9. ச²த்துபாஹனவக்³க³, 12. த்³வாத³ஸம ஸிக்கா²புச்சா²

புச்சா² – அனோகாஸகதம் ஆவுஸோ பி⁴க்கு²ம் பஞ்ஹம் புச்ச²ந்தியா பாசித்தியம் கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலா பி⁴க்கு²னியோ ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கு²னியோ அனோகாஸகதம் பி⁴க்கு²ம் பஞ்ஹம் புச்சி²ம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஸப்பிம் வா ஆவுஸோ தேலம் வா மது⁴ம் வா பா²ணிதம் வா மச்ச²ம் வா மம்ஸம் வா கீ²ரம் வா த³தி⁴ம் வா விஞ்ஞாபேத்வா பு⁴ஞ்ஜந்தியா பாடிதே³ஸனீயம் கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யா பி⁴க்கு²னியோ ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கு²னியோ ஸப்பிம்பி தேலம்பி மது⁴ம்பி பா²ணிதம்பி மச்ச²ம்பி மம்ஸம்பி கீ²ரம்பி த³தி⁴ம்பி விஞ்ஞாபேத்வா பு⁴ஞ்ஜிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – சதுன்னம் ஆவுஸோ விபத்தீனம் கதமா விபத்தி.

விஸ்ஸஜ்ஜனா – ஆசாரவிபத்தி ப⁴ந்தே.

புச்சா² – ச²ன்னம் ஆவுஸோ ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தி.

விஸ்ஸஜ்ஜனா – சதூஹி ப⁴ந்தே ஸமுட்டா²னேஹி ஸமுட்டா²தி, ஸியா காயதோ ஸமுட்டா²தி, நவாசதோ நசித்ததோ, ஸியா காயதோ ச வாசதோ ச ஸமுட்டா²தி, நசித்ததோ, ஸியா காயதோ ச சித்ததோ ச ஸமுட்டா²தி, நவாசதோ, ஸியா காயதோ ச வாசதோ ச சித்ததோ ச ஸமுட்டா²தி, இமேஹி ப⁴ந்தே சதூஹி ஸமுட்டா²னேஹி ஸமுட்டா²தி.

புச்சா² – கா ஆவுஸோ விபத்தி.

விஸ்ஸஜ்ஜனா – அஸம்வரோ ப⁴ந்தே விபத்தி.

புச்சா² – கா ஆவுஸோ ஸம்பத்தி.

விஸ்ஸஜ்ஜனா – ஸம்வரோ ப⁴ந்தே ஸம்பத்தி.

புச்சா² – கா ஆவுஸோ படிபத்தி.

விஸ்ஸஜ்ஜனா – ந ஏவரூபம் கரிஸ்ஸாமீதி யாவஜீவம் ஆபாணகோடிகம் ஸமாதா³ய ஸிக்க²தி ஸிக்கா²பதே³ஸு, அயம் ப⁴ந்தே படிபத்தி.

புச்சா² – கஸ்ஸ ஆவுஸோ வசனம்.

விஸ்ஸஜ்ஜனா – ப⁴க³வதோ ப⁴ந்தே வசனம் அரஹதோ ஸம்மாஸம்பு³த்³த⁴ஸ்ஸ.

புச்சா² – கேனாவுஸோ ஆப⁴தம்.

விஸ்ஸஜ்ஜனா – பரம்பராய ப⁴ந்தே ஆப⁴தம்.

ஸுணாது மே ப⁴ந்தே ஸங்கோ⁴…பே… ஸம்கா³யேய்யாம.