ஏகவீஸதிம பரிச்சே²த³

வஞ்ச ராஜகோ

1. உத்தியஸ்ஸ கனிட்டோ² து, மஹாஸிவோ தத³ச்சயே;

த³ஸ வஸ்ஸானி காரேஸி, ரஜ்ஜம் ஸுஜன ஸேவகோ.

2. ப⁴த்³த³ஸாலம்ஹி ஸோ தே²ரே, பஸீதி³த்வா மனோரமம்;

காரேஸி புரிமாயந்து, விஹாரம் நக³ரங்க³ணம்.

3. மஹாஸிவகனிட்டோ² து, ஸுரதிஸ்ஸோ தத³ச்சயே;

த³ஸவஸ்ஸானி காரேஸி, ரஜ்ஜம் புஞ்ஞேஸு ஸாத³ரோ.

4. த³க்கி²ணாய தி³ஸாயம் ஸோ, விஹாரம் நக³ரம் க³ணம்;

புரிமாய ஹத்தி²க்க²ந்த⁴ஞ்ச, கோ³கண்ணகி³ரிமேவ ச.

5. வங்கு³த்தரே பப்³ப³தம்ஹி, பாசின பப்³ப³தவ்ஹயம்;

ரஹேணகஸமீபம்ஹி, ததா² கோளம்ப³காளகம்.

6. அரிட்ட²பாதே³ மம் கு³லகம், புரிமாய’ச்ச² க³ல்லகம்;

கி³ரினேலபனாயகண்ட³ம், நக³ரஸ்ஸுத்த²ராய து.

7. பஞ்சஸதா நேவ மாதி³-விஹாரே புத²வீ பதி;

க³ங்கா³ய ஓரபாரஞ்ஹி, லம்காதீ³பே தஹிம் தஹிம்.

8. புரே ரஜ்ஜா ச ரஜ்ஜே ச, ஸட்டீ²வஸ்ஸானி ஸாது⁴கம்;

காரேஸி ரம்மே த⁴ம்மேன, ரதனத்தய கா³ரவோ.

9. ஸுவண்ணபிண்ட³திஸ்ஸோதி, நாமம் ரஜ்ஜா தஸ்ஸா அஹு;

ஸுரதிஸ்ஸோதி நாமந்து, தஸ்ஸா’புரஜ்ஜபத்தியா.

10. அஸ்ஸனாவிகபுத்தா த்³வே, த³மிளா ஸேனகு³த்திகா;

ஸுரதிஸ்ஸமஹீபாலம், தம் க³ஹேத்வா மஹப்³ப³லா.

11. து³வே வீஸதிவஸ்ஸானி, ரஜ்ஜம் த⁴ம்மேன காரயும்;

தே க³ஹேத்வா அஸேலோ து, முடஸிவஸ்ஸ அத்ரஜோ.

12. ஸோத³ரியானம் பா⁴தூனம், நவமோ ப⁴துகோ ததோ;

அனுராத⁴புரே ரஜ்ஜம், த³ஸவஸ்ஸானி காரயி.

13. சோளரட்டா² இத⁴ க³ம்ம, ரஜ்ஜத்த²ம் உஜுஜாதிகோ;

ஏளாரோ நாம த³மிளோ, க³ஹேத்வா’ஸேலபூ⁴பதிம்.

14. வஸ்ஸானி சத்தாரீஸஞ்ச, சத்தாரி ச அகாரயி;

ரஜ்ஜம் வோஹாரஸமயே, மஜ்ஜ²த்தோ மித்தஸத்துஸு.

15. ஸயனஸ்ஸ ஸிரோபஸ்ஸே, க⁴ண்டம் ஸுதீ³க⁴யோத்தகம்;

லம்பா³பேஸி வீராவேதும், இச்ச²ந்தேஹி வினிச்ச²யம்.

16. ஏகோ புத்தோ ச தீ⁴தா ச, அஹேஸும் தஸ்ஸ ராஜினோ;

ரதே²ன திஸ்ஸவாபிம் ஸோ, க³ச்ச²ந்தோ பூ⁴மிபாலஜோ.

17. தருணம் வச்ச²கம் மக்³கே³, நிபன்னம் ஸஹதே⁴னுகம்;

கீ³வம் அக்கம்மசக்கேன, அஸஞ்சிச்ச அகா⁴தயி.

18. க³ந்த்வான தே⁴னுக⁴ண்டம் தம், க⁴ட்டேஸி க⁴ட்டிதாஸயா;

ராஜா தேனேவ சக்கேன, ஸீஸம் புத்தஸ்ஸ சே²த³யி.

19. தி³ஜபோதம் தாலருக்கே², ஏகோ ஸப்போ அப⁴க்க²யி;

தம்போதமாதா ஸகுணீ, க³ந்த்வா க⁴ண்டமக⁴ட்டயி.

20. ஆணாபேத்வான தம் ராஜா, குச்சி²ம் தஸ்ஸ விதா³ளிய;

போதம் தம் நீஹராபேத்வா, தாலே ஸப்பமஸப்பயி.

21. ரதனக்³க³ஸ்ஸ ரதன-த்தயஸ்ஸ கு³ணஸாரதம்;

அஜானந்தோபி ஸோ ராஜா, சாரித்தமனுபாலயம்.

22. சேதியத³ப்³ப³தம் க³ந்த்வா, பி⁴க்கு²ஸங்க⁴ம் பவாரிய;

ஆக³ச்ச²ந்தோ ரத²க³தோ, ரத²ஸ்ஸ யுக³கோடியா.

23. அகாஸி ஜினதூ²பஸ்ஸ,

ஏகதே³ஸஸ்ஸ ப⁴ஞ்ஜனம்;

அமச்சா ‘‘தே³வ தூ²போனோ,

தயா பி⁴ன்னோ’தி ஆஹு தம்.

24. அஸஞ்சிச்ச கதே‘பே’ஸ, ராஜா ஓருய்ஹ ஸந்த³னா;

‘‘சக்கேன மம ஸீஸம்பி, சி²ந்த³தா²’தி பதே²ஸயி.

25. ‘‘பரஹிம்ஸம் மஹாராஜ, ஸத்தா² நோ நேவ இச்ச²தி;

தூ²பம் பாகதிகம் கத்வா, க²மாபேஹீ’’தி ஆஹு தம்.

26. தே ட²பேதும் பஞ்சத³ஸ, பாஸாணே பதிதே தஹிம்;

கஹாபண ஸஹஸ்ஸானி, அதா³ பஞ்சத³ஸே வஸோ.

27. அகா மஹல்லிகா வீஹிம், ஸோ ஸேதும் ஆதபே கி²பி;

தே³வோ அகாலே வஸ்ஸித்வா, தஸ்ஸா விஹிம் அதேமயி.

28. வீஹிம் க³ஹேத்வா க³ந்த்வா ஸா, க⁴ண்டம் தம் ஸமக⁴ட்டயி;

அகாலவஸ்ஸம் ஸுத்வா தம், விஸ்ஸஜ்ஜேத்வா தமத்திகம்.

29. ராஜா த⁴ம்மம்ஹி வத்தந்தோ, ‘‘காலே வஸ்ஸம் லபே⁴’’இதி;

தஸ்ஸா வினிச்ச²யத்தா²ய, உபவாஸம் நிபஜ்ஜி ஸோ.

30. ப³லிக்³கா³ஹீ தே³வபுத்தோ, ரஞ்ஞோ தேஜேன ஓத்த²டோ;

க³ந்த்வா சாதுமஹாராஜ-ஸந்திகம் தம் நிவேத³யி.

31. தே தமாதா³ய க³ந்த்வான, ஸக்கஸ்ஸ படிவேத³யும்;

ஸக்கோ பஜ்ஜுன்னமாஹுய, காலே வஸ்ஸம் உபாதி³யி.

32. ப³லிக்³கா³ஹீ தே³வபுத்தோ, ராஜினோ தம் நிவேத³யி;

ததோப்பபு⁴தி தம் ரஜ்ஜே, தி³வா தே³வோ ந வஸ்ஸத².

33. ரத்திம் தே³வோ’நு ஸத்தாஹம், வஸ்ஸியாமம்ஹி மஜ்ஜி²மே;

புண்ணான’ஹேஸும் ஸப்³ப³த்த², கு²த்³த³கா வாடகானிபி.

34. அக³திக³மனதோ³ஸோ முத்தமத்தேன ஏஸோ,

அனுபஹத குதி³ட்டி²பீதி³ஸிம் பாபுணீ’த்³தி⁴ம்;

அக³திக³மனதோ³ஸம் ஸுத்³த⁴தி³ட்டி²ஸமானோ,

கத²மித⁴ஹி மனுஸ்ஸோ பு³த்³தி⁴மா நோ ஜஹேய்யாதி.

ஸுஜனப்பஸாத³ஸம்வேக³த்தா²ய கதே மஹாவம்ஸே

பஞ்சராஜகோ நாம

ஏகவீஸதிமோ பரிச்சே²தோ³.