17. சோரஸஹாயஸ்ஸ வத்து²ம்ஹி அயமானுபுப்³பீ³கதா²

அம்ஹாகம் ப⁴க³வதி பரினிப்³பு³தே ஜம்பு³தீ³பே தே³வத³ஹனக³ரே ஏகோ மனுஸ்ஸோ து³க்கி²தோ தத்த² தத்த² விசரந்தோ பச்சந்தே அஞ்ஞதரம் கா³மம் க³ந்த்வா தத்த² ஏகஸ்மிம் குலகே³ஹே நிவாஸம் கப்பேஸி. தத்த² மனுஸ்ஸா தஸ்ஸ யாகு³ப⁴த்தம் த³த்வா போஸேஸும், ததோ ஸோ தத்த² மனுஸ்ஸேஹி மித்தஸந்த²வம் கத்வா கதிபாஹம் தத்த² வஸித்வா அஞ்ஞட்டா²னம் க³ந்த்வா அபரபா⁴கே³ சோரகம்மம் கரோந்தோ ஜீவிகம் கப்பேதி. அதே²கதி³வஸம் சோரேந்தம் தம் ராஜபுரிஸா க³ஹேத்வா ரஞ்ஞோ த³ஸ்ஸேஸும். ராஜா தம் ப³ந்த⁴னாகா³ரே கரோதா²தி ஆணாபேஸி, தே தம் ப³ந்த⁴னாகா³ரம் நேத்வா ஸங்க²லிகாஹி ப³ந்தி⁴த்வா ஆரக்க²கானம் படிபாதே³த்வா அக³மம்ஸு, ப³ந்த⁴னாகா³ரே வஸந்தஸ்ஸ தஸ்ஸ த்³வாத³ஸஸம்வச்ச²ரானி அதிக்கந்தானி. ததோ அபரபா⁴கே³ தஸ்ஸ புப்³ப³ஸஹாயோ பச்சந்தகா³மவாஸீ மனுஸ்ஸோ கேனசி கம்மேன தே³வத³ஹ மாக³தோ தத்த² தத்த² ஆஹிண்ட³ந்தோ ப³ந்த⁴னாகா³ரே ப³த்³த⁴ம் தம் அத்³த³ஸ. தி³ஸ்வா தஸ்ஸ ஹத³யம் கம்பி, ஸோ ரோதி³த்வா பரிதே³வித்வா கிம் தே மயா கத்தப்³ப³ம் ஸம்மாதி புச்சி². ததோ தேன ஸம்ம ப³ந்த⁴னாகா³ரே வஸந்தஸ்ஸ மே இதா³னி த்³வாத³ஸஸம்வச்ச²ரானி அதிக்கந்தானி, ஏத்தகம் காலம் து³ப்³போ⁴ஜனாதி³னா மஹாது³க்க²ம் அனுபோ⁴மி. யாவாஹம் ஆஹாரம் பரியேஸித்வா பு⁴ஞ்ஜித்வா ஆக³மிஸ்ஸாமி. தாவ மம் இதோ முஞ்சனுபாயம் ஜானாஹீதி வுத்தே ஸோ ஸப்புரிஸோ.

1. ரூபேன கிந்து கு³ணஸீலவிவஜ்ஜிதேன,

மிச்சா²லயஸ்ஸ கிதவஸ்ஸ தி⁴யா கிமத்த²ம்;

தா³னா தி³சாக³விக³தேன த⁴னேன கிம் வா;

மித்தேன கிம் ப்³யஸனகாலபரம்முகே²னாதி.

ஏவஞ்ச பன வத்வா ஸாது⁴ ஸம்ம கரோமி தே வசனந்தி ஆரக்க²கானம் ஸந்திகம் க³ந்த்வா போ⁴ந்தோ யாவேஸோ ப⁴த்தம் பு⁴ஞ்ஜித்வா ஆக³ச்ச²தி. தாவாஹம் தஸ்ஸ பாடிபோ⁴கோ³ ப⁴விஸ்ஸாமி. விஸ்ஸஜ்ஜேத² நந்தி ஆஹ, தேஹி ந ஸக்கா போ⁴ ஏதம் விஸ்ஸஜ்ஜேதும், அபி ச கோ² யாவாயம் ஆக³ச்ச²தி. தாவ த்வம் அயஸங்க²லிகாய ப³த்³தோ⁴ நிஸீதி³ஸ்ஸஸி, ஏவம் தம் விஸ்ஸஜ்ஜேஸ்ஸாம, நோ சே ந ஸக்காதி ஆஹம்ஸு, ஸோ ஏவம்பி ஹோது ஸம்மாதி வத்வா தஸ்ஸ பாத³தோ ஸங்க²லிகம் முஞ்சித்வா அத்தனோ பாதே³ கத்வா ப³ந்த⁴னாகா³ரம் பவிஸித்வா இதரம் முஞ்சாபேஸி. ஸோபி அஸப்புரிஸோ ப³ந்த⁴னா முத்தோ ந புன தம் டா²ன மக³மாஸி, அஹோ அகதஞ்ஞுனோ பகதிம் ஞாதும் பா⁴ரியம். யதா²ஹ.

2. வாரிபூரே யதா² ஸோப்³பே⁴, நேவந்தோ விஸமம் ஸமம்;

பஞ்ஞாயதேவம்ஸாது⁴ஸ்ஸ, பா⁴வம் மனஸி ஸம்ப⁴வம்.

3. பா⁴ஸந்தி முக²தோ ஏகம், சிந்தேந்தி மனஸா பரம்;

காயேனேகம் கரோந்தேவம், பகதாயமஸாது⁴னம்.

4. தேஸம் யோ பா⁴வமஞ்ஞாஸி, ஸோவ பண்டி³தஜாதிகோ;

ப³ஹுஸ்ஸுதோபி ஸோயேவ, பரசித்தவிதூ³பி ஸோ.

அத²ஸ்ஸ ப³ந்த⁴னாகா³ரே வஸந்தஸ்ஸ த்³வாத³ஸஸம்வச்ச²ரானி அதிக்கந்தானி. ஏத்தகம் காலம் ஜிக⁴ச்சா²பீளிதேன தேன ஆஹாரத்தாய பரோ ந யாசிதபுப்³போ³, அனுச்சி²ட்டா²ஹாரம் லப⁴னதி³வஸதோ அலப⁴னதி³வஸாயேவ ப³ஹுதரா ஹோந்தி, அத² த்³வாத³ஸஸம்வச்ச²ராதிக்கமே ரஞ்ஞோ புத்தோ நிப்³ப³த்தி. ததா³ ராஜா அத்தனோ விஜிதே ஸப்³ப³ப³ந்த⁴னாகா³ரானி விவராபேஸி. அந்தமஸோ மிக³பக்கி²னோபி ப³ந்த⁴னா முஞ்சாபேஸி. த்³வாரே விவடமத்தேயேவ ப³ந்த⁴னாகா³ரே மனுஸ்ஸா இச்சி²திச்சி²தட்டா²னம் அக³மம்ஸு. ஸோ பனேகோவ தேஹி ஸத்³தி⁴ம் அக³ந்த்வா ஓஹீயி. ஆரக்க²கேஹி த்வம் போ⁴ கஸ்மா ந க³ச்ச²ஸீதி வுத்தே அஹம் போ⁴ பஞ்ஞாதபா⁴வேன இதா³னி ந க³மிஸ்ஸாமி. அதீவ பரிஹீனக³த்தோஸ்மி. அந்த⁴காரே க³மிஸ்ஸாமீதி வத்வா அந்த⁴காரே ஆக³தே நிக்க²ம்ம அந்தோனக³ரே விஸ்ஸாஸிகானம் அபா⁴வேன குதோ ஆஹாரம் லபி⁴ஸ்ஸாமீதி சிந்தேந்தோ நிக்க²ம்ம ரத்தந்த⁴காரே ஆமகஸுஸான மக³மாஸி. ஏத்தா²ஹாரம் லபி⁴ஸ்ஸாமீதி. தத்த² ஸோ அது⁴னா நிக்கி²த்தமதமனுஸ்ஸம் தி³ஸ்வா மனுஸ்ஸட்டி²னா மம்ஸம் சி²ந்தி³த்வா ஸீஸகபாலே பக்கி²பித்வா தீஹி மனுஸ்ஸஸீஸேஹி கதஉத்³த⁴னே ட²பேத்வா சிதகதோ ஓமுக்கஅலாதேஹி அக்³கி³ம் கத்வா ஸுஸானம் நிப்³பா³பனத்தா²யா ப⁴தஉத³கேன மனுஸ்ஸட்டி²னா ஆலோலேந்தோ மம்ஸம் பசித்வா ஓதாரேத்வா ஸாகா²ப⁴ங்கே³ன ஹிரிகோபீணம் படிச்சா²தே³த்வா நிவத்த²பிலோகிகம் வாதாவரணம் கத்வானிஸீதி³. தஸ்மிம் க²ணே தத்த² பிப்பலீருக்கே² அதி⁴வத்தா² தே³வதா தஸ்ஸ தம் கிரியம் தி³ஸ்வா புச்சி²ஸ்ஸாமி தாவ நந்தி தம் உபஸங்கமித்வா ஏவமாஹ. போ⁴ த்வம் க⁴னதரதிமிராகுலே மஹாரத்தியம் தத்த² தத்த² விகிண்ணனரட்டி²ஸமாகிண்ணே ஸோணஸிகா³லாதி³குணபாத³காகுலே மனுஸ்ஸமம்ஸப⁴க்க²யக்க²ரக்க²ஸாகுலே தத்த² தத்த² பஜ்ஜலந்தானேகசிதகப⁴யானகே ஸுஸானே மனுஸ்ஸமம்ஸம் பசித்வா கிம்கரோஸீதி புச்ச²ந்தீ ஆஹ.

5. ரத்தந்த⁴காரே குணபாத³கேஹி,

ஸமாகுலே ஸீவதி²காய மஜ்ஜே²;

மனுஸ்ஸமம்ஸம் பசஸீ த⁴ ஸீஸே,

வதே³ஹி கிம் தேன பயோஜனம் தேதி.

அத² ஸோ ஆஹ.

6. ந யாக³ஹேது ந ச தா³னஹேது,

ஸுஸானமஜ்ஜ²ம்ஹி பசாமி மம்ஸம்;

கு²தா³ஸமம் நத்தி² நரஸ்ஸ அஞ்ஞம்,

கு²தா³வினாஸாய பசாமிமம்போ⁴தி.

ததோ தே³வதா தம் ததா² ஹோது, இமினா பிலோதிகேன வாதாவரணம் கரோஸி. கிமத்த²மேதந்தி புச்ச²ந்தீ.

7. நிவத்த²ஸாகோ² ஹிரிஸம்வராய,

பிலோதிகம் தத்த² பஸாரயந்தோ;

கரோஸி வாதாவரணஞ்ச ஸம்ம,

கிமத்த²மேதம் வத³ புச்சி²தோ மேதி.

ஸோ தஸ்ஸா சிக்க²ந்தோ ஆஹ.

8. ஸுபா⁴ ஸுபா⁴மிஸ்ஸிதஸீதவாதோ,

ஸயம் அசித்தோவ அசித்தபா⁴வா;

தே³ஹம் பு²ஸித்வான அஸாது⁴கஸ்ஸ,

அகதஞ்ஞுனோ மித்தபத⁴ம்ஸகஸ்ஸ.

9. ஸமாவஹந்தோ யதி³ மே ஸரீரே,

பு²ஸாதி [பு²ஸாதிஸாஸங்க³திமஜ்ஜதா³னி இதிகத்தசி] தம் வாயு மமா விஸித்வா;

து³க்க²ம் த³தா³தீதி விஸம்வ தம் போ⁴,

பரிவஜ்ஜிதும் ப³த்³த⁴மிமம் குசேலந்தி.

தே³வதா ஆஹ.

10. கி மகாஸி போ⁴ ஸோ கதனாஸகோ தே,

த⁴னஞ்ச த⁴ஞ்ஞம் தவ நாஸயீ ச;

மாதா பிதா ப³ந்த⁴வோ கே²த்த வத்தூ²,

வினாஸிதா தேன வதே³ஹி கிம் தேதி.

ததோ ஸோ ஆஹ.

11. யம் ராஜதோ ஹோதி ப⁴யம் மஹந்தம்,

ஸப்³ப³ஸ்ஸ ஹரணாதி³வதா⁴தி³கஞ்ச;

அகதஞ்ஞுனா ஸப்புரிஸேன ஹோதி,

ஆராவ ஸோ போ⁴ பரிவஜ்ஜனீயோ.

12. யமத்தி² சோராரிப⁴யஞ்ஹி லோகே,

அதோ² த³கேனாபி ச பாவகேன;

அகதஞ்ஞுனா தம் ஸகலம்பி ஹோதி,

ஆராவ ஸோ போ⁴ பரிவஜ்ஜனீயோ.

13. பாணாதிபாதம்பி அதி³ன்னதா³னம்,

பரஸ்ஸ தா³ரூபக³மம் முஸா ச;

மஜ்ஜஸ்ஸ பானம் கலஹஞ்ச பேஸுனம்,

ஸம்ப²ம் கி³ரம் து⁴த்தஜனேஹி [அக்க²து⁴த்தாதி³யோக³ம் இதிகத்த²சி] யோக³ம்.

14. ஸப்³ப³ம் அனத்த²ம் அஸிவம் அனிட்ட²ம்,

அபாயிகம் [அபாயிகம் இதிகத்த²சி] து³க்க²மனந்த மஞ்ஞம்;

அகதஞ்ஞுனா ஸப்புரிஸேன ஹோதி;

ஆராவ ஸோ போ⁴ பரிவஜ்ஜனீயோதி.

வத்வா அத்தனா அஸப்புரிஸஸம்ஸக்³கே³னானுபூ⁴தம் ஸப்³ப³ம் து³க்க²ம் கதே²ஸி, ததோ தே³வதா அஹம்பி போ⁴ ஸத்து²னோ மங்க³லஸுத்ததே³ஸனாதி³வஸே இமஸ்மிம்யேவ ருக்கே² நிஸின்னோ.

அஸேவனா ச பா³லானம், பண்டி³தானஞ்ச ஸேவனா;

பூஜா ச பூஜனீய்யானம், ஏதம் மங்க³ல முத்தமந்தி.

கா³தா²ய பா³லஸ்ஸ தோ³ஸே அஸ்ஸோஸிம்தி வத்வா தஸ்ஸ பஸன்னோ தம் அத்தனோ விமானம் நேத்வா நஹாபேத்வா தி³ப்³ப³வத்தா²லங்காரேஹி அலங்கரித்வா தி³ப்³ப³ன்னபானம் த³த்வா மஹந்தம் ஸக்காரஸம்மானம் கத்வா அத்தனோ ஆனுபா⁴வேன தஸ்மிம் நக³ரே ரஜ்ஜே அபி⁴ஸிஞ்சாபேஸி. ஸோ தத்த² ரஜ்ஜம் கரோந்தோ தா³னாதீ³னி புஞ்ஞானி கத்வா ஆயுபரியோஸானே யதா²கம்மம் க³தோதி.

15. ஏவம் அஸாது⁴ஜனஸங்க³மஸன்னிவாஸம்,

ஸஞ்சஜ்ஜ ஸாது⁴ஸுசிஸஜ்ஜனஸங்க³மேன;

தா³னாதி³ நேககுஸலம் பரிபூரயந்தா,

ஸக்³கா³ பவக்³க³விப⁴வம் அபி⁴ஸம்பு⁴னாதா²தி.

சோரஸஹாயஸ்ஸ வத்து²ம் ஸத்தமம்.