பஞ்சவீஸதிம பரிச்சே²த³

து³ட்ட²கா³மணி விஜயோ

1. து³ட்ட²கா³மணிராஜா’த², கத்வான ஜனஸங்க³ஹம்;

குந்தே தா⁴தும் நிதா⁴பேத்வா, ஸயோக்³க³ப³லவாஹனோ.

2. க³ந்த்வா திஸ்ஸமஹாராமம், வந்தி³த்வா ஸங்க⁴மப்³ரவி;

‘‘பாரக³ங்க³ம் க³மிஸ்ஸாமி, ஜோதேதும் ஸாஸனம் அஹம்.

3. ஸக்காதும் பி⁴க்க²வோ தே³த², அம்ஹேஹி ஸஹகா³மினோ;

மங்க³லஞ்சேவ ரக்கா² ச, பி⁴க்கூ²னம் த³ஸ்ஸனம் ஹினோ.

4. அதா³ஸி த³ண்ட³கம்மத்த²ம், ஸங்கோ⁴ பஞ்சஸதம் யதீ;

பி⁴க்கு²ஸங்க⁴தமாதா³ய, ததோ நிக்க²ம்ம பூ⁴பதி.

5. ஸோதா⁴பேத்வான மலயே, இதா⁴க³மனமஞ்ஜஸம்;

கண்டு³லம் ஹத்தி²மாருய்ஹ, யோதே⁴ஹி பரிவாரிதோ.

6. மஹதா ப³லகாயேன, யுத்³தா⁴ய அபி⁴னிக்க²மி;

மஹாகா³மேன ஸம்ப³த்³தா⁴, ஸேனாகா³’கு³த்தஹாலகம்.

7. மஹியங்க³ணமாக³ம்ம, ச²த்தம் த³மிளமக்³க³ஹீ;

கா⁴தேத்வா த³மிளே தத்த², ஆக³ந்த்வா அம்ப³தித்த²கம்.

8. க³ங்கா³ பரிகா²ஸம்பன்னம், தித்த²ம்ப³த³மிளம் பன;

யுஜ்ஜ²ம் சதூஹி மா ஸேஹி, கதஹத்த²ம் மஹப்³ப³லம்.

9. மாதரம் த³ஸ்ஸயித்வான, தேன லேஸேன அக்³க³ஹி;

ததோஓருய்ஹ த³மிளே, ஸத்தராஜே மஹப்³ப³லே.

10. ஏகாஹேனேவ க³ண்ஹித்வா, கே²மம் கத்வா மஹப்³ப³லோ;

ப³லஸ்ஸா’தா³ த⁴னம் தேன, கே²மாராமோதி வுச்சதி.

11. மஹாகோட்ட²ந்தரே ஸோப்³பே⁴, தோ³ணோ க³வரமக்³க³ஹீ;

ஹாலகோலே இஸ்ஸரியம், நாளிஸோப்³ப⁴ம்ஹி நாளிகம்.

12. தீ³கா⁴ப⁴யக³ல்லகம்ஹி, க³ண்ஹி தீ³கா⁴ப⁴யம்பி ச;

கச்சி²பிட்டே² கபிஸீஸம், சதுமாஸேன அக்³க³ஹி.

13. கோடனக³ரே கோடஞ்ச, ததோ ஹாலவஹாணகம்;

வஹிட்டே² வஹிட்ட²த³மிளம், கா³மணிம்ஹி ச கா³மணிம்.

14. கும்ப⁴கா³மம்ஹி கும்ப⁴ஞ்ச, நந்தி³கா³மம்ஹி நந்தி³கம்;

க³ண்ஹி கா²ணும் கா²ணுகா³மே, த்³வே து தம்பு³ண்ணமே பன.

15. மாதுலம் பா⁴கி³னேய்யஞ்ச, தம்ப³உண்ணமனாமகே;

ஜம்பு³சக்³க³ஹீ ஸோஸோ ச, கா³மோ’ஹு தம் தத³வ்ஹயோ.

16. ‘‘அஜானித்வா ஸகம்ஸேனம், கா⁴தேந்தி ஸஜனா’’ இதி;

ஸுத்வான ஸச்சகிரியம், அகரீ தத்த² பூ⁴பதி.

17. ரஜ்ஜஸுகா²ய வாயாமோ, நாயம் மம கதா³சிபி;

ஸம்பு³த்³த⁴ ஸாஸனஸ்ஸேவ, ட²பனாய அயம் மம.

18. தேன ஸச்சேன மேஸேனா-காயோபக³தப⁴ண்டி³கம்;

ஜாலவண்ணம்வ ஹோதூதி, தம் ததே²வததா³ அஹு.

19. க³ங்கா³தீரம்ஹி த³மிளா, ஸப்³பே³ கா⁴திதஸேஸகா;

விஜிதம் நக³ரம் நாம, ஸரணத்தா²ய பாவிஸும்.

20. பா²ஸுகே அங்க³ணடா²னே, க²ந்தா⁴வாரம் நிவேஸயி;

தம் க²ந்தா⁴வார… டீ²தி, நாமேனா’ஹோஸி பாகடம்.

21. விஜிதனக³ரகா³ஹத்த²ம், வீமம்ஸந்தோ நராதி⁴போ;

தி³ஸ்வா’யந்தம் நந்தி³மித்தம், விஸஜ்ஜாபேஸி கண்டு³லம்.

22. க³ண்ஹிதும் ஆக³தம் ஹத்தி²ம், நந்தீ³மித்தோ கரேஹிதம்;

உபோ⁴ த³ந்தே பீளயித்வா, உக்குடிகம் நிஸீத³யி.

23. ஹத்தி²னா நந்தி³மித்தோ து, யஸ்மா யத்த² அயுஜ்ஜி² ஸோ;

தஸ்மா தத்த² ததோ கா³மோ, ஹத்தி²போரோதி வுச்சதி.

24. வீமம்ஸித்வா உபோ⁴ ராஜா, விஜிதம் நக³ரம் அகா³;

யோதா⁴னம் த³க்கி²ணத்³வாரே, ஸங்கா³மோ ஆஸி பி⁴ம்ஸனோ.

25. புரத்தி²மம்ஹி த்³வாரம்ஹி, ஸோ வேளுஸுமனோ பன;

அனேக ஸங்கே² த³மிளே, அஸ்ஸாருள்ஹே அகா⁴தயி.

26. த்³வாரம் த²கேஸும் த³மிளா, ராஜா யோதே⁴ விஸஜ்ஜயி;

கண்ணுலோ நந்தி³மித்தோ ச, ஸுரனிமிலோ ச த³க்கி²ணே.

27. மஹாஸோணோ ச கோ³ட்டோ² ச,

தே²ர புத்தோ ச தே தயோ;

த்³வாரேஸு தீஸு கம்மானி,

இதரேஸு ததா³ கரும்.

28. நக³ரம் தம் திபரிக²ம், உச்சபாகார கோ³பிதம்;

அயோகம்மகதத்³வாரம், அரீஹி து³ப்பத⁴ம்ஸியம்.

29. ஜாணூஹி ட²த்வா தா³டா²ஹி, பி⁴ந்தி³த்வான ஸிலாயுதா⁴;

இட்ட²கா சேவ ஹத்தி² ஸோ, அயோத்³வாரமுபாக³மி.

30. கோ³புரட்டா² து த³மிளா, கி²பிம்ஸு விவிதா⁴’யுதே⁴;

பக்கம் அயோகு³ளஞ்சேவ, கதி²கஞ்ச ஸிலேஸிகம்.

31. பிட்டி²ம் கி²த்தே ஸிலேஸம்ஹி, தூ⁴பாயந்தே’த² கண்டு³லோ;

வேத³னட்டோ’த³கடா²னம், க³ந்த்வான தத்த² ஓக³ஹீ.

32. ந இத³ம் ஸுராபாணம் தே, அயோத்³வார விகா⁴டனம்;

க³ச்ச² த்³வாரம் விகா⁴டேஹி, இச்சாஹகோ³ட்ட²யிம்ப³ரோ.

33. ஸோ மானம் ஜனயித்வான, கோஞ்சம் கத்வா க³ஜுத்தமோ;

உத³கா உட்ட²ஹித்வான, த²லே அட்டா²ஸி த³ப்பவா.

34. ஹத்தி²வஜ்ஜே வியோஜேத்வா, ஸிலேஸம் ஓஸத⁴ம் அகா;

ராஜா ஆருய்ஹ ஹத்தி²ம் தம், கும்பே⁴ பு²ஸியபாணினா.

35. ‘‘லம்காதீ³பம்ஹி ஸகலே, ரஜ்ஜம் தே தாத கண்டு³ல;

த³ம்மீ’’தி தம் தோஸயித்வா, போ⁴ஜேத்வா வரபோ⁴ஜனம்.

36. வேட²யித்வா ஸாடகேன, காரயித்வா ஸுவம்மிதம்;

ஸத்தகு³ணம் மாஹிஸசம்மம், ப³ந்தே⁴த்வா சம்மபிட்டி²யம்.

37. தஸ்ஸோ’ பரிதேலசம்மம், தா³பேத்வா தம் விஸஜ்ஜயி;

அஸனீவிய க³ஜ்ஜந்தோ, ஸோ க³ஹேத்வா’பத்³த³வே ஸஹ.

38. பத³ரம் விஜ்ஜி² தா³டா²ஹி, உம்மாரம் பத³ஸா’ஹனி;

ஸத்³தா⁴ரபா³ஹம் தம் த்³வாரம், பூ⁴மியம் ஸரவம் பதி.

39. கோ³புரே த³ப்³ப³ஸம்பா⁴ரம், பதந்தம் ஹத்திபிட்டி²யம்;

பா³ஹாஹி பரிஹரித்வான, நந்தீ³மித்தோ பவட்டயி.

40. தி³ஸ்வான தஸ்ஸ கிரியம், கண்டு³லோ துட்ட²மானஸோ;

தா³டா²பீட²னவேரம் தம், ச²ட்³டே⁴ஸி பட²மம் கதம்.

41. அத்த²னோ பிட்டி²தோயேவ, பவேஸத்தா²ய கண்டு³லோ;

நிவத்தித்வான ஓலோகி, யோத⁴ம் தத்த² க³ஜுத்தமோ.

42. ‘‘ஹத்தி²னாகதமக்³கே³ன, நப்பவேக்கா²மஹம்’’இதி;

நந்தீ³மித்தோ விசிந்தேத்வா, பாகாரம் ஹனி பா³ஹுனா.

43. ஸோ அட்டா²ரஸஹத்து²ச்சோ, பதிஅட்டு²ஸபோ⁴ கிர;

ஓலோகி ஸுரனிமலம், அனிச்ச²ம் ஸோபி தம் பத²ம்.

44. லங்க⁴யித்வான பாகாரம்,

நக³ரப்³ப⁴ந்தரே பதி;

பி⁴ந்தி³த்வா த்³வாரமேகேகம்,

கோ³ட்டோ² ஸோணோவ பாவிஸி.

45. ஹத்தீ க³ஹேத்வா ரத²சக்கம், மித்தோ ஸகடபஞ்ஜரம்;

நாளிகேரதரும் கோ³ட்டோ², நிம்மலோ க²க்³க³முத்தமம்.

46. தாலருக்க²ம் மஹாஸோணோ, தே²ரபுத்தோ மஹாக³த³ம்;

விஸும் விஸும் வீதி²க³தா, த³மிளே தத்த² சுண்ணயும்.

47. விஜிதம் நக³ரம் பே⁴த்வா, சதுமாஸேன க²த்தியோ;

ததோ² கி³ரிலகம் க³ந்த்வா, கி³ரியம் த³மிளம் ஹனி.

48. க³ந்த்வா மஹேலனக³ரம், திமஹாபரிக²ம் ததோ;

கத³ம்ப³ புப்ப²வல்லீஹி, ஸமந்தா பரிவாரிதம்.

49. ஏகத்³வாரம் து³ப்பவேஸம், சதுமாஸே வஸம் தஹிம்;

க³ண்ஹி மஹேலராஜானம், மந்தயுத்³தே⁴ன பூ⁴மிபோ.

50. ததோ’நுராத⁴னக³ரம், ஆக³ச்ச²ந்தோ மஹீபதி;

க²ந்தா⁴வாரம் நிவேஸேஸி, பரிதோகாஸபப்³ப³தம்.

51. மாஸம்ஹி ஜேட்ட²மூலம்ஹி, தளாகம் தத்த² காரிய;

ஜலம் கீளி தஹிம் கா³மோ, போஸோனனக³ரவ்ஹயோ.

52. தம் யுத்³தா⁴யாக³தம் ஸுத்வா, ராஜானம் து³ட்ட²கா³மணிம்;

அமச்சே ஸன்னிபாதேத்வா, ஏளாரோ ஆஹ பூ⁴மிபோ.

53. ‘‘ஸோ ராஜா ச ஸயம்யோதோ⁴,

யோதா⁴ சஸ்ஸ மஹூகிர;

அமச்சோ கின்னு காதப்³ப³ம்,

கிந்தி மஞ்ஞந்தி நோ இமே.

54. தீ³க⁴ஜத்துப்பபு⁴தயோ, யோதா⁴ ஏளாரராஜினோ;

‘‘ஸுவே யுத்³த⁴ம் கரிஸ்ஸாமி’’, இதி தே நிச்ச²யம் கரும்.

55. து³ட்ட²கா³மணிராஜாபி, மந்தேத்வா மாதுயா ஸஹ;

தஸ்ஸா மதேன காரேஸி, த்³வத்திம்ஸ ப³லகோட்ட²கே.

56. ராஜச்ச²த்தத⁴ரே தத்த², ட²பேஸி ராஜரூபகே;

அப்³ப⁴ந்தரே கோட்ட²கே து, ஸயம் அட்டா²ஸி பூ⁴பதி.

57. ஏளாரராஜா ஸன்னத்³தோ⁴, மஹாபப்³ப³த ஹத்தி²னம்;

ஆருய்ஹ அக³மா தத்த², ஸயோக்³க³ ப³லவாஹனோ.

58. ஸங்கா³மே வத்தமானம்ஹி, தீ³க⁴ஜத்து மஹப்³ப³லோ;

ஆதா³ய க²க்³க³ப²லகம், யுஜ்ஜ²மானோ ப⁴யானகோ.

59. ஹத்தே² அட்ட²ரஸு’க்³க³ந்த்வா, நப⁴ம் தம் ராஜரூபகம்;

சி²ந்தி³த்வா அஸினா பி⁴ந்தி³, பட²மம் ப³லகோட்ட²கம்.

60. ஏவம் ஸேஸேபி பி⁴ந்தி³த்வா, மலகோட்டே² மஹப்³ப³லோ;

டி²தம் கா³மணிராஜேன, ப³லகோட்ட²முபாக³மி.

61. யோதோ⁴ ஸோ ஸுரனிமலோ, க³ச்ச²ந்தம் ராஜினோ’பரி;

ஸாவேத்வா அத்தனோ நாமம், தமக்கோஸி மஹப்³ப³லோ.

62. இதரோ ‘‘தம் வதி⁴ஸ்ஸ’’ந்தி, குத்³தோ⁴ ஆகாஸமுக்³க³மி;

இதரோ ஓதரந்தஸ்ஸ, ப²லகம் உபனாமயி.

63. ‘‘சி²ந்தா³ மேதம் ஸப²லகம்’’, இதி சிந்திய ஸோ பன;

ப²லகம் ஹனி க²க்³கே³ன, தம் முஞ்சியி’ தரோஸயி.

64. கப்பேந்தோ முத்தப²லகம், தீ³க⁴ஜத்து தஹிம் பதி;

உட்டா²ய ஸூரனிமிலோ, பதிதம் ஸத்தியா’ஹனி.

65. ஸங்க²ம் த⁴மி பு²ஸ்ஸதே³வோ, ஸேனா பி⁴ஜ்ஜித்த² தா³மிளி;

ஏளரோபி நிவத்தித்த², கா⁴தேஸும் த³மிளே ப³ஹூ.

66. தத்த² வாபி ஜலம் ஆஸி, ஹதானம் லோஹிதா விலம்;

தஸ்மா குலத்த²வா பீதி, நாமதோ விஸ்ஸுதம் அஹு.

67. சராபேத்வா தஹிம் பே⁴ரிம், து³ட்ட²கா³மணி பூ⁴பதி;

‘‘ந ஹனிஸ்ஸது ஏளாரம், மம்முஞ்சிய பரோ’’இதி.

68. ஸன்னத்³தோ⁴ ஸயமாருய்ஹ, ஸன்னத்³த⁴ம் கண்டு³லம் கரிம்;

ஏளாரம் அனுப³ந்த⁴ந்தோ, த³க்கி²ணத்³வாரமாக³மி.

69. புரத³க்கி²ணத்³வாரம்ஹி, உபோ⁴ யுஜ்ஜி²ம்ஸு பூ⁴மிபா;

தோமரம் கி²பி ஏளாரோ, கா³மணி தமவஞ்சயி.

70. விஜ்ஜா²பேஸி ச த³ந்தேஹி, தம் ஹத்தி²ம் ஸகஹத்தி²னா;

தோமரம் கி²பி ஏளாரம், ஸஹத்தி² தத்த² ஸோ பதி.

71. ததோ விஜிதஸங்கா³மோ, ஸயோக்³க³ப³லவாஹனோ;

லம்கம் ஏகாதபத்தம் ஸோ, கத்வான பாவிஸி புரம்.