18. சுராதி³க³ணபரிதீ³பன

இதோ பரம் பவக்கா²மி, பசுரத்த²ஹிதக்கரம்;

சுராதி³கக³ணனாமம், நாமதோ அட்ட²மம் க³ணம்.

சுர தே²ய்யே. தே²னனம் தே²ய்யம், சோரிகாதி வுத்தம் ஹோதி. தஸ்மிம் தே²ய்யே சுரத்⁴து வத்ததி. சோரேதி, சோரயதி, சோரோ, சோரீ, சோரிகா, சோரேது, சோரயிதும், சோரேத்வா, சோரயித்வா. கத்துத்தே²ஸு ணேணயதா சுராதி³க³ணலக்க²ணம். காரிதே – சோராபேதி, சோராபயதி, சோராபேதும், சோராபயிதும், சோராபேத்வா, சோராபயித்வா. கம்மேத⁴னம் சோரேஹி சோரியதி, சோரிதம் த⁴னம். ஏஸ நயோ ஸப்³ப³த்த².

ககாரந்ததா⁴து

லோக த³ஸ்ஸனே. லோகேதி, லோகயதி, ஓலோகேதி, ஓலோகயதி, உல்லோகேதி, உல்லோகயதி, அபலோகேதி, அபலோகயதி, ஆலோகேதி, ஆலோகயதி, விலோகேதி, விலோகயதி. லோகோ, ஆலோகோ, லோகனம், ஓலோகனம், உல்லோகனம், ஆலோகனம், விலோகனம், அபலோகனம், அவலோகனம். ஓலோகேதும், ஓலோகயிதும், ஓலோகேத்வா, ஓலோகயித்வா. காரிதே பன ‘‘ஓலோகாபேதி, ஓலோகாபயதி, ஓலோகாபேதும், ஓலோகாபயிதும், ஓலோகாபேத்வா, ஓலோகாபயித்வா’’ இச்சேவமாதீ³னி யோஜேதப்³பா³னி. ஏஸ நயோ ஸப்³ப³த்தா²பி.

தத்த² லோகோதி தயோ லோகா ஸங்கா²ரலோகோ ஸத்தலோகோ ஓகாஸலோகோதி. தத்த² ‘‘ஏகோ லோகோ ஸப்³பே³ ஸத்தா ஆஹாரட்டி²திகா’’தி ஆக³தட்டா²னே ஸங்கா²ரலோகோ வேதி³தப்³போ³. ‘‘ஸஸ்ஸதோ லோகோ’தி வா ‘அஸஸ்ஸதோ லோகோ’தி வா’’தி ஆக³தட்டா²னே ஸத்தலோகோ.

‘‘யாவதா சந்தி³மஸூரியா பரிஹரந்தி,

தி³ஸா ப⁴ந்தி விரோசமானா;

தாவ ஸஹஸ்ஸதா⁴ லோகோ,

ஏத்த² தே வத்ததே வஸோ’’தி

ஆக³தட்டா²னே ஓகாஸலோகோ.

அத² வா லோகோதி திவிதோ⁴ லோகோ கிலேஸலோகோ ப⁴வலோகோ இந்த்³ரியலோகோதி. தத்த² ராகா³தி³கிலேஸப³ஹுலதாய காமாவசரஸத்தா கிலேஸலோகோ. ஜா²னாபி⁴ஞ்ஞாபரிபு³த்³தி⁴யா ரூபாவசரஸத்தா ப⁴வலோகோ. ஆனேஞ்ஜஸமாதி⁴ப³ஹுலதாய விஸதி³ந்த்³ரியத்தா அரூபாவசரஸத்தா இந்த்³ரியலோகோ. அத² வா கிலிஸ்ஸனம் கிலேஸோ, விபாகது³க்க²ந்தி அத்தோ². தஸ்மா து³க்க²ப³ஹுலதாய அபாயேஸு ஸத்தா கிலேஸலோகோ. தத³ஞ்ஞே ஸத்தா ஸம்பத்திப⁴வபா⁴வதோ ப⁴வலோகோ. தத்த² யே விமுத்திபரிபாசகேஹி இந்த்³ரியேஹி ஸமன்னாக³தா ஸத்தா, ஸோ இந்த்³ரியலோகோதி வேதி³தப்³ப³ம்.

ஜாதகட்ட²கதா²யம் பன –

‘‘ஸங்கா²ரலோகோ ஸத்தலோகோ ஓகாஸலோகோ க²ந்த⁴லோகோ ஆயதனலோகோ தா⁴துலோகோதி அனேகவிதோ⁴ லோகோ. ஏத்த² ‘ஏகோ லோகோ ஸப்³பே³ ஸத்தா ஆஹாரட்டி²திகா…பே… அட்டா²ரஸ லோகா அட்டா²ரஸ தா⁴துயோ’தி ஏத்த² ஸங்கா²ரலோகோ வுத்தோ. க²ந்த⁴லோகாத³யோ தத³ந்தோக³தா⁴யேவ. ‘அயம் லோகோ பரோ லோகோ ப்³ரஹ்மலோகோ ஸதே³வகோ’திஆதீ³ஸு பன ஸத்தலோகோ வுத்தோ. ‘யாவதா சந்தி³மஸூரியா பரிஹரந்தி, தி³ஸா ப⁴ந்தி விரோசமானா. தாவ ஸஹஸ்ஸதா⁴ லோகோ, ஏத்த² தேவத்ததே வஸோ’தி ஏத்த² ஓகாஸலோகோ வுத்தோ’’தி வுத்தம்.

அத்த²தோ பன இந்த்³ரியப³த்³தா⁴னம் க²ந்தா⁴னம் ஸமூஹோ ஸந்தானோ ச ஸத்தலோகோ, ரூபாதீ³ஸு ஸத்தவிஸத்ததாய ஸத்தோ, லோகியதி ஏத்த² குஸலாகுஸலம் தப்³பி³பாகோ சாதி. அனிந்த்³ரியப³த்³தா⁴னம் ரூபானம் ஸமூஹோ ஸந்தானோ ச ஓகாஸலோகோ, லோகியந்தி ஏத்த² தஸா தா²வரா ச, தேஸஞ்ச ஓகாஸபூ⁴தோதி, ததா³தா⁴ரணதாய ஹேஸ ‘‘பா⁴ஜனலோகோ’’திபி வுச்சதி. து³விதோ⁴பி சேஸ ரூபாதி³த⁴ம்மே உபாதா³ய பஞ்ஞத்தத்தா உபாதா³பஞ்ஞத்திபூ⁴தோ அபரமத்த²ஸபா⁴வோ ஸப்பச்சயே பன ரூபாரூபத⁴ம்மே உபாதா³ய பஞ்ஞத்தத்தா தது³ப⁴யஸ்ஸாபி உபாதா³னானம் வஸேன பரியாயதோ பச்சயாயத்தவுத்திதா உபசரிதப்³பா³, தது³ப⁴யே க²ந்தா⁴ ஸங்கா²ரலோகோ, பச்சயேஹி ஸங்க²ரியந்தி, லுஜ்ஜந்தி பலுஜ்ஜந்தி சாதி ஏத்த² பச்சயாயத்தவுத்திதாய மக்³க³ப²லத⁴ம்மானம்பி ஸதிபி லுஜ்ஜனபலுஜ்ஜனத்தே தேபூ⁴மிகத⁴ம்மானம்யேவ ‘‘லோகோ’’தி அதி⁴ப்பேதத்தா நத்தி² லோகதாபஜ்ஜனம். ததா² ஹி தே ‘‘லோகுத்தரா’’தி வுத்தா.

ஆலோகோதி ரஸ்மி, ஆலோகேந்தி ஏதேன பு⁴ஸோ பஸ்ஸந்தி ஜனா சக்கு²விஞ்ஞாணம் வாதி ஆலோகோ. ஓலோகனந்தி ஹேட்டா² பேக்க²னம். விலோகனந்தி உத்³த⁴ம் பேக்க²னம். ஆலோகனந்தி புரதோ பேக்க²னம். விலோகனந்தி த்³வீஸு பஸ்ஸேஸு பேக்க²னம், விவிதா⁴ வா பேக்க²னம். அபலோகனந்தி ‘‘ஸங்க⁴ம் அபலோகேத்வா’’திஆதீ³ஸு விய ஜானாபனம். அவலோகனந்தி ‘‘நாகா³வலோகிதம் அவலோகேத்வா’’திஆதீ³ஸு விய புரிமகாயம் பரிவத்தேத்வா பேக்க²னம். ‘‘ஆலோகிதே விலோகிதே ஸம்பஜானகாரீ ஹோதீ’’தி ஏத்தா²பி பா⁴வவஸேன ஆலோகனம் ஆலோகிதம் விலோகனம் விலோகிதந்தி அத்தோ² க³ஹேதப்³போ³.

த²க படிகா⁴தே. த²கேதி, த²கயதி த்³வாரம் புரிஸோ.

தக்க விதக்கே. தக்கேதி, விதக்கேதி, விதக்கயதி. தக்கோ, விதக்கோ, விதக்கிதா.

தத்த² தக்கனம் தக்கோ, ஊஹனந்தி வுத்தம் ஹோதி, ஏவம் விதக்கோ. அத² வா விதக்கேந்தி ஏதேன, ஸயம் வா விதக்கேதி, விதக்கனமத்தமேவ வா ஏதந்தி விதக்கோ. ‘‘தக்கோ, விதக்கோ, அப்பனா, ப்³யப்பனா, சேதஸோ அபி⁴னிரோபனா’’தி அபி⁴த⁴ம்மே பரியாயஸத்³தா³ வுத்தா. விதக்கேதீதி விதக்கிதா, புக்³க³லோ. ‘‘அவிதக்கிதா மச்சுமுபப்³ப³ஜந்தீ’’தி பாளி.

அகி லக்க²ணே. லக்க²ணம் ஸஞ்ஞாணம், ஸஞ்ஜானனகாரணந்தி வுத்தம் ஹோதி. அத்ரித³ம் ஸல்லக்கி²தப்³ப³ம். யே இமஸ்மிம் சுராதி³க³ணே அனேகஸ்ஸரா அஸம்யோக³ந்தா இகாரானுப³ந்த⁴வஸேன நித்³தி³ட்டா² தா⁴தவோ, தே ஏவம்வுத்தேஹி இமேஹி தீஹி லக்க²ணேஹி ஸமன்னாக³தா ஆக்²யாதத்தம் நாமிகத்தஞ்ச பாபுணந்தா ஏகந்ததோ நிக்³க³ஹீதாக³மேன நிப்ப²ன்னரூபாயேவ ப⁴வந்தி, ந கத்த²சிபி விக³தனிக்³க³ஹீதாக³மரூபானி ப⁴வந்தி. அங்கேதி, அங்கயதி. அங்கனம், அங்கோ. ஸமாஸே பன ‘‘ஸஸங்கோ, சக்கங்கிதசரணோ’’திஆதீ³னி ரூபானி ப⁴வந்தி.

ஸக்க வக்க பா⁴ஸனே. ஸக்கேதி, ஸக்கயதி. வக்கேதி, வக்கயதி.

நக்க வக்க நாஸனே. நக்கேதி, நக்கயதி. வக்கேதி, வக்கயதி.

சக்க சுக்க ப்³யத²னே. சக்கேதி, சக்கயதி. சுக்கேதி, சுக்கயதி. சக்கம். சக்கந்தி கேனட்டே²ன சக்கம்? சக்கேதி ப்³யத²தி ஹிம்ஸதீதி அத்தே²ன சக்கம். சக்கஸத்³தோ³ –

ஸம்பத்தியம் லக்க²ணே ச, ரத²ங்கே³ இரியாபதே²;

தா³னே ரத்னத⁴ம்மகு²ர-சக்காதீ³ஸு பதி³ஸ்ஸதி;

‘‘சத்தாரிமானி பி⁴க்க²வே சக்கானி யேஹி ஸமன்னாக³தானம் தே³வமனுஸ்ஸான’’ந்திஆதீ³ஸு ஹி அயம் ஸம்பத்தியம் தி³ஸ்ஸதி. ‘‘பாத³தலேஸு சக்கானி ஜாதானீ’’தி ஏத்த² லக்க²ணே. ‘‘சக்கம்வ வஹதோ பத³’’ந்தி ஏத்த² ரத²ங்கே³. ‘‘சதுசக்கம் நவத்³வார’’ந்தி ஏத்த² இரியாபதே². ‘‘த³த³ பு⁴ஞ்ஜ ச மா சப்பமாதோ³, சக்கம் வத்தஸ்ஸு பாணின’’ந்தி ஏத்த² தா³னே. ‘‘தி³ப்³ப³ம் சக்கரதனம் பாதுரஹோஸீ’’தி ஏத்த² ரதனசக்கே. ‘‘மயா பவத்திதம் சக்க’’ந்தி ஏத்த² த⁴ம்மசக்கே. ‘‘இச்சா²ஹதஸ்ஸ போஸஸ்ஸ, சக்கம் ப⁴மதி மத்த²கே’’தி ஏத்த² கு²ரசக்கே. ‘‘கு²ரபரியந்தேன சேபி சக்கேனா’’தி ஏத்த² பஹரணசக்கே. ‘‘அஸனிவிசக்க’’ந்தி ஏத்த² அஸனிமண்ட³லேதி.

தகி ப³ந்த⁴னே. தங்கேதி, தங்கயதி.

அக்க த²வனே. த²வனம் து²தி. அக்கேதி, அக்கயதி. அக்கோ. அக்கோதி ஸூரியோ. ஸோ ஹி மஹாஜுதிதாய அக்கியதி அபி⁴த்த²வியதி தப்பஸன்னேஹி ஜனேஹீதி அக்கோ. ததா² ஹி தஸ்ஸ ‘‘நத்தி² ஸூரியஸமா ஆபா⁴. உதே³தயம் சக்கு²மா ஏகராஜா’’திஆதி³னா அபி⁴க்கு²தி தி³ஸ்ஸதி.

ஹிக்க ஹிம்ஸாயம். ஹிக்கேதி, ஹிக்கயதி.

நிக்க பரிமாணே. நிக்கேதி, நிக்கயதி.

பு³க்க ப⁴ஸ்ஸனே. ஏத்த² ஸுனக²ப⁴ஸ்ஸனம் ப⁴ஸ்ஸனந்தி க³ஹேதப்³ப³ம், ந வாசாஸங்கா²தம் ப⁴ஸ்ஸனம். பு³க்கேதி, பு³க்கயதி. ஏத்த² ச ‘‘பு³க்கயதி ஸா சோரே’’ இதி லோகியப்பயோகோ³ வேதி³தப்³போ³. பூ⁴வாதி³க³ணே பன ‘‘பு³க்கதி ஸா’’தி ரூபம் ப⁴வதி. அஞ்ஞோ து ‘‘பு³க்க பரிபா⁴ஸனே’’ இதி பட²தி, ஏவம் பட²ந்தேபி ஸுனக²ப⁴ஸ்ஸனமேவாதி⁴ப்பேதம்.

த³க லக அஸ்ஸாத³னே. த³கேதி, த³கயதி. லகேதி, லகயதி.

தக்க லோக பா⁴ஸாயம். தக்கேதி, தக்கயதி. லோகேதி, லோகயதி.

சிக ஸிக ஆமஸனே. சிகேதி, சிகயதி. ஸிகேதி, ஸிகயதி.

ககாரந்ததா⁴துரூபானி.

க²காரந்ததா⁴து

லக்க² த³ஸ்ஸனங்கேஸு. த³ஸ்ஸனம் பஸ்ஸனம். அங்கோ லஞ்ஜனம். லக்கே²தி, லக்க²யதி. ஸல்லக்கே²தி, ஸல்லக்க²யதி. லக்க²ம் விஜ்ஜ²தி உஸுனா, லக்க²ம் கரோதி.

க³ங்கா³ய வாலுகா கீ²யே, உத³கம் கீ²யே மஹண்ணவே;

மஹியா மத்திகா கீ²யே, லக்கே² ந மம பு³த்³தி⁴யா.

கப்பலக்க²ணம். கோ³லக்க²ணம். இத்தி²லக்க²ணம். த⁴ம்மானம் லக்க²ணம். ஸல்லக்க²னா. உபலக்க²னா. பச்சுபலக்க²னா. லக்க²தா⁴துயா யுபச்சயந்தாய ஸமாதி³புப்³பா³னம் ரூபானம் நகாரோ த³ந்தஜோ.

ப⁴க்க² அத³னே. ப⁴க்கே²தி, ப⁴க்க²யதி. ப⁴க்கோ² நோ லத்³தோ⁴. ப⁴க்க²யந்தி மிகா³த⁴மா. பூ⁴வாதி³க³ணே பன ‘‘ப⁴க்க²தீ’’தி ரூபம்.

நக்க² ஸம்ப³ந்தே⁴. நக்கே²தி, நக்க²யதி.

மக்க² மக்க²னே. மக்கே²தி, மக்க²யதி. மக்கோ², மக்கீ². தத்த² மக்கோ²தி பரேஹி கதகு³ணம் மக்கே²தி பிஸதீதி மக்கோ², கு³ணத⁴ம்ஸனா. ‘‘மக்க²ம் அஸஹமானோ’’தி ஏத்த² பன அத்தனி பரேஹி கதம் அவமஞ்ஞனம் மக்கோ²தி வுச்சதி.

யக்க² பூஜாயம். யக்கே²தி, யக்க²யதி. யக்கோ². யக்கோ²தி மஹானுபா⁴வோ ஸத்தோ. ததா² ஹி ‘‘புச்சா²மி தம் மஹாயக்க², ஸப்³ப³பூ⁴தானமிஸ்ஸரா’’தி ஏத்த² ஸக்கோ தே³வராஜா ‘‘யக்கோ²’’தி வுத்தோ. அத² வா யக்கோ²தி யக்க²யோனியம் நிப்³ப³த்தஸத்தோ. ஸப்³பே³பி வா ஸத்தா ‘‘யக்கா²’’தி வுச்சந்தி. ‘‘பரமயக்க²விஸுத்³தி⁴ம் பஞ்ஞாபேந்தீ’’தி ஏத்த² ஹி யக்க²ஸத்³தோ³ ஸத்தே வத்ததி. ததா² ஹி யக்கோ²பி ஸத்தோபி தே³வோபி ஸக்கோபி கீ²ணாஸவோபி யக்கோ²யேவ நாம, மஹானுபா⁴வதாய யக்கி²யதி ஸரணக³தேஹி ஜனேஹி நானாபச்சயேஹி நானாப³லீஹி ச பூஜியதீதி யக்கோ².

ஸத்தே தே³வே ச ஸக்கே ச, கீ²ணாஸவே ச ரக்க²ஸே;

பஞ்சஸ்வேதேஸு அத்தே²ஸு, யக்க²ஸத்³தோ³ பவத்ததி.

லக்க² ஆலோசனே. லக்கே²தி, லக்க²யதி. லக்க²ம் விஜ்ஜ²தி உஸுனா.

மோக்க² ஆஸனே. மோக்கே²தி, மோக்க²யதி.

ருக்க² பா²ருஸ்ஸே. பா²ருஸ்ஸம் ப²ருஸபா⁴வோ. ருக்கே²தி, ருக்க²யதி. ஸமாஸே ‘‘ருக்க²கேஸோ, அதிருக்க²வசனோ’’தி ரூபானி. ஏத்த² ச ‘‘ஸமணோ அயம் பாபோ அதிருக்க²வாசோ’’தி பாளி நித³ஸ்ஸனம். தத்த² அதிருக்க²வாசோதி அதிப²ருஸவசனோதி அத்தோ².

க²காரந்ததா⁴துரூபானி.

க³காரந்ததா⁴து

லிங்க³ சித்தீகரணே. சித்தீகரணம் விசித்ரபா⁴வகரணம். லிங்கே³தி, லிங்க³யதி, லிங்க³ம். ஏத்த² லிங்க³ம் நாம தீ³க⁴ரஸ்ஸகிஸதூ²லபரிமண்ட³லாதி³பே⁴த³ம் ஸண்டா²னந்தி க³ஹணே அதீவ யுஜ்ஜதி. தஞ்ஹி நானப்பகாரேஹி விசித்ரம் ஹோதி, லிங்கீ³யதி விசித்தம் கரியதி அவிஜ்ஜாதண்ஹாகம்மேஹி உதுனா வா சுண்ணாதீ³ஹி வா ஸரீரமிதி லிங்க³ம், அஜ்ஜ²த்தஸந்தானதிணருக்கா²தி³குண்ட³லகரண்ட³காதீ³ஸு பவத்தஸண்டா²னவஸேனேதம் த³ட்ட²ப்³ப³ம். லிங்க³ஸத்³தோ³ ஸத்³தே³ ஸத்³த³ப்பவத்தினிமித்தே இத்தி²ப்³யஞ்ஜனே புரிஸப்³யஞ்ஜனே ஸஞ்ஞாணே ஆகாரே சாதி இமேஸு அத்தே²ஸு தி³ஸ்ஸதி. அயஞ்ஹி ‘‘ருக்கோ²தி வசனம் லிங்க³’’ந்தி ஏத்த² ஸத்³தே³ தி³ஸ்ஸதி. ‘‘ஸதலிங்க³ஸ்ஸ அத்த²ஸ்ஸா’’தி ஏத்த² ஸத்³த³ப்பவத்தினிமித்தே. ‘‘தேன கோ² பன ஸமயேன அஞ்ஞதரஸ்ஸ பி⁴க்கு²னோ இத்தி²லிங்க³ம் பாதுப⁴வதீ’’தி ஏத்த² இத்தி²ப்³யஞ்ஜனே. ‘‘புரிஸலிங்க³னிமித்தகுத்தாகப்பான’’ந்தி ஏத்த² புரிஸப்³யஞ்ஜனே. ‘‘தேன லிங்கே³ன ஜானாம, து⁴வம் பு³த்³தோ⁴ ப⁴விஸ்ஸதீ’’தி ஏத்த² ஸஞ்ஞாணே. ‘‘தேஹி லிங்கே³ஹி தேஹி நிமித்தேஹி தேஹி ஆகாரேஹி ஆக³ந்துகபா⁴வோ ஜானிதப்³போ³ ‘‘ஆக³ந்துகா இமே’’தி ஏத்த² ஆகாரே தி³ஸ்ஸதி.

ஸத்³தே³ ச தன்னிமித்தே ச, காடகோடசிகாய ச;

லக்க²ணே சேவ ஆகாரே, லிங்க³ஸத்³தோ³ பவத்ததி.

மக³ அன்வேஸனே. மகே³தி, மக³யதி. மிகோ³, மகோ³, மகோ³, மக³யமானோ.

ஏத்த² ச ‘‘யதா² பி³ளாரோ மூஸிகம் மக³யமானோ’’தி பாளி நித³ஸ்ஸனம். ‘‘மிகோ³’’தி ச ‘‘மகோ³’’தி ச சதுப்பதோ³ பவுச்சதி. ஏத்த² மிகோ³தி மக³யதி இதோ சிதோ கோ³சரம் அன்வேஸதி பரியேஸதீதி மிகோ³. ஏவம் மகோ³. ஏத்த² விஸேஸதோ ஹரிண மிகோ³ மிகோ³ நாம. ஸாமஞ்ஞதோ பன அவஸேஸாபி சதுப்பதா³ ‘‘மிகோ³’’ இச்சேவ வுச்சந்தி. ததா² ஹி ஸுஸீமஜாதகே ‘‘காளா மிகா³ ஸேதத³ந்தா தவ இமே, பரோஸஹஸ்ஸம் ஹேமஜாலாபி⁴ஸஞ்ச²ன்னா’’தி ஏதஸ்மிம் பாளிப்பதே³ஸே ஹத்தி²னோபி மிக³ஸத்³தே³ன வுத்தா ‘‘காளமிகா³’’தி. அத² வா மகி³யதி ஜீவிதகப்பனத்தா²ய மம்ஸாதீ³ஹி அத்தி²கேஹி லுத்³தே³ஹி அன்வேஸியதி பரியேஸியதீதி மிகோ³, அரஞ்ஞஜாதா ஸஸபஸத³ஹரிணேணேய்யாத³யோ சதுப்பாதா³, ஏவம் மகோ³. ‘‘அத்த²ம் ந லப⁴தே மகோ³’’தி ஏத்த² பன மகோ³ வியாதி மகோ³, பா³லோதி அத்தோ².

மக்³க³ க³வேஸனே. மக்³கே³தி, மக்³க³யதி. மக்³கோ³, மக்³க³னம்.

ஏத்த² ச மக்³கோ³தி படிபதா³ய ச பகதிமக்³க³ஸ்ஸ ச உபாயஸ்ஸ ச அதி⁴வசனம். ‘‘மஹாவிஹாரவாஸீனம், வாசனாமக்³க³னிஸ்ஸித’’ந்திஆதீ³ஸு பன கதா²பப³ந்தோ⁴பி ‘‘மக்³கோ³’’தி வுச்சதி. தத்ர படிபதா³ ஏகந்ததோ ஜாதிஜராப்³யாதி⁴து³க்கா²தீ³ஹி பீளிதேஹி ஸத்தேஹி து³க்க²க்க²யம் நிப்³பா³னம் பாபுணத்தா²ய மக்³கி³தப்³போ³ க³வேஸிதப்³போ³தி மக்³கோ³. பகதிமக்³கோ³ பன மக்³க³மூள்ஹேஹி மக்³கி³தப்³போ³தி மக்³கோ³. பகதிமக்³க³மூள்ஹேஹி ச படிபதா³ஸங்கா²தாரியமக்³க³மூள்ஹா ஏவ ப³ஹவோ ஸந்தி. பகதிமக்³கோ³ ஹி கதா³சி ஏவ அத்³தி⁴கானம் முய்ஹதி, ‘‘ஏஸ மக்³கோ³’’தி நாயகா ந து³ல்லபா⁴. அரியமக்³கோ³ பன ஸப்³ப³தா³யேவ ஸப்³ப³லோகஸ்ஸ முய்ஹதி, நாயகா பரமது³ல்லபா⁴. தஸ்மா ஸோ ஏவ அவிஜ்ஜாஸம்மூள்ஹேஹி மக்³கி³தப்³போ³தி மக்³கோ³. அஞ்ஞேஸம் பன த்³வின்னம் தா⁴தூனம் வஸேனபி அத்த²ம் வத³ந்தி க³ரூ ‘‘கிலேஸே மாரேந்தோ க³ச்ச²தீதி மக்³கோ³’’தி. தம் தம் கிச்சம் ஹிதம் வா நிப்பா²தே³துகாமேஹி மக்³கி³யதி க³வேஸியதீதி மக்³கோ³, உபாயோ. மக்³க³ஸத்³தோ³ ஹி ‘‘அபி⁴த⁴ம்மகதா²மக்³க³ம், தே³வானம் ஸம்பவத்தயீ’’தி ஏத்த² உபாயேபி வத்ததி. ததா² ஹி அபி⁴த⁴ம்மடீகாயம் ‘‘மக்³கோ³தி உபாயோ, க²ந்தா⁴யதனாதீ³னம் குஸலாதீ³னஞ்ச த⁴ம்மானம் அவபோ³த⁴ஸ்ஸ ஸச்சப்படிவேத⁴ஸ்ஸேவ வா உபாயபா⁴வதோ அபி⁴த⁴ம்மகதா²மக்³கோ³’’தி வுத்தோ, பப³ந்தோ⁴ வா ‘‘மக்³கோ³’’தி வுச்சதி. ஸோ ஹி தீ³க⁴த்தா மக்³கோ³ வியாதி மக்³கோ³, தஸ்மா அபி⁴த⁴ம்மகதா²பப³ந்தோ⁴ அபி⁴த⁴ம்மகதா²மக்³கோ³தி வுத்தோ. இதா³னி பகதிபடிபதா³மக்³கா³னம் நாமானி கத²யாம. தேஸு பகதிமக்³க³ஸ்ஸ –

‘‘மக்³கோ³ பந்தோ² பதோ² பஜ்ஜோ, அஞ்ஜ²ஸம் வடுமா’யனம்;

அத்³தா⁴ன’மத்³தா⁴ பத³வீ, வத்தனி சேவ ஸந்ததீ’’தி

இமானி நாமானி. படிபதா³மக்³க³ஸ்ஸ பன –

‘‘மக்³கோ³ பந்தோ² பதோ² பஜ்ஜோ, அஞ்ஜஸம் வடுமா’யனம்;

நாவ உத்தர ஸேது ச, குல்லோ ச பி⁴ஸி ஸங்கமோ’’தி

அனேகானி நாமானி. ஏத்த² பன கேசி ‘‘நாவாதிஆதீ³னி பகதிமக்³க³ஸ்ஸ நாமானீ’’தி வத³ந்தி, தம் ந க³ஹேதப்³ப³ம், பகதிமக்³க³ஸ்ஸ கிஸ்மிஞ்சிபி பாளிப்பதே³ஸே ‘‘நாவா’’திஆதீ³ஹி பதே³ஹி வுத்தட்டா²னாபா⁴வதோ, அபி⁴தா⁴னஸத்தே²ஸு ச ‘‘நாவா’’ இச்சாதி³கானம் தத³பி⁴தா⁴னானம் அனாக³தத்தா.

அயம் பனேத்த² வசனத்தோ² – நாவாவியாதி நாவா, உத்தரந்தி ஏதேனாதி உத்தரம், நாவாயேவ உத்தரந்தி. அயஞ்ஹி நாவாபரியாயோ ‘‘தரம், தரணம், போதோ, ப்லவோ’’தி. இமேபி தம்பரியாயாயேவ. உத்தரம் வியாதி உத்தரம். ஸேது வியாதி ஸேது. குல்லோ வியாதி குல்லோ. பி⁴ஸி வியாதி பி⁴ஸி. ஸங்கமோ விய, ஸங்கமந்தி வா ஏதேனாதி ஸங்கமோ, ஸப்³ப³மேதம் அரியமக்³க³ஸ்ஸேவ நாமம், ந பகதிமக்³க³ஸ்ஸ. ததா² ஹி ‘‘த⁴ம்மனாவம் ஸமாரூய்ஹ, ஸந்தாரேஸ்ஸம் ஸதே³வக’’ந்தி ச, ‘‘த⁴ம்மஸேதும் த³ள்ஹம் கத்வா, நிப்³பு³தோ ஸோ நராஸபோ⁴’’தி ச, ‘‘குல்லோ’தி கோ² பி⁴க்க²வே அரியமக்³க³ஸ்ஸேதம் அதி⁴வசன’’ந்தி ச ஏவமாதி³னா தத்த² தத்த² ப⁴க³வதா அரியமக்³கோ³ ‘‘நாவா’’திஆதீ³ஹி அனேகேஹி நாமேஹி வுத்தோ. அட்ட²கதா²சரியேஹிபி ஸுத்தனிபாதட்ட²கதா²யம் ‘‘ப³த்³தா⁴ பி⁴ஸி ஸுஸங்க²தா ப⁴க³வா’’தி ஏதஸ்மிம் பதே³ஸே ஏவம் அத்த²ஸம்வண்ணனா கதா ‘‘பி⁴ஸீதி பத்த²ரித்வா புது²லம் கத்வா ப³த்³தா⁴ ‘குல்லா’தி வுச்சதி லோகே, அரியஸ்ஸ வினயே பன அரியமக்³கோ³’தி.

‘மக்³கோ³ பஜ்ஜோ பதோ² பந்தோ², அஞ்ஜஸம் வடுமா’யனம்;

நாவா உத்தர ஸேது ச, குல்லோ ச பி⁴ஸி ஸங்கமோ;

அத்³தா⁴னம் பப⁴வோ’ச்சேவ, தத்த² தத்த² பகாஸிதோ’’தி.

ஏவம் ஆசரியேஹி கதாய அத்த²ஸம்வண்ணனாய த³ஸ்ஸனதோ ச ‘‘நாவாதிஆதீ³னிபி பகதிமக்³க³ஸ்ஸ நாமானீ’’தி வசனம் ந க³ஹேதப்³ப³ம், யதா²வுத்தமேவ வசனம் க³ஹேதப்³ப³ம்.

கோசி பனேத்த² ஏவம் வதே³ய்ய ‘‘த⁴ம்மஸேதும் த³ள்ஹம் கத்வா’தி ஏத்த² ‘த⁴ம்மஸேதுந்தி மக்³க³ஸேது’ந்தி வசனதோ த⁴ம்மஸத்³தோ³ மக்³கே³ வத்ததி, ந ஸேதுஸத்³தோ³’’தி. தன்ன, த⁴ம்மஸத்³தோ³ விய ஸேதுஸத்³தோ³பி மக்³கே³ வத்ததீதி ஸேது வியாதி ஸேது, த⁴ம்மோ ஏவ ஸேது த⁴ம்மஸேதூதி அத்த²வஸேன, ஏஸ நயோ அஞ்ஞத்ராபி. அபரம்பி வதே³ய்ய ‘‘நனு ப்³ரஹ்மஜாலஸுத்தந்தட்ட²கதா²யம் ‘த³க்கி²ணுத்தரேன போ³தி⁴மண்ட³ம் பவிஸித்வா அஸ்ஸத்த²து³மராஜானம் பத³க்கி²ணம் கத்வா புப்³பு³த்தரபா⁴கே³ டி²தோ’தி இமஸ்மிம் டா²னே த³க்கி²ணுத்தரஸத்³தே³ன த³க்கி²ணோ மக்³கோ³ வுத்தோ’’தி. ந, அனேகேஸு பாளிப்பதே³ஸேஸு அட்ட²கதா²பதே³ஸேஸு ச அபி⁴தா⁴னஸத்தே²ஸு ச மக்³க³வாசகஸ்ஸ உத்தரஸத்³த³ஸ்ஸ அனாக³தத்தா, தஸ்மா தத்த² ஏவமத்தோ² த³ட்ட²ப்³போ³ ‘‘த³க்கி²ணதி³ஸதோ க³ந்தப்³போ³ உத்தரதி³ஸாபா⁴கோ³ த³க்கி²ணுத்தரோதி வுச்சதி, ஏவம்பூ⁴தேன த³க்கி²ணுத்தரேன போ³தி⁴மண்ட³பவிஸனம் ஸந்தா⁴ய த³க்கி²ணுத்தரேன போ³தி⁴மண்ட³ம் பவிஸித்வாதி வுத்த’’ந்தி. அத² வா த³க்கி²ணுத்தரேனாதி த³க்கி²ணபச்சி²முத்தரேன, ஏத்த² ஆதி³அவஸானக்³க³ஹணேன மஜ்ஜ²ஸ்ஸபி க³ஹணம் த³ட்ட²ப்³ப³ம். ஏவம் க³ஹணம்யேவ ஹி யம் ஜாதகனிதா³னே வுத்தம் ‘‘போ³தி⁴ஸத்தோ திணம் க³ஹேத்வா போ³தி⁴மண்ட³ம் ஆரூய்ஹ த³க்கி²ணதி³ஸாபா⁴கே³ உத்தராபி⁴முகோ² அட்டா²ஸி, தஸ்மிம் க²ணே த³க்கி²ணசக்கவாளம் ஓஸீதி³த்வா ஹேட்டா² அவீசிஸம்பத்தம் விய அஹோஸி, உத்தரசக்கவாளம் உல்லங்கி⁴த்வா உபரி ப⁴வக்³க³ப்பத்தம் விய அஹோஸி, போ³தி⁴ஸத்தோ இத³ம் ஸம்போ³தி⁴பாபுணட்டா²னம் ந ப⁴வதி மஞ்ஞேதி பத³க்கி²ணம் கரோந்தோ பச்சி²மதி³ஸாபா⁴க³ம் க³ந்த்வா புரத்தா²பி⁴முகோ² அட்டா²ஸீ’’திஆதி³, தேன ஸமேதி. அதா²பி வதே³ய்ய ‘‘யதி³ உத்தரஸத்³தோ³ தி³ஸாவாசகோ, ஏவஞ்ச ஸதி ‘‘த³க்கி²ணுத்தரேனா’’தி ஏனயோக³ம் அவத்வா ‘‘த³க்கி²ணுத்தராயா’’தி ஆயயோகோ³ வத்தப்³போ³’’தி. தன்ன, தி³ஸாவாசகஸ்ஸபி ஸத்³த³ஸ்ஸ ‘‘உத்தரேன நதீ³ ஸீதா, க³ம்பீ⁴ரா து³ரதிக்கமா’’தி ஏனயோக³வஸேன வசனதோ. அபிச தி³ஸாபா⁴க³ம் ஸந்தா⁴ய ‘‘த³க்கி²ணுத்தரேனா’’தி வசனம் வுத்தம். தி³ஸாபா⁴கோ³ ஹி தி³ஸா ஏவாதி நிட்ட²மேத்தா²வக³ந்தப்³ப³ம்.

க³காரந்ததா⁴துரூபானி.

க⁴காரந்ததா⁴து

லிகி⁴ பா⁴ஸனே. லங்கே⁴தி, லங்க⁴யதி. ஏதானி பு³த்³த⁴வசனே அப்பஸித்³தா⁴னிபி லோகிகப்பயோக³த³ஸ்ஸனவஸேன ஆக³தானி. ஸாஸனஸ்மிஞ்ஹி பூ⁴வாதி³க³ணசுராதி³க³ணபரியாபன்னஸ்ஸ க³த்யத்த²வாசகஉல்லங்க⁴னத்த²பரிதீ³பகஸ்ஸ தா⁴துஸ்ஸ ரூபம் அதீவ பஸித்³த⁴ம்.

லங்க⁴ லங்க⁴னே. லங்கே⁴தி, லங்க⁴யதி.

‘‘அதிகர’மகரா’சரிய, மய்ஹம்பேதம் ந ருச்சதி;

சதுத்தே² லங்க⁴யித்வான, பஞ்சமியம்பி ஆவுதோ’’தி

இமஸ்மிம் ஸத்திலங்க⁴னஜாதகே சுராதி³க³ணபரியாபன்னஸ்ஸ க³த்யத்த²வாசகஸ்ஸ உல்லங்க⁴னத்த²பரிதீ³பகஸ்ஸ லங்க⁴தா⁴துஸ்ஸ ‘‘லங்க⁴யித்வா, லங்க⁴யித்வானா’’தி ரூபே தி³ட்டே²யேவ ‘‘லங்கே⁴தி, லங்க⁴யதீ’’தி ரூபானி தி³ட்டா²னி ஏவ ஹோந்தி. பா⁴ஸத்த²வாசகஸ்ஸ பன ததா²ரூபானி ரூபானி ந தி³ட்டா²னி, ஏவம் ஸந்தேபி புப்³பா³சரியேஹி தீ³க⁴த³ஸ்ஸீஹி அபி⁴மதத்தா பா⁴ஸத்த²வாசிகாபி லங்க⁴தா⁴து அத்தீ²தி க³ஹேதப்³பா³, ஏவம் ஸப்³பே³ஸுபி பூ⁴வாதி³க³ணாதீ³ஸு ஸாஸனே அப்பஸித்³தா⁴னம்பி ரூபானம் ஸாஸனானுகூலானம் க³ஹணம் வேதி³தப்³ப³ம், அனனுகூலானஞ்ச அப்பஸித்³தா⁴னம் ச²ட்³ட³னம்.

அக⁴ பாபகரணே. அகே⁴தி, அக⁴யதி. அக⁴ம், அகோ⁴, அனகோ⁴.

தத்த² அக⁴ந்தி து³க்க²ம். ‘‘அக⁴ந்தம் படிஸேவிஸ்ஸம். வனே வாளமிகா³கிண்ணே. க²க்³க³தீ³பினிஸேவிதே’’தி இத³ம் நித³ஸ்ஸனம். அகோ⁴தி கிலேஸோ. தேன அகே⁴ன அரஹா அனகோ⁴. தத்த² அக⁴யந்தி பாபம் கரோந்தி ஸத்தா ஏதேனாதி அக⁴ம், கிந்தம்? து³க்க²ம், ஏவம் அகோ⁴. நனு ச ஸப்புரிஸா து³க்க²ஹேதுபி கிலேஸஹேதுபி ச அத்தனோ ஸுக²த்தா²ய பாபம் ந கரோந்தி. ததா² ஹி –

‘‘ந பண்டி³தா அத்தஸுக²ஸ்ஸ ஹேது,

பாபானி கம்மானி ஸமாசரந்தி;

து³க்கே²ன பு²ட்டா² க²லிதாபி ஸந்தா,

ச²ந்தா³ ச தோ³ஸா ந ஜஹந்தி த⁴ம்ம’’ந்தி

வுத்தம். ஏவம் ஸந்தே கஸ்மா ‘‘அக⁴ பாபகரணே’’தி தா⁴து ச ‘‘அக⁴யந்தி பாபம் கரோந்தி ஸத்தா ஏதேனாதி அக⁴’’ந்திஆதி³வசனஞ்ச வுத்தந்தி? ஸச்சம், யேபு⁴ய்யேன பன ஸத்தா து³க்கா²தி³ஹேது பாபகம்மம் கரோந்தி, ஏதேஸு ஸப்புரிஸா ஏவ ந கரோந்தி, இதரே கரோந்தி. ஏவம் பாபகரணஸ்ஸ ஹி து³க்க²ம் கிலேஸோ ச ஹேது. ததா² ஹி –

ஸுகீ²பி ஹேகே ந கரோந்தி பாபம்,

அவண்ணஸம்ஸக்³க³ப⁴யா புனேகே;

பஹூ ஸமானோ விபுலத்த²சிந்தீ,

கிம்காரணா மே ந கரோஸி து³க்க²’’ந்தி

வுத்தம். அயஞ்ஹி கா³தா² து³க்க²ஹேதுபி ஸத்தா பாபம் கரோந்தீதி ஏதமத்த²ம் தீ³பேதி. ‘‘குத்³தோ⁴ ஹி பிதரம் ஹந்தி, குத்³தோ⁴ ஹந்தி ஸமாதர’’ந்தி அயம் பன கிலேஸஹேதுபி பாபம் கரோந்தீதி ஏதமத்த²ம் தீ³பேதி, தஸ்மா அம்ஹேஹி ‘‘அக⁴ பாபகரணே’’திஆதி³வசனம் வுத்தம்.

க⁴காரந்ததா⁴துரூபானி.

சகாரந்ததா⁴து

லோச த³ஸ்ஸனே. லோசேதி, லோசயதி. லோசனம். ரூபாரம்மணம் லோசயதி பஸ்ஸதீதி லோசனம், சக்கு².

கிசி மத்³த³னே. கிஞ்சேதி, கிஞ்சயதி. கிஞ்சனம், அகிஞ்சனோ.

தத்த² கிஞ்சனந்தி பலிபோ³தோ⁴. கிஞ்சேதி ஸத்தே மத்³த³தீதி கிஞ்சனம். கிஞ்சனஸத்³தோ³ மத்³த³னத்தே² வத்ததி. மனுஸ்ஸா ஹி வீஹிம் மத்³த³ந்தா கோ³ணம் ‘‘கிஞ்சேஹி காபில, கிஞ்சேஹி காபிலா’’தி வத³ந்தி.

பசி வித்தா²ரே. பஞ்சேதி, பஞ்சயதி. பபஞ்சேதி, பபஞ்சயதி. பபஞ்சா.

ஏத்த² பபஞ்சாதி தண்ஹாமானதி³ட்டி²யோ. ஏதா ஹி அத்தனிஸ்ஸிதானம் ஸத்தானம் ஸம்ஸாரம் பபஞ்சேந்தி வித்தி²ன்னம் கரோந்தீதி பபஞ்சாதி வுச்சந்தி. அத² வா பபஞ்சேந்தி யத்த² ஸயம் உப்பன்னா தம்ஸந்தானம் வித்தா²ரேந்தி சிரம் ட²பேந்தீதி பபஞ்சா. லோகியா பன ‘‘அம்ஹாகம் தும்ஹேஹி ஸத்³தி⁴ம் கதே²ந்தானம் பபஞ்சோ ஹோதீ’’திஆதீ³னி வத³ந்தா காலஸ்ஸ சிரபா⁴வம் பபஞ்சோதி வத³ந்தி, ஸாஸனே பன த்³வயம்பி லப்³ப⁴தி.

ஸிச்ச குட்³ட³னே. ஸிச்சேதி, ஸிச்சயதி.

வஞ்சு பலம்ப⁴னே. பலம்ப⁴னம் உபலாபனம். வஞ்சேதி, வஞ்சயதி. வஞ்சகோ, வஞ்சனம். பூ⁴வாதி³க³ணே பன வஞ்சதா⁴து க³த்யத்தே² வத்ததி. ‘‘ஸந்தி பாதா³ அவஞ்சனா’’தி ஹி பாளி

சச்ச அஜ்ஜ²யனே. சச்சேதி, சச்சயதி.

சு சவனே. சாவேதி, சாவயதி. அஞ்ஞோ ‘‘சு ஸஹனே’’ இதி ப்³ருதே. சாவேதி, சாவயதி, ஸஹதீதி அத்தோ².

அஞ்சு விஸேஸனே. அஞ்சேதி, அஞ்சயதி.

லோச பா⁴ஸாயம். லோசேதி, லோசயதி. லோசனம், லோசயதி ஸமவிஸமம் ஆசிக்க²ந்தம் விய ப⁴வதீதி லோசனம், சக்கு².

ரச பதியதனே. ரசேதி, ரசயதி. ரசனா, விரசிதம், கேஸரசனா, கா³தா²ரசனா.

ஸூச பேஸுஞ்ஞே. பிஸுணபா⁴வோ பேஸுஞ்ஞம். ஸூசேதி, ஸூசயதி. ஸூசகோ.

பச்ச ஸம்யமனே. பச்சேதி, பச்சயதி.

ரிச வியோஜனஸம்பஜ்ஜனேஸு. ரேசேதி, ரேசயதி. ஸேட்டி²புத்தம் விரேசேய்ய. விரேசேதி, விரேசயதி. விரேசகோ, விரேசனம்.

வச பா⁴ஸனே. வசேதி, வசயதி. பூ⁴வாதி³க³ணேபி அயம் வத்ததி. ததா³ தஸ்ஸா ‘‘வத்தி, வசதி, அவோச, அவோசு’’ந்திஆதீ³னி ரூபானி ப⁴வந்தி. காரிதே பன ‘‘அந்தேவாஸிகம் த⁴ம்மம் வாசேதி, வாசயதீ’’தி ரூபானி. வத்தும், வத்தவே, வத்வா, வுத்தம், வுச்சதி.

அச்ச பூஜாயம். அச்சேதி, அச்சயதி. ப்³ரஹ்மாஸுரஸுரச்சிதோ.

ஸூச க³ந்த⁴னே. ஸுசேதி, ஸூசயதி. ஸூசகோ, ஸுத்தம்.

ஏத்த² ச அத்தத்த²பரத்தா²தி³பே⁴தே³ அத்தே² ஸூசேதீதி ஸுத்தம். தேபிடகம் பு³த்³த⁴வசனம்.

கச தி³த்தியம். கச்சேதி, கச்சயதி. கச்சோ.

ஏத்த² கச்சோதி ரூபஸம்பத்தியா கச்சேதி தி³ப்³ப³தி விரோசதீதி கச்சோ, ஏவம்னாமகோ ஆதி³புரிஸோ, தப்³ப³ம்ஸே ஜாதா புரிஸா ‘‘கச்சானா’’திபி ‘‘கச்சாயனா’’திபி ‘‘காதியானா’’திபி வுச்சந்தி, இத்தி²யோ பன ‘‘கச்சானீ’’திபி ‘‘கச்சாயனீ’’திபி ‘‘காதியானீ’’திபி வுச்சந்தி.

சகாரந்ததா⁴துரூபானி.

ச²காரந்ததா⁴து

மிலேச² அப்³யத்தாயம் வாசாயம். மிலேச்சே²தி, மிலேச்ச²யதி. மிலக்கு².

ஏத்த² மிலக்கூ²தி மிலேச்சே²தி அப்³யத்தவாசம் பா⁴ஸதீதி மிலக்கு².

குச்ச² அவக்கே²பே. அவக்கே²போ அதோ⁴கி²பனம். குச்சே²தி, குச்ச²யதி.

விச்ச² பா⁴ஸாயம். விச்சே²தி, விச்ச²யதி.

ச²காரந்ததா⁴துரூபானி.

ஜகாரந்ததா⁴து

வஜ்ஜ வஜ்ஜனே. வஜ்ஜேதி, வஜ்ஜயதி. பரிவஜ்ஜனகோ. வஜ்ஜிதோ ஸீலவந்தேஹி, கத²ம் பி⁴க்கு² கரிஸ்ஸஸீதி.

துஜ்ஜ ப³லபாலனேஸு. துஜ்ஜேதி, துஜ்ஜயதி.

துஜி பிஜி ஹிம்ஸாப³லதா³னனிகேதனேஸு. நிகேதனம் நிவாஸோ. துஞ்ஜேதி, துஞ்ஜயதி. பிஞ்ஜேதி. பிஞ்ஜயதி.

க²ஜி கிச்ச²ஜீவனே. க²ஞ்ஜேதி, க²ஞ்ஜயதி. க²ஞ்ஜோ.

க²ஜி ரக்க²ணே. தாதி³ஸானியேவ ரூபானி. பூ⁴வாதி³க³ணே ‘‘க²ஜி க³திவேகல்லேதி இமிஸ்ஸா ‘‘க²ஞ்ஜதீ’’தி ரூபம்.

பூஜ பூஜாயம். பூஜேதி, பூஜயதி. பூஜா. ஏஸாவ பூஜனா ஸேய்யோ. பூஜகோ, பூஜிதோ, பூஜனீயோ, பூஜனேய்யோ, பூஜேதப்³போ³, புஜ்ஜோ.

க³ஜ மத்³த³னஸத்³தே³ஸு. க³ஜேதி, க³ஜயதி. க³ஜோ.

திஜ நிஸானே. தேஜேதி, தேஜயதி.

வஜ மக்³க³னஸங்கா²ரேஸு. வஜேதி, வஜயதி.

தஜ்ஜ ஸந்தஜ்ஜனே. தஜ்ஜேதி, தஜ்ஜயதி. ஸந்தஜ்ஜேதி, ஸந்தஜ்ஜயதி. ஸந்தஜ்ஜிதோ.

அஜ்ஜ படிஸஜ்ஜனே. அஜ்ஜேதி, அஜ்ஜயதி.

ஸஜ்ஜ ஸஜ்ஜனே. ஸஜ்ஜேதி, ஸஜ்ஜயதி தா³னம். க³மனஸஜ்ஜோ ஹுத்வா.

ப⁴ஜ விஸ்ஸாஸே. ப⁴ஜேதி, ப⁴ஜயதி. பூ⁴வாதி³க³ணே பன ‘‘ப⁴ஜதீ’’தி ரூபம், ப⁴த்தி, ஸம்ப⁴த்தி.

துஜி பிஜி லுஜி ப⁴ஜி பா⁴ஸாயம். துஞ்ஜேதி, துஞ்ஜயதி. பிஞ்ஜேதி, பிஞ்ஜயதி. லுஞ்ஜேதி, லுஞ்ஜயதி. ப⁴ஞ்ஜேதி, ப⁴ஞ்ஜயதி. கதே²தீதி அத்தோ².

ருஜ ஹிம்ஸாயம். ரோஜேதி, ரோஜயதி. ரோகோ³.

பா⁴ஜ புத²கம்மனி. புத²கம்மம் புத²க்கரணம், விஸும் க்ரியாதி அத்தோ². பா⁴ஜேதி, பா⁴ஜயதி. விபா⁴ஜேதி, விபா⁴ஜயதி. விப⁴த்தி.

ஸபா⁴ஜ ஸீதிஸேவனேஸு. ஸபா⁴ஜேதி, ஸபா⁴ஜயதி.

லஜ பகாஸனே. லஜேதி, லஜயதி. லாஜா.

யுஜ ஸம்யமனே. ஸம்புப்³போ³ ப³ந்த⁴னே. யோஜேதி, யோஜயதி. ஸம்யோஜேதி, ஸம்யோஜயதி. ஸம்யோஜனம்.

மஜ்ஜ ஸோசேய்யாலங்காரேஸு. மஜ்ஜேதி, மஜ்ஜயதி. ஸம்மஜ்ஜேதி, ஸம்மஜ்ஜயதி. ஸம்மஜ்ஜா.

பா⁴ஜ பா⁴ஜனதா³னேஸு. பா⁴ஜேதி, பா⁴ஜயதி. கத²ம் வேஸ்ஸந்தரோ புத்தோ, க³ஜம் பா⁴ஜேதி ஸஞ்சய.

ஜகாரந்ததா⁴துரூபானி.

ஜ²ஞந்தா அப்பஸித்³தா⁴. ஸத்³த³ஸத்தே² பன ‘‘ஞா நியோஜனே’’தி பட²ந்தி, ரூபம் பன பு³த்³த⁴வசனானுகூலம் ந ப⁴வதி, தஸ்மா ந த³ஸ்ஸிதம் அம்ஹேஹி.

டகாரந்ததா⁴து

க⁴ட்ட க⁴ட்டனே. க⁴ட்டனம் வாயாமகரணம். க⁴ட்டேதி, க⁴ட்டயதி. ஏத்த² து ‘‘க⁴ட்டேஸி, க⁴ட்டேஸி, கிம்காரணா க⁴ட்டேஸி, அஹம் தம் ஜானாமீ’’தி நித³ஸ்ஸனம்.

க⁴ட ஸங்கா⁴தே. புப்³பே³ விய க்ரியாபதா³னி, நாமிகத்தே ‘‘க⁴டோ, க⁴டா’’தி ரூபானி. ஏத்த² க³டோதி பானீயக⁴டோ. க⁴டாதி ஸமூஹோ ‘‘மச்ச²க⁴டா’’திஆதீ³ஸு விய.

க⁴ட்ட சலனே. க⁴ட்டேதி, க⁴ட்டயதி.

நட அவஸந்த³னே. அவஸந்த³னம் க³த்தவிக்கே²போ. நடேதி, நடயதி.

சுட சு²ட குட்ட சே²த³னே. சுடேதி, சுடயதி. சு²டேதி, சு²டயதி. குட்டேதி, குட்டயதி.