1. ஸுக்கவிஸ்ஸட்டி²ஸங்கா⁴தி³ஸேஸ ஸிக்கா²புச்சா²

புச்சா² – யம் தேன ஆவுஸோ ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ கத்த² பஞ்ஞத்தோ.

விஸ்ஸஜ்ஜனா – ஸாவத்தி²யம் ப⁴ந்தே பஞ்ஞத்தோ.

புச்சா² – கம் ஆவுஸோ ஆரப்³ப⁴ பஞ்ஞத்தோ.

விஸ்ஸஜ்ஜனா – ஆயஸ்மந்தம் ப⁴ந்தே ஸேய்யஸகம் ஆரப்³ப⁴ பஞ்ஞத்தோ.

புச்சா² – கிஸ்மிம் ஆவுஸோ வத்து²ஸ்மிம் பஞ்ஞத்தோ.

விஸ்ஸஜ்ஜனா – ஆயஸ்மா ப⁴ந்தே ஸேய்யஸகோ ஹத்தே²ன உபக்கமித்வா அஸுசிம் மோசேஸி, தஸ்மிம் ப⁴ந்தே வத்து²ஸ்மிம் பஞ்ஞத்தோ.

புச்சா² – அத்தி² ஆவுஸோ தத்த² பஞ்ஞத்தி அனுபஞ்ஞத்தி அனுப்பன்னபஞ்ஞத்தி.

விஸ்ஸஜ்ஜனா – ஏகா ப⁴ந்தே பஞ்ஞத்தி, ஏகா அனுபஞ்ஞத்தி, அனுப்பன்னபஞ்ஞத்தி தஸ்மிம் நத்தி².

புச்சா² – கதமா ஆவுஸோ தத்த² மூலபஞ்ஞத்தி.

விஸ்ஸஜ்ஜனா – ஸஞ்சேதனிகா ஸுக்கவிஸ்ஸட்டி² ஸங்கா⁴தி³ஸேஸோதி அயம் ப⁴ந்தே தத்த² மூலபஞ்ஞத்தி.

புச்சா² – கதமா பனாவுஸோ தத்த² அனுபஞ்ஞத்தி.

விஸ்ஸஜ்ஜனா – அஞ்ஞத்ர ஸுபினந்தாதி அயம் ப⁴ந்தே தத்த² அனுபஞ்ஞத்தி.

புச்சா² – கதமா பனாவுஸோ தத்த² பரிபுண்ணபஞ்ஞத்தி.

விஸ்ஸஜ்ஜனா – ஸஞ்சேதனிகா ஸுக்கவிஸ்ஸட்டி² அஞ்ஞத்ரஸுபினந்தா ஸங்கா⁴தி³ஸோதி அயம் ப⁴ந்தே தத்த² பரிபுண்ணபஞ்ஞத்தி.

புச்சா² – ஸாதா⁴ரண பஞ்ஞத்தினுகோ² ஆவுஸோ அஸாதா⁴ரண பஞ்ஞத்தினுகோ².

விஸ்ஸஜ்ஜனா – அஸாதா⁴ரணபஞ்ஞத்தி ப⁴ந்தே.

புச்சா² – தத்த² ஆவுஸோ உபக்கமித்வா அஸுசிம் மோசேந்தோ கதி ஆபத்தியோ ஆபஜ்ஜதி.

விஸ்ஸஜ்ஜனா – உபக்கமித்வா ப⁴ந்தே அஸுசிம் மோசேந்தோ திஸ்ஸோ ஆபத்தியோ ஆபஜ்ஜதி, சேதேதி உபக்கமதி முச்சதி ஆபத்தி

ஸங்கா⁴தி³ஸேஸஸ்ஸ, சேதேதி உபக்கமதி ந முச்சதி ஆபத்தி து²ல்லச்சயஸ்ஸ, பயோகே³ து³க்கடம்.

புச்சா² – கேஸம் ஆவுஸோ அனாபத்தி.

விஸ்ஸஜ்ஜனா – ச²ன்னம் ப⁴ந்தே அனாபத்தி ஸுபினந்தேன மோசேந்தஸ்ஸ ந மோசனாதி⁴ப்பாயஸ்ஸ உம்மத்தகஸ்ஸ கி²த்தசித்தஸ்ஸ வேத³னாட்டஸ்ஸ ஆதி³கம்மிகஸ்ஸ இமேஸம் கோ² ப⁴ந்தே ச²ன்னம் அனாபத்தி.

புச்சா² – பஞ்சன்னம் ஆவுஸோ பாதிமோக்கு²த்³தே³ஸானம் கதமேன உத்³தே³ஸேன உத்³தே³ஸம் ஆக³ச்ச²தி.

விஸ்ஸஜ்ஜனா – பஞ்சன்னம் ப⁴ந்தே பாதிமோக்கு²த்³தே³ஸானம் ததியேன உத்³தே³ஸேன உத்³தே³ஸம் ஆக³ச்ச²தி.

புச்சா² – சதுன்னம் ஆவுஸோ விபத்தீனம் கதமா விபத்தி.

விஸ்ஸஜ்ஜனா – சதுன்னம் ப⁴ந்தே விபத்தீனம் ஸீலவிபத்தி.

புச்சா² – கா ஆவுஸோ விபத்தி.

விஸ்ஸஜ்ஜனா – அஸம்வரோ ப⁴ந்தே விபத்தி.

புச்சா² – கா ஆவுஸோ ஸம்பத்தி.

விஸ்ஸஜ்ஜனா – ஸம்வரோ ப⁴ந்தே ஸம்பத்தி.

புச்சா² – கா ஆவுஸோ படிபத்தி.

விஸ்ஸஜ்ஜனா – ந ஏவ ரூபம் கரிஸ்ஸாமீதி யாவஜீவம் ஆபாணகோடிகம் ஸமாதா³ய ஸிக்க²தி ஸிக்கா²பதே³ஸு அயம் ப⁴ந்தே படிபத்தி.

புச்சா² – கதி ஆவுஸோ அத்த²வஸே படிச்ச ப⁴க³வதா உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ பஞ்ஞத்தோ.

விஸ்ஸஜ்ஜனா – த³ஸ ப⁴ந்தே அத்த²வஸே படிச்ச ப⁴க³வதா உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ பஞ்ஞத்தோ ஸங்க⁴ஸுட்டு²தாய…பே… வினயானுக்³க³ஹாய.

புச்சா² – கத்த² ஆவுஸோ டி²தம்.

விஸ்ஸஜ்ஜனா – ஸிக்கா²காமேஸு ப⁴ந்தே டி²தம்.

புச்சா² – கே ஆவுஸோ தா⁴ரேந்தி.

விஸ்ஸஜ்ஜனா – யேஸம் ப⁴ந்தே வத்ததி தே தா⁴ரேந்தி.

புச்சா² – கஸ்ஸ ஆவுஸோ வசனம்.

விஸ்ஸஜ்ஜனா – ப⁴க³வதோ ப⁴ந்தே வசனம் அரஹதோ ஸம்மாஸம்பு³த்³த⁴ஸ்ஸ.

புச்சா² – கேனாவுஸோ ஆப⁴தம்.

விஸ்ஸஜ்ஜனா – பரம்பராய ப⁴ந்தே ஆப⁴தம்.

புச்சா² – அத்தி² நுகோ² ஆவுஸோ தத்த² ஸனிதா³னே ஸபத³பா⁴ஜனீயே ஸவினீதவத்து²கே உபனேதப்³ப³ம் வா அபனேதப்³ப³ம் வா அக்க²ரபத³பச்சாப⁴ட்ட²ம் வா விரத்³த⁴பத³ப்³யஞ்ஜனம் வா.

ஸம்கா³யனத்தா²ய ஸங்க⁴ஸ்ஸ ஞாபனம்

ஸுணாது மே ப⁴ந்தே ஸங்கோ⁴ ஆயஸ்மந்தம் விசித்தஸாராபி⁴வம்ஸம் திபிடகத⁴ர த⁴ம்மப⁴ண்டா³கா³ரிகம் பட²மஸ்ஸ ஸங்கா⁴தி³ஸேஸ ஸிக்கா²பத³ஸ்ஸ நிதா³னம்பி புச்சி²ம், புக்³க³லம்பி புச்சி²ம், வத்து²ம்பி புச்சி²ம், பஞ்ஞத்திம்பி புச்சி²ம், அனுபஞ்ஞத்திம்பி புச்சி², ஆபத்திம்பி புச்சி²ம், அனாபத்திம்பி புச்சி²ம், அஞ்ஞானிபி ஏவரூபானி அனேகானி புச்சி²தப்³ப³ட்டா²னானி புச்சி²ம், புட்டோ² புட்டோ² ச ஸோ ஆயஸ்மா விசித்தஸாராபி⁴வம்ஸோ விஸ்ஸஜ்ஜேஸி, இதிஹித³ம் ப⁴ந்தே பட²ம ஸங்கா⁴தி³ஸேஸ ஸிக்கா²பத³ம் ஸபரிவாரம் நிம்மலம் ஸுபரிஸுத்³த⁴ம் தஸ்ஸேவ ப⁴க³வதோ வசனம் அரஹதோ ஸம்மாஸம்பு³த்³த⁴ஸ்ஸ. தஸ்மா யதா²புரே மஹாகஸ்ஸபாத³யோ மஹாதே²ரவரா போராணஸம்கீ³திகாரா ப்³ரஹ்மசரியஸ்ஸ சிரட்டி²தியா ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானம் த⁴ம்மவினயம் ஸம்கா³யிம்ஸுசேவ அனுஸம்கா³யிம்ஸுச, ஏவமேவ மயம்பி ஸப்³பே³வ ச²ட்ட²ஸம்கீ³திமஹாத⁴ம்மஸபா⁴ பரியாபன்னா இத³ம் பட²மம் ஸங்கா⁴தி³ஸேஸ ஸிக்கா²பத³ம் நிதா³னதோ பட்டா²ய ஏகச்சானம் வசஸா ஸஜ்ஜா²யவஸேன ஏகச்சானம் மனஸா மனஸிகரணவஸேனச ஏகதோ க³ணஸஜ்ஜா²யம் கத்வா ஸம்கா³யேய்யாம.

புச்சா² – யம் தேன ஆவுஸோ ப⁴க³வதா…பே… ஸம்மாஸம்பு³த்³தே⁴ன மாதுகாமேன ஸத்³தி⁴ம் காயஸம்ஸக்³க³ம் ஸமாபஜ்ஜந்தஸ்ஸ ச, மாதுகா³மம் து³ட்டு²ல்லாஹி வாசாஹி ஓபா⁴ஸந்தஸ்ஸ ச, மாதுகா³மஸ்ஸ ஸந்திகே அத்தகாம பாரிசரியாய வண்ணம் பா⁴ஸந்தஸ்ஸ ச, ஸஞ்சரித்தம் ஸமாபஜ்ஜந்தஸ்ஸ ச ஸங்கா⁴தி³ஸேஸோ கத்த² பஞ்ஞத்தோ.

விஸ்ஸஜ்ஜனா – ஸாவத்தி²யம் ப⁴ந்தே பஞ்ஞத்தோ.

புச்சா² – கம் ஆவுஸோ ஆரப்³ப⁴ பஞ்ஞத்தோ.

விஸ்ஸஜ்ஜனா – ஆயஸ்மந்தம் ப⁴ந்தே உதா³யித்தே²ரம் ஆரப்³ப⁴ பஞ்ஞத்தோ.

புச்சா² – கிஸ்மிம் ஆவுஸோ வத்து²ஸ்மிம் பஞ்ஞத்தோ.

விஸ்ஸஜ்ஜனா – ஆயஸ்மா ப⁴ந்தே உதா³யித்தே²ரோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜி, ஆயஸ்மாயேவ ப⁴ந்தே உதா³யித்தே²ரோ மாதுகா³மம் து³ட்டு²ல்லாஹி வாசாஹி ஓபா⁴ஸி, ஆயஸ்மாயேவ ப⁴ந்தே உதா³யித்தே²ரோ மாதுகா³மஸ்ஸ ஸந்திகே அத்தகாம பாரிசரியாய வண்ணம் அபா⁴ஸி, ஆயஸ்மாயேவ ப⁴ந்தே உதா³யித்தே²ரோ ஸஞ்சரித்தம் ஸமாபஜ்ஜிம், தஸ்மிம் ப⁴ந்தே வத்து²ஸ்மிம் பஞ்ஞத்தோ.