ஸத்தவீஸதிம பரிச்சே²த³

லோஹபாஸாத³மஹோ

1. ததோ ராஜா விசிந்தேஸி, விஸ்ஸுதம் ஸுஸ்ஸுதம் ஸுதம்;

மஹாபஞ்ஞோ ஸதா³ புஞ்ஞோ, பஞ்ஞாய கதனிச்ச²யோ.

2. ‘‘தீ³பப்பஸாத³கோ தே²ரோ, ராஜினோ அய்யகஸ்ஸ மே;

ஏவம் கிராஹனத்தா தே, து³ட்ட²கா³மணிபூ⁴பதி.

3. மஹாபுஞ்ஞோ மஹாதூ²பம், ஸோண்ணமாலிம் மனோரமம்;

வீஸம்ஹத்த²ஸதம் உச்சம், காரேஸ்ஸதி அனாக³தே.

4. புனோ உபோஸதா²கா³ரம், நானாரதனமண்டி³தம்;

நவபூ⁴மம் கரித்வான, லோஹபாஸாத³ மேவ ச.

5. இதி சிந்திய பூ⁴மிந்தோ³, லிகி²த்வேவம் ட²பாபிதம்;

பேக்கா²பேந்தோ ராஜகே³ஹே, டி²தம் ஏவ கரண்ட³கே.

6. ஸோவண்ணபட்டம் லத்³தா⁴ன, லேக²ம் தத்த² அவாசயி;

‘‘சத்தாலீஸஸதம் வஸ்ஸம், அதிக்கம்ம அனாக³தே.

7. காகவண்ணஸுதோ து³ட்ட²-கா³மணிமனுஜாதி⁴போ;

இத³ஞ்சித³ஞ்ச ஏவஞ்ச, காரேஸ்ஸதீ’’தி வாசிதம்.

8. ஸுத்வா ஹட்டோ² உதா³னேத்வா, அப்போட்டே²ஸி மஹீபதி;

ததோ பாதோ’வ க³ந்த்வான, மஹாமேக⁴வனம் ஸுப⁴ம்.

9. ஸன்னிபாதம் காரயித்வா, பி⁴க்கு²ஸங்க⁴ஸ்ஸ அப்³ரவி;

‘‘விமானதுல்யம் பாஸாத³ம், காரயிஸ்ஸாமி வோ அஹம்.

10. தி³ப்³ப³ம் விமானம் பேஸேத்வா, ததா³ லேக²ம் அதா³த² மே’’;

பி⁴க்கு²ஸங்கோ⁴ விஸஜ்ஜேஸி, அட்ட² கீ²ணாஸவே தஹிம்.

11. கஸ்ஸபமுனினோ காலே, அஸோகோ நாம ப்³ராஹ்மணோ;

அட்ட² ஸலாகப⁴த்தானி, ஸங்க⁴ஸ்ஸ பரிணாமிய.

12. ப⁴ரணிம் நாம தா³ஸிம் ஸோ, ‘‘நிச்சம் தே³ஹீ’’தி அப்³ரவி;

த³த்வா ஸா தானி ஸக்கச்சம், யாவஜீவம் ததோ சுதா.

13. ஆகாஸட்ட²விமானம்ஹி, நிப்³ப³த்திருசிரே ஸுபே⁴;

அச்ச²ரானம் ஸஹஸ்ஸேன, ஸதா³’ஸி பரிவாரிதா.

14. தஸ்ஸா ரதனபாஸாதோ³, த்³வாத³ஸயோஜனுக்³க³தோ;

யோஜனானம் பரிக்கே²போ, சத்தாலீஸஞ்ச அட்ட² ச.

15. கூடாகா³ரஸஹஸ்ஸேன, மண்டி³தோ நவபூ⁴மிகோ;

ஸஹஸ்ஸக³ப்³ப⁴ஸம்பன்னோ, ராஜமானோ சதும்முகோ².

16. ஸஹஸ்ஸஸங்க²ஸம்வுத்தி, ஸீஹபஞ்ஜர நேத்தவா;

ஸகிங்கணிகஜாலாய, ஸஜ்ஜிதோ வேதி³காய ச.

17. அம்ப³லட்டி²கபாஸாதோ³, தஸ்ஸ மஜ்ஜே² டி²தோ அஹு;

ஸந்தமதோ தி³ஸ்ஸமானோ, பக்³க³ஹிதத⁴ஜாகுலோ.

18. தாவதிம்ஸஞ்ச க³ச்ச²ந்தா, தி³ஸ்வா தே²ரம் தமேவ தே;

ஹிங்கு³லேன ததா³ லேக²ம், லேக²யித்வா படே ததோ.

19. நிவத்தித்வான ஆக³ந்த்வா, படம் ஸங்க⁴ஸ்ஸ த³ஸ்ஸயும்;

ஸங்கோ⁴ படம் க³ஹேத்வா தம், பாஹேஸி ராஜஸந்திகம்.

20. தம் தி³ஸ்வா ஸுமனோ ராஜா, ஆக³ம்மாராம முத்தமம்;

ஆலேக²துல்யம் காரேஸி, லோஹபாஸாத³ முத்தமம்.

21. கம்மாரம்ப⁴னகாலேவ, சதுத்³வாரம்ஹி போ⁴க³வா;

அட்ட²ஸதஸஹஸ்ஸானி, ஹிரஞ்ஞானி ட²பாபயி.

22. புடஸஹஸ்ஸ வத்தா²னி, த்³வாரே த்³வாரே ட²பாபயி;

கு³ள தேலஸக்க²ரமது⁴-புரா சானேக சாடியோ.

23. ‘‘அமூலககம்ம மேத்த², ந காதப்³ப³’’ந்தி பா⁴ஸிய;

அக்³கா⁴பேத்வா கதம் கம்மம், தேஸம் மூலமதா³பயி.

24. ஹத்த²ஸதம் ஹத்த²ஸதம், ஆஸி ஏகேக பஸ்ஸதோ;

உச்சதோ தத்தகோயேவ, பாஸாதோ³ ஹி சதும்முகோ².

25. தஸ்மிம் பாஸாத³ ஸேட்ட²ஸ்மிம், அஹேஸும் நவபூ⁴மியோ;

ஏகேகிஸ்ஸா பூ⁴மியா ச, கூடாகா³ரஸதானி ச.

26. கூடாகா³ரானி ஸப்³பா³னி, ஸஜ்ஜு²னா க²சிதா ந’யும்;

பவாலவேதி³கா தேஸம், நானாரதன பூ⁴ஸிதா.

27. நானாரதன சித்தானி, தாஸம் பது³மகானி ச;

ஸஜ்ஜ²கிம்கிணிகாபந்தி-பரிக்கி²த்தாவ தா அஹு.

28. ஸஹஸ்ஸம் தத்த² பாஸாதோ³, க³ப்³பா⁴ ஆஸும் ஸுஸங்க²தா;

நானாரதன க²சிதா, ஸீஹபஞ்ஜரனேத்தவா.

29. நாரிவாஹனயானந்து, ஸுத்வா வேஸ்ஸவணஸ்ஸ ஸோ;

ததா³ காரமகாரேஸி, மஜ்ஜே² ரதனமண்ட³பம்.

30. ஸீஹப்³யக்³கா⁴தி³ரூபேஹி, தே³வதா ரூபகேஹி ச;

அஹு ரதனமயோஹே’ஸ, த²ம்பே⁴ஹி ச விபூ⁴ஸிதோ.

31. முத்தாஜாலபரிக்கே²போ, மண்ட³பந்தே ஸமந்ததோ;

பவாலவேதி³கா சேத்த², புப்³பே³ வுத்தவிதா⁴ அஹு.

32. ஸத்தரதன சித்தஸ்ஸ, வேமஜ்ஜே² மண்ட³பஸ்ஸ து;

ருசிரோ த³ந்தபல்லங்கோ, ரம்மோ ப²லிகஸந்த²ரோ.

33. த³ந்தமயாபஸ்ஸயே’த்த², ஸுவண்ணமய ஸூரியோ;

ஸஜ்ஜு²மயே சந்தி³மா ச, தாரா ச முத்தகா மயா.

34. நானாரதன பது³மானி, தத்த² தத்த² யதா²ரஹம்;

ஜாதகானி ச தத்தே²வ, ஆஸும் ஸோண்ணலதந்தரே.

35. மஹக்³க⁴பச்சத்த²ரணே, பல்லங்கே’தி மனோரமே;

மனோஹரா’ஸிட்ட²பிதா, ருசிரம் த³ந்தபீ³ஜனீ.

36. பவாலபாது³கா தத்த², ப²லிகம்ஹி பதிட்டி²தா;

ஸேதச்ச²த்தம் ஸஜ்ஜு²த³ண்ட³ம், பல்லங்கோ’பரிஸோப⁴த².

37. ஸத்தரதன மயானேத்த², அட்ட²மங்க³லிகானி ச;

சதுப்பதா³னம் பந்தீ ச, மணிமுத்தந்தரா அஹும்.

38. ரஜதானஞ்ச க⁴ண்டானம், பந்தீ ப⁴த்தந்தலம்பி³தா;

பாஸாத³ச²த்தபல்லங்க-மண்ட³பா’ஸும் அனக்³கி⁴கா.

39. மஹக்³க⁴ பஞ்ஞபாபேஸி, மஞ்சபீட²ம் யதா²ரஹம்;

ததே²வ பூ⁴மத்த²ரணம், கம்ப³லஞ்ச மஹாரஹம்.

40. ஆசாம கும்பி⁴ஸோவண்ணா, உலுங்கோ ச அஹு தஹிம்;

பாஸாத³ பரிபோ⁴கே³ஸு, ஸேஸேஸு ச கதா²’ வகா.

41. சாருபாகார பரிவாரோ,

ஸோ சதுத்³வாரகோட்ட²கோ;

பாஸாதோ³’லங்கதோ ஸோபி⁴,

தாவதிம்ஸ ஸபா⁴ விய.

42. தம்ப³ லோஹிட்ட²காஹே’ஸோ,

பாஸாதோ³ சா²தி³தோ அஹு;

லோஹ பாஸாத³ வோஹாரோ,

தேன தஸ்ஸ அஜாயத².

43. நட்டி²தே லோஹபாஸாதே³, ஸோ ஸங்க⁴ம் ஸன்னிபாதயி;

ராஜா ஸங்கோ⁴ ஸன்னிபதி, மரிசவட்டிமஹே விய.

44. புது²ஜ்ஜனா’வ அட்ட²ம்ஸு, பி⁴க்கூ² பட²மபூ⁴மியம்;

தேபிடகா து³தியாய, ஸோதாபன்னாத³யோ பன.

45. ஏகே கேயேவ அட்ட²ம்ஸு, ததியாதீ³ஸு பூ⁴மிஸு;

அரஹந்தோ ச அட்ட²ம்ஸு, உத்³த⁴ம் சதூஸு பூ⁴மிஸு.

46. ஸங்க⁴ஸ்ஸ த³த்வா பாஸாத³ம், த³க்கி²ணம்பு³புரஸ்ஸரம்;

ராஜா’த³த்த² மஹாதா³னம், ஸத்தாஹம் புப்³ப³கம் பிய.

47. பாஸாத³ மஹசத்தானி, மஹாசாகே³ன ராஜினா;

அனக்³கா⁴னி ட²பேத்வான, அஹேஸும் திம்ஸகோடியோ.

48. நிஸ்ஸாரே த⁴னனிசயே விஸேஸஸாரம்,

யே தா³னம் பரிக³ணயந்தி ஸாது⁴பஞ்ஞா;

தே தா³னம் விபுலமபேத சித்தஸங்கா³,

ஸத்தானம் ஹிதபரமா த³த³ந்தி ஏவம்தி.

ஸுஜனப்பஸாத³ஸம்வேக³த்தா²ய கதே மஹாவம்ஸே

லோகஹபாஸாத³மஹோ நாம

ஸத்தவீஸதிமோ பரிச்சே²தோ³.