ஸாரிபுத்தஸம்யுத்த

ஸுசிமுகீ²ஸுத்த

புச்சா² – ஸாரிபுத்தஸம்யுத்தே பனாவுஸோ த³ஸமம் ஸுசிமுகீ²ஸுத்தம் கத்த² கம் ஆரப்³ப⁴ கிஸ்மிம் வத்து²ஸ்மிம் கேன கத²ஞ்ச பா⁴ஸிதம்.

விஸ்ஸஜ்ஜனா – ராஜக³ஹே ப⁴ந்தே ஸுசிமுகி²ம் பரிப்³பா³ஜிகம் ஆரப்³ப⁴ ஆயஸ்மதா ஸாரிபுத்தத்தே²ரேன த⁴ம்மஸேனாபதினா பா⁴ஸிதம். ஸுசிமுகீ² ப⁴ந்தே பரிப்³பா³ஜிகா ஆயஸ்மந்தம் ஸாரிபுத்தம் ஏதத³வோச ‘‘கிம் நு கோ² ஸமண அதோ⁴முகோ² பு⁴ஞ்ஜஸீ’’தி. தஸ்மிம் ப⁴ந்தே வத்து²ஸ்மிம் ‘‘ந க்²வாஹம் ப⁴கி³னி அதோ⁴முகோ² பு⁴ஞ்ஜாமீ’’தி ஏவமாதி³னா படிக்கி²பித்வா ‘‘யே ஹி கேசி ப⁴கி³னி ஸமணப்³ராஹ்மணா வத்து²விஜ்ஜா திரச்சா²னவிஜ்ஜாய மிச்சா²ஜீவேன ஜீவிகம் கப்பேந்தி, இமே வுச்சந்தி ப⁴கி³னி ஸமணப்³ராஹ்மணா அதோ⁴முகா² பு⁴ஞ்ஜந்தீ’’தி ஏவமாதி³னா ஆயஸ்மதா ஸாரிபுத்தத்தே²ரேன த⁴ம்மஸேனாபதினா பா⁴ஸிதம்.

கிம் நு கோ² ஸமண அதோ⁴ முகோ² பு⁴ஞ்ஜஸி.

ந க்²வாஹம் ப⁴கி³னி அதோ⁴முகோ² பு⁴ஞ்ஜாமி.

தேன ஹி ஸமண உப்³ப⁴முகோ² பு⁴ஞ்ஜஸி.

ந க்²வாஹம் ப⁴கி³னி உப்³ப⁴முகோ² பு⁴ஞ்ஜாமி.