நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

சூளக³ந்த²வம்ஸபாளி

1. பிடகத்தயபரிச்சே²தோ³

நமஸ்ஸேத்வான ஸம்பு³த்³த⁴ம், அக்³க³வம்ஸவரம்வரம்;

நத்வான த⁴ம்மம் பு³த்³த⁴ஜம், ஸங்க⁴ஞ்சாபினிரங்க³ணம்.

க³ந்த²வம்ஸம்பி நிஸ்ஸாய, க³ந்த²வம்ஸம் பகதி²ஸ்ஸம்;

திபேடகஸமாஹாரம், ஸாது⁴னம் ஜங்க⁴தா³ஸகம்.

விமதினோத³னமாரம்ப⁴ம், தம் மே ஸுணாத² ஸாத⁴வோ;

ஸப்³ப³ம்பி பு³த்³த⁴வசனம், விமுத்தி ச ஸஹேதுகம்.

ஹோதி ஏகவித⁴ம்யேவ, திவித⁴ம் பிடகேன ச;

தஞ்ச ஸப்³ப³ம்பி கேவலம், பஞ்சவித⁴ம் நிகாயதோ.

அங்க³தோ ச நவவித⁴ம், த⁴ம்மக்க²ந்த⁴க³ணனதோ;

சதுராஸீதி ஸஹஸ்ஸ, த⁴ம்மக்க²ந்த⁴பபே⁴த³னந்தி.

கத²ம் பிடகதோ பிடகஞ்ஹி திவித⁴ம் ஹோதி?

வினயபிடகம், அபி⁴த⁴ம்மபிடகம் ஸுத்தந்தபிடகந்தி. தத்த² கதமம் வினய பிடகம்? பாராஜிககண்ட³ம், பாசித்தியகண்ட³ம், மஹாவக்³க³கண்ட³ம், சுல்லவக்³க³கண்ட³ம், பரிவாரகண்ட³ந்தி. இமானி கண்டா³னி வினயபிடகம் நாம.

கதமம் அபி⁴த⁴ம்மபிடகம்? த⁴ம்மஸங்க³ணீ-பகரணம், விப⁴ங்க³-பகரணம், தா⁴துகதா²-பகரணம், புக்³க³லபஞ்ஞத்தி-பகரணம், கதா²வத்து²-பகரணம், யமக-பகரணம், பட்டா²ன-பகரணந்தி. இமானி ஸத்த பகரணானி அபி⁴த⁴ம்மபிடகம் நாம. கதமம் ஸுத்தந்தபிடகம்? ஸீலக்க²ந்த⁴வக்³கா³தி³கம், அவஸேஸம் பு³த்³த⁴வசனம் ஸுத்தந்தபிடகம் நாம.

கத²ம் நிகாயதோ? நிகாயா பஞ்ச விதா⁴ ஹோந்தி. தீ³க⁴னிகாயோ, மஜ்ஜி²மனிகாயோ, ஸம்யுத்தனிகாயோ, அங்கு³த்தரனிகாயோ, கு²த்³த³கனிகாயோதி.

தத்த² கதமோ தீ³க⁴-நிகாயோ? ஸீலக்க²ந்த⁴வக்³கோ³, மஹாவக்³கோ³, பாதி²கவக்³கோ³தி, இமே தயோ வக்³கா³ தீ³க⁴னிகாயோ நாம. இமேஸு தீஸு வக்³கே³ஸு, சதுதிம்ஸ வக்³கா³னி ச ஹோந்தி. [சதுதிம்ஸேவ ஸுத்தந்தா, ஸீலக்க²ந்த⁴வக்³கா³தி³கா, யஸ்ஸ ப⁴வந்தி ஸோ யேவ தீ³க⁴னிகாய நாம ஹோதி.]

கதமோ மஜ்ஜி²மனிகாயோ? மூலபண்ணாஸோ, மஜ்ஜி²மபண்ணாஸோ, உபரிபண்ணாஸோதி, இமே தயோ பண்ணாஸா மஜ்ஜி²மனிகாயோ நாம. இமேஸு தீஸு பண்ணாஸேஸு த்³வேபஞ்ஞாஸாதி⁴க-ஸுத்த-ஸதானி ஹோந்தி [தி³யட்³ட⁴ஸதஸுத்தந்தா, த்³வி ஸுத்தம் யஸ்ஸ ஸந்திஸோ, மஜ்ஜி²மனிகாயோ நாமோ மூலபண்ணாஸமாதி³ ஹோதி.]

கதமோ ஸம்யுத்தனிகாயோ? ஸகா³தா²வக்³கோ³, நிதா³னவக்³கோ³, க²ந்த⁴கவக்³கோ³, ஸளாயதனவக்³கோ³, மஹாவக்³கோ³தி, இமே பஞ்ச வக்³கா³ ஸம்யுத்தனிகாயோ நாம. இமேஸு பஞ்சஸு வக்³கே³ஸு த்³வாஸட்டி²ஸுத்தஸத்தஸதாதி⁴கஸத்த-ஸுத்தஸஹஸ்ஸானி ஹோந்தி. [த்³வாஸட்டி²-ஸத்த-ஸதானி, ஸத்தஸஹஸ்ஸகானி ச.] ஸுத்தானி யஸ்ஸ ஹோந்தி ஸோ, ஸகா³தா²தி³கவக்³க³கோ, ஸம்யுத்தனிகாயோ நாமோ வேதி³தப்³போ³ ச விஞ்ஞூனாதி.

கதமோ அங்கு³த்தரனிகாயோ? ஏக்கனிபாதோ, து³க்கனிபாதோ, திக்கனிபாதோ, சதுக்கனிபாதோ, பஞ்சகனிபாதோ, ச²க்கனிபாதோ, ஸத்தகனிபாதோ, அட்ட²கனிபாதோ, நவகனிபாதோ, த³ஸகனிபாதோ, ஏகாத³ஸனிபாதோதி, இமே ஏகாத³ஸ நிபாதா அங்கு³த்தரனிகாயோ நாம. இமேஸு ஏகாத³ஸ நிபாதேஸு ஸத்த-பஞ்ஞாஸ-பஞ்ச-ஸதாதி⁴கனவ-ஸுத்த-ஸஹஸ்ஸானி ஹோந்தி. [நவஸுத்தஸஹஸ்ஸானி, பஞ்சஸதமத்தானி ச, ஸத்தபஞ்ஞாஸாதி⁴கானி, ஸுத்தானி யஸ்ஸ ஹோந்தி ஸோ, அங்கு³த்தரனிகாயோதி, ஏக்கனிபாதகாதி³கோதி.]

கதமோ கு²த்³த³கனிகாயோ? கு²த்³த³கபாடோ², த⁴ம்மபத³ம், உதா³னம், இதிவுத்தகம், ஸுத்தனிபாதோ, விமானவத்து², பேதவத்து², தே²ரகதா², தே²ரீகதா², ஜாதகம், மஹானித்³தே³ஸோ, படிஸம்பி⁴தா³மக்³கோ³, அபதா³னம், பு³த்³த⁴வம்ஸோ, சரியாபிடகம், வினயபிடகம், அபி⁴த⁴ம்மபிடகந்தி. இமேஸு ஸத்தரஸஸு க³ந்தே²ஸு அனேகானி ஸுத்த-ஸஹஸ்ஸானி ஹோந்தி. [அனேகானி ஸுத்த-ஸஹஸ்ஸானி, நித்³தி³ட்டா²னி மஹேஸினா, நிகாயே பஞ்சமே இமே, கு²த்³த³கே இதி விஸுதேதி.]

கத²ம் அங்க³தோ அங்க³ஹி நவ வித⁴ம் ஹோதி? ஸுத்தம், கே³ய்யம், வேய்யாகரணம், கா³தா², உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லந்தி, நவப்பபே⁴த³ம் ஹோதி. தத்த² உப⁴தோ விப⁴ங்க³னித்³தே³ஸக²ந்த⁴கபரிவாரா, ஸுத்தனிபாதே, மங்க³லஸுத்த, ரதனஸுத்த, துவட்டகஸுத்தானி. அஞ்ஞம்பி ஸுத்தனாமகம் ததா²க³தவசனம், ஸுத்தந்தி வேதி³தப்³ப³ம். ஸப்³ப³ம் ஸகா³த²கம் கே³ய்யந்தி வேதி³தப்³ப³ம். விஸேஸனஸம்யுத்தகே ஸகலோபி ஸகா³த²கவக்³கோ³, ஸகலம் அபி⁴த⁴ம்மபிடகம் நிகா³த²கஞ்ச ஸுத்தயஞ்ச அஞ்ஞம்பி அட்ட²ஹி அங்கே³ஹி அஸங்க³ஹிதம் பு³த்³த⁴வசனம் தம் வேய்யாகரணந்தி வேதி³தப்³ப³ம். த⁴ம்மபத³ம், தே²ரகதா², தே²ரீகதா², ஸுத்தனிபாதே, நோ ஸுத்தனாமிகா ஸுத்³தி⁴ககா³தா², கா³தா²தி வேதி³தப்³பா³. ஸோமனஸ்ஸ ஞாணமயிககா³தா² படிக-ஸம்யுத்தா த்³வே அஸீதிஸுத்தந்தா உதா³னந்தி வேதி³தப்³பா³. வுத்தஞ்ஹேதம் ப⁴க³வதாதிஆதி³னயப்பவத்தா த³ஸுத்தரஸதஸுத்தந்தா, இதிவுத்தகந்தி வேதி³தப்³பா³. அபண்ணகஜாதகாதீ³னி பஞ்ஞாஸாதி³கானி. பஞ்சஜாதகஸதானி, ஜாதகந்தி வேதி³தப்³ப³ம். சத்தாரோ மே பி⁴க்க²வே அச்ச²ரியா அபூ⁴தத⁴ம்மா, ஆனந்தே³திஆதி³னயப்பவத்தா ஸப்³பே³பி அச்ச²ரிய அபூ⁴தத⁴ம்மபடிஸம்யுத்தா ஸுத்தந்தா அபூ⁴தத⁴ம்மந்தி வேதி³தப்³பா³. சுல்லவேத³ல்ல, மஹாவேத³ல்ல, ஸம்மாதி³ட்டி², ஸக்கபஞ்ஹ, ஸங்கா²ரபா⁴ஜனிய, மஹாபுண்ணமஸுத்தந்தாத³யோ ஸப்³பே³பி வேத³ஞ்ச துட்டி²ஞ்ச லத்³தா⁴ [புச்ச²] லத்³தா⁴ புச்சி²தஸுத்தந்தா, வேத³ல்லந்தி வேதி³தப்³பா³. கதமானி சதுராஸீதி த⁴ம்மக்க²ந்த⁴ஸஹஸ்ஸானி து³ஜானானி, சதுராஸீதி த⁴ம்மக்க²ந்த⁴ஸஹஸ்ஸானி ஸசே வித்தா²ரேன கதி²ஸ்ஸம் அதிபபஞ்சோ ப⁴விஸ்ஸதி. தஸ்மா நய வஸேன கதி²ஸ்ஸாமி. ஏகம் வத்து², ஏகோ த⁴ம்மக்க²ந்தோ⁴, ஏகம் நிதா³னம் ஏகோ த⁴ம்மக்க²ந்தோ⁴, ஏகம் பஞ்ஹா புச்ச²ந்தம் ஏகோ த⁴ம்மக்க²ந்தோ⁴, ஏகம் பஞ்ஹா விஸஜ்ஜனம் ஏகோ த⁴ம்மக்க²ந்தோ⁴, சதுராஸீதி த⁴ம்மக்க²ந்த⁴ஸஹஸ்ஸானி கேன பா⁴ஸிதானி, கத்த² பா⁴ஸிதானி, கதா³ பா⁴ஸிதானி, கமாரப்³ப⁴ பா⁴ஸிதானி, கிமத்த²ம் பா⁴ஸிதானி, கேன தா⁴ரிதானி, கேனாப⁴தானி, கிமத்த²ம் பரியாபுணிதப்³பா³னி. தத்ராயம் விஸஜ்ஜனா, கேன பா⁴ஸிதானீதி? பு³த்³தா⁴னு பு³த்³தே⁴ஹி பா⁴ஸிதானி. கத்த² பா⁴ஸிதானீதி? தே³வேஸு ச மானுஸ்ஸேஸு ச, பா⁴ஸிதானி. கதா³ பா⁴ஸிதானீதி? ப⁴க³வதோ த⁴ரமானகாலே சேவ பச்சி²மகாலே ச பா⁴ஸிதானி. கதமாரப்³ப⁴ பா⁴ஸிதானீதி? பஞ்சவக்³கி³யாதி³கே வேனேய்ய ப³ந்த⁴வே ஆரப்³ப⁴ பா⁴ஸிதானீதி. கிமத்த²ம் பா⁴ஸிதானீதி? திவஜ்ஜஞ்ச அவஜ்ஜஞ்ச ஞத்வா வஜ்ஜம் பஹாய அவஜ்ஜே படிபத்தித்வா நிப்³பா³னபரியந்தே. தி³ட்ட²-த⁴ம்மிகஸம்பராயிகத்தே² ஸம்பாபுணிதும்.

கேன தா⁴ரிதானீதி? அனுபு³த்³தே⁴ஹி சேவ ஸிஸ்ஸானுஸிஸ்ஸேஹி ச தா⁴ரிதானி. கேனா ப⁴தானீதி? ஆசரிய பரம்பரேஹி ஆப⁴தானி. கிமத்த²ம் பரியாபுணிதப்³பா³னீதி? வஜ்ஜஞ்ச அவஜ்ஜஞ்ச ஞத்வா வஜ்ஜம் பஹாய அவஜ்ஜே படிபத்தித்வா நிப்³பா³னபரியந்தே தி³ட்ட²த⁴ம்மிகஸம்பராயிகத்தே², ஸம்பாபுணிதும், யதே³வம் தாய நிப்³பா³னபரியந்தே தி³ட்ட²த⁴ம்மிகஸம்பராயிகத்தே² ஸாதி⁴கானி ஹோந்தி. தேவ தத்த² கேஹி அப்பமத்தேன பரியாபுணிதப்³பா³னி தா⁴ரேதப்³பா³னி தா⁴ரேதப்³பா³னி வாசேதப்³பா³னி ஸஜ்ஜா²யம் காதப்³பா³னீதி [இதி சுல்லக³ந்த²வம்ஸே பிடகத்தய தீ³பகோ நாம பட²மோ பரிச்சே²தோ³.]

2. க³ந்த²காரகாசரிய-பரிச்சே²தோ³

ஆசரியோ பன அத்தி². போராணாசரியா அத்தி², அட்ட²கதா²சரியா அத்தி², க³ந்த²காரகாசரியா அத்தி², திவித⁴னாமிகாசரியா. கதமே போராணாசரியா? பட²மஸங்கா³யனாயம் பஞ்சஸதா கீ²ணாஸவா பஞ்சன்னம் நிகாயானம் நாமஞ்ச அத்த²ஞ்ச அதி⁴ப்பாயஞ்ச யத³ஞ்ச ப்³யஞ்ஜன ஸோத⁴னஞ்ச அவஸேஸம் கிச்சம் கரிம்ஸு. து³தியஸங்கா³யனாயம் ஸத்தஸதா கீ²ணாஸவா தேஸம்யேவ ஸத்³த³த்தா²தி³கம் கிச்சம் புன கரிம்ஸு. ததியஸங்கா³யனாயம் ஸஹஸ்ஸமத்தா கீ²ணாஸவா தேஸம்யேவ ஸத்³த³த்தா²தி³கம் கிச்சம் புன கரிம்ஸு. இச்சேவம் த்³வேஸதாதி⁴கா த்³வேஸஹஸ்ஸ கீ²ணாஸவா மஹாகச்சாயனம் ட²பேத்வா அவஸேஸா போராணாசரியா நாம. யே போராணாசரியா தேயேவ அட்ட²கதா²சரியா நாம. கதமே க³ந்த²காரகாசரியா? மஹாஅட்ட²கதி²காபேப⁴த³அனேகாசரியா க³ந்த²காரகாசரியா நாம. கதமே திவித⁴ நாமாசரியா மஹாகச்சாயனோ திவித⁴னாமம். கதமே க³ந்தா² மஹாகச்சாயனேன கதா? கச்சாயனக³ந்தோ², மஹானிருத்திக³ந்தோ², சுல்லனிருத்திக³ந்தோ², யமகக³ந்தோ², நேத்திக³ந்தோ², பேடகோபதே³ஸக³ந்தோ²தி, இமே ச² க³ந்தா² மஹாகச்சாயனேன கதா. கதமே அனேகாசரியேன கதா க³ந்தா²? மஹாபச்சரிகாசரியோ மஹாபச்சரியம் நாம க³ந்த²ம் அகாஸி. மஹாகுருந்தி³காசரியோ குருந்தி³ நாம க³ந்த²ம் அகாஸி. அஞ்ஞதரோ ஆசரியோ மஹாபச்சரிய க³ந்த²ஸ்ஸ அட்ட²கத²ம் அகாஸி. அஞ்ஞதரோ ஆசரியோ குருந்தி³ க³ந்த²ஸ்ஸ அட்ட²கத²ம் அகாஸி, மஹாபு³த்³த⁴கோ⁴ஸா நாமசரியோ விஸுத்³தி⁴மக்³கோ³ தீ³க⁴னிகாயஸ்ஸ ஸுமங்க³லவிலாஸனி நாம அட்ட²கதா², மஜ்ஜி²மனிகாயஸ்ஸ பபஞ்சஸூத³னீ நாம அட்ட²கதா², ஸம்யுத்தனிகாயஸ்ஸ ஸாரத்த²ப்பகாஸினீ நாம அட்ட²கதா², அங்கு³த்தரனிகாயஸ்ஸ மனோரத²பூரணீ நாம அட்ட²கதா², பஞ்சவினய க³ந்தா²னம் ஸமந்தபாஸாதி³கா நாம அட்ட²கதா², ஸத்தன்னம் அபி⁴த⁴ம்மக³ந்தா²னம் பரமத்த²கதா² நாம அட்ட²கதா², பாதிமோக்க² ஸம்கா²தாய மாதிகாய கங்கா²விதரணீதி விஸுத்³தி⁴ நாம அட்ட²கதா², த⁴ம்மபத³ஸ்ஸ அட்ட²கதா², ஜாதகஸ்ஸ அட்ட²கதா², கு²த்³த³கபாட²ஸ்ஸ அட்ட²கதா², ஸுத்தனிபாதஸ்ஸ அட்ட²கதா², அபதா³னஸ்ஸ அட்ட²கதா²தி, இமே தேரஸ க³ந்தே² அகாஸி. பு³த்³த⁴த³த்தோனாமாசரியோ வினய வினிச்ச²யோ, உத்தரவினிச்ச²யோ, அபி⁴த⁴ம்மாவதாரோ, பு³த்³த⁴வம்ஸஸ்ஸ மது⁴ரத்த²விலாஸினீ நாம அட்ட²கதா²தி, இமே சத்தாரோ க³ந்தே² அகாஸி. ஆனந்தோ³னாமாசரியா ஸத்தாபி⁴த⁴ம்மக³ந்த²ட்ட²கதா²ய மூடீகம் நாம டீகம் அகாஸி. த⁴ம்மபாலாசரியோ நேத்திப்பகரணட்ட²கதா², இதிவுத்தகட்ட²கதா², உதா³னட்ட²கதா², சரியாபிடகட்ட²கதா², தே²ரகத²ட்ட²கதா², தே²ரீகத²ட்ட²கதா², விமானவத்து²ஸ்ஸ விமலவிலாஸினி நாம அட்ட²கதா², பேதவத்து²ஸ்ஸ விமலவிலாஸினி நாம அட்ட²கதா², விஸுத்³தி⁴மக்³க³ஸ்ஸ பரமத்த²மஞ்ஜூஸா நாம டீகா, தீ³க⁴னிகாயஸ்ஸ அட்ட²கதா²தீ³னம் சதுன்னம் அட்ட²கதா²னம் லீனத்த²ப்பகாஸனி நாம டீகா, ஜாதகட்ட²கதா²ய லீனத்த²ப்பகாஸனி நாம டீகா, நேத்திபகரணட்ட²கதா²ய டீகா, பு³த்³த⁴வம்ஸட்ட²கதா²ய பரமத்த²தீ³பனீ நாம டீகா, அபி⁴த⁴ம்மட்ட²கதா²யடீகா லீனத்த²வண்ணனா நாம அனுடீகாதி இமே சுத்³த³ஸ மத்தே க³ந்தே² அகாஸி.

த்³வே புப்³பா³சரியானாமா சரியானிருத்தி மஞ்ஜூஸம் நாம சுல்லனிருத்தி டீகஞ்ச மஹானிருத்தி ஸங்கே²பஞ்ச அகம்ஸு. மஹாவஜிரபு³த்³தி⁴னாமாசரியோ வினயக³ண்டி²னாம பகரணம் அகாஸி. தீ³பங்கரஸங்கா²தோ விமலபு³த்³தி⁴ நாமாசரியோ முக²மத்ததீ³பனீ நாமகம் ந்யாஸப்பகரணம் அகாஸி. சுல்லவஜிரபு³த்³தி⁴ நாமாசரியோ அத்த²ப்³யாக்²யானம் நாம பகரணம் அகாஸி.

தீ³பங்கரோ நாமாசரியோ ரூபஸித்³தி⁴ பகரணம், ரூபஸித்³தி⁴ டீகம், ஸம்பபஞ்ச ஸுத்தஞ்சேதி திவித⁴ம் பகரணம் அகாஸி. ஆனந்தா³சரியஸ்ஸ ஜேட்ட²ஸிஸ்ஸோ த⁴ம்மபாலோ நாமாசரியோ ஸச்சஸங்கே²பம் நாம பகரணம் அகாஸி. கஸ்ஸபோ நாமாசரியோ மோஹவிச்சே²த³னீ, விமதிச்சே²த³னீ, த³ஸபு³த்³த⁴வம்ஸோ, அனாக³தவம்ஸோதி, சதுவித⁴ம் பகரணம் அகாஸி.

மஹானாமோ நாமாசரியோ, ஸத்³த⁴ம்மபகாஸனீ நாம படிஸம்பி⁴தா³மக்³க³ஸ்ஸ அட்ட²கத²ம் அகாஸி. தீ³பவம்ஸோ, தூ²பவம்ஸோ, போ³தி⁴வம்ஸோ, சூலவம்ஸோ, மஹாவம்ஸோ, படிஸம்பி⁴தா³மக்³க³ட்ட²கதா² க³ண்டி² சேதி இமே ச² க³ந்தா² மஹானாமாசரி விஸும் விஸும் கதா.

நவோ மஹானாமோ நாமாசரியோ நவம் மஹாவம்ஸ நாம பகரணம் அகாஸி. உபஸேனோ நாமாசரியோ ஸத்³த⁴ம்மபஜ்ஜோதிகம் நாம மஹானித்³தே³ஸஸ்ஸ அட்ட²கத²ம் அகாஸி. மோக்³க³லானோ நாமாசரியோ மோக்³க³லானப்³யாகரணம் நாம பகரணம் அகாஸி. ஸங்க⁴ரக்கி²தோ நாமாசரியோ, ஸுபோ³தா⁴லங்காரம் நாம பகரணம் அகாஸி. வுத்தோத³யகாரோ நாமாசரியோ வுத்தோத³யம் நாம பகரணம் அகாஸி. த⁴ம்மஸிரி நாமாசரியோ கு²த்³த³கஸிக்க²ம் நாம பகரணம் அகாஸி. புராணகு²த்³த³ஸிக்கா²ய டீகா, மூலஸிக்கா² சேதி, இமே த்³வே க³ந்தா² த்³வேஹாசரியேஹி விஸும் விஸும் கதா.

அனுருத்³தோ⁴ நாமாசரியோ பரமத்த²வினிச்ச²யம், நாமரூபபரிச்சே²த³ம், அபி⁴த⁴ம்மத்த²ஸங்க³ஹம் சேதி திவித⁴ம் பகரணம் அகாஸி. கே²மோ நாமாசரியோ கே²மம் நாம பகரணம் அகாஸி. ஸாரிபுத்தோ நாமாசரியோ வினயட்ட²கதா²ய ஸாரத்த²தீ³பனீ நாம டீகம்; வினயஸங்க³ஹபகரணம், வினயஸங்க³ஹஸ்ஸடீகம்; அங்கு³த்தரட்ட²கதா²ய ஸாரத்த²மஞ்ஜூஸம் நாம நவம் டீகம்; பஞ்சிகா டீகஞ்சேதி, இமே பஞ்ச க³ந்தே² அகாஸி. பு³த்³த⁴னாகோ³ நாமாசரியோ வினயத்த²மஞ்ஜூஸம் நாம கங்கா²விதரணீயா டீகம் அகாஸி. நவோ மோக்³க³லானோ நாமாசரியோ அபி⁴தா⁴னப்பதீ³பிகம் நாம பகரணம் அகாஸி. வாசிஸ்ஸரோ நாமாசரியோ மஹாஸாமி நாம ஸுபோ³தா⁴லங்காரஸ்ஸ டீகா, வுத்தோத³ய விவரணம், ஸுமங்க³லப்பஸாத³னி நாம கு²த்³த³ஸிக்கா²ய டீகா; ஸம்ப³ந்த⁴சிந்தா, ஸம்ப³ந்த⁴சிந்தாய டீகா; பா³லாவதாரோ, மோக்³க³லானப்³யாகரணஸ்ஸ பஞ்சிகாய டீகா; யோக³வினிச்ச²யோ, வினயவினிச்ச²யஸ்ஸ டீகா, உத்தரவினிச்ச²யஸ்ஸ டீகா, நாமரூப-பரிச்சே²த³ஸ்ஸ விபா⁴கோ³, ஸத்³த³த்த²ஸ்ஸ பத³ரூபவிபா⁴வனம்; கே²மஸ்ஸ பகரணஸ்ஸ டீகா, ஸீமாலங்காரோ, மூலஸிக்கா²ய டீகா, ரூபவிபா⁴கோ³, பச்சயஸங்க³ஹோ, ஸச்சஸங்கே²பஸ்ஸ டீகா சேதி, இமே அட்டா²ரஸ க³ந்தே² அகாஸி.

ஸுமங்க³லோ நாமாசரியோ அபி⁴த⁴ம்மாவதாரஸ்ஸடீகம், அபி⁴த⁴ம்மத்த²ஸங்க³ஹஸ்ஸடீகஞ்ச து³வித⁴ம் பகரணம் அகாஸி. பு³த்³த⁴பியோ நாமாசரியோ ஸாரத்த²ஸங்க³ஹம் நாம பகரணம் அகாஸி. த⁴ம்மகித்தி நாமாசரியோ த³ந்ததா⁴து பகரணம் அகாஸி. மேத⁴ங்கரோ நாமாசரியோ ஜினசரிதம் நாம பகரணம் அகாஸி. பு³த்³த⁴ரக்கி²தோ நாமாசரியோ ஜினலங்காரம், ஜினலங்காரஸ்ஸ டீகஞ்சாதி து³வித⁴ம் பகரணம் அகாஸி. உபதிஸ்ஸோ நாமாசரியோ அனாக³தவம்ஸஸ்ஸ அட்ட²கத²ம் அகாஸி.

கங்கா²விதரணீயா லீனத்த²ப்பகாஸினி, நிஸந்தே³ஹோ, த⁴ம்மானுஸாரணீ, ஞேய்யாஸந்ததி, ஞேய்யாஸந்ததியா டீகா, ஸுமதாதா³வதாரோ, லோகபஞ்ஞத்தி பகரணம், ததா²க³துப்பத்தி பகரணம், நலாடதா⁴து வண்ணனா, ஸீஹளவத்து², த⁴ம்மதீ³பகோ, படிபத்திஸங்க³ஹோ, விஸுத்³தி⁴மக்³க³ண்டி², அபி⁴த⁴ம்மக³ண்டி², நேத்திபகரணக³ண்டி², விஸுத்³தி⁴மக்³க³சுல்லனவடீகா, ஸோதப்³ப³மாலினீ, பஸாத³ஜனனீ, ஓகாஸலோகோ, ஸுபோ³தா⁴லங்காரஸ்ஸ நவ டீகா சேதி, இமே வீஸதி க³ந்தா² வீஸதாசரியேஹி விஸும் விஸும் கதா.

ஸத்³த⁴ம்மஸிரி நாமாசரியோ ஸத்³த³த்த²பே⁴த³சிந்தா நாம பகரணம் அகாஸி. தே³வோ நாமாசரியோ ஸுமன கூடவண்ணனம் நாம பகரணம் அகாஸி. சுல்லபு³த்³த⁴கோ⁴ஸோ நாமாசரியோ ஸோதத்த²கினிதா³னம் நாம பகரணம் அகாஸி. ரட்ட²பாலோ நாமாசரியோ மது⁴ரஸங்கா³ஹணீகித்தி நாம பகரணம் அகாஸி. ஸுபூ⁴தசந்தோ³ நாமாசரியோ லிங்க³த்த²விவரண-பகரணம் அகாஸி. அக்³க³வம்ஸோ நாமாசரியோ ஸத்³த³னீதி பகரணம் நாம அகாஸி. வஜிரபு³த்³தி⁴ நாமாசரியோ மஹாடீகம் நாம ந்யாஸபகரணடீகம் அகாஸி. கு³ணஸாக³ரோ நாமாசரியோ முக²மத்தஸாரம், முக²மத்தஸாரஸ்ஸ டீகஞ்ச து³வித⁴ம் பகரணம் அகாஸி. அப⁴யோ நாமாசரியோ ஸத்³த³த்த²பே⁴த³சிந்தாய மஹாடீகம் அகாஸி. ஞாணஸாக³ரோ நாமாசரியோ லிங்க³த்த²விவரணப்பகாஸனம் நாம பகரணம் அகாஸி. அஞ்ஞதரோ ஆசரியோ கூ³ளத்த²டீகம், பா³லப்பபோ³த⁴னஞ்ச து³வித⁴ம் பகரணம் அகாஸி. அஞ்ஞதரோ ஆசரியோ ஸத்³த³த்த²-பே⁴த³சிந்தாய மஜ்ஜி²மடீகம் அகாஸி. உத்தமோ நாமாசரியோ பா³லாவதாரடீகம், லிங்க³த்த²விவரணடீகஞ்ச து³வித⁴ம் பகரணம் அகாஸி. அஞ்ஞதரோ ஆசரியோ ஸத்³த³த்த²பே⁴த³சிந்தாய நவ-டீகம் அகாஸி. ஏகோ அமச்சோ அபி⁴தா⁴னப்பதீ³பிகாயடீகம், க³ண்டி²பகரணஸ்ஸ த³ண்டீ³ப்பகரணஸ்ஸ மாக³த⁴பூ⁴தம் டீகம், கோலத்³த⁴ஜனஸ்ஸ ஸகடபா⁴ஸாய கதடீகஞ்ச திவித⁴ம் பகரணம் அகாஸி. த⁴ம்மஸேனாபதி நாமாசரியோ காரிகம், ஏதிமாஸபிதீ³பனீ, மனோஹாரஞ்ச திவித⁴ம் பகரணம் அகாஸி. அஞ்ஞதரோ ஆசரியோ காரிகாய டீகம் அகாஸி. அஞ்ஞதரோ ஆசரியோ ஏதிமாஸபிதீ³பிகாய டீகம் அகாஸி.

அஞ்ஞதரோ ஆசரியோ ஸத்³த³பி³ந்து³ நாம பகரணம் அகாஸி. ஸத்³த⁴ம்மகு³ரு நாமாசரியோ ஸத்³த³வுத்திப்பகாஸகம் நாம பகரணம் அகாஸி. ஸாரிபுத்தோ நாமாசரியோ ஸத்³த³வுத்திப்பகாஸகஸ்ஸ டீகம் அகாஸி. அஞ்ஞதரோ ஆசரியோ கச்சாயனஸாரம் நாம பகரணம் கச்சாயனஸாரஸ்ஸ டீகஞ்ச து³வித⁴ம் பகரணம் அகாஸி. நவோ மேத⁴ங்கரோ நாமாசரியோ லோகதீ³பகஸாரம் நாம பகரணம் அகாஸி. அக்³க³பண்டி³தோ நாமாசரியோ லோகுப்பத்தி நாம பகரணம் அகாஸி. சீவரோ நாமாசரியோ ஜங்க⁴தா³ஸகஸ்ஸ டீகம் அகாஸி. மாதிகத்த²தீ³பனீ, அபி⁴த⁴ம்மத்த²ஸங்க³ஹவண்ணனா, ஸீமாலங்காரஸ்ஸடீகா, வினயஸமுட்டா²னதீ³பனீ டீகா, க³ண்டி² ஸாரோ, பட்டா²னக³ணனா நயோ, ஸுத்தனித்³தே³ஸோ, பாதிமோக்கோ², சேதி, இமே அட்ட² க³ந்தே² ஸத்³த⁴ம்மஜோதிபாலாசரியோ அகாஸி. விமலபு³த்³தி⁴ நாமாசரியோ அபி⁴த⁴ம்ம-பன்னரஸட்டா²னம் நாம பகரணம் அகாஸி. நவோ விமலபு³த்³தி⁴ நாமாசரியோ ஸத்³த³ஸாரத்த²ஜாலினீ, ஸத்³த³ஸாரத்த²ஜாலினியா டீகா, வுத்தோத³ய டீகா, பரமத்த²மஞ்ஜூஸா நாம அபி⁴த⁴ம்மஸங்க³ஹடீகாய அனுடீகா த³ஸக³ண்டி²வண்ணனா, மாக³த⁴பூ⁴தாவித³க்³க³முக²மண்ட³னடீகா சேதி இமே ச² க³ந்தே² அகாஸி. அஞ்ஞதரோ ஆசரியோ பஞ்சபகரணடீகாய நவானுடீகம் அகாஸி. அரியவம்ஸோ நாமாசரியோ அபி⁴த⁴ம்மஸங்க³ஹ-டீகாய [பரமத்த²] மணிஸாரமஞ்ஜூஸம் நாம நவானுடீகம் அகாஸி. அபி⁴த⁴ம்மத்த²ஸங்க³ஹஸ்ஸ டீகா, பேடகோபதே³ஸஸ்ஸ டீகா, சதுபா⁴ணவாரஸ்ஸ அட்ட²கதா², மஹாஸாரபகாஸனீ, மஹாதீ³பனீ, ஸாரத்த²தீ³பனீ க³தி பகரணம், ஹத்த²ஸாரோ, பு⁴ம்மஸங்க³ஹோ, பு⁴ம்மனித்³தே³ஸோ, த³ஸவத்து²காயவிரதிடீகா, ஜோதனா நிருத்தி, விப⁴த்திகதா², கச்சாயனவிவரணா, ஸத்³த⁴ம்மமாலினீ, பஞ்சக³தி வண்ணனா, பா³லசித்தபபோ³த⁴னம், த⁴ம்மசக்கஸுத்தஸ்ஸ நவட்ட²கதா², த³ந்ததா⁴து பகரணஸ்ஸ டீகா சேதி, இமே வீஸதி க³ந்தா² நானாசரியேஹி கதா, அஞ்ஞானி பன பகரணானி அத்தி².

கதமானி ஸத்³த⁴ம்மோ பாயனோ, பா³லப்பபோ³த⁴னபகரணஸ்ஸ டீகா ச, ஜினாலங்காரபகரணஸ்ஸ நவடீகா ச, லிங்க³த்த²விவரணம், லிங்க³வினிச்ச²யோ; பாதிமோக்க²விவரணம், பரமத்த²கதா²விவரணம், ஸமந்தபாஸாதி³கா விவரணம், சதுபா⁴ணவாரட்ட²கதா² விவரணம், அபி⁴த⁴ம்மத்த²ஸங்க³ஹவிவரணம், ஸச்சஸங்கே²பவிவரணம், ஸத்³த³த்த²பே⁴த³சிந்தாவிவரணம், ஸத்³த³வுத்திவிவரணம், கச்சாயனஸாரவிவரணம், அபி⁴த⁴ம்மத்த²ஸங்க³ஹஸ்ஸ டீகா விவரணம், மஹாவேஸ்ஸந்தராஜாதகஸ்ஸ விவரணம், ஸக்காபி⁴மதம், மஹாவேஸ்ஸந்தரஜாதகஸ்ஸ நவட்ட²கதா², பட²ம ஸம்போ³தி⁴, லோகனேத்தி ச, பு³த்³த⁴கோ⁴ஸாசரியனிதா³னம் மிலிந்த³பஞ்ஹா வண்ணனா, சதுரா ரக்கா², சதுரக்கா²ய அட்ட²கதா², ஸத்³த³வுத்திபகரணஸ்ஸ நவடீகா, இச்சேவம் பஞ்சவீஸதி பமாணானி பகரணானி லங்கோ தீ³பாதீ³ஸுட்டா²னேஸு பண்டி³தேஹி கதானி அஹேஸும், ஸம்பு³த்³தே⁴கா³தா² ச, நரதே³வ நாம கா³தா² ச, தா³தவே சீரத்தி கா³தா² ச, வீஸதி ஓவாத³கா³தா² ச, தா³னஸத்தரி, ஸீலஸத்தரி, ஸப்பாதா³னவண்ணனா, அனந்தபு³த்³த⁴வந்த³னகா³தா² ச, அட்ட²வீஸதி பு³த்³த⁴வந்த³னகா³தா² ச, அதீதானாக³தபச்சுப்பன்னவந்த³னகா³தா² ச, அஸீதிமஹாஸாவகவந்த³னகா³தா² ச, நவஹாரகு³ணவண்ணனா சாதி, இமே பு³த்³த⁴பணாம-கா³தா²தி³கா கா³தா² யோ பண்டி³தேஹி லங்காதீ³பாதி³ஸுட்டா²னேஸு கதா அஹேஸும் [இதி சுல்லக³ந்த²வம்ஸே க³ந்த²காரகாசரிய தீ³பகோ நாம து³தியோ பரிச்சே²தோ³]

3. ஆசரியானம் ஸஞ்ஜாதட்டா²னபரிச்சே²தோ³

ஆசரியேஸு ச அத்தி² ஜம்பு³தீ³பிகாசரியா அத்தி², லங்காதீ³பிகாசரியா. கதமே ஜம்பு³தீ³பிகாசரியா? கதமே லங்காதீ³பிகாசரியா? மஹாகச்சாயனோ ஜம்பு³தீ³பிகாசரியோ ஸோ ஹி அவந்திரட்டே² உஜ்ஜேனீ நக³ரே சந்த³பஜ்ஜோதஸ்ஸ நாம ரஞ்ஞோ புரோஹிதோ ஹுத்வா காமானம் ஆதீ³னவம் தி³ஸ்வா, க⁴ராவாஸம் பஹாய ஸத்து²ஸாஸனே பப்³ப³ஜ்ஜித்வா ஹேட்டா² வுத்தப்பகாரே க³ந்தே² அகாஸி. மஹாஅட்ட²கதா²சரியோ ஜம்பு³தீ³பிகோ, மஹாபச்சரிகாசரியோ, மஹாகுருந்தி³காசரியோ, அஞ்ஞதரோ ஆசரியா த்³வேதி இமே ச பூ⁴வாசரியா. லங்காதீ³பிகாசரியா நாம தே கிர பு³த்³த⁴கோ⁴ஸாசரியஸ்ஸ பூரே பூ⁴தாசரியே காலே அஹேஸும். மஹாபு³த்³த⁴கோ⁴ஸாசரியோ ஜம்பு³தீ³பிகோ. ஸோ கிர மக³த⁴ரட்டே² கோ⁴ஸககா³மே ரஞ்ஞோ புரோஹிதஸ்ஸ கேஸி நாம ப்³ராஹ்மணஸ்ஸ புத்தோ, ஸத்து²ஸாஸனே பப்³ப³ஜ்ஜித்வா லங்காதீ³பம் க³தோ ஹேட்டா² வுத்தப்பகாரே க³ந்தே² அகாஸி.

பு³த்³த⁴த³த்தாசரியோ, ஆனந்தா³சரியோ, த⁴ம்மபாலாசரியோ, த்³வே பு³ப்³பா³சரியோ, மஹாவஜிர-பு³த்³தா⁴சரியோ, சுல்லவஜிர-பு³த்³தா⁴சரியோ, விமலபு³த்³த⁴ஸங்கா²தோ தீ³பங்கராசரியோ, சுல்லதீ³பங்கராசரியோ, சுல்லத⁴ம்மபாலாசரியோ, கஸ்ஸபாசரியோதி இமே ஏகாத³ஸசரியா ஜம்பு³தீ³பிகா ஹேட்டா² வுத்தபகாரே க³ந்தே² அகம்ஸு. மஹானாமாசரியோ, அஞ்ஞதராசரியா, சுல்லமஹானாமாசரியோ, உபஸேனாசரியோ, மோக்³க³லானாசரியோ, ஸங்க⁴ரக்கி²தாசரியோ, வுத்தோத³யகாராசரியோ, த⁴ம்மஸிராசரியோ, அஞ்ஞதரா த்³வாசரியா, அனுருத்³தா⁴சரியோ, கே²மாசரியோ, ஸாரிபுத்தாசரியோ, பு³த்³த⁴னாகா³சரியோ, சுல்லமோக்³க³லானாசரியோ, வாசிஸ்ஸவாசரியோ, ஸுமங்க³லாசரியோ, பு³த்³த⁴பியாசரியோ, த⁴ம்மகித்தி ஆசரியோ மேத⁴ங்கராசரியோ, பு³த்³த⁴ரக்கி²தாசரியோ, உபதிஸ்ஸா சரியோ, அஞ்ஞதரா வீஸதாசரியா, ஸத்³த⁴ம்மஸிராசரியோ, தே³வாசரியோ, சுல்லபு³த்³த⁴கோ⁴ஸாசரியோ, ஸாரிபுத்தாசரியோ, ரட்ட²பாலாசரியோதி இமே த்³வே பஞ்ஞாஸாசரியா லங்காதீ³பிகாசரியா நாம. ஸுபூ⁴தசந்தா³சரியோ, அக்³க³வம்ஸாசரியோ, நவோ வஜிரபு³த்³தா⁴சரியோ, கு³ணஸாக³ராசரியோ, அப⁴யாசரியோ, ஞாணஸாக³ராசரியோ, அஞ்ஞதரா த்³வாசரியா, உத்தமாசரியோ, அஞ்ஞதரோ ஆசரியோ, அஞ்ஞதரோ மஹாமச்சோ, த⁴ம்மஸேனாபதாசரியோ, அஞ்ஞதரா தயோ ஆசரியா, ஸத்³த⁴ம்மகு³ரு ஆசரியோ, ஸாரிபுத்தாசரியோ, அஞ்ஞதரோ ஏகா ஆசரியோ, மேத⁴ங்கராசரியோ, அக்³க³பண்டி³தாசரியோ, சீவராசரியோ, ஸத்³த⁴ம்மஜோதிபாலாசரியோ, விமலபு³த்³தா⁴சரியோதி இமே தேவீஸதி ஆசரியா ஜம்பு³தீ³பிகா ஹேட்டா² வுத்தப்பகாரே க³ந்தே² புக்காம ஸங்கா²தே அரிமத்³த³ன நக³ரே அகம்ஸு.

நவோவிமலபு³த்³தா⁴சரியோ ஜம்பு³தீ³பிகோ ஹேட்டா² வுத்தப்பகாரே க³ந்தே² பம்யனக³ரே அகாஸி. அஞ்ஞதராசரியோ அரியவம்ஸாசரியோதி இமே த்³வாசரியா ஜம்பு³தீ³பிகா ஹேட்டா² வுத்தப்பகாரே க³ந்தே² அதி [நவி] புரே அகம்ஸு, அஞ்ஞதரா வீஸதாசரியா ஜம்பு³தீ³பிகா ஹேட்டா² வுத்தப்பகாரே க³ந்தே² கிஞ்சி புராதி³க⁴ரே அகம்ஸு.

[இதி சுல்லக³ந்த²வம்ஸே ஆசரியானம் ஸஞ்ஜாதட்டா²ன தீ³பகோ நாம ததியோ பரிச்சே²தோ³.]

4. ஆயாயகாசரிய-பரிச்சே²தோ³

க³ந்தா² பன ஸியா ஆயாசனேன ஆசரியேஹி கதா, ஸியா அனாயாசனேன ஆசரியேஹி கதா. கதமே க³ந்தா² ஆயாசனேன, கதமே அனாயாசனேன கதா? மஹாகச்சாயன க³ந்தோ², மஹாஅட்ட²கதா² க³ந்தோ², மஹாபச்சரிய க³ந்தோ², மஹாகுருந்தி³ க³ந்தோ², மஹாபச்சரியக³ந்த²ஸ்ஸ அட்ட²கதா² க³ந்தோ², மஹாகுருந்தி³ க³ந்த²ஸ்ஸ அட்ட²கதா² க³ந்தோ²தி. இமேஹி ச² க³ந்தே²ஹி அத்தனோ மதியா ஸாஸனுக்³க³ஹனத்தா²ய ஸத்³த⁴ம்மடி²தியா கதா.

க. பு³த்³த⁴கோ⁴ஸாசரிய-க³ந்த²தீ³பனா

பு³த்³த⁴கோ⁴ஸாசரிய க³ந்தே²ஸு பன விஸுத்³தி⁴மக்³கோ³, ஸங்க⁴பாலேன நாம ஸங்க⁴தே²ரேன ஆயாசிதேன பு³த்³த⁴கோ⁴ஸாசரியேன கதோ. தீ³க⁴னிகாயஸ்ஸ அட்ட²கதா² க³ந்தோ² தா³டா² நாமேன ஸங்க⁴தே²ரேன ஆயாசிதேன பு³த்³த⁴கோ⁴ஸாசரியேன கதோ. மஜ்ஜி²மனிகாயஸ்ஸ அட்ட²கதா² க³ந்தோ² பு³த்³த⁴மித்தனாமேன தே²ரேன ஆயாசிதேன பு³த்³த⁴கோ⁴ஸாசரியேன கதோ. ஸம்யுத்தனிகாயஸ்ஸ அட்ட²கதா² க³ந்தோ² ஜோதிபாலேன நாம தே²ரேன ஆயாசிதேன பு³த்³த⁴கோ⁴ஸாசரியேன கதோ. அங்கு³த்தரனிகாயஸ்ஸ அட்ட²கதா² க³ந்தோ² ப⁴த்³த³ந்தா நாம தே²ரேன ஸஹஆஜீவகேன உபாஸகேன ச ஆயாசிதேன பு³த்³த⁴கோ⁴ஸாசரியேன கதோ. ஸமந்தபாஸாதி³கா நாம அட்ட²கதா² க³ந்தோ² பு³த்³த⁴ஸிரி நாமேன தே²ரேன ஆயாசிதேன பு³த்³த⁴கோ⁴ஸாசரியேன கதோ. ஸத்தன்னம் அபி⁴த⁴ம்ம-க³ந்தா²னம் அட்ட²கதா² க³ந்தோ² சுல்லபு³த்³த⁴கோ⁴ஸேன பி⁴க்கு²னா ஆயாசிதேன பு³த்³த⁴கோ⁴ஸாசரியேன கதோ. த⁴ம்மபத³ஸ்ஸஅட்ட²கதா² க³ந்தோ² குமாரகஸ்ஸபனாமேன தே²ரேன ஆயாசிதேன பு³த்³த⁴கோ⁴ஸாசரியேன கதோ. ஜாதகஸ்ஸஅட்ட²கதா² க³ந்தோ² அத்த²த³ஸ்ஸீ, பு³த்³த⁴மித்த, பு³த்³த⁴பியதே³வ ஸங்கா²தேஹி தீஹி தே²ரேஹி ஆயாசிதேன பு³த்³த⁴கோ⁴ஸாசரியேன கதோ. கு²த்³த³கபாட²ஸ்ஸ அட்ட²கதா² க³ந்தோ², ஸுத்தனிபாதஸ்ஸ அட்ட²கதா² க³ந்தோ² அத்தனோ மதியா பு³த்³த⁴கோ⁴ஸாசரியேன கதோ. அபதா³னஸ்ஸ அட்ட²கதா² க³ந்தோ² பஞ்சனிகாய விஞ்ஞூஹி பஞ்சஹி தே²ரேஹி ஆயாசிதேன பு³த்³த⁴கோ⁴ஸாசரியேன கதோ.

பு³த்³த⁴கோ⁴ஸாசரிய-க³ந்த²தீ³பனா நிட்டி²தா.

க². பு³த்³த⁴த³த்தாசரிய-க³ந்த²தீ³பனா

பு³த்³த⁴த்தாசரிய க³ந்தே²ஸு பன வினய-வினிச்ச²யக³ந்தோ² அத்தனோ ஸிஸ்ஸேன பு³த்³த⁴ஸீஹேன நாம தே²ரேன ஆயாசிதேன பு³த்³த⁴த்தாசரியா கதோ. உத்தர-வினிச்ச²யக³ந்தோ² ஸங்க⁴பாலேன நாமேன தே²ரேன ஆயாசிதேன பு³த்³த⁴த³த்தாசரியேன கதோ. அபி⁴த⁴ம்மாவதாரோ நாம க³ந்தோ² அத்தனோ ஸிஸ்ஸேன ஸுமதி தே²ரேன ஆயாசிதேன பு³த்³த⁴த³த்தாசரியேன கதோ. பு³த்³த⁴வம்ஸஸ்ஸ அட்ட²கதா² க³ந்தோ² தேனேவ பு³த்³த⁴ஸீஹனாம தே²ரேன ஆயாசிதேன பு³த்³த⁴த³த்தாசரியேன கதோ.

பு³த்³த⁴த³த்தாசரிய-க³ந்த²தீ³பனா நிட்டி²தா.

அபி⁴த⁴ம்மகதா²ய மூலடீகா நாம டீகா க³ந்தோ² பு³த்³த⁴மித்தா நாம தே²ரேன ஆயாசிதேன ஆனந்தா³சரியேன கதோ.

க³. த⁴ம்மபாலாசரியேன-க³ந்த²தீ³பனா

நேத்திபகரணஸ்ஸ அட்ட²கதா² க³ந்தோ² த⁴ம்மரக்கி²த நாம தே²ரேன ஆயாசிதேன த⁴ம்மபாலாசரியேன கதோ. இதிவுத்தகஅட்ட²கதா² க³ந்தோ², உதா³னஅட்ட²கதா² க³ந்தோ², சரியாபிடகஅட்ட²கதா² க³ந்தோ², தே²ரகதா²அட்ட²கதா² க³ந்தோ², தே²ரிகதா²அட்ட²கதா² க³ந்தோ², விமானவத்து²அட்ட²கதா² க³ந்தோ², பேதவத்து²அட்ட²கதா² க³ந்தோ², இமே ஸத்த க³ந்தா² அத்தனோ மதியா த⁴ம்மபாலாசரியேன கதோ. விஸுத்³தி⁴மக்³க³டீகா க³ந்தோ² தா³டா² நாமேன நாம தே²ரேன ஆயாசிதேன த⁴ம்மபாலாசரியேன கதோ, தீ³க⁴னிகாய-அட்ட²கதா²தீ³னம் சதுன்னம் அட்ட²கதா²னம் டீகா க³ந்தோ², அபி⁴த⁴ம்மட்ட²கதா²ய அனுடீகா க³ந்தோ², நேத்திபகரணட்ட²கதா²ய டீகா க³ந்தோ², பு³த்³த⁴வம்ஸட்ட²கதா²ய டீகா க³ந்தோ², ஜாதகட்ட²கதா²ய டீகா க³ந்தோ² சேதி இமே பஞ்ச க³ந்தா² அத்தனோ மதியா த⁴ம்மபாலாசரியேன கதோ.

த⁴ம்மபாலாசரிய-க³ந்த²தீ³பனா நிட்டி²தா.

நிருத்திமஞ்ஜூஸா நாம சுல்லனிருத்திடீகா க³ந்தோ², மஹானிருத்திஸங்கே²போ நாம க³ந்தோ² ச அத்தனோ மதியா புப்³பா³சரியேஹி விம்ஸு கதோ.

பஞ்ச வினயபகரணானம் வினயக³ண்டி² நாம க³ந்தோ² அத்தனோ மதியா மஹாவஜிரபு³த்³தா⁴சரியேன கதோ. ந்யாஸஸங்கா²தோ முக²மத்ததீ³பனீ நாம க³ந்தோ² அத்தனோ மதியா விமலபு³த்³தி⁴ ஆசரியேன கதோ. அத்த²ப்³யக்க்²யானோ நாம க³ந்தோ² அத்தனோ மதியா சுல்லவஜிரபு³த்³தா⁴சரியேன கதோ. ரூபஸித்³தி⁴ தஸ்ஸ ச க³ந்த²ஸ்ஸ டீகா க³ந்தோ² ஸப்³ப³ பஞ்சஸுத்தஞ்ச அத்தனோ மதியா தீ³பங்கராசரியேன கதோ. ஸச்சஸங்கே²போ நாம க³ந்தோ² அத்தனோ மதியா சுல்லத⁴ம்மபாலாசரியேன கதோ. மோஹச்சே²த³னீ க³ந்தோ², விமதிச்சே²த³னீ க³ந்தோ², த³ஸ பு³த்³த⁴வம்ஸோ, அனாக³தவம்ஸோ ச. அத்தனோ மதியா கஸ்ஸபாசரியேன கதோ. படிஸம்பி⁴தா³மக்³க³ஸ்ஸ அட்ட²கதா² க³ந்தோ² மஹானாமேன உபாஸகேன ஆயாசிதேன மஹானாமாசரியேன கதோ. தீ³பவம்ஸோ, தூ²பவம்ஸோ, போ³தி⁴வம்ஸோ, சுல்லவம்ஸோ, போராணவம்ஸோ, மஹாவம்ஸோ சாதி இமே ச² க³ந்தா² அத்தனோ மதியா மஹானாமாசரியேஹி விஸும் கதா. நவோ மஹாவம்ஸக³ந்தோ² அத்தனோ மதியா சுல்லமஹானாமாசரியேன கதோ. ஸத்³த⁴ம்மபஜ்ஜோதிகா நாம மஹானித்³தே³ஸஸ்ஸ அட்ட²கதா² க³ந்தோ² தே³வேன தே²ரேன ஆயாசிதேன உபஸேனாசரியேன கதோ. மோக்³க³லானப்³யாகரணக³ந்தே² அத்தனோ மதியா மோக்³க³லானாசரியேன கதோ. ஸுபோ³தா⁴லங்கார நாம க³ந்தோ² அத்தனோ மதியா ஸங்க⁴ரக்கி²தாசரியேன கதோ. வுத்தோத³ய க³ந்தோ² அத்தனோ மதியா வுத்தோத³யகாராசரியேன கதோ. கு²த்³த³ஸிக்கா² நாம க³ந்தோ² அத்தனோ மதியா த⁴ம்மஸிராசரியேன கதோ. போராணகு²த்³த³ஸிக்கா² டீகா ச மூலஸிக்கா² சாதி, இமே த்³வே க³ந்தே² அத்தனோ மதியா அஞ்ஞதரேஹி த்³விஹாசரியேஹி விம்ஸு கதா.

பரமத்த²வினிச்ச²யம் நாம க³ந்தோ² ஸங்க⁴ரக்கி²தேன தே²ரேன ஆயாசிதேன அனுருத்³தா⁴சரியேன கதோ. நாமரூப-பரிச்சே²தோ³ நாம க³ந்தோ² அத்தனோ மதியா அனுருத்³தா⁴சரியேன கதோ. அபி⁴த⁴ம்மத்த²ஸங்க³ஹம் நாம க³ந்தோ² நம்ம நாமேன உபாஸகேன ஆயாசிதேன அனுருத்³தா⁴சரியேன கதோ. கே²மோ நாம க³ந்தோ² அத்தனோ மதியா கே²மாசரியேன கதோ. ஸாரத்த²தீ³பனீ நாம வினயட்ட²கதா²ய டீகா க³ந்தோ², வினயஸங்க³ஹம், வினயஸங்க³ஹஸ்ஸ டீகா க³ந்தோ², அங்கு³த்தரட்ட²கதா²ய நவோ டீகா க³ந்தோ²தி இமே சத்தாரோ க³ந்தா² பரக்கமபா³ஹு நாமேன லங்காதீ³பிஸ்ஸரேன ரஞ்ஞா ஆயாசிதேன ஸாரிபுத்தாசரியேன கதோ. ஸகடஸத்³த³ஸத்த²ஸ்ஸ பஞ்சிகாய டீகா க³ந்தோ² அத்தனோ மதியா ஸாரிபுத்தாசரியேன கதோ. கங்கா²விதரணியா வினயத்த²மஞ்ஜூஸா நாம டீகா க³ந்தோ² ஸுமேதா⁴ நாமதே²ரேன ஆயாசிதேன பு³த்³த⁴னாகா³சரியேன கதோ. அபி⁴தா⁴னப்பதீ³பிகோ நாம க³ந்தோ² அத்தனோ மதியா சூலமோக்³க³லானாசரியேன கதோ. ஸுபோ³தா⁴லங்காரஸ்ஸ மஹாஸாமி நாம டீகா, வுத்தோத³ய விவரணஞ்சாதி இமே த்³வே க³ந்தா² அத்தனோ மதியா வாசிஸ்ஸரேன கதா. கு²த்³த³ஸிக்கா²ய ஸுமங்க³லப்பஸாத³னி நாம நவோ டீகா க³ந்தோ² ஸுமங்க³லேன ஆயாசிதேன நவாசிஸ்ஸரேன கதோ. ஸம்ப³ந்த⁴சிந்தாடீகா பா³லாவதாரோ, மோக்³க³லானப்³யாகரணஸ்ஸ டீகா சாதி இமே தயோ க³ந்தா², ஸுமங்க³ல, பு³த்³த⁴மித்த, மஹாகஸ்ஸப ஸங்கா²தேஹி தீஹி தே²ரேஹி ச, த⁴ம்மகித்தி நாம உபாஸகேன, வானிஜ்ஜா பா⁴து உபாஸகேன ச ஆயாசிதேன வாசிஸ்ஸரேன கதோ. நாமரூபபரிச்சே²த³ஸ்ஸ விபா⁴கோ³, ஸத்³த³த்த²ஸ்ஸ பத³ரூப-விபா⁴வனம், கே²மபகரணஸ்ஸ டீகா, ஸீமாலங்காரோ, மூலஸிக்கா²ய டீகா, ரூபவிபா⁴கோ³, பச்சயஸங்க³ஹோ சாதி இமே ஸத்த க³ந்தா² அத்தனோ மதியா வாசிஸ்ஸரேன கதா. ஸச்சஸங்கே²பஸ்ஸ டீகா க³ந்தோ² ஸாரிபுத்த-நாமேன தே²ரேன ஆயாசிதேன வாசிஸ்ஸரேன கதோ. அபி⁴த⁴ம்மாவதாரஸ்ஸ டீகா, அபி⁴த⁴ம்மத்த²ஸங்க³ஹஸ்ஸ டீகா சாதி இமே த்³வே க³ந்தா² அத்தனோ மதியா ஸுமங்க³லாசரியேன கதா. ஸாரத்த²ஸங்க³ஹம் நாம க³ந்தோ² அத்தனோ மதியா பு³த்³த⁴ப்பியேன கதோ த³ந்ததா⁴துவண்ணனா நாம பகரணம்

லங்காதீ³பிஸ்ஸரஸ்ஸ ரஞ்ஞோ ஸேனாபதினா ஆயாசிதேன த⁴ம்மகித்தினாமாசரியேன கதம். ஜினசரிதம் நாம பகரணம் அத்தனோ மதியா மேத⁴ங்கராசரியேன கதம். ஜினாலங்காரோ, ஜினாலங்காரஸ்ஸ டீகா அத்தனோ மதியா பு³த்³த⁴ரக்கி²தாசரியேன கதோ. அமதத⁴ரஸ்ஸ நாம அனாக³தவம்ஸஸ்ஸ அத்தனோ மதியா அட்ட²கதா² உபதிஸ்ஸாசரியேன கதா. கங்கா²விதரணீயா லீனத்த²பகாஸினீ, நிஸந்தே³ஹோ, த⁴ம்மானுஸாரணீ, ஞேய்யா-ஸந்ததி, ஞேய்யா-ஸந்ததியா டீகா, ஸுமதாவதாரோ, லோகபஞ்ஞத்தி பகரணம், ததா²க³துப்பத்தி பகரணம், நலாடதா⁴துவண்ணனா, ஸீஹளவத்து², த⁴ம்மதீ³பகோ படிபத்தி ஸங்க³ஹோ, விஸுத்³தி⁴மக்³க³ஸ்ஸ க³ண்டி², அபி⁴த⁴ம்மக³ண்டி², நேத்திபகரணக³ண்டி², விஸுத்³தி⁴மக்³க³சூல-நவடீகா, ஸோதப்³ப³மாலினீ, பஸாத³ஜனனீ, ஓகஸ்ஸலோகோ, ஸுபோ³தா⁴லங்காரஸ்ஸ நவ டீகா சேதி, இமே வீஸதி க³ந்தா² அத்தனோ மதியா வீஸதாசரியேஹி விம்ஸு விம்ஸு கதா.

ஸத்³த³த்த² பே⁴த³சிந்தா நாம பகரணம் அத்தனோ மதியா ஸத்³த⁴ம்மஸிரினாமாசரியேன கதம். ஸுமன-கூடவண்ணனம் நாம பகரணம், ராஹுலா நாம தே²ரேன ஆயாசிதேன வாசிஸ்ஸரேனதே³வதே²ரேன கதம். ஸோதத்த² கிம் மஹானிதா³னம் நாம பகரணம் அத்தனோ மதியா சுல்லபு³த்³த⁴கோ⁴ஸாசரியேன கதம். மது⁴ரஸங்கா³ஹனி நாம பகரணம் அத்தனோ மதியா ரட்ட²பாலாசரியேன கதம். லிங்க³த்த²விவரணம் நாம பகரணம் அத்தனோ மதியா ஸுபூ⁴தசந்தா³சரியேன கதம். ஸத்³த³னீதிபகரணம் அத்தனோ மதியா அக்³க³வம்ஸாசரியேன கதம். ந்யாஸபகரணஸ்ஸ மஹாடீகா நாம டீகா அத்தனோ மதியா வஜிரபு³த்³தா⁴சரியேன கதா. முக²மத்தஸாரோ அத்தனோ மதியா கு³ணஸாக³ராசரியேன கதோ. முக²மத்தஸாரஸ்ஸ டீகா ஸுதஸம்பன்ன நாமேன த⁴ம்மராஜினோ கு³ருனா ஸங்க⁴தே²ரேன ஆயாசிதேன கு³ணஸாக³ராசரியேன கதா. ஸத்³த³த்த²பே⁴த³சிந்தாய மஹாடீகா அத்தனோ மதியா அப⁴யாசரியேன கதா. லிங்க³த்த²விவரணப்பகாஸகம் நாம பகரணம் அத்தனோ மதியா ஞாணஸாக³ராசரியேன கதம். கு³ள்ஹத்த²ஸ்ஸ டீகா பா³லப்பபோ³த⁴னஞ்ச து³வித⁴ம் பகரணம் அத்தனோ மதியா அஞ்ஞதராசரியேன கதம். ஸத்³த³த்த²பே⁴த³சிந்தாய மஜ்ஜி²மடீகா அத்தனோ மதியா அஞ்ஞதராசரியேன கதா. பா³லாவதாரஸ்ஸ டீகா, லிங்க³த்த²விவரணா டீகா ச அத்தனோ மதியா உத்தமாசரியேன கதா. ஸத்³த³த்த²பே⁴த³சிந்தாய நவ டீகா அத்தனோ மதியா அஞ்ஞதராசரியேன கதா. அபி⁴தா⁴னப்பதீ³பிகாய டீகா த³ண்டீ³பகரணஸ்ஸ மக³க⁴-பூ⁴தா டீகா சாதி து³விதா⁴ டீகாயோ அத்தனோ மதி, ஸீஹஸூர நாம ரஞ்ஞோ ஏகேன அமச்சேன கதா. கோலத்³த⁴ஜனஸ்ஸடீகா பாஸாதி³கேன நாம தே²ரேன ஆயாசிதேன தேனேவ மஹாமச்சேன கதா. காரிகம் நாம பகரணம் ஞாணக³ம்பீ⁴ரனாமேன பி⁴க்கு²னா ஆயாசிதேன த⁴ம்மஸேனாபதாசரியேன கதம். ஏதிமாஸமிதீ³பனீ [வா ஏதிமாஸமிதீ³பிகா] நாம பகரணம் மனோஹாரஞ்ச அத்தனோ மதியா தேனேவ த⁴ம்மஸேனாபதாசரியேன கதம். காரிகாய டீகா அத்தனோ மதியா அஞ்ஞதராசரியேன கதா. ஏதிமாஸமிதீ³பிகாய டீகா அத்தனோ மதியா அஞ்ஞதராசரியேன கதா.

ஸத்³த³பி³ந்து³பகரணம் அத்தனோ மதியா த⁴ம்மராஜஸ்ஸ கு³ருனா அஞ்ஞதராசரியேன கதம். ஸத்³த³வுத்திப்பகாஸகம் நாம பகரணம் அஞ்ஞதரேன பி⁴க்கு²னா ஆயாசிதேன ஸத்³த⁴ம்மகு³ரு நாமாசரியேன கதம். ஸத்³த³வுத்திப்பகாஸகஸ்ஸ டீகா அத்தனோ மதியா ஸாரிபுத்தாசரியேன கதா.

கச்சாயன ஸாரோ ச கச்சாயனஸாரஸ்ஸ டீகா சாதி து³வித⁴ம் பகரணம் அத்தனோ மதியா அஞ்ஞதராசரியேன கதம். லோகதீ³பகஸாரம் நாம பகரணம் அத்தனோ மதியா நவேனமேத⁴ங்கராசரியேன கதம். லோகுப்பத்திபகரணம் அத்தனோ மதியா அக்³க³பண்டி³தாசரியேன கதம். ஜங்க⁴தா³ஸகஸ்ஸ டீகா பூ⁴தா மக³த⁴டீகா அத்தனோ மதியா சீவராசரியேன கதா. மாதிகத்த²தீ³பனீ, அபி⁴த⁴ம்மத்த²ஸங்க³ஹவண்ணனா, ஸீமாலங்காரஸ்ஸடீகா, க³ண்டி²ஸாரோ, பட்டா²னக³ணனானயோ சாதி இமே பஞ்ச பகரணானி அத்தனோ மதியா ஸத்³த⁴ம்மஜோதிபாலாசரியேன கதானி. ஸங்கே²பவண்ணனா பரக்கமபா³ஹு-நாமேன ஜம்பு³தீ³பிஸ்ஸரேன ரஞ்ஞோ ஆயாசிதே தேனேவ ஸத்³த⁴ம்மஜோதிபாலாசரியேன கதா. கச்சாயனஸ்ஸ ஸுத்தனித்³தே³ஸோ அத்தனோ ஸிஸ்ஸேன த⁴ம்மசாரினா தே²ரேன ஆயாசிதேன ஸத்³த⁴ம்மஜோதிபாலாசரியேன கதோ. வினயஸமுட்டா²னதீ³பனீ நாம பகரணம், அத்தனோ கு³ருனா ஸங்க⁴தே²ரேன ஆயாசிதேன ஸத்³த⁴ம்ம-ஜோதிபாலாசரியேன கதம்.

ஸத்தபகரணானி பன தேன புக்காமனக³ரே கதானி. ஸங்கே²பவண்ணனாவ லங்காதீ³பே கதா. அபி⁴த⁴ம்ம-பன்னரஸட்டா²னவண்ணானம் நாம பகரணம் அத்தனோ மதியா நவேன-விமலபு³த்³தா⁴சரியேன கதா. ஸத்³த³ஸாரத்த²ஜாலினீ நாம பகரணம் அத்தனோ மதியா நவேன-விமலபு³த்³தா⁴சரியேன கதம். ஸத்³த³ஸாரத்த²-ஜாலினியா டீகா, பம்யனக³ரே ரஞ்ஞோ கு³ருனா ஸங்க⁴ராஜேன ஆயாசிதேன தேனேவ நவேன விமலபு³த்³தா⁴சரியேன கதா. வுத்தோத³யஸ்ஸ டீகா, அபி⁴த⁴ம்மஸங்க³ஹஸ்ஸ டீகாய பரமத்த²மஞ்ஜூஸா நாம அனுடீகா, த³ஸக³ண்டி²வண்ணனம் நாம பகரணம், மக³த⁴பூ⁴தவித³க்³க³முக²மண்ட³னியாடீகா சாதி இமானி சத்தாரி பகரணானி அத்தனோ மதியா தேனேவ நவேன விமலபு³த்³தா⁴சரியேன கதானி.

பஞ்சபகரணடீகாய நவானுடீகா அத்தனோ மதியா அஞ்ஞதரோ சரியேன கதா. அபி⁴த⁴ம்மஸங்க³ஹஸ்ஸ நவடீகா அத்தனோ மதியா அஞ்ஞதராசரியேன கதா. அபி⁴த⁴ம்மத்த²ஸங்க³ஹடீகாய [மணி] மஞ்ஜூஸா [மணிஸாரமஞ்ஜூஸா] நாம நவானுடீகா அத்தனோ மதியா அரியவம்ஸாசரியேன கதா.

பேடகோபதே³ஸஸ்ஸ டீகா அத்தனோ மதியா உது³ம்ப³ரினாமாசரியேன புக்காமனக³ரே கதா. சதுபா⁴ணவாரஸ்ஸ அட்ட²கதா², மஹாஸாரபகாஸினி, மஹாதீ³பனீ, ஸாரத்த²தீ³பனீ, க³திபகரணம், ஹத்தா²ஸாரோ, பு⁴ம்மஸங்க³ஹோ, பு⁴ம்மனித்³தே³ஸோ, த³ஸவத்து²காயவிரதிடீகா, சோத³னானிருத்தி, விப⁴த்திகதா², ஸத்³த⁴ம்மமாலினி, பஞ்சக³திவண்ணனா, பா³லசித்த-பபோ³த⁴னம், த⁴ம்மசக்கஸுத்தஸ்ஸ நவட்ட²கதா², த³ந்ததா⁴து-பகரணஸ்ஸ டீகா ச ஸத்³த⁴ம்மோபாயனோ பா³லப்பபோ³த⁴னடீகா ச, ஜினாலங்காரஸ்ஸ நவடீகா ச, லிங்க³த்த²-விவரணம், லிங்க³த்த²-வினிச்ச²யோ, பாதிமோக்க²விவரணம், பரமத்த²கதா²விவரணம், ஸமந்தபாஸாதி³கவிவரணம், சதுபா⁴ணவாரட்ட²கதா² விவரணம், அபி⁴த⁴ம்மஸங்க³ஹவிவரணம், ஸச்சஸங்கே²பவிவரணம், ஸத்³த³த்த²பே⁴த³சிந்தாவிவரணம், ஸத்³த³வுத்திவிவரணம், கச்சாயனஸாரவிவரணம், கச்சாயனவிவரணம், அபி⁴த⁴ம்மஸங்க³ஹஸ்ஸடீகாவிவரணம், மஹாவேஸ்ஸந்தரஜாதகஸ்ஸ விவரணம், ஸக்காபி⁴மதம், மஹாவேஸ்ஸந்தரஜாதகஸ்ஸ நவட்ட²கதா², பட²ம-ஸம்போ³தி⁴ ச லோகனேத்தி, பு³த்³த⁴கோ⁴ஸாசரியனிதா³னம், மிலிந்த³-பஞ்ஹோ வண்ணனா, சதுராரக்கா², சதுராரக்கா²யஅட்ட²கதா², ஸத்³த³வுத்திப்பகரணஸ்ஸ நவடீகா சாதி இமானி, திசத்தாலீஸ பகரணானி அத்தனோ மதியா ஸாஸனஸ்ஸ ஜாதியா ஸத்³த⁴ம்மஸ்ஸ டி²தியா ச லங்காதீ³பாதீ³ஸு விம்ஸு விம்ஸு கதானி.

ஸம்பு³த்³தே⁴ கா³தா² ச…பே… நவஹாரகு³ணவண்ணனா சாதி இமே பு³த்³த⁴பணாமாதி³கா கா³தா²யோ. அத்தனோ அத்தனோ பு³த்³த⁴கு³ணபகாஸனத்தா²ய அத்தனோ ச பரே ச அனந்தபஞ்ஞாபவத்தனத்தா²ய ச பண்டி³தேஹி லங்காதீ³பாதீ³ஸு விம்ஸு விம்ஸு கதா.

[இதி சுல்ல-க³ந்த²வம்ஸே ஆயாசகாசரியதீ³பகோ நாம சதுத்தோ² பரிச்சே²தோ³.]

5. பகிண்ணக-பரிச்சே²தோ³

நாமம் ஆரோபனம் போத்த²கம் க³ந்த²காரஸ்ஸ ச. லேக²ம்லேகா²பனஞ்சேவ, வதா³மி தத³னந்தரந்தி. தத்த² சதுராஸீதியா த⁴ம்மக்க²ந்த⁴ஸஹஸ்ஸானி பிடக, நிகாயங்க³, வக்³க³, நிபாதாதி³கம் நாமம், கேனாரோபிதம், கத்த² ஆரோபிதம், கதா³ ஆரோபிதம், கிமத்த²ம் ஆரோபிதந்தி? தத்ராயம் பிவிஸஜ்ஜனாகேன ஆரோபிதந்தி பஞ்சஸதகீ²ணாஸவேஹி ஆரோபிதம். தேஹி ஸப்³ப³பு³த்³த⁴வசனம் ஸங்கா³யந்தி, இத³ம் பிடகம், அயம் நிகாயோ, இத³ம் அங்க³ம், அயம் வக்³கோ³, அயம் நிபாதோதி. ஏவமாதி³கம் நாமம் ஆரோபேந்தி. கத்த² ஆரோபிதந்தி? ராஜக³ஹே வேபா⁴ரபப்³ப³தஸ்ஸ பாதே³ த⁴ம்மமண்ட³ப்பே ஆரோபிதம். கதா³ ஆரோபிதந்தி? ப⁴க³வதோ பரினிப்³பு³தே பட²மஸங்கா³யனகாலே ஆரோபிதம். கிமத்த²ம் ஆரோபிதந்தி? த⁴ம்மக்க²ந்தா⁴னம் வோஹாரஸுக²த்தா²ய ஸுக²தா⁴ரணத்தா²ய ச ஆரோபிதம். ஸங்கீ³திகாலே பஞ்சஸதா கீ²ணாஸவா தேஸஞ்ச த⁴ம்மக்க²ந்தா⁴னம் நாம வக்³க³னிபாததோ. இமஸ்ஸ த⁴ம்மக்க²ந்த⁴ஸ்ஸ அயம் நாமோ ஹோது, இமஸ்ஸ ச பகரணஸ்ஸ அயம் நாமோதி, அப்³ரவும் ஸப்³ப³ம் நாமாதி³கம் கிச்சம் அகம்ஸு. தே கீ²ணாஸவா, யதி³ நாமாதி³கம் கிச்சம் அகதம் ந ஸுபாகதம் தஸ்மா வோஹாரஸுக²த்தா²யனாமாதி³கம் கிச்சம் கதம் அனாக³தே பனத்தா²ய நாமாதி³கம் பவத்திதம் அஸஞ்ஜாதனாமோ ந ஸுட்டு² பாகதோ ஸப்³ப³ஸோ ப⁴வேதி. த⁴ம்மக்க²ந்தா⁴னம் நாம தீ³பனா நிட்டி²தா.

சதுராஸீதி த⁴ம்மக்க²ந்த⁴ஸஹஸ்ஸானி கேன போத்த²கே ஆரோபிதானி, கதா³ ஆரோபிதானி, கிமத்த²ம் ஆரோபிதானீதி. தத்ராயம் விஸஜ்ஜனா கேனாரோபிதானிதி? கீ²ணாஸவமஹானாகே³ஹி ஆரோபிதானி. கத்த² ஆரோபிதானீதி? லங்காதீ³பே ஆரோபிதானி. கதா³ ஆரோபிதானீதி? ஸத்³தா⁴திஸ்ஸஸ்ஸராஜினோ புத்தஸ்ஸ வட்டகா³மனி ராஜஸ்ஸ காலே ஆரோபிதானி. கிமத்த²ம் ஆரோபிதானீதி? த⁴ம்மக்க²ந்தா⁴னம் அவித⁴ம்ஸனத்தா²ய ஸத்³த⁴ம்மட்டி²தியா ச ஆரோபிதானி.

த⁴ரமானோ ஹி ப⁴க³வா, அம்ஹாகம் ஸுக³தோதீ⁴ரோ;

நிகாயே பஞ்சதே³ஸேதி, யாவ நிப்³பா³னக³மனா.

ஸப்³பே³பி தே பி⁴க்கு² ஆதி³, மனஸா வசஸாஹாரோ;

ஸப்³பே³ ச வாசுக்³க³தா ஹோந்தி, மஹாபஞ்ஞாஸதிவரா.

நிப்³பூ³தே லோகனாத²ம்ஹி, ததோ வஸ்ஸஸதம் ப⁴வே;

அரியானரியா சாபி ச, ஸப்³பே³ வாசுக்³க³தா து⁴வம்.

ததோ பரம் அட்ட²ரஸம், த்³விஸதம்வஸ்ஸ க³ணனம்;

ஸப்³பே³ புது²ஜ்ஜனா சேவ, அரியா ச ஸப்³பே³பிதே.

மனஸாவசஸாயேவ, வாசுக்³க³தாவ ஸப்³ப³தா³;

து³ட்ட²கா³மணிரஞ்ஞோ ச, காலே வாசுக்³க³தா து⁴வம்.

அரியானரியாபி ச, நிகாயே தா⁴ரணாஸதா³;

ததோ பரம்ஹி ராஜா ச, ததோ சுதோ ச துஸிதே.

உப்பஜ்ஜி தே³வ லோகே ஸோ, தே³வேஹி பரிவாரிதோ;

ஸத்³தா⁴ திஸ்ஸோதி நாமேன, தஸ்ஸ கனிட்ட²கோ ஹிதோ.

ததோ லத்³த⁴ரட்டோ² ஹோதி, பு³த்³த⁴ஸாஸனபாலகோ.

ததா³ காலே பி⁴க்கூ² ஆஸும், ஸப்³பே³ வாசுக்³க³தா ஸதா³;

நிகாயே பஞ்சவேதே⁴வ, யாவ ரஞ்ஞோ ச தா⁴ரணா;

ததோ சுதோ ஸோ ராஜா ச, துஸ்ஸீதே உபபஜ்ஜதி;

தே³வலோகேட்டி²தோ ஸந்தோ, ததா³ வாசுக்³க³தா ததோ.

தஸ்ஸ புத்தாபி அஹேஸும், அனேகா வரஜ்ஜம் க³தா;

அனுக்கமேன சுததே, தே³வலோகம் க³தா து⁴வம்;

ததா³பிதே ஸப்³பே³ பி⁴க்கூ², வாசுக்³க³தாவ ஸப்³ப³தா³;

நிகாயே பஞ்சவிதே⁴வ, தா⁴ரணாவஸதிமதா.

ததோ பரம் போத்த²கேஸு, நிகாயா பஞ்ச பிட்டி²தா;

ததா³ அட்ட²கதா² டீகா, ஸப்³பே³ க³ந்தா² போத்த²கே க³தா;

ஸப்³பே³ போத்தே²ஸு யே க³ந்தா², பாளி அட்ட²கதா² டீகா;

ஸம்ட்டி²தாஸம் டி²தா ஹோந்தி, ஸப்³பே³பி நோ ந ஸந்திதே.

ததா³ தே போத்த²கேயேவ, நிகாயா பிடி²தா கி²லா;

ததா³ அட்ட²கதா²தீ³னி, ப⁴வந்தீதி வத³ந்தி ச.

பரிஹாரோ பண்டி³தேஹி வத்தப்³போ³வ;

லங்காதீ³பஸ்ஸ ரஞ்ஞோவ, ஸத்³தா⁴ திஸ்ஸஸ்ஸ ராஜினோ.

புத்தகோ லங்காதீ³பஸ்ஸ, இஸ்ஸரோ த⁴ம்மிகோ வரோ;

ததா³ கீ²ணாஸவா ஸப்³பே³, ஓலோகேந்தி அனக³தே.

கீ²ணாஸவா பஸ்ஸந்தி தே, து³பஞ்ஞேவ புது²ஜ்ஜனே;

ஸப்³பே³பி தே பி⁴க்கூ² ஆஸும், ப³ஹும்தரா புது²ஜ்ஜனா;

ந ஸக்கி²ஸ்ஸந்தி தே பஞ்ச, நிகாயே வாசுக்³க³தம் இதி;

போத்த²கேஸு ஸப்³பே³ பஞ்ச, ஆரோபேந்தி கீ²ணாஸவா.

ஸத்³த⁴ம்மட்டி²தி சிரத்தாய, ஜனானம் புஞ்ஞத்தா²ய ச;

ததோ பட்டா²யதே ஸப்³பே³, நிகாயா ஹோந்தி போத்த²கே;

அட்ட²கதா² டீகா ஸப்³பே³, தே ஹோந்தி போத்த²கேட்டி²தா.

ததோ பட்டா²யதே ஸப்³பே³, பி⁴க்கு² ஆதி³ மஹாக³ணா;

போத்த²கேஸு டி²தேயேவ, ஸப்³பே³ பஸ்ஸந்தி ஸப்³ப³தா³.

[போத்த²கே ஆரோபன தீ³பகா நிட்டி²தா.]

யோ கோசி பண்டி³தோ தீ⁴ரோ, அட்ட²கதா²தி³கம் க³ந்த²ம் கரோதி வா காராபேதி வா, தஸ்ஸ அனந்தகோ ஹோதி புஞ்ஞஸம்சயோ, அனந்தகோ ஹோதி புஞ்ஞானிஸம்ஸோ. சதுராஸீதி சேதியஸஹஸ்ஸ கரணஸதி³ஸோ, சதுராஸீதி பு³த்³த⁴ரூபஸஹஸ்ஸ கரணஸதி³ஸோ, சதுராஸீதி போ³தி⁴ருக்க²ஸஹஸ்ஸரோபனஸதி³ஸோ, சதுராஸீதி விஹாரஸஹஸ்ஸ கரணஸதி³ஸோ, யோ ச பு³த்³த⁴வசனமஞ்ஜூஸம் கரோதி வா காராபேதி வா, யோ ச பு³த்³த⁴வசனம் மண்ட³னம் கரோதி வா காராபேதி வா, யோ ச பு³த்³த⁴வசனம் லேக²ம் கரோதி வா காராபேதி வா, யோ ச போத்த²கம் வா, யோ ச போத்த²கமூலம் வா, தே³தி வா தா³பேதி வா, யோ ச தேலம் வா சுண்ணம் வா, த⁴ஞ்ஞம் வா போத்த²கப⁴ஞ்ஜனத்தா²ய யம் கிஞ்சி நித்த²ம் வா போத்த²கசி²த்³தே³ ஆவுனத்தா²ய, யம் கிஞ்சி ஸுத்தம் வா கட்ட²ப²லகத்³வயம் வா போத்த²கம் புடனத்தா²ய யம் கிஞ்சி வத்த²ம் வா, போத்த²க-ப³ந்த⁴னத்தா²ய, யம் கிஞ்சி யோத்தம் வா போத்த²கலாப பூடனத்தா²ய யம் கிஞ்சி த²விகம் தே³தி வா தா³பேதி வா.

யோ ச ஹரிதாலேன வா மனோஸிலாய வா, ஸுவண்ணேன வா ரஜதேன வா போத்த²கமண்ட³னம் வா கட்ட²ப²லகமண்ட³னம் வா கரோதி வா காராபேதி வா, தஸ்ஸ அனந்தகோ ஹோதி புஞ்ஞஸம்சயோ, அனந்தகோ ஹோதி புஞ்ஞானிஸம்ஸோ. சதுராஸீதி சேதியஸஹஸ்ஸ கரணஸதி³ஸோ, சதுராஸீதி விஹாரஸஹஸ்ஸ கரணஸதி³ஸோ.

ப⁴வே நிப்³ப³த்தமானோ ஸோ, ஸீலகு³ணமுபாக³தா;

மஹா தேஜோ ஸதா³ ஹோதி, ஸீஹனாதோ³ விஸாரதோ³.

ஆயுவண்ணப³லுப்பேதோ, த⁴ம்மகாமோ ப⁴வே ஸத்³தா³;

தே³வமனுஸ்ஸலோகேஸு, மஹேஸக்கோ² அனாமயோ.

ப⁴வே நிப்³ப³த்தமானோ ஸோ, பஞ்ஞவா ஸுஸமாஹிதோ;

அதி⁴பச்ச பரிவாரோ, ஸப்³ப³ஸுகா²தி⁴ க³ச்ச²தி.

ஸத்³தோ³ஹீரிமா வத³ஞ்ஞூ, ஸம்விக்³க³ மானஸோ ப⁴வே;

அங்க³பச்சங்க³ ஸம்பன்னோ, ஆரோஹ பரிணாஹவா.

ஸப்³பே³ ஸத்தாபி யோ லோகே, ஸப்³ப³த்த² பூஜிதாப⁴வே;

தே³வமனுஸ்ஸ ஸஞ்சரோ, மித்தஸஹாய பாலிதோ.

தே³வமனுஸ்ஸ ஸம்பத்திம், அனுபோ⁴தி புனப்புனம்;

அரஹத்த ப²லம் பத்தோ, நிப்³பா³னம் பாபுணிஸ்ஸதி.

படிஸம்பி⁴தா³ சதஸ்ஸோ, அபி⁴ஞ்ஞா ச²ப்³பி³தே⁴ வரே;

விமோக்கே² அட்ட²கே ஸேட்டே², க³மிஸ்ஸதி அனாக³தே.

தஸ்மாஹி பண்டி³தோ போஸோ, ஸம்பஸ்ஸம் ஹித மத்தனோ;

காரேய்ய ஸாம க³ந்தே² ச, அஞ்ஞே சாபி காராபயே.

போத்த²கே ச டி²தே க³ந்தே², பாளி அட்ட²கதா²தி³கே;

த⁴ம்மமஞ்ஜூஸா க³ந்தே² ச, லேக²ம் கரே காராபயே.

போத்த²கம் போத்த²கமூலஞ்ச, தேஸம் சுல்லதூ²ஸம்பி ச;

பிலோதிகாதி³கம் ஸுத்தம், கட்ட²ப²லத்³வயம்ஹி ச.

த⁴ம்மப³ந்த⁴னத்தா²ய ச, யம் கிஞ்சி மஹக்³க⁴ம் வத்த²ம்;

த⁴ம்மப³ந்த⁴னயோத்தஞ்ச, யம் கிஞ்சி த²விகம்பி ச.

த³தே³ய்ய த⁴ம்மகே²த்தம்ஹி, விப்பஸ்ஸன்னேன சேதஸா;

அஞ்ஞோ சாபி த³ஜ்ஜாபேய்ய, மித்தஸஹாயப³ந்த⁴வேதி.

க³ந்தா²கரலேக²லேகா²பனானிஸம்ஸ தீ³பனா நிட்டி²தா.

[இதி சூலக³ந்த²வம்ஸே பகிண்ணகதீ³பகோ நாம பஞ்சமோ பரிச்சே²தோ³.]

ஸோஹம் ஹம்ஸாரட்ட² ஜாதோ, நந்தபஞ்ஞோதி விஸ்ஸுதோ

ஸத்³தா⁴ ஸீல வீரப்பேதோ, த⁴ம்மரஸம் க³வேஸனோ.

ஸோஹம் ததோ க³ந்த்வா சிமம், ஜின நவம் யம் பூரம்;

ஸப்³ப³ த⁴ம்மம் விசினந்தோ, வீஸதி வஸ்ஸமாக³தோ.

ஸப்³ப³ த⁴ம்மம் விஸ்ஸேஜ்ஜேந்தோ, கிகாரே நேவ பி⁴க்கு²னோ;

ச² வஸ்ஸானம் க³ணம் பி⁴த்வா, காமானம் அபி⁴மத்³த³னம்.

ஸந்தி ஸபா⁴ ச நிப்³பா³னம், க³வேஸிஞ்ச புனப்புனம்;

வஸந்தோஹம், வனாரம்மம், பிடகத்தய ஸங்க³ஹம்;

க³ந்த²வம்ஸம் இமம் கு²த்³த³ம், அரியஸங்க⁴தா³ஸகந்தி.

இதி பாமோஜ்ஜத்தா²ய அரஞ்ஞவாஸினா, நந்த³பஞ்ஞாசரியேன கதோ சூளக³ந்த²வம்ஸோ நிட்டி²தோ.

த⁴ம்மவடம்ஸகனாமேன விஸுதோ தே²ரோ, யம் பகரணம் லிக்கி²தம் தம் பரிபுண்ணம் தேன புஞ்ஞேன தம் பிடகம் பரிஸிப்பம் பரினிட்டி²தம்.