மஹாவக்³க³ஸம்யுத்தபாளி

அவிஜ்ஜாவக்³க³

உபட்³ட⁴ஸுத்த

புச்சா² – மஹாவக்³க³ஸம்யுத்தே பனாவுஸோ போராணகேஹி த⁴ம்மஸம்கா³ஹகமஹாதே²ரேஹி து³தியம் ஸம்கீ³தம் உபட்³ட⁴ஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸக்கேஸு ப⁴ந்தே ஸக்கரே நாம ஸக்யானம் நிக³மே ஆயஸ்மந்தம் ஆனந்த³த்தே²ரம் ஆரப்³ப⁴ பா⁴ஸிதம். ஆயஸ்மா ப⁴ந்தே ஆனந்த³த்தே²ரோ ப⁴க³வந்தம் ஏதத³வோச ‘‘உபட்³ட⁴மித³ம் ப⁴ந்தே ப்³ரஹ்மசரியம் யதி³த³ம் கல்யாணமித்ததா கல்யாணஸஹாயதா கல்யாணஸம்பவங்கதா’’தி. தஸ்மிம் ப⁴ந்தே வத்து²ஸ்மிம் ‘‘மா ஹேவம் ஆனந்த³, மா ஹேவம் ஆனந்த³, ஸகலமேவித³ம் ஆனந்த³ ப்³ரஹ்மசரியம் யதி³த³ம் கல்யாணமித்ததா கல்யாணஸஹாயதா கல்யாணஸம்பவங்கதா’’தி ஏவமாதி³னா ப⁴க³வதா பா⁴ஸிதம்.

மமம் ஹி ஆனந்த³ கல்யாணமித்தம் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி.

போ³ஜ்ஜ²ங்க³ஸம்யுத்த

குண்ட³லியஸுத்த

புச்சா² – போ³ஜ்ஜ²ங்க³ஸம்யுத்தே பனாவுஸோ போராணகேஹி த⁴ம்மஸம்கா³ஹகமஹாதே²ரேஹி ச²ட்ட²ம் ஸம்கீ³தம் குண்ட³லியஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸாகேதே ப⁴ந்தே அஞ்ஜனவனே மிக³தா³யே குண்ட³லியம் பரிப்³பா³ஜகம் ஆரப்³ப⁴ பா⁴ஸிதம். குண்ட³லியோ ப⁴ந்தே பரிப்³பா³ஜகோ ப⁴க³வந்தம் உபஸங்கமித்வா ‘‘அஹமஸ்மி போ⁴ கோ³தம ஆராமனிஸ்ஸயீ பரிஸாவசரோ, தஸ்ஸ மய்ஹம் போ⁴ கோ³தம பச்சா²ப⁴த்தம் பு⁴த்தபாதராஸஸ்ஸ அயமாசாரோ ஹோதி ஆராமேன ஆராமம் உய்யானேன உய்யானம் அனுசங்கமாமி அனுவிசராமி, ஸோ தத்த² பஸ்ஸாமி ஏகே ஸமணப்³ராஹ்மணே இதிவாத³ப்பமோக்கா²னிஸம்ஸஞ்சேவ கத²ம் கத²ந்தே உபாரம்பா⁴னிஸம்ஸஞ்ச, ப⁴வம் பன கோ³தமோ கிமானிஸம்ஸோ விஹரதீ’’தி ஏதம் வசனம் அவோச. தஸ்மிம் ப⁴ந்தே வத்து²ஸ்மிம் ‘‘விஜ்ஜாவிமுத்திப²லானிஸம்ஸோ கோ² குண்ட³லிய ததா²க³தோ விஹரதீ’’தி ஏவமாதி³னா ப⁴க³வதா பா⁴ஸிதம்.

பட²ம கி³லானஸுத்த

புச்சா² – தேனாவுஸோ ப⁴க³வ்வதா ஜானதா…பே… ஸம்மாஸம்பு³த்³தே⁴ன போ³ஜ்ஜ²ங்க³ஸம்யுத்தே து³தியே கி³லானவக்³கே³ பட²மகி³லானஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ராஜக³ஹே ப⁴ந்தே பிப்பலிகு³ஹாயம் ஆயஸ்மந்தம் மஹாகஸ்ஸபத்தே²ரம் ஆரப்³ப⁴ பா⁴ஸிதம். ஆயஸ்மா ப⁴ந்தே மஹாகஸ்ஸபத்தே²ரோ பிப்பலிகு³ஹாயம் விஹரதி ஆபா³தி⁴கோ து³க்கி²தோ பா³ள்ஹகி³லானோ. அத² கோ² ப⁴ந்தே ப⁴க³வா ஸாயன்ஹஸமயம் படிஸல்லானா வுட்டி²தோ யேனாயஸ்மா மஹாகஸ்ஸபோ தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³, நிஸஜ்ஜ கோ² ப⁴க³வா ஆயஸ்மந்தம் மஹாகஸ்ஸபம் ஏதத³வோச– ‘‘கச்சி தே கஸ்ஸப க²மனீயம், கச்சி யாபனீயம், கச்சி து³க்கா² வேத³னா படிக்கமந்தி நோ அபி⁴க்கமந்தி, படிக்கமோஸானம் பஞ்ஞாயதி நோ அபி⁴க்கமோதி. ந மே ப⁴ந்தே க²மனீயம் ந யாபனீயம், பா³ள்ஹா மே து³க்கா² வேத³னா அபி⁴க்கமந்தி நோ படிக்கமந்தி, அபி⁴க்கமோஸானம் பஞ்ஞாயதி நோ படிக்கமோ’’தி. தஸ்மிம் ப⁴ந்தே வத்து²ஸ்மிம் ‘‘ஸத்திமே கஸ்ஸப போ³ஜ்ஜ²ங்கா³ மயா ஸம்மத³க்கா²தா பா⁴விதா ப³ஹுலீகதா அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்தந்தீ’’தி ஏவமாதி³னா ப⁴க³வதா பா⁴ஸிதம்.

உதா³யிஸுத்த

புச்சா² – தத்தே²வ ஆவுஸோ ததியே உதா³யிவக்³கே³ போராணகேஹி த⁴ம்மஸம்கா³ஹகமஹாதே²ரேஹி த³ஸமம் ஸம்கீ³தம் உதா³யிஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸும்பே⁴ஸு ப⁴ந்தே ஸேதகேனாம ஸும்பா⁴னம் நிக³மே ஆயஸ்மந்தம் உதா³யித்தே²ரம் ஆரப்³ப⁴ பா⁴ஸிதம். ஆயஸ்மா ப⁴ந்தே உதா³யித்தே²ரோ ப⁴க³வந்தம் உபஸங்கமித்வா ‘‘அச்ச²ரியம் ப⁴ந்தே, அப்³பு⁴தம் ப⁴ந்தே, யாவ ப³ஹுகதஞ்ச மே ப⁴ந்தே ப⁴க³வதி பேமஞ்ச கா³ரவோ ச ஹிரீ ச ஓத்தப்பஞ்சாதி ஏவமாதி³கம் வசனம் அவோச. தஸ்மிம் ப⁴ந்தே வத்து²ஸ்மிம் ‘‘ஸாது⁴ ஸாது⁴ உதா³யி ஏஸோ ஹி தே உதா³யி மக்³கோ³ படிலத்³தோ⁴. யோ தே பா⁴விதோ ப³ஹுலீகதோ, ததா² ததா² விஹரந்தம் தத²த்தாய உபனேஸ்ஸதி, யதா² த்வம் ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானிஸ்ஸதீ’’தி. ஏவம் கோ² ப⁴க³வதா பா⁴ஸிதம்.

ஸதிபட்டா²னஸம்யுத்த

ஸதிஸுத்த

புச்சா² – ஸதிபட்டா²னஸம்யுத்தே ஆவுஸோ போராணகேஹி த⁴ம்மஸம்கா³ஹக மஹாதே²ரேஹி து³தியம் ஸம்கீ³தம் ஸதிஸுத்தம் ப⁴க³வதா கத்த² கம் காரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – வேஸாலியம் ப⁴ந்தே அம்ப³பாலிவனே ஸம்ப³ஹுலே பி⁴க்கூ² ஆரப்³ப⁴ ‘‘ஸதோ பி⁴க்க²வே பி⁴க்கு² விஹரேய்ய ஸம்பஜானோ அயம் வோ அம்ஹாகம் அனுஸாஸனீ’’தி ஏவமாதி³னா ப⁴க³வதா பா⁴ஸிதம்.

ஸாலஸுத்த

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி சதுத்த²ம் ஸம்கீ³தம் ஸாலஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – கோஸலேஸு ப⁴ந்தே ஸாலாயனாம கேஸலானம் ப்³ராஹ்மணகா³மே ஸம்ப³ஹுலே பி⁴க்கூ² ஆரப்³ப⁴ ‘‘யே தே பி⁴க்க²வே பி⁴க்கூ² நவா அசிரபப்³ப³ஜிதா அது⁴னாக³தா இமம் த⁴ம்மவினயம், தே வோ பி⁴க்க²வே பி⁴க்கூ² சதுன்னம் ஸதிபட்டா²னானம் பா⁴வனாய ஸமாத³பேதப்³பா³ நிவேஸேதப்³பா³ பதிட்டா²பேதப்³பா³’’தி ஏவமாதி³னா ப⁴ந்தே ப⁴க³வதா பா⁴ஸிதம்.

ஸகுணக்³கி⁴ஸுத்த

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி ச²ட்ட²ம் ஸம்கீ³தம் ஸகுணக்³கி⁴ஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ ‘‘பூ⁴தபுப்³ப³ம் பி⁴க்க²வே ஸகுணக்³கி⁴ லாபம் ஸகுணம் ஸஹஸா அஜ்ஜ²ப்பத்தா அக்³க³ஹேஸி. அத² கோ² பி⁴க்க²வே லாபோ ஸகுணோ ஸகுணக்³கி⁴யா ஹரியமானோ ஏவம் பரிதே³வஸி மயமேவம்ஹ அலக்கி²கா, மயம் அப்பபுஞ்ஞா, யே மயம் அகோ³சரே சரிம்ஹ பரவிஸயே, ஸசேஜ்ஜ மயம் கோ³சரே சரேய்யாம ஸகே பேத்திகே விஸயே, ந ம்யாஹம் ஸகுணக்³கி⁴ அலம் அப⁴விஸ்ஸ யதி³த³ம் யுத்³தா⁴யா’’தி ஏவமாதி³னா ப⁴க³வதா பா⁴ஸிதம்.

மயமேவம்ஹ அலக்கி²கா, மயம் அப்பபுஞ்ஞா.

கோ பன தே லாப கோ³சரோ ஸகோ பேத்திகோ விஸயோ.

யதி³த³ம் நங்க³லகட்ட²கரணம் லேட்³டு³ட்டா²னம்.

ஏஹி கோ² தா³னி மே ஸகுணக்³கி⁴, ஏஹி கோ² தா³னி மே ஸகுணக்³கி⁴,

(தா³ருகு³ளோவிய வினிவத்தித்வா தஸ்ஸேவ லேட்³டு³ஸ்ஸ அந்தரே பச்சுபாதி³. அட்ட²கதா²)

ஏவஞ்ஹி தம் பி⁴க்க²வே ஹோதி யோ அகோ³சரே சரதி பரவிஸயே.

தஸ்மாதிஹ பி⁴க்க²வே மா அகோ³சரே சரித்த² பரவிஸயே.

கோ³சரே பி⁴க்க²வே சரத² ஸகே பேத்திகே விஸயே.

கோ³சரே பி⁴க்க²வே சரதம் ஸகே பேத்திகே விஸயே ந லச்ச²தி மாரோ ஓதாரம், ந லச்ச²தி மாரோ ஆரம்மணம்.

பி⁴க்கு²னுபஸ்ஸயஸுத்த

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி த³ஸமம் ஸம்கீ³தம் பி⁴க்கு²னுபஸ்ஸயஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம் ஆனந்த³த்தே²ரம் ஆரப்³ப⁴ பா⁴ஸிதம். ஆயஸ்மா ப⁴ந்தே ஆனந்தோ³ யாவத்தகோ அஹோஸி பி⁴க்கு²னீஹி ஸத்³தி⁴ம் கதா²ஸல்லாபோ தம் ஸப்³ப³ம் ப⁴க³வதோ ஆரோசேஸி. தஸ்மிம் ப⁴ந்தே வத்து²ஸ்மிம் ‘‘ஏவமேதம் ஆனந்த³, ஏவமேதம் ஆனந்த³, யோஹி கோசி ஆனந்த³ பி⁴க்கு² வா பி⁴க்கு²னீ வா சதூஸு ஸதிபட்டா²னேஸு ஸுப்பதிட்டி²தசித்தோ விஹரதி, தஸ்ஸேதம் பாடிகங்க²ம் உளாரம் புப்³பே³னாபரம் விஸேஸம் ஸஞ்ஜானிஸ்ஸதீ’’தி ஏவமாதி³னா ப⁴க³வதா பா⁴ஸிதம்.

சுந்த³ஸுத்த

புச்சா² – தத்தே²வ ஆவுஸோ து³தியே நாலந்த³வக்³கே³ போராணகேஹி த⁴ம்மஸம்கா³ஹகமஹாதே²ரேஹி ததியம் ஸம்கீ³தம் சுந்த³ஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம்யேவ ஆனந்த³த்தே²ரம் ஆரப்³ப⁴ பா⁴ஸிதம். ஆயஸ்மா ப⁴ந்தே ஆனந்த³த்தே²ரோ சுந்தே³ன ஸமணுத்³தே³ஸேன ஸத்³தி⁴ம் யேன ப⁴க³வா தேனுபஸங்கமி. உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ப⁴ந்தே ஆயஸ்மா ஆனந்தோ³ ப⁴க³வந்தம் ஏதத³வோச ‘‘அயம் ப⁴ந்தே சுந்தோ³ ஸமணுத்³தே³ஸோ ஏவமாஹ ‘ஆயஸ்மா ப⁴ந்தே ஸாரிபுத்தோ பரினிப்³பு³தோ, இத³மஸ்ஸ பத்தசீவர’ந்தி. அபி ச மே ப⁴ந்தே மது⁴ரகஜாதோ விய காயோ, தி³ஸாபி மே ந பக்கா²யந்தி, த⁴ம்மாபி மம் நப்படிப⁴ந்தி ‘ஆயஸ்மா ஸாரிபுத்தோ பரினிப்³பு³தோ’தி ஸுத்வா’’தி. தஸ்மிம் ப⁴ந்தே வத்து²ஸ்மிம் ‘‘கிம் நு கோ² தே ஆனந்த³ ஸாரிபுத்தோ ஸீலக்க²ந்த⁴ம் வா ஆதா³ய பரினிப்³பு³தோ, ஸமாதி⁴க்க²ந்த⁴ம் வா, பஞ்ஞாக்க²ந்த⁴ம்வா, விமுத்திக்க²ந்த⁴ம்வா, விமுத்திஞாணத³ஸ்ஸனக்க²ந்த⁴ம் வா ஆதா³ய பரினிப்³பு³தோ’’தி ஏவமாதி³னா ப⁴க³வதா பா⁴ஸிதம்.

அயம் ப⁴ந்தே சுந்தோ³ஸமணுத்³தே³ஸோ ஏவமாஹ.

தஸ்மாதிஹானந்த³ அத்ததீ³பா விஹரத² அத்தஸரணா அனஞ்ஞஸரணா த⁴ம்மதீ³பா த⁴ம்மஸரணா அனஞ்ஞஸரணா.

பா³ஹியஸுத்த

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி பஞ்சமம் ஸம்கீ³தம் பா³ஹியஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம் பா³ஹியம் ஆரப்³ப⁴ பா⁴ஸிதம். ஆயஸ்மா ப⁴ந்தே பா³ஹியோ ப⁴க³வந்தம் ஏதத³வோச ‘‘ஸாது⁴ மே ப⁴ந்தே ப⁴க³வா ஸம்கி²த்தேன த⁴ம்மம் தே³ஸேது, யமஹம் ப⁴க³வதோ த⁴ம்மம் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரேய்ய’’ந்தி. தஸ்மிம் ப⁴ந்தே வத்து²ஸ்மிம் ‘‘தஸ்மாதிஹ த்வம் பா³ஹிய ஆதி³மேவ விஸோதே⁴ஹி குஸலேஸு த⁴ம்மேஸு. கோ சாதி³குஸலானம் த⁴ம்மானம், ஸீலஞ்ச ஸுவிஸுத்³த⁴ம் தி³ட்டி²ச உஜுகா’’தி ஏவமாதி³னா ப⁴க³வதா பா⁴ஸிதம்.

ஸீலட்டி²திவக்³க³

சிரட்டி²திஸுத்த

புச்சா² – தத்தே²வ ஆவுஸோ ததியே ஸீலட்டி²திவக்³கே³ போராணகேஹி த⁴ம்மஸம்கா³ஹகமஹாதே²ரேஹி து³தியம் ஸம்கீ³தம் சிரட்டி²திஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கேன கத²ஞ்ச பா⁴ஸிதம்.

விஸ்ஸஜ்ஜனா – பாடலிபுத்தே ப⁴ந்தே ஆயஸ்மந்தம் ப⁴த்³த³ம் ஆரப்³ப⁴ ஆயஸ்மதா ஆனந்த³த்தே²ரேன த⁴ம்மப⁴ண்டா³கா³ரிகேன பா⁴ஸிதம். ஆயஸ்மா ப⁴ந்தே ப⁴த்³தோ³ ஸாயன்ஹஸமயம் படிஸல்லானா வுட்டி²தோ யேனாயஸ்மா ஆனந்தோ³ தேனுபஸங்கமி, உபஸங்கமித்வா ஆயஸ்மந்தம் ஆனந்த³ம் ஏதத³வோச ‘‘கோ நு கோ² ஆவுஸோ ஆனந்த³ ஹேது கோ பச்சயோ, யேன ததா²க³தே பரினிப்³பு³தே ஸத்³த⁴ம்மோ ந சிரட்டி²திகோ ஹோதி, கோ பனாவுஸோ ஆனந்த³ ஹேது கோ பச்சயோ, யேன ததா²க³தே பரினிப்³பு³தே ஸத்³த⁴ம்மோ சிரட்டி²திகோ ஹோதீ’’தி. தஸ்மிம் ப⁴ந்தே வத்து²ஸ்மிம் ‘‘ஸாது⁴ ஸாது⁴ ஆவுஸோ ப⁴த்³த³, ப⁴த்³த³கோ கோ² தே ஆவுஸோ ப⁴த்³த³ உம்மங்கோ³’’தி ஏவமாதி³னா ஆயஸ்மதா ஆனந்த³த்தே²ரேன த⁴ம்மப⁴ண்டா³கா³ரிகேன பா⁴ஸிதம்.

ப⁴த்³த³கோ தே ஆவுஸோ ப⁴த்³த³ உம்மங்கோ³.

‘‘சதுன்னம் கோ² ஆவுஸோ ஸதிபட்டா²னானம் அபா⁴விதத்தா அப³ஹுலீகதத்தா ததா²க³தே பரினிப்³பு³தே ஸத்³த⁴ம்மோ ந சிரட்டி²திகோ ஹோதீ’’ –

ஸிரிவட்³ட⁴ஸுத்த

புச்சா² – தஸ்ஸாவுஸோ ப⁴க³வதா அரஹதோ ஸம்மாஸம்பு³த்³த⁴ஸ்ஸ பாவசனஸமுத³யபூ⁴தாய மஹாவக்³க³பாளியா ஸதிபட்டா²னஸம்யுத்தே ஸீலட்டி²திவக்³கே³ நவமம் ஸிரிவட்³ட⁴ஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கேன கத²ஞ்ச பா⁴ஸிதம்.

விஸ்ஸஜ்ஜனா – ராஜக³ஹே ப⁴ந்தே ஸிரிவட்³ட⁴ம் க³ஹபதிம் ஆரப்³ப⁴ ஆயஸ்மதா ஆனந்த³த்தே²ரேன த⁴ம்மப⁴ண்டா³கா³ரிகேன பா⁴ஸிதம். ஸிரிவட்³டோ⁴ ப⁴ந்தே க³ஹபதி ஆபா³தி⁴கோ ஹோதி து³க்கி²தோ பா³ள்ஹகி³லானோ. அத²கோ² ப⁴ந்தே ஆயஸ்மா ஆனந்தோ³ யேனஸிரிவட்³ட⁴ஸ்ஸ க³ஹபதிஸ்ஸ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ஆயஸ்மா ஆனந்தோ³ ஸிரிவட்³ட⁴ம் க³ஹபதிம் ஏதத³வோச ‘‘கச்சி தே க³ஹபதி க²மனீயம், கச்சி யாபனீயம், கச்சி து³க்கா² வேத³னா படிக்கமந்தி நோ அபி⁴க்கமந்தி, படிக்கமோஸானம் பஞ்ஞாயதி நோ அபி⁴க்கமோ’’தி. ந மே ப⁴ந்தே க²மனீயம், ந யாபனீயம், பா³ள்ஹா மே து³க்கா² வேத³னா அபி⁴க்கமந்தி நோ படிக்கமந்தி, அபி⁴க்கமோஸானம் பஞ்ஞாயதி நோ படிக்கமோ’’தி. தஸ்மிம் ப⁴ந்தே வத்து²ஸ்மிம் ‘‘தஸ்மாதிஹ தே க³ஹபதி ஏவம் ஸிக்கி²தப்³ப³ம் ‘காயே காயானுபஸ்ஸீ விஹரிஸ்ஸாமி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா² தோ³மனஸ்ஸம். வேத³னாஸு. சித்தே. த⁴ம்மேஸு த⁴ம்மானுபஸ்ஸீ விஹரிஸ்ஸாமி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா² தோ³மனஸ்ஸ’ந்தி. ஏவஞ்ஹி தே க³ஹபதி ஸிக்கி²தப்³ப³’’ந்தி. ஏவம் கோ² ஆயஸ்மதா ஆனந்த³த்தே²ரேன த⁴ம்மப⁴ண்டா³கா³ரிகேன பா⁴ஸிதம்.

இத்³தி⁴பாத³ஸம்யுத்த

மோக்³க³ல்லானஸுத்த

புச்சா² – இத்³தி⁴பாத³ஸம்யுத்தே ஆவுஸோ சதுத்த²ம் மோக்³க³ல்லானஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ பா⁴ஸிதம். ஸம்ப³ஹுலா ப⁴ந்தே பி⁴க்கூ² ஹேட்டா²மிகா³ரமாதுபாஸாதே³ விஹரந்தி உத்³த⁴தா உன்னளா சபலா முக²ரா விகிண்ணவாசா முட்ட²ஸ்ஸதினோ அஸம்பஜானா அஸமாஹிதா ப⁴ந்தசித்தா பாகதிந்த்³ரியா. தஸ்மிம் ப⁴ந்தே வத்து²ஸ்மிம் ஆயஸ்மந்தம் மஹாமோக்³க³ல்லானம் தே பி⁴க்கூ² ஸம்வேஜேத்வா ‘‘கிம் நு தும்ஹே பி⁴க்க²வே ஸம்விக்³கா³ லோமஹட்ட²ஜாதா ஏகமந்தம் டி²தா’’தி ஏவமாதி³னா ப⁴க³வதா பா⁴ஸிதம்.

அச்ச²ரியம் வத போ⁴, அப்³பு⁴தம் வத போ⁴.

நிவாதஞ்ச வத.

அயஞ்ச மிகா³ரமாதுபாஸாதோ³ க³ம்பீ⁴ரனேமோ.

தும்ஹேவ கோ² பி⁴க்க²வே ஸம்வேஜேதுகாமேன மோக்³க³ல்லானேன பி⁴க்கு²னா பாத³ங்கு³ட்ட²கேன மிகா³ரமாதுபாஸாதோ³ ஸங்கம்பிதோ ஸம்பகம்பிதோ ஸம்பதா⁴லிதோ.

தம் கிம் மஞ்ஞத² பி⁴க்க²வே, கதமேஸம் த⁴ம்மானம் பா⁴விதத்தா ப³ஹுலீகதத்தா மோக்³க³ல்லானோ பி⁴க்கு² ஏவம் மஹித்³தி⁴கோ ஏவம் மஹானுபா⁴வோ.

அனுருத்³த⁴ஸம்யுத்த

பா³ள்ஹகி³லானஸுத்த

புச்சா² – அனுருத்³த⁴ஸம்யுத்தே ஆவுஸோ போராணகேஹி த⁴ம்மஸம்கா³ஹகமஹாதே²ரேஹி த³ஸமம் ஸம்கீ³தம் பா³ள்ஹகி³னானஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கேன கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ ஆயஸ்மதா அனுருத்³த⁴த்தே²ரேன பா⁴ஸிதம். ஸம்ப³ஹுலா ப⁴ந்தே பி⁴க்கூ² ஆயஸ்மந்தம் அனுருத்³த⁴ம் ஆபா³தி⁴கம் து³க்கி²தம் பா³ள்ஹகி³லானம் ஏதத³வோசும் ‘‘கதமேனாயஸ்மதோ அனுருத்³த⁴ஸ்ஸ விஹாரேன விஹரதோ உப்பன்னா ஸாரீரிகா து³க்கா² வேத³னா சித்தம் ந பரியாதா³ய திட்ட²ந்தீ’’தி. தஸ்மிம் ப⁴ந்தே வத்து²ஸ்மிம் ‘‘சதூஸு கோ² மே ஆவுஸோ ஸதிபட்டா²னேஸு ஸுப்பதிட்டி²தசித்தஸ்ஸ விஹரதோ உப்பன்னா ஸாரீரிகா து³க்கா² வேத³னா சித்தம் ந பரியாதா³ய திட்ட²ந்தீ’’தி ஏவமாதி³னா ஆயஸ்மதா அனுருத்³த⁴த்தே²ரேன பா⁴ஸிதம்.

ஆனாபானஸம்யுத்த

மஹாகப்பினஸுத்த

புச்சா² – ஆனாபானஸம்யுத்தே ஆவுஸோ போராணகேஹி த⁴ம்மஸம்கா³ஹகமஹாதே²ரேஹி ஸத்தமம் ஸம்கீ³தம் மஹாகப்பினஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ ‘‘பஸ்ஸத² நோ தும்ஹே பி⁴க்க²வே ஏதஸ்ஸ பி⁴க்கு²னோ காயஸ்ஸ இஞ்ஜிதத்தம் வா ப²ந்தி³தப்³ப³ம் வா’’தி ஏவமாதி³னா ப⁴க³வதா பா⁴ஸிதம்.

இச்சா²னங்க³லஸுத்த

புச்சா² – தத்தே²வ ஆவுஸோ து³தியவக்³கே³ பட²மம் இச்சா²னங்க³லஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – இச்சா²னங்க³லே ப⁴ந்தே ஸம்ப³ஹுலே பி⁴க்கூ² ஆரப்³ப⁴ ‘‘ஸசே கோ² பி⁴க்க²வே அஞ்ஞதித்தி²யா பரிப்³பா³ஜகா ஏவம் புச்சே²ய்யும் ‘கதமே நாவுஸோ விஹாரேன ஸமணோ கோ³தமோ வஸ்ஸாவாஸம் ப³ஹுலம் விஹாஸீ’தி. ஏவம் புட்டா² தும்ஹே பி⁴க்க²வே தேஸம் அஞ்ஞதித்தி²யானம் பரிப்³பா³ஜகானம் ஏவம் ப்³யாகரேய்யாத² ஆனாபானஸ்ஸதிஸமாதி⁴னா கோ² ஆவுஸோ ப⁴க³வா வஸ்ஸாவாஸம் ப³ஹுலம் விஹாஸீ’’தி ஏவமாதி³னா ப⁴ந்தே ப⁴க³வதா பா⁴ஸிதம்.

ஸோதாபத்திஸம்யுத்த

சக்கவத்திராஜஸுத்த

புச்சா² – ஸோதாபத்திஸம்யுத்தே ஆவுஸோ போராணகேஹி த⁴ம்மஸம்கா³ஹகமஹாதே²ரேஹி பட²மம் ஸம்கீ³தம் சக்கவத்திராஜஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ ‘‘கிஞ்சாபி பி⁴க்க²வே ராஜா சக்கவத்தீ சதுன்னம் தீ³பானம் இஸ்ஸரியாதி⁴பச்சம் ரஜ்ஜம் காரேத்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி தே³வானம் தாவதிம்ஸானம் ஸஹப்³யதம், ஸோ தத்த² நந்த³னே வனே அச்ச²ராஸங்க⁴பரிவுதோ தி³ப்³பே³ஹி ச பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி ஸோ சதூஹி த⁴ம்மேஹி அஸமன்னாக³தோ, அத² கோ² ஸோ அபரிமுத்தோவ நிரயா, அபரிமுத்தோ திரச்சா²னயோனியா, அபரிமுத்தோ பேத்திவிஸயா, அபரிமுத்தோ அபாயது³க்³க³திவினிபாதா’’தி ஏவமாதி³னா ப⁴ந்தே ப⁴க³வதா பா⁴ஸிதம்.

தீ³கா⁴வு உபாஸகஸுத்த

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி ததியம் ஸம்கீ³தம் தீ³கா⁴வுஉபாஸகஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ராஜக³ஹே ப⁴ந்தே தீ³கா⁴வும் உபாஸகம் ஆரப்³ப⁴ பா⁴ஸிதம். ப⁴க³வா ப⁴ந்தே தீ³கா⁴வும் உபாஸகம் ஆபா³தி⁴கம் து³க்கி²தம் பா³ள்ஹகி³லானம் ஏதத³வோச ‘‘கச்சி தே தீ³கா⁴வு க²மனீயம், கச்சி யாபனீயம், கச்சி து³க்கா² வேத³னா படிக்கமந்தி நோ அபி⁴க்கமந்தி, படிக்கமோஸானம் பஞ்ஞாயதி நோ அபி⁴க்கமோ’’தி. ந மே ப⁴ந்தே க²மனீயம், ந யாபனீயம் பா³ள்ஹா மே து³க்கா² வேத³னா அபி⁴க்கமந்தி நோ படிக்கமந்தி, அபி⁴க்கமோஸானம் பஞ்ஞாயதி நோ படிக்கமோதி. தஸ்மிம் ப⁴ந்தே வத்து²ஸ்மிம் ‘‘தஸ்மாதிஹ தே தீ³கா⁴வு ஏவம் ஸிக்கி²தப்³ப³ம் பு³த்³தே⁴ அவேச்சப்பஸாதே³ன ஸமன்னாக³தோ ப⁴விஸ்ஸாமீ’’தி ஏவமாதி³னா ப⁴க³வதா பா⁴ஸிதம்.

யானிமானி ப⁴ந்தே ப⁴க³வதா சத்தாரி ஸோதாபத்தியங்கா³னி தே³ஸிதானி, ஸம்விஜ்ஜந்தே தே த⁴ம்மா மயி–

தஸ்மாதிஹ த்வம் தீ³கா⁴வு இமேஸு சதூஸு ஸோதாபத்தியங்கே³ஸு பதிட்டா²ய ச² விஜ்ஜாபா⁴கி³யே த⁴ம்மே உத்தரி பா⁴வேய்யாஸி–

மா த்வம் தாத தீ³கா⁴வு ஏவம் மனஸாகாஸி.

இங்க⁴ த்வம் தாத தீ³கா⁴வு யதே³வ தே ப⁴க³வா ஆஹ, ததே³வ த்வம் ஸாது⁴கம் மனஸிகரோஹி.

பண்டி³தோ பி⁴க்க²வே தீ³கா⁴வு உபாஸகோ.

பச்சபாதி³ த⁴ம்மஸ்ஸானுத⁴ம்மம்.

ந ச மம் த⁴ம்மாதி⁴கரணம் விஹேடே²ஸி.

தீ³கா⁴வு பி⁴க்க²வே உபாஸகோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ தத்த² பரினிப்³பா³யீ அனாவத்தித⁴ம்மோ தஸ்மா லோகா.

வேளுத்³வாரேய்யஸுத்த

புச்சா² – தேனாவுஸோ ப⁴க³வதா…பே… ஸம்மாஸம்பு³த்³தே⁴ன ஸோதாபத்திஸம்யுத்தே ஸத்தமம் ஸம்கீ³தம் வேளுத்³வாரேய்யஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – கோஸலேஸு ப⁴ந்தே வேளுத்³வாரே நாம கோஸலானம் ப்³ராஹ்மண கா³மே வேளுத்³வாரேய்யகே ப்³ராஹ்மணக³ஹபதிகே ஆரப்³ப⁴ பா⁴ஸிதம்.

வேளுத்³வாரேய்யகா ப⁴ந்தே ப்³ராஹ்மணக³ஹபதிகா ப⁴க³வந்தம் ஏதத³வோசும் ‘‘மயம் போ⁴ கோ³தம ஏவம்காமா ஏவம்ச²ந்தா³ ஏவம்அதி⁴ப்பாயா புத்தஸம்பா³த⁴ஸயனம் அஜ்ஜா²வஸேய்யாம…பே… ஜாதரூபரஜதம் ஸாதி³யேய்யாம, காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்யாம, தேஸம் நோ ப⁴வம் கோ³தமோ அம்ஹாகம் ஏவம்காமானம் ஏவம்ச²ந்தா³னம் ஏவம்அதி⁴ப்பாயானம் ததா² த³ம்மம் தே³ஸேது, யதா² மயம் புத்தஸம்பா³த⁴ஸயனம் அஜ்ஜா²வஸேய்யாம…பே… காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்யாமா’’தி. தஸ்மிம் ப⁴ந்தே வத்து²ஸ்மிம் ‘‘அத்தூபனாயிகம் வோ க³ஹபதயோ த⁴ம்மபரியாயம் தே³ஸேஸ்ஸாமி, தம் ஸுணாத² ஸாது⁴கம் மனஸி கரோத², பா⁴ஸிஸ்ஸாமீ’’தி ஏவமாதி³னா ப⁴க³வதா பா⁴ஸிதம்.

ஸரணானிவக்³க³

பட²ம மஹானாமஸுத்த

புச்சா² – தத்தே²வ ஆவுஸோ ததியே ஸரணானிவக்³கே³ போராணகேஹி த⁴ம்மஸம்கா³ஹகமஹாதே²ரேஹி பட²மம் ஸம்கீ³தம் பட²மமஹானாமஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸக்கேஸு ப⁴ந்தே கபிலவத்து²ஸ்மிம் நிக்³ரோதா⁴ராமே மஹானாமம் ஸக்கம் ஆரப்³ப⁴ பா⁴ஸிதம். மஹானாமோ ப⁴ந்தே ஸக்கோ ப⁴க³வந்தம் ஏதத³வோச ‘‘இத³ம் ப⁴ந்தே கபிலவத்து² இத்³த⁴ஞ்சேவ பீ²தஞ்ச பா³ஹுஜஞ்ஞம் ஆகிண்ணமனுஸ்ஸம் ஸம்பா³த⁴ப்³யூஹம், ஸோ க்²வாஹம் ப⁴ந்தே ப⁴க³வந்தம் வா பயிருபாஸித்வா மனோபா⁴வனீயே வா பி⁴க்கூ² ஸாயன்ஹஸமயம் கபிலவத்து²ம் பவிஸந்தோ ப⁴ந்தேனபி ஹத்தி²னா ஸமாக³ச்சா²மி, ப⁴ந்தேனபி அஸ்ஸேன ஸமாக³ச்சா²மி, ப⁴ந்தேனபி ரதே²ன ஸமாக³ச்சா²மி, ப⁴ந்தேனபி ஸகடேன ஸமாக³ச்சா²மி, ப⁴ந்தேனபி புரிஸேன ஸமாக³ச்சா²மி, தஸ்ஸ மய்ஹம் ப⁴ந்தே தஸ்மிம் ஸமயே முஸ்ஸதேவ ப⁴க³வந்தம் ஆரப்³ப⁴ ஸதி, முஸ்ஸதி த⁴ம்மம் ஆரப்³ப⁴ ஸதி, முஸ்ஸதி ஸங்க⁴ம் ஆரப்³ப⁴ ஸதி, தஸ்ஸ மய்ஹம் ப⁴ந்தே ஏவம் ஹோதி இமம்ஹி சாஹம் ஸமயே காலம் கரேய்யம், கா மய்ஹம் க³தி, கோ அபி⁴ஸம்பராயோ’’தி. தஸ்மிம் ப⁴ந்தே வத்து²ஸ்மிம் ‘‘மா பா⁴யி மஹானாம, மா பா⁴யி மஹானாம, அபாபகம் தே மரணம் ப⁴விஸ்ஸதி அபாபிகா காலம் கிரியா’’தி ஏவமாதி³னா ப⁴க³வதா பா⁴ஸிதம்.

து³திய ஸரணானிஸக்கஸுத்த

புச்சா² – தத்தே²வ ஆவுஸோ த⁴ம்மஸம்கா³ஹகமஹாதே²ரேஹி பஞ்சமம் ஸம்கீ³தம் து³தியஸரணானிஸக்கஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸக்கேஸு ப⁴ந்தே கபிலவத்து²ஸ்மிம் நிக்³ரோதா⁴ராமே மஹானாமம்யேவ ஸக்கம் ஆரப்³ப⁴ பா⁴ஸிதம்.

மஹானாமோ ப⁴ந்தே ஸக்கோ ப⁴க³வந்தம் ஏதத³வோச ‘‘இத⁴ ப⁴ந்தே ஸரணானி ஸக்கோ காலங்கதோ, ஸோ ப⁴க³வதா ப்³யாகதோ ‘ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’தி. தத்ர ஸுத³ம் ப⁴ந்தே ஸம்ப³ஹுலா ஸக்கா ஸங்க³ம்ம ஸமாக³ம்ம உஜ்ஜா²யந்தி கீ²யந்தி விபாசேந்தி ‘அச்ச²ரியம் வத போ⁴, அப்³பு⁴தம் வத

போ⁴, ஏத்த² தா³னி கோ ந ஸோதாபன்னோ ப⁴விஸ்ஸதி, யத்ர ஹி நாம ஸரணானி ஸக்கோ காலங்கதோ, ஸோ ப⁴க³வதா ப்³யாகதோ ‘ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’தி, ஸரணானி ஸக்கோ ஸிக்கா²ய அபரிபூரகாரீ அஹோஸீ’’தி தஸ்மிம் ப⁴ந்தே வத்து²ஸ்மிம் ‘‘யோ ஸோ மஹானாம தீ³க⁴ரத்தம் உபாஸகோ பு³த்³த⁴ம் ஸரணம் க³தோ, த⁴ம்மம் ஸரணம் க³தோ, ஸங்க⁴ம் ஸரணம் க³தோ, ஸோ கத²ம் வினிபாதம் க³ச்சே²ய்யா’’தி ஏவமாதி³னா ப⁴க³வதா பா⁴ஸிதம்.

பட²ம அனாத²பிண்டி³கஸுத்த

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி ச²ட்ட²ம் ஸம்கீ³தம் பட²மஅனாத²பிண்டி³கஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கேன கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே அனாத²பிண்டி³கம் க³ஹபதிம் ஆரப்³ப⁴ ஆயஸ்மதா ஸாரிபுத்தத்தே²ரேன த⁴ம்மஸேனாபதினா பா⁴ஸிதம்.

ஆயஸ்மா ப⁴ந்தே ஸாரிபுத்தத்தே²ரோ ஆயஸ்மதா ஆனந்த³த்தே²ரேன பச்சா²ஸமணேன ஸத்³தி⁴ம் யேன அனாத²பிண்டி³கஸ்ஸ க³ஹபதிஸ்ஸ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³, நிஸஜ்ஜ கோ² ஆயஸ்மா ஸாரிபுத்தோ அனாத²பிண்டி³கம் க³ஹபதிம் ஆபா³தி⁴கம் து³க்கி²தம் பா³ள்ஹகி³லானம் ஏதத³வோச ‘‘கச்சி தே க³ஹபதி க²மனீயம் கச்சி யாபனீயம், கச்சி து³க்கா² வேத³னா படிக்கமந்தி, நோ அபி⁴க்கமந்தி, படிக்கமோஸானம் பஞ்ஞாயதி, நோ அபி⁴க்கமோ’’தி, ந மே ப⁴ந்தே க²மனீயம், ந யாபனீயம், பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி, அபி⁴க்கமோஸானம் பஞ்ஞாயதி, நோ படிக்கமோதி. தஸ்மிம் ப⁴ந்தே வத்து²ஸ்மிம் ‘‘யதா² ரூபேன கோ² க³ஹபதி பு³த்³தே⁴ அப்பஸாதே³ன ஸமன்னாக³தோ அஸ்ஸுதவா புது²ஜ்ஜனோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நியரம் உபபஜ்ஜதி ததா²ரூபோ தே பு³த்³தே⁴ அப்பஸாதோ³ நத்தி², அத்தி² ச கோ² தே க³ஹபதி பு³த்³தே⁴ அவேச்சப்பஸாதோ³ ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴…பே… ப⁴க³வா’தி தஞ்ச பன தே பு³த்³தே⁴ அவேச்சப்பஸாத³ம் அத்தனி ஸமனுபஸ்ஸதோ டா²னஸோ வேத³னா படிப்பஸ்ஸம்பே⁴ய்யா’’தி ஏவமாதி³னா ஆயஸ்மதா ஸாரிபுத்தத்தே²ரேன த⁴ம்மஸேனாபதினா பா⁴ஸிதம்.

யஸ்ஸ ஸத்³தா⁴ ததா²க³தே, அசலா ஸுப்பதிட்டி²தா;

ஸீலஞ்ச யஸ்ஸ கல்யாணம், அரியகந்தம் பஸம்ஸிதம்.

ஸங்கே⁴ பஸாதோ³ யஸ்ஸத்தி², உஜுபூ⁴தஞ்ச த³ஸ்ஸனம்;

அத³லித்³தோ³தி தம் ஆஹு, அமோக⁴ம் தஸ்ஸ ஜீவிதம்.

தஸ்மா ஸத்³த⁴ஞ்ச ஸீலஞ்ச, பஸாத³ம் த⁴ம்மத³ஸ்ஸனம்;

அனுயுஞ்ஜேத² மேதா⁴வீ, ஸரம் பு³த்³தா⁴னஸாஸனம்.

புஞ்ஞாபி⁴ஸந்த³வக்³க³

மஹானாமஸுத்த

புச்சா² – தத்தே²வ ஆவுஸோ புஞ்ஞாபி⁴ஸந்த³வக்³கோ³ போராணகேஹி த⁴ம்மஸம்கா³ஹகமஹாதே²ரேஹி ஸத்தமம் ஸம்கீ³தம் மஹானாமஸுத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸக்கேஸு ப⁴ந்தே கபிலவத்து²ஸ்மிம் மஹானாமம் ஸக்கம் ஆரப்³ப⁴ பா⁴ஸிதம்.

மஹானாமோ ப⁴ந்தே ஸக்கோ ப⁴க³வந்தம் ஏதத³வோச ‘‘கித்தாவதா நு கோ² ப⁴ந்தே உபாஸகோ ஹோதீ’’தி. தஸ்மிம் ப⁴ந்தே வத்து²ஸ்மிம் ‘‘யதோ கோ² மஹானாம பு³த்³த⁴ம் ஸரணம் க³தோ ஹோதி, த⁴ம்மம் ஸரணம் க³தோ ஹோதி, ஸங்க⁴ம் ஸரணம் க³தோ ஹோதீ’’தி ஏவமாதி³னா ப⁴க³வதா பா⁴ஸிதம்.

கித்தாவதா நு கோ² ப⁴ந்தே உபாஸகோ ஹோதி.

காளிகோ³த⁴ஸுத்த

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி நவமம் ஸம்கீ³தம் காளிகோ³த⁴ஸுத்தம் ப⁴க³வதா கத்த² கம் காரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – ஸக்கேஸு ப⁴ந்தே காளிகோ³த⁴ம் நாம ஸாகியானிம் ஆரப்³ப⁴ ‘‘சதூஹி கோ² கோ³தே⁴ த⁴ம்மேஹி ஸமன்னாக³தா அரியஸாவிகா ஸோதாபன்னா ஹோதி அவினிபாதத⁴ம்மா நியதா ஸம்போ³தி⁴பராயணா’’தி ஏவமாதி³னா ப⁴க³வதா பா⁴ஸிதம்.

லாபா⁴ தே கோ³தே⁴, ஸுலத்³த⁴ம் தே கோ³தே⁴, ஸோதாபத்திப²லம் தயா கோ³தே⁴ –

நந்தி³யஸக்கஸுத்த

புச்சா² – தேனாவுஸோ ஜானதா…பே… ஸம்மாஸம்பு³த்³தே⁴ன ஸோதாபத்திஸம்யுத்தே புஞ்ஞாபி⁴ஸந்த³வக்³கே³ த³ஸமம் நந்தி³யஸக்கஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கத²ஞ்ச பா⁴ஸிதம்.

விஸ்ஸஜ்ஜனா – ஸக்கேஸு ப⁴ந்தே கபிலவத்து²ஸ்மிம் நிக்³ரோதா⁴ராமே நந்தி³யம் ஸக்கம் ஆரப்³ப⁴ பா⁴ஸிதம். நந்தி³யோ ப⁴ந்தே ஸக்கோ ப⁴க³வந்தம் ஏதத³வோச ‘‘யஸ்ஸேவ நு கோ² ப⁴ந்தே அரியஸாவகஸ்ஸ சத்தாரி ஸோதாபத்தியங்கா³னி ஸப்³பே³ன ஸப்³ப³ம் ஸப்³ப³தா²ஸப்³ப³ம் நத்தி², ஸ்வேவ நு கோ² ப⁴ந்தே அரியஸாவகோ பமாத³விஹாரீ’’தி. தஸ்மிம் ப⁴ந்தே வத்து²ஸ்மிம் ‘‘யஸ்ஸ கோ² நந்தி³ய சத்தாரி ஸோதாபத்தியங்கா³னி ஸப்³பே³னஸப்³ப³ம் ஸப்³ப³தா²ஸப்³ப³ம் நத்தி², தமஹம் பா³ஹிரோ புது²ஜ்ஜனபக்கே² டி²தோதி வதா³மீ’’தி ஏவமாதி³னா ப⁴க³வதா பா⁴ஸிதம்.

ஸச்சஸம்யுத்த

திரச்சா²னகதா²ஸுத்த

புச்சா² – ஸச்சஸம்யுத்தே ஆவுஸோ போராணகேஹி த⁴ம்மஸம்கா³யகமஹாதே²ரேஹி த³ஸமம் ஸம்கீ³தம் திரச்சா²னகதா²ஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ மா பி⁴க்க²வே அனேகவிஹிதம் திரச்சா²னகத²ம் கதே²ய்யாத². ஸேய்யதி²த³ம், ராஜகத²ம் சோரகத²ம் மஹாமத்தகத²ம் ஸேனாகத²ம் ப⁴யகத²ம் யுத்³த⁴கத²ம் அன்னகத²ம் பானகத²ம் வத்த²கத²ம் ஸயனகத²ம் ஏவமாதி³னா ப⁴ந்தே ப⁴க³வதா பா⁴ஸிதம்.

இத³ம் து³க்க²ந்தி கதே²ய்யாத².

தஸ்மாதிஹ பி⁴க்க²வே இத³ம் து³க்க²ந்தி யோகோ³ கரணீயோ…பே… அயம் து³க்க²னிரோத⁴கா³மினீ படிபதா³தி யோகோ³ கரணீயோ.

த⁴ம்மசக்கபவத்தனஸுத்த

புச்சா² – தத்தே²வ ஆவுஸோ த⁴ம்மசக்கப்பவத்தனவக்³கே³ போராணகேஹி த⁴ம்மஸம்கா³ஹகமஹாதே²ரேஹி பட²மம் ஸம்கீ³தம் த⁴ம்மசக்கபவத்தனஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – பா³ராணஸியம் ப⁴ந்தே இஸிபதனே மிக³தா³யே பஞ்சவக்³கி³யே பி⁴க்கூ² ஆரப்³ப⁴ ‘‘த்³வே மே பி⁴க்க²வே அந்தா பப்³ப³ஜிதேன நஸேவிதப்³பா³. கதமே த்³வே, யோ சாயம் காமேஸு காமஸுக²ல்லிகானுயோகோ³ ஹீனோ க³ம்மோ போது²ஜ்ஜனிகோ அனரியோ அனத்த²ஸம்ஹிதோ, யோ சாயம் அத்தகிலமதா²னுயோகோ³ து³க்கோ² அனரியோ அனத்த²ஸம்ஹிதோ, ஏதே கோ² பி⁴க்க²வே உபோ⁴ அந்தே அனுபக³ம்ம மஜ்ஜி²மாபடிபதா³ ததா²க³தேன அபி⁴ஸம்பு³த்³தா⁴’’தி ஏவமாதி³னா ப⁴க³வதா பா⁴ஸிதம்.

ஆஸவக்க²யஸுத்த

புச்சா² – தத்தே²வ ஆவுஸோ கோடிகா³மவக்³கே³ போராணகேஹி த⁴ம்மஸம்கா³ஹகமஹாதே²ரேஹி பஞ்சமம் ஸம்கீ³தம் ஆஸவக்க²யஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ ‘‘ஜானதோஹம் பி⁴க்க²வே பஸ்ஸதோ ஆஸவானம் க²யம் வதா³மி, நோ அஜானதோ அபஸ்ஸதோ. கிஞ்ச பி⁴க்க²வே ஜானதோ பஸ்ஸதோ ஆஸவானம் க²யோ ஹோதி, இத³ம் து³க்க²ந்தி பி⁴க்க²வே ஜானதோ பஸ்ஸதோ ஆஸவானம் க²யோ ஹோதி, அயம் து³க்க²ஸமுத³யோதி, அயம் து³க்க²னிரோதோ⁴தி, அயம் து³க்க²னிரோத⁴கா³மினீபடிபதா³தி ஜானதோ பஸ்ஸதோ ஆஸவானம் க²யோ ஹோதி. ஏவம் கோ² பி⁴க்க²வே ஜானதோ ஏவம் பஸ்ஸதோ ஆஸவானம் க²யோ ஹோதி. தஸ்மாதிஹ பி⁴க்க²வே ‘‘இத³ம் து³க்க²’’ந்தி யோகோ³ கரணீயோ, அயம் து³க்க²ஸமுத³யோதி, அயம் து³க்க²னிரோதோ⁴தி, அயம் து³க்க²னிரோத⁴கா³மினீபடிபதா³தி யோகோ³ கரணீயோ’’தி ஏவம் கோ² ப⁴க³வதா பா⁴ஸிதம்.

ஸீஸபாவனஸுத்த

புச்சா² – தத்தே²வ ஆவுஸோ ஸீஸபாவனவக்³கே³ போராணகேஹி த⁴ம்மஸம்கா³ஹகமஹாதே²ரேஹி பட²மம் ஸம்கீ³தம் ஸீஸபாவனஸுத்தம் ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதம்.

விஸ்ஸஜ்ஜனா – கோஸம்பி³யம் ப⁴ந்தே ஸீஸபாவனே ஸம்ப³ஹுலே பி⁴க்கூ² ஆரப்³ப⁴ ‘‘தம் கிம் மஞ்ஞத² பி⁴க்க²வே, கதமம் நுகோ² ப³ஹுதரம் யானி வா மயா பரித்தானி ஸீஸபாபண்ணானி பாணினா க³ஹிதானி யதி³த³ம் உபரி ஸீஸபாவனே’’தி ஏவமாதி³னா ப⁴க³வதா பா⁴ஸிதம்.

பஞ்சக³திபேய்யாலவக்³க³

புச்சா² – தத்தே²வ ஆவுஸோ போராணகேஹி த⁴ம்மஸம்கா³ஹகமஹாதே²ரேஹி பரியோஸானபா⁴வேன ஸம்கீ³தோ பஞ்சக³திபேய்யாலவக்³கே³, ப⁴க³வதா கத்த² கம் ஆரப்³ப⁴ கத²ஞ்ச பா⁴ஸிதோ.

விஸ்ஸஜ்ஜனா – வேஸாலியம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ ‘‘தம் கிம் மஞ்ஞத² பி⁴க்க²வே, கதமம் நு கோ² ப³ஹுதரம், யோ வாயம் மயா பரித்தோ நக²ஸிகா²யம் பம்ஸு ஆரோபிதோ, அயம் வா மஹாபத²வீ’’தி ஏவமாதி³னா ப⁴க³வதா பா⁴ஸிதோ.

புச்சா² – கே ஆவுஸோ ஸிக்க²ந்தி.

விஸ்ஸஜ்ஜனா – ஸேக்கா² ச ப⁴ந்தே புது²ஜ்ஜனகல்யாணகா ச ஸிக்க²ந்தி.

புச்சா² – கே ஆவுஸோ ஸிக்கி²தஸிக்கா².

விஸ்ஸஜ்ஜனா – அரஹந்தோ ப⁴ந்தே ஸிக்கி²தஸிக்கா².

புச்சா² – கத்த² ஆவுஸோ டி²தம்.

விஸ்ஸஜ்ஜனா – ஸிக்கா²காமேஸு ப⁴ந்தே டி²தம்.