ஏகாத³ஸம பரிச்சே²த³

தே³வானம்பியதிஸ்ஸாபி⁴ஸேகோ

1. தஸ்ஸச்சயே தஸ்ஸ ஸுதோ, முடஸிவோ’தி விஸ்ஸுதோ;

ஸுவண்ணபாலியா புத்தோ, பத்தோ ரஜ்ஜமனாகுலம்.

2. மஹாமேக⁴வனுய்யானம், நாமனுக³கு³ணோதி³தம்;

ப²லபுப்ப²தருபேதம், ஸோ ராஜா காரயி ஸுப⁴ம்.

3. உய்யானடா²னக்³க³ஹணே, மஹாமேகோ⁴ அகாலஜோ;

பாவஸ்ஸிதேன உய்யானம், மஹாமேக⁴வனம் அஹு.

4. ஸட்டி²வஸ்ஸானி முடஸிவோ, ராஜா ராஜ்ஜமகாரயி;

அனுராதே⁴ புரவரே, லம்கா பு⁴வத³னே ஸுபே⁴.

5. தஸ்ஸ புத்தா த³ஸா’ஹேஸும், அஞ்ஞமஞ்ஞஹிதேஸினோ;

து³வே தீ⁴தா சா’நுகுலா, குலானுச்ச²விகா அஹூ.

6. தே³வானம் பியதிஸ்ஸோதி, விஸ்ஸுதோ து³தியோ ஸுதோ;

தேஸு பா⁴தூஸு ஸப்³பே³ஸு, புஞ்ஞாபஞ்ஞாதி⁴கோ அஹு.

7. தே³வானம் பியதிஸ்ஸோ ஸோ, ராஜா’ஸி பிதுஅச்சயே;

தஸ்ஸா’பி⁴ஸேகேன ஸமம், ப³ஹூன’ச்ச²ரியான’ஹும்.

8. லம்காதீ³பம்ஹி ஸகலே, நித⁴யோ ரதனானி ச;

அந்தோடி²தானி உக்³க³ந்த்வா, பத²வீதலமாருஹும்.

9. லம்காதீ³பஸமீபம்ஹி, பி⁴ன்னனாவாக³தானி ச;

தத்ரஜாதானி ச த²லம், ரதனானி ஸமாருஹும்.

10. சா²தபப்³ப³தபாத³ம்ஹி, திஸ்ஸோ ச வேளுயட்டி²யோ;

ஜாதாரத²பதோதே³ன, ஸமானா பரிமாணதோ.

11. தாஸு ஏகாலதாயட்டி², ரஜதா’பா⁴ தஹிம் லதா;

ஸுவண்ணாவண்ணாருசிரா, தி³ஸ்ஸந்தேதா மனோரமா.

12. ஏகா குஸுமா யட்டீ²து, குஸுமானி தஹிம் பன;

நானானி நானாவண்ணானி, தி³ஸ்ஸந்தே’தி பு²டானி ச.

13. ஏகாஸகுணயட்டி²து, தஹிம் பக்கி²மிகா³ ப³ஹூ;

நானா ச நானாவண்ணா ச, ஸஜீவா விய தி³ஸ்ஸரே.

14. ப⁴யக³ஜரதா²மலகா, வலயங்கு³லிவேட²கா;

ககுத⁴ப²லாபாகதிகா, இச்சேதா அட்ட²ஜாதியோ.

15. முத்தாஸமுதா³ உக்³க³ந்த்வா, தீரே வட்டி விய டி²தா;

தே³வானம் பியதிஸ்ஸஸ்ஸ, ஸப்³ப³ம் புஞ்ஞவிஜம்பி⁴தம்.

16. இந்த³னீலம் வேளுரியம், லோஹிதங்கமணிதி⁴’மே;

ரஜதானி பனே’தானி, முத்தா தா தாவயட்டி²யோ.

17. ஸத்தஹப்³ப⁴ந்தரேயேவ, ரஞ்ஞோ ஸந்திகமாஹரும்;

தானி தி³ஸ்வா பதீதோ ஸோ, ராஜா இதி விசிந்தயி.

18. ரதனானி அனக்³கா⁴னி, த⁴ம்மாஸோகோ இமானிமே;

ஸஹாயோ’ரஹதேனா’ஞ்ஞோ, தஸ்ஸ த³ஸ்ஸம் இமான’தோ.

19. தே³வானம் பியதிஸ்ஸோ ச, த⁴ம்மாஸோகோ ச தே இமே;

த்³வே அதி³ட்ட²ஸஹாயாஹி, சிரப்பபு⁴தி பூ⁴பதி.

20. பா⁴கி³னேய்யம் மஹாரிட்ட²ம், அமச்சம் பமுக²ம் ததோ;

தி³ஜம் அமச்சம் க³ணதம், ராஜா தே சதுரோ ஜனே.

21. தூ³தோ கத்வான பாஹேஸி, ப³லோக⁴பரிவாரிதே;

கா³ஹா பேத்வா அனக்³கா⁴னி, ரதனானி இமானி ஸோ.

22. மணிஜாதீ ச திஸ்ஸோ தா, திஸ்ஸோ ச ரத²யட்டி²யோ;

ஸங்க²ஞ்ச த³க்கி²ணாவத்தம், முத்தா ஜாதீ ச அட்ட² தா.

23. ஆருய்ஹ ஜம்பு³கோலம்ஹி, நாவம் ஸத்ததி³னேன தே;

ஸுகே²ன தித்த²ம் லத்³தா⁴ன, ஸத்தாஹேன ததோ புன.

24. பாடலிபுத்தம் க³ந்த்வான, த⁴ம்மாஸோகஸ்ஸ ராஜினோ;

அத³ம்ஸு பண்ணாகாரேதே, தி³ஸ்வா தானி பஸீதி³ ஸோ.

25. ரதனானி’தி³ஸானேத்த², நத்தி² மே இதி சிந்திய;

அதா³ ஸேனாபதிட்டா²னம், துட்டோ²’ரிட்ட²ஸ்ஸ பூ⁴பதி.

26. போரோஹிச்சப்³ராஹ்மணஸ்ஸ, த³ண்ட³னாயதம் பன;

அதா³ஸி தஸ்ஸா’மச்சஸ்ஸ, ஸேட்டி²த்தம் க³ணகஸ்ஸ து.

27. தேஸம் அனப்பகே போ⁴கே³, த³த்வா வாஸக⁴ரானி ச;

மஹாமச்சேஹி மந்தேந்தோ, பஸ்ஸித்வா படிபாப⁴தம்.

28. வாலபீ³ஜனீ முண்ஹிஸம், க²க்³க³ம் ச²த்தஞ்ச பாது³கம்;

மோளிம் வதம் ஸபாமங்க³ம், பி⁴ங்காரம் ஹரிசந்த³னம்.

29. அதோ⁴விமம் வத்த²கோடிம், மஹக்³க⁴ம் ஹத்த²புஞ்ச²னிம்;

நாகா³’ஹடம் அஞ்ஜனஞ்ச, அருணாப⁴ஞ்ச மத்திகம்.

30. அனோதத்தோத³கஞ்சேவ, க³ங்கா³ஸலிலமேவ ச;

ஸங்க²ஞ்ச நந்தி³யாவட்டம், வட்³ட⁴மானம் குமாரிகம்.

31. ஹேமபோ⁴ஜனகண்ட³ஞ்ச, ஸிவிகஞ்ச மஹாரஹம்;

ஹரீடகம் ஆமலகம், மஹக்³க⁴ம் அமதோஸத⁴ம்.

32. ஸுகாஹடானம் ஸாலீனம், ஸட்டி²வாஹஸதானி ச;

அபி⁴ஸேகோ பகரணம், பரிவாரவிஸேஸிதம்.

33. த³த்வா காலே ப⁴ஹாயஸ்ஸ, பண்ணாகாரே நரிஸ்ஸரோ;

தூ³தே பாஹேஸிஸத்³த⁴ம்ம-பண்ணாகாரமிமம்பிச.

34. அஹம் பு³த்³த⁴ஞ்ச த⁴ம்மஞ்ச, ஸங்க⁴ஞ்ச ஸரணம் க³தோ;

உபாஸகத்தம் தே³ஸேஸிம், ஸக்யபுத்தஸ்ஸ ஸாஸனே.

35. த்வம்பிமானி ரதனானி, உத்தமானி நருத்தம;

சித்தம் பஸாத³யித்வான, ஸத்³தா⁴ய ஸரணம் வஜ.

36. ‘‘கரோத² மே ஸஹாயஸ்ஸ, அபி⁴ஸேகம் புனோ’’ இதி;

வத்வா ஸஹயா’மச்சேதே, ஸக்கரித்வா ச பேஸயி.

37. பஞ்சமாஸே வஸித்வான, தே மச்சா’திவஸக்கதா;

வேஸாக²ஸுக்க²பக்கா²தி³-தி³னே தூ³தா வினிக்³க³தா.

38. தாமலித்தியமாருய்ஹ, நாவம் தேஜம்பு³கோலகே;

ஓருய்ஹ கூபம் பஸ்ஸிம்ஸு, பத்வா த்³வாத³ஸியம் இத⁴.

39. அத³ம்ஸு பண்ணாகாரே தே, தூ³தா லம்காதீ³பஸ்ஸதே;

தேஸம் மஹந்தம் ஸக்காரம், லம்காபதி அகாரயி.

40. தே மக்³க³ஸிரமாஸஸ்ஸ, ஆதி³சந்தோ³த³யேஜினே;

அபி⁴ஸித்தஞ்ச லம்கிந்த³ம், அமச்சா ஸாமிப⁴த்தினோ.

41. த⁴ம்மாஸோகஸ்ஸ வசனம், வத்வா ஸாமி ஹிதேரதா;

புனோபி அபி⁴ஸிஞ்சிம்ஸு, லம்காஹிதஸுகே²ரதம்.

42. வேஸாகே² நரபதி புண்ணமாயமேவம்;

தே³வானம் பியவசனோ பகூ³ளனாமோ;

லம்காயம் பவீததபீதி உஸ்ஸவாயம்;

அத்தானம் ஜனஸுக²தோ³’பி⁴ஸேசயீ ஸோதி.

ஸுஜனப்பஸாத³ஸம்வேக³த்தா²ய கதே மஹாவம்ஸே

தே³வானம்பியதிஸ்ஸாபி⁴ஸேகோனாம

ஏகாத³ஸமோ பரிச்சே²தோ³.