7. பகிண்ணககண்டோ³

138. இத்தி²மிஸ்ஸே குதோஸீலம்,

மம்ஸ ப⁴க்கே² குதோத³யா;

ஸுரா பானே குதோஸச்சம்,

மஹாலோபே⁴ குதோஹிரீ;

மஹாதந்தே³ குதோஸிப்பம்,

மஹா கோதே⁴ குதோத⁴னம்.

139. ஸுரா யோகோ³ விகாலோ ச,

ஸமஜ்ஜ சரணாலஸம்;

கி²ட்³டா³து⁴த்தோ பாபமித்தோ,

போ⁴க³னாஸமுகா² இமே.

140. தி³வா நாதி³க்கா² வத்தப்³ப³ம்,

ரத்தோ நாவசனேன ச;

ஸஞ்சரேய்ய ப⁴யா பீ⁴தோ,

வனே வனசரீ யதா².

141. ஜீவந்தாபி மதாபஞ்ச,

ப்³யாஸேன பரிகித்திதா;

து³க்கி²தோ ப்³யாதி⁴தோமூள்ஹோ,

இணவா நித்யஸேவகோ.

142. அனாக³தம் ப⁴யம் தி³ஸ்வா,

தூ³ரதோ பரிவஜ்ஜயே;

ஆக³தஞ்ச ப⁴யம் தி³ஸ்வா,

அ பீ⁴தோ ஹோதி பண்டி³தோ.

143. நித்³தா³லுகோ பமத்தோச,

ஸுக²த்தோ ரோக³வாலஸோ;

மஹிச்சோ² கம்மாராமோச,

ஸத்தே தே ஸத்த²வஜ்ஜிதா.

144. து³க்³க³தம் க³ச்ச² ஹே லாப⁴,

லாபீ⁴ லாபே⁴ன பூரதி;

த²லே பவஸ்ஸ பஜ்ஜுன்ன,

ஸிந்து⁴ ஆபேன பூரதி;

நத்தி²த³ம் கம்மப்பதா⁴னகம்.

145. ந ஹி கோசி கதே கிச்சே,

கத்தாரம் ஸமுபேக்க²தே;

தஸ்மா ஸப்³பா³னி கிச்சானி,

ஸாவ ஸேஸேன காரயே.

146. தூலம் ஸல்லஹுகம் லோகே,

ததோ சாபல்ல-ஜாதிகோ;

ததோ வுட்³ட⁴ மனோவாதோ³,

பமத்தோ பு³த்³த⁴ஸாஸனே.

147. பாஸாணச²த்தம் க³ருகம்,

ததோ தே³வானசிக்க²ணம்;

ததோ வுட்³டா⁴னமோவாதோ³,

ததோ பு³த்³த⁴ஸ்ஸ ஸாஸனம்.

148. காயஸ்ஸ த³க்கி²ண ஹத்தோ²,

தோ³ஸோ ஏத்த² கனிட்ட²கோ;

கண்ண கா⁴னான-மக்கீ²னம்,

வாமோ து பாத³-பாஸகோ.

149. தம்பூ³லஸ்ஸ மஜ்ஜ² பத்தே,

குவேரோ ரக்க²தீ ஸதா³;

மூலம்ஹி ரக்க²தி யக்கோ²,

அக்³க³ம்ஹி காலகண்ணிகா;

தானி பு⁴ஞ்ஜேய்ய சி²ந்தி³த்வா,

ஸிரீ ஏவம் பவட்³ட⁴தி.

150. ஸம்புண்ணரக்கோ² ப்³ரஹ்மாவ,

அச்சுரக்கோ² ச பி³ஸ்ஸணோ;

தஸ்மா ஹி தே பூஜயந்து,

ஸதா³ மானேந்தி தம் நரம்.

151. கோ³ணா ஹி ஸப்³ப³கி³ஹீனம்,

போஸகா போ⁴க³தா³யகா;

தஸ்மா ஹி மாதா பிதூவ,

மானயே ஸக்கரேய்ய ச.

152. யேச கா²த³ந்தி கோ³மம்ஸம்,

மாது மம்ஸம்வ கா²த³ரே;

மதேஸு தேஸு கி³ஜ்ஜா²னம்,

த³தே³ ஸோதே ச வாஹயே.

153. கு³ருஸித்³தோ⁴ ஸிப்பாரம்போ⁴,

ரவி ஸோக்ரா ச மஜ்ஜி²மோ;

ந ஸிப்போ பு³த்³த⁴சந்த³ரோ,

ஸோரீ அங்கா³ச மரணம்.

154. அட்ட²மியம் கு³ரும் ஹந்தி,

ஸிஸ்ஸம் ஹந்தி சதுத்³த³ஸிம்;

ஸிப்பம் ஹந்தி த³ஸ ஸிப்பம்,

மாதாபிதா ச புண்ணமிம்.

155. நாளிகம் ஸத்த நபு⁴ஞ்ஜே,

ந லாபு³ம் நவமம் ததா²;

த்³வாத³ஸ ப்ரின்னம்த்ரிமினம்,

பு⁴ஞ்ஜே ஸிப்பம் வினஸ்ஸதி.

156. ஏகம் சஜே குலஅத்த²ம்,

கா³மஸ்ஸத்த²ம் குவம் சஜே;

கா³ம சஜே ஜனபத³த்த²ம்,

அத்தத்த²ம் பத²விம் சஜே.

157. தே³ஸம் ஓஸ்ஸஜ்ஜ க³ச்ச²ந்தி,

ஸீஹோ ஸப்புரிஸோ க³ஜோ;

தத்தே²வ நித⁴னம் யந்தி,

காகோ காபுரிஸோ மிகோ³.

158. யம்ஹி பதே³ஸே ந மானோ,

ந பேமம் ந ச ப³ந்த⁴வா;

ந ச விஜ்ஜாகா³ஹோ கோசி,

ந தத்த² வஸனம் கரே.

159. சரத்யேகேன பாதே³ன,

திட்ட²த்யேகேன பண்டி³தோ;

அ நிஸம்ம பரம் டா²னம்,

ந புப்³ப³மாலயம் ஜஹே.

160. த⁴ன த⁴ஞ்ஞ பயோகே³ஸு,

ததா² விஜ்ஜாக³மேஸு ச;

தூ³தேஸு அபசாரேஸு,

சஜ்ஜா லஜ்ஜா ததா³ ப⁴வே.

161. த்³வி கு³ணோ தீ²னமாஹாரோ,

பு³த்³தி⁴சாபி சதுக்³கு³ணோ;

ச²க்³கு³ணோ ஹோதி வாயாமோ,

காமோத்வட்ட²-கு³ணோ ப⁴வே.

162. பப்³பே³ பப்³பே³ கமேனுச்சு²,

விஸேஸரஸவாக்³க³தோ;

ததா² ஸுமேத்திகோ ஸாது⁴,

விபரீதோவ து³ஜ்ஜனோ.

163. கஸ்ஸகோ வாணிஜோ மச்சோ,

ஸமணோ ஸுத ஸீலவா;

தேஸு விபுல ஜாதேஸு,

ரட்ட²ம்பி விபுலம் ஸியா.

164. அஸஜ்ஜா²ய மலா மந்தா,

அனுட்டா²ன மலா க⁴ரா;

மலம் வண்ணஸ்ஸ கோஸஜ்ஜம்,

பமாதோ³ ரக்க²தோ மலம்.

165. ஹீனானம் க³ச்ச²தே வித்தம்,

வீரானம் ஸந்தகத்தனம்;

வத³ந்தி ச ஹீனா ஜனா,

புப்³ப³-கம்மப்பதா⁴னகா.

166. ந வத³ந்தி சேவம்தீ⁴ரா,

வாயமிம்ஸு ஸப்³ப³கம்மே;

ந சே ஸிஜ்ஜ²தி தம் கம்மம்,

அ-ப²லம் ஏவ கோ தோ³ஸோ.

167. நீசம் குலம் நிபஞ்ஞம் வா,

நிரூபம் நிப³லம் ஸமம்;

இமம் காலம் சு²த்தகாலம்,

த⁴னமேவ விஸேஸகம்.

பகிண்ணககண்டோ³ நிட்டி²தோ.

பண்டி³தோ ஸுஜனோ கண்டோ³,

து³ஜ்ஜனோ மித்த-இத்தி² ச;

ராஜா பகிண்ணகோ சாதி,

ஸத்த-கண்ட³-விபூ⁴ஸிதம்.

விஸுத்³தா⁴ சார-தே²ரேன,

விஸுத்³தா⁴ராம-வாஸினா;

ஸப்³ப³-குலானமத்தா²ய,

விஸோதி⁴தம் பத²க்க²யே.