ஏகூனபஞ்ஞாஸதிம பரிச்சே²த³

ராஜத்³வயதீ³பனோ

1. ஏவம் தஸ்மிம் மதே தஸ்ஸ, காதப்³ப³ம் ஸாது⁴காரிய;

மஹாதீ³பாதோ³ ஸேனவ்ஹோ, ஆதா³ய ப³லவாஹனம்.

2. ஆக³ம்ம நக³ரம் ராஜா, அஹோஸி த⁴ரணீ தலே;

ஆதி³கப்பம்ஹி ராஜூனம், த³ஸ்ஸந்தோ சரியம் பிய.

3. ஸத்³தோ⁴ மஹாத⁴னோ ஸூரோ, முத்தசாகீ³ நிராலயோ;

யாசயோகோ³ மஹாபோ⁴கோ³, ஸம்பன்னப³லவாஹனோ.

4. கித்தியா’மலபூ⁴தாய, ததா² தேஜோ கு³ணேன ச;

ஸன்னிபாதம்வ ஸோ சந்த³-ஸூரியானம் நித³ஸ்ஸயி.

5. அஸங்கிண்ண கு³ணாகிண்ணோ, ஸுவிசிண்ண கு³ணாகு³ணோ;

நித்தி²ண்ணபாபோ நிப்³பி³ண்ண-ஸம்ஸாரோ ஸாரத³ஸ்ஸனோ.

6. ப⁴ரியா தஸ்ஸ யா ஆஸி, ஸங்கா⁴தம் ஸோ பி⁴ஸேசயி;

மஹேஸீபா⁴வே த³த்வான, பரிஹாரம் யதா²ப⁴தம்.

7. மஹிந்த³ம் நாம ஸப்பஞ்ஞம், கணிட்ட²ம் பா⁴தரம் ஸகம்;

த³த்வா த³க்கி²ணபா⁴க³ம் ஸோ, ஓபரஜ்ஜே’பி⁴ஸேசயி.

8. அந்தேபுரே’பரஜ்ஜி²த்வா, ஸோ ரஞ்ஞா அவதா⁴ரிதே;

ஸபுத்ததா³ரோ வுட்டா²ய, அஞ்ஞாதோ மலயம் அகா³.

9. உப்பஜ்ஜித்த² ததா³ புத்தோ, ரஞ்ஞோ ஸங்கா⁴ய தே³வியா;

த³ஸ்ஸேந்தோ’வ பனாத³ஸ்ஸ, குமார ரூபமத்தனோ.

10. ராஜா தம் ஜாதமத்தம்’வ, தி³ஸ்வா ஸந்து²ட்ட²மானுஸோ;

ஸித்³த⁴த்த²ம் லும்பி³னீஜாதம், ராஜா ஸுத்³தோ⁴த³னோ விய.

11. த⁴ஞ்ஞபுஞ்ஞகு³ணூபேதோ, ட²பேத்வா தீ³பமேககம்;

ஜம்பு³தீ³பே’பி கஸிணே, ரஜ்ஜயோக்³கோ³தி மே ஸுதோ.

12. நாமதா³ன தி³னேயேவ, பரிஹாரேன ஸப்³ப³ஸோ;

ஓபரஜ்ஜே பி⁴ஸிஞ்சித்வா, த³க்கி²ணம் தே³ஸமஸ்ஸ’தா³.

13. யுவராஜாபி மலயே, வஸந்தோ’வ மஹீபதிம்;

ஆராதே⁴த்வா உபாயேன, அனுஞ்ஞதோ ஸபா⁴தரா.

14. நிகாயத்தய வா ஸீஹி, ஸத்³தி⁴ம் பி⁴க்கூ²ஹி ஆக³தோ;

தி³ஸ்வா ராஜானமேத்தே²வ, ஸந்தீ⁴ம்’காஸி அகுப்பியம்.

15. யா தஸ்ஸ யுவராஜஸ்ஸ, ப⁴ரியா திஸ்ஸா நாமிகா;

ராஜினீ ஸா விஜாயித்த², தீ⁴தரம் ஸங்க⁴னாமிகம்.

16. கித்தினாமா’பராயா ச, ப⁴ரியா ஸாபி கோ² பன;

விஜாயி புத்தே சத்தாரோ, ததா² ஏகஞ்ச தீ⁴தரம்.

17. ததா³ ராஜாபி சிந்தேத்வா, ஏவம் ஸதி கணிட்ட²கோ;

நிஸ்ஸங்கோ மயி ஹோதீதி, ஸம்மா மந்தீஹி மந்திய.

18. தீ⁴தரம் யுவராஜஸ்ஸ, ஸுரூபிம் ரூபனாமிகம்;

கஸ்ஸபஸ்ஸ’த்த புத்தஸ்ஸ, விவாஹம் காரயி பு³தோ⁴.

19. த³க்கி²ணம் தே³ஸமஸ்ஸேவ, கணிட்ட²ஸ்ஸ ஸதா³பயி;

ராஜபுத்தஸ்ஸ பாதா³பி, பச்சேகம் போ⁴க³மத்தனோ.

20. ரஜ்ஜம்ஹி ஸப்³ப³ம் தஸ்ஸேவ, பரிபோ⁴கா³ய தா³பயி;

கேவலந்து விசாரேஸி, தீ³பம் தீ³ப ஹிதாவஹோ.

21. தேஸம் ஸம்வாஸமன்வாய, உபி⁴ன்னம் புஞ்ஞகம்மினம்;

த⁴ஞ்ஞபுஞ்ஞகு³ணூபேதா, விஜாதா புத்ததீ⁴தரோ.

22. கத்வா ஸப்³போ³பஹாரேன, தா³டா²தா⁴து மஹாமஹம்;

ஆருய்ஹ வரபாஸாத³ம், ரதனவ்ஹம் மஹீபதி.

23. ததா³ ஸோவண்ணயஸ்ஸாபி, ஸம்பு³த்³த⁴ஸ்ஸ புரா டி²தம்;

ஸுஞ்ஞம் பிட்ட²ம் ஸயம் தி³ஸ்வா, கஸ்மா ஏவந்தி ஸம்வதி³.

24. ததோ அமச்சா ஆஹம்ஸு, நாஜானாஸி மஹீபதி;

மஹாபிதுனரிந்த³ஸ்ஸ, காலே தவ நரிஸ்ஸரம்.

25. பண்டு³ராஜா இதா⁴க³ம்ம, தீ³பமேதம் வினாஸிய;

ஸப்³ப³ம் ஸாரக³தம் தீ³பே, ஸமாதா³ய க³தோ இதி.

26. தம் ஸுத்வா லஜ்ஜிதோ ராஜா, ஸயம் விய பராஜிதோ;

தத³ஹேவ நியோஜேஸி, அமச்சே ப³லஸங்க³ஹே.

27. ததா³’வ கிர ஆக³ஞ்சி², பண்டு³ராஜகுமாரகோ;

பரிபூ⁴தோ ஸராஜேன, ரஜ்ஜத்த²ம் கத நிச்ச²யோ.

28. ராஜா தி³ஸ்வா’தி ஸந்துட்டோ², கத்தப்³ப³ம் தஸ்ஸ காரிய;

மஹாதித்த² முபாக³ம்ம, பட்டனம் ஸேமத்ரஸோ.

29. மஹந்தம் ப³லகாயஞ்ச, தஸ்ஸோபகரணானி ச;

அனுனம் படியாதே³த்வா, தே³வஸேனம்வ ஸஜ்ஜிதம்.

30. பண்டு³ராஜகுமாரேன, ஸத்³தி⁴ம் ஸேனாபதி ஸகம்;

க³ந்த்வா தம் பண்டு³ராஜானம், ஹந்த்வானிகமிதோ புரா.

31. ரதனம் ஸப்³ப³மாதா³ய, த³த்வா ரஜ்ஜம் இமஸ்ஸ ச;

ந சிரேனேவ ஏஹீதீ, உய்யோஜேஸி மஹாயஸோ.

32. ஸோபி ஏவம் கரோமீதி, படிஸ்ஸுத்வா மஹீபதிம்;

விந்தி³த்வா ப³லமாதா³ய, நாமமாருய்ஹ தம் க²ணே.

33. பரதீரம் ததோ க³ந்த்வா, ஸம்வுளஹ ப³லவாஹனோ;

வினாஸயந்தோ பச்சந்தம், வாரேஸி மது⁴ரம் புரம்.

34. த்³வாரானி பித³ஹித்வான, பச்சி²ந்தி³த்த² க³தாக³தம்;

ததோ அக்³கி³ம் கி²பாபேஸி, கோ³புரட்டால கோட்ட²கே.

35. ஏவம் ஸீஹளஸேனாய, பவிட்டா²ய ஸகம் புரம்;

ஸப்³ப³ம் விலும்பமானாய, ஸேனங்க³ம் கா⁴தயந்தியா.

36. பண்டு³ராஜா நிஸம்மேதம், ஸமாதா³ய ஸகம் ப³லம்;

வேக³ஸா தம் ஸமாக³ம்ம, யுத்³த⁴ம் காதும் ஸமாரபி⁴.

37. அஸம்புண்ண ப³லத்தா ஸோ, வித்³தோ⁴ ஸல்லேன பூ⁴பதி;

ஹத்தி²க்க²ந்த⁴க³தோயேவ, விஹாய புரமத்தனோ.

38. பலாயித்வா க³தடா²னே, ஜீவிதம் நிஜமேஸ்ஸஜி;

ப⁴ரியாவ’ஸ்ஸ தேனாஸி, ஸம்பத்தா ஜீவிதக்க²யம்.

39. ததோ ஸீஹளஸேனாஸா, பவிட்டா² நிப்³ப⁴யா புரம்;

தத்த² ஸப்³ப³ம் விலும்பித்த², தே³வா’ஸிரபுரம் யதா².

40. ஸேனாபதி ததோ ராஜ-கே³ஹே ப⁴த்தம் ஸமேக்கி²ய;

தீ³பானிதமிமம்ஹா ச, தத்ரட்ட²ஞ்ச மஹாரஹம்.

41. ஸாரம் ஸப்³ப³ம்ஸமாதா³ய, தே³ஸே ச நக³ரே டி²தம்;

கத்வா இஸ்ஸரியம் தத்த², வஸேவத்திய அத்தனோ.

42. பண்டு³ராஜ குமாரம் து, தத்த² ரஜ்ஜே’பி⁴ ஸிஞ்சிய;

காரேத்வா பரிஹாரஞ்ச, தே³ஸம் தஸ்ஸ ஸமப்பிய.

43. யதா²ருசிம் க³ஹேத்வான, ஹத்தி²அஸ்ஸே நரே’பி ச;

தத்த² தத்த² யதா² காமம், வஸந்தோ அகுதோ ப⁴யோ.

44. ஸமுத்³த³ தடமாக³ம்ம, ட²த்வா தத்த² யதா²ஸுக²ம்;

கீளந்தோ விய நாவம் ஸோ, ஸமாருய்ஹ விஸாரதோ³.

45. மஹாதித்த² முபாக³ம்ம, வந்தி³த்வா த⁴ரணீ பதிம்;

தம் ஸாஸனம் நிவேதே³த்வா, ஸாரம் த³ஸ்ஸேஸி ஆஹடம்.

46. ராஜா ஸாதூ⁴தி வத்வான, காரேத்வா தஸ்ஸ ஸங்க³ஹம்;

ஸத்³தி⁴ம் ஸேனாய ஆக³ந்த்வா, பகட்டா²ய ஸகம் புரம்.

47. ஜயபானம் பிவித்வான, கத்வா விஜயமங்க³லம்;

மஹாதா⁴க³ம் பவத்தேத்வா, யாசகானம் யதா² ருசிம்.

48. ஸப்³ப³ம் பாகதிகம் காஸி, ஸாரம் தீ³பே நிராலயோ;

ஸோவண்ண படிமாயோ ச, யதா²டா²னே ட²பாபயி.

49. ஸுஞ்ஞம் ரதனபாஸாதே³, பிட்ட²ம் பூரேஸி ஸத்து²னோ;

காஸி ரக்க²பிதா⁴னேன, நிப்³ப⁴யம் த⁴ரணீதலம்.

50. ததோ பட்டா²ய தீ³பம்ஸோ, அரீனம் து³ப்பத⁴ம்ஸியம்;

கத்வா வட்³டே⁴ஸி போ⁴கே³ஹி, உத்தராதி³குரும் பிய.

51. கி²ன்னா புப்³ப³ஸ்ஸ ராஜஸ்ஸ, காலே தீ³பம்ஹி பாணினோ;

நிப்³பு³தா தம் ஸமாக³ம்ம, க⁴ம்மா விய வலாஹகா.

52. தஸ்ஸ வீஸதிமே வஸ்ஸே, விஹாரே அப⁴யுத்தரே;

நிக்க²மித்வா க³தா ஹேஸும், பம்ஸுகூலிக பி⁴க்க²வோ.

53. யுவராஜா மஹிந்தோ³ ஸோ, து⁴மராஜஸ்ஸ ஸத்து²னோ;

காராபயி க⁴ரம் ரம்மம், த³ஸ்ஸனேய்யம் மனோரமம்.

54. போ³தி⁴கே³ஹம் கரோந்தோ தம், தி³ஸ்வா வட்³ட⁴கீனோ ததா³;

வம்ஸேன ஸாக²ம் ஆஹச்ச, பி⁴ஜ்ஜந்தம் வரபோ³தி⁴யா.

55. கிந்து காதப்³ப³மேத்தா²தி, யுவராஜம் நிவேத³யும்;

ஸோ தம் தம் முபஸம்கம்ம, மஹாபூஜாய பூஜிய.

56. ஸசே ஸத்தா², ஹிதத்தா²ய, ஸம்பூ⁴தோ ஸப்³ப³பாணினம்;

லத்³து⁴ம் புஞ்ஞஸ்ஸ’நக்³க⁴ஸ்ஸ, க⁴ரஸ்ஸ கரணேதி’த⁴.

57. ஸாகா² க³ச்ச²ம் து உத்³த⁴ம்வ, காதும் ஸக்கா யதா²க⁴ரம்;

ஏவமாராத⁴யித்வான, வந்தி³த்வா ஸங்க⁴ரம் க³தோ.

58. ததா³ ஸாகா² து³மிந்த³ஸ்ஸ, ரத்தியம் உத்³த⁴முக்³க³மி;

ததோ கம்மகரா ஸப்³ப³ம், ஆரோசேஸும் ஸஸாமினோ.

59. யுவராஜா’தி ஸந்துட்டோ², பா⁴துரஞ்ஞோ நிவேதி³ய;

மஹாபூஜாய பூஜேஸி, விஸ்ஸஜ்ஜிய ப³ஹுத⁴னம்.

60. ததா² மஹிந்த³ஸேனவ்ஹம், பரிவேணஞ்ச காரிய;

ஸங்க⁴ஸ்ஸா’தா³ ஸபோ⁴க³ம் ஸோ, புஞ்ஞா புஞ்ஞானிசாசீனி.

61. அதா³ ஸபரிஸம் ப⁴த்தம், வத்த²ம் ச²த்தமுபாஹனம்;

ததா² க³மியப⁴த்தஞ்ச, நஹானஞ்ச ஸப⁴த்தகம்.

62. ஏவம் கு²த்³தா³னு கு²த்³தா³னி, கத்வா புஞ்ஞானி ஸோ விபூ⁴;

ரஞ்ஞோ தேத்திம்ஸவஸ்ஸம்ஹி, யதா²கம்மமுபாக³மி.

63. அத² ராஜா மதேதஸ்மிம், கணிட்ட²முத³யம் ஸகம்;

தஸ்ஸ டா²னே ட²பேத்வான, ஸப்³ப³ம் தஸ்ஸேவ தஸ்ஸதா³.

64. துலாபா⁴ரஸ்ஸ தா³னேன, தீ³னானாதே² ஸதப்பயி;

த⁴ம்மகம்மேன ஸோதே⁴ஸி, நிகாயத்தயமேகதோ.

65. ஸோண்ணதா²லீஸஹஸ்ஸம் ஸோ, முத்தாஹி பரிபூரிய;

ட²பேத்வா மணிமேகேகம், தஸ்ஸோபரி மஹாரஹம்.

66. ப்³ராஹ்மணானம் ஸஹஸ்ஸஸ்ஸ, ஸுத்³தே⁴ ரதனபா⁴ஜனே;

போ⁴ஜேத்வா கீ²ரபாயாஸம், தா³பேத்வா ஹேமஸுத்தகம்.

67. ததா² நவேஹி வத்தே²ஹி, அச்சா²தே³த்வா யதா²ருசிம்;

ஸந்தப்பேஸி மஹந்தேன, பரிஹாரேன புஞ்ஞவா.

68. பி⁴க்கூ²னம் தீ³பவாஸீனம், அதா³ஸி ச திசீவரம்;

அதா³ ஸப்³பா³ஸமித்தீ²னம், வத்த²ஞ்ச ஸுமனோஹரம்.

69. காரேத்வா லோஹபாஸாத³ம், வேஜயந்தஸரிக்க²கம்;

வட்³டே⁴ஸி படிமம் தத்த², ஸுவண்ணக⁴டகோட்டிமம்.

70. ஸுத்வா உபோஸதா²கா³ர-பா⁴வம் ஸப்³ப³ மஹேஸீனம்;

துச்சோ² யம் நேவ ஹோதூதி, வாஸம் ஸங்க⁴ஸ்ஸ தம் அகா.

71. போ⁴க³கா³மே ச தஸ்ஸதா³, ரக்க²கே ச நியோஜயி;

பி⁴க்கூ² த்³வத்திம்ஸமத்தாஹி, வஸந்தூதி நியாமயி.

72. க³ங்கா³ய மரியாத³ம் ஸோ, காரேஸி மணிமேக²லம்;

தோயனித்³த⁴மனஞ்சாகா, மணிஹீரகவாபியா.

73. கட்டு²ந்தனக³ரே சேவ, காணவாபிம்ச ப³ந்த⁴யி;

வேஜ்ஜஸாலஞ்ச காரேஸி, சேதியம்ஹி கி³ரிம்ஹி ஸோ.

74. பு³த்³த⁴கா³மவிஹாரஞ்ச, விஹாரம் மஹியங்க³ணம்;

கூடதிஸ்ஸ விஹாரஞ்ச, போ⁴க³கா³மே ந வட்³ட⁴யி.