7. ஸமுச்சயஸங்க³ஹஅனுதீ³பனா

162. ஸமுச்சயஸங்க³ஹே. அத்தனோ ஆவேணிகபூ⁴தேன ஸாமஞ்ஞ லக்க²ணேனதி ச ஸம்ப³ந்தோ⁴. அஞ்ஞாபதே³ஸேன ஏவ தது³ப⁴யலக்க²ணேன ஸலக்க²ணானி நாம வுச்சந்தீதி அதி⁴ப்பாயோ. ‘‘நிப்³பா³னஸ்ஸபி ஸரூபதோ லப்³ப⁴மானஸபா⁴வதா’’தி அஞ்ஞனிஸ்ஸய ரஹிதேன லப்³ப⁴மானஸபா⁴வதா. நனு நிப்³பா³னம்பி ராக³க்க²யோ தோ³ஸக்க²யோ மோஹக்க²யோதிஆதி³னா அஞ்ஞனிஸ்ஸயத³ஸ்ஸனம் அத்தி² யேவாதி. த³ஸ்ஸனமத்தம் அத்தி². நிப்³பா³னம் பன ராகா³தீ³ஹி படிப³த்³த⁴ம் ந ஹோதி. அத² கோ² தேஹி தூ³ரதரம் ஹோதி. படிபக்க²தரம், படிவிருத்³த⁴தரம். யஞ்ஹி ரூபஸ்ஸ க²யோ வயோ பே⁴தோ³ அனிச்சாதி வுத்தம். தத்த² ரூபஸ்ஸ உப்பஜ்ஜித்வா க²யோ வுத்தோதி ஸோ ரூபஸ்ஸ நிஸ்ஸிதோ ஏவ ஹோதி. இத⁴ பன ராகா³தீ³னம் புன உப்பாத³ஸ்ஸபி அபா⁴வோ வுத்தோதி ஸோ ராகா³தீ³ஸு அனிஸ்ஸிதோ ஏவ. ந கேவலம் அனிஸ்ஸிதோ. அத² கோ² தேஹி தூ³ரதரோ ச படிபக்க²தரோ ச தேஸம் படிபக்க²கு³ணேஹி இமஸ்ஸஸித்³த⁴த்தாதி. அனிப்ப²ன்னரூபானிபி அதி⁴ப்பேதானி ஏவ தேஸம்பி க²ந்தா⁴யதனதா⁴து ஸச்சேஸு ஸங்க³ஹிதத்தா.

ஆஸவாதீ³ஸு. ‘‘பாரிவாஸியட்டே²னா’’தி பரிவாஸகரணட்டே²ன. ‘‘மத³னீயட்டே²னா’’தி மத³னஜனகட்டே²ன. ‘‘பரிவாஸம் க³ண்ஹந்தீ’’தி தோ³ஸவேபுல்லம் ஆபஜ்ஜந்தீதி வுத்தம் ஹோதி. புன ‘‘பரிவாஸம்’’தி து³க்³க³ந்த⁴தாதி³பரிவாஸம். ‘‘ஆஸவப⁴ரிதமேவா’’தி ஆஸவேஹி பூரிதமேவ. ‘‘ச²ளாரம்மணானி தூ³ஸேந்தீ’’தி தானி ஸாஸவாதி³பா⁴வம் பாபேந்தீதி அதி⁴ப்பாயோ. ‘‘ப⁴வதோ’’தி பூ⁴மிதோ இச்சேவத்தோ². அவதீ⁴யதி பரிச்சி²ந்தீ³யதி ஏதஸ்மாதி அவதி⁴. அபாதா³னம் வுச்சதி. மரியாதோ³ நாம பரியந்தபரிச்சே²தோ³. மரியாத³மத்தபூ⁴தோ க்ரியாவிஸயோ மரியாத³விஸயோ. அவதி⁴ நாம ப்³யாபன விதா⁴னம், க்ரியா ப்³யாபனஸ்ஸ விஸயோ அபி⁴விதி⁴விஸயோ. ‘‘யஸ்ஸா’’தி அவதி⁴ வத்து²ஸ்ஸ. ‘‘அத்தானம்’’தி அவதி⁴வத்து²ம். ‘‘ப³ஹிகத்வா’’தி ஸம்பத்தமத்தம் கத்வாதி அதி⁴ப்பாயோ. அவதி⁴விசாரணாயம். ‘‘ஸத்³த³ஸ்ஸா’’தி ப⁴க³வதோ கித்திஸத்³த³ஸ்ஸ. ‘‘தம்’’தி அவதி⁴பூ⁴தம் அத்த²ம். ‘‘யஸோ’’தி கித்திஸத்³தோ³. ‘‘இதரம்’’தி அனபி⁴விதி⁴விஸயம் ப³ஹி கத்வா பவத்ததி.

காமாஸவாதீ³ஸு. ‘‘தன்னாமேனா’’தி காமனாமேன. ‘‘ததா³ரம்மணா’’தி காமத⁴ம்மாரம்மணா. ‘‘அயமத்தோ² வா’’தி காமீயதீதிஆதி³னா வுத்தோ பச்சி²மத்தோ²வ. ‘‘மஹக்³க³தகுஸலத⁴ம்மா’’தி இதா⁴தி⁴ப்பேதம் கம்மப⁴வம் ஸந்தா⁴ய வுத்தம். ‘‘தம் நிப்³ப³த்தா’’தி தேன நிப்³ப³த்தா. ‘‘ததா³ரம்மணா’’தி து³வித⁴ப⁴வாரம்மணா. ‘‘தண்ஹா ஏவா’’தி ப⁴வதண்ஹா ஏவ. ‘‘ப⁴வோ ஏவா’’தி ப⁴வாரம்மணதாய ப⁴வனாமிகா தண்ஹா ஏவ. ‘‘இமே ஏவா’’தி தண்ஹாதி³ட்டி² அவிஜ்ஜா ஏவ. ‘‘பரிவுத்தே² ஸதீ’’தி பரிவஸிதே ஸதி. ‘‘காமவிஸயா’’தி காமத⁴ம்மவிஸயா. ‘‘தஸ்மிம்’’தி காமாஸவே. ப⁴வவிஸயா மானாத³யோ பரிவுத்தா² ஏவாதிஆதி³னா யோஜேதப்³ப³ம். ததா² தி³ட்டி²விஸயாதி பதே³பி.

‘‘அனஸ்ஸாஸிகம் கத்வா’’தி அஸ்ஸாஸபஸ்ஸாஸரஹிதம் கத்வா. ‘‘அவஹனனட்டே²னா’’தி அஜ்ஜோ²த்த²ரித்வா மாரணட்டே²ன. அதோ⁴கத்வா மாரணட்டே²னாதிபி யுஜ்ஜதி. ‘‘து³த்தரட்டே²னா’’தி தத்த² பதந்தஸ்ஸ தரிதும் து³க்கரட்டே²ன. ‘‘வுத்தனயேனா’’தி ஆஸவேஸு வுத்தனயேன.

‘‘வட்டஸ்மிம்’’தி திவித⁴வட்டஸ்மிம். ‘‘ப⁴வயந்தகே’’தி அவிஜ்ஜாஸங்கா²ராதி³கே ப⁴வசக்கே. ‘‘ஆமஸனம்’’தி பத³ஸ்ஸ அத்த²ம் த³ஸ்ஸேதி ‘‘ததா² ததா² கப்பேத்வா க³ஹண’’ந்தி. ‘‘ஸாஸனே’’தி பரியத்திஸாஸனே தஸ்மிம் தஸ்மிம் ஸுத்தந்தே. ‘‘தி³ட்டி²யோ தி³ட்டு²பாதா³னம்’’தி தி³ட்டி²வத்தூ²ஸு த³ள்ஹக்³கா³ஹட்டே²ன தி³ட்டி²யோ ஏவ தி³ட்டு²பாதா³னம். அத்தவாது³பாதா³னே. பரிகப்ப பு³த்³தி⁴ நாம மிச்சா²ஞாணம் வுச்சதி. ‘‘இஸ்ஸர நிம்மிதம்’’தி ஸகலலோகிஸ்ஸரேன மஹாப்³ரஹ்முனா ஆதி³கப்பகாலே நிம்மிதம். ‘‘அதி⁴ச்ச ஸமுப்பன்னம்’’தி அஹேது அபச்சயா ஸமுப்பன்னம். ‘‘அச்சந்தஸஸ்ஸதம்’’தி ப⁴வபரம்பராஸு ஸஸ்ஸதம். ‘‘ஏகச்சஸஸ்ஸதம்’’தி ப⁴வவிஸேஸம் பத்வா ஏகச்சானம் ஸத்தானம் ஸஸ்ஸதம். ‘‘உச்சி²ன்னம்’’தி யத்த²கத்த²சி பரம்மரணா உச்சி²ன்னம். புராணஞ்சகம்மம் பரிக்கீ²ணம், நவஞ்சகம்மம் அகதம். ஏவம் ஸம்ஸார ஸுத்³தீ⁴திஆதி³னா க³ஹணந்தி அத்தோ². ஸந்தோ காயோ ஸக்காயோ. ‘‘ஸந்தோ’’தி பரமத்த²தோ விஜ்ஜமானோ. ‘‘காயோ’’தி ரூபகாயோ, நாமகாயோ. அத்தனோ அத்தனோ காயோ வா ஸக்காயோ. பச்சத்தகாயோ, பாடிபுக்³க³லிக காயோதி வுத்தம் ஹோதி. யதா²வுத்தகாய த்³வயமேவ. ஸக்காயே தி³ட்டி² ஸக்காயதி³ட்டி². தத்த² ‘‘ஸக்காயே தி³ட்டீ²’’தி புப்³ப³ந்தாபரந்த கப்பிகானம் விய புப்³ப³ந்தா பரந்தேஅசிந்தேத்வா ஸப்³ப³ஸத்தானம்பி அத்தனோ க²ந்தே⁴ஸு ஏவ ‘ரூபம் மே அத்தாதி வா’ அத்தா மே ரூபவாதி வா, அத்தனி மே ரூபந்தி வா, ரூபஸ்மிம் மே அத்தாதி வா, ஏவமாதி³னா த⁴ம்மதா ஸித்³தா⁴ தி³ட்டீ²தி வுத்தம் ஹோதி. ‘‘அஸ்ஸுதவா’’தி க²ந்த⁴தே³ஸனாதி³கே ஸுஞ்ஞதத⁴ம்மப்படிஸம் யுத்தே தே³ஸனா த⁴ம்மே அஸ்ஸுத புப்³ப³த்தா நத்தி² ஸுதம் ஏதஸ்ஸாதி அஸ்ஸுதவா. ‘‘புது²ஜ்ஜனோ’’தி லோகியமஹாஜனோ. தத்த² பரியாபன்னோ பன ஏகபுக்³க³லோபி புது²ஜ்ஜனோத்வேவ வுச்சதி. ஸோ ஸுதவாபி அத்தி², அஸ்ஸுதவாபி அத்தி². இத⁴ அஸ்ஸுதவா அதி⁴ப்பேதோ. அரிய புக்³க³லோ பன தத்த² பரியாபன்னோ ந ஹோதி. அஹந்திவா, மமாதி வா, மயீதி வா, மேதி வா, பராமஸன பதா³னி நாம. ‘‘ஸேஸத⁴ம்மேவா க³ஹேத்வா’’தி ரூபதோ அவஸேஸே நாமக்க²ந்த⁴ த⁴ம்மே அத்தா மேதி க³ஹேத்வா வா. ‘‘த⁴ம்ம முத்தகம் வா அத்தானம் க³ஹேத்வா’’தி பஞ்சக்க²ந்த⁴த⁴ம்மவிமுத்தம் பரிகப்பஸித்³த⁴ம் அத்தானம் வா க³ஹேத்வா. சதஸ்ஸோ அவத்தா² யஸ்ஸாதி சதுராவத்தி²கா. வேத³னாய ஸம்போ⁴க³ரஸத்தா ‘‘ஸம்பு⁴ஞ்ஜிம்’’தி வுத்தம். ‘‘ஸுகி²தோ’’தி ஸுக²வேத³னாய ஸமங்கீ³புக்³க³லோ. த⁴ம்மதோ க²ந்த⁴ பஞ்சகமேவ. தத்த² பன ஸுக²வேத³னாபதா⁴னத்தா ததா² ஸமனுபஸ்ஸந்தோ வேத³னம் அத்தாதி ஸமனுபஸ்ஸதி நாம. ‘‘ஸமூஹதோ க³ஹேத்வா’’தி அஹமஸ்மி, அஹம் ஏகோ ஸத்தோதிஆதி³னா ஸமூஹதோ. ‘‘வத்தூ²’’தி பஞ்சக்க²ந்தா⁴ வுச்சந்தி. ஞாதபரிஞ்ஞாதி³வஸேன அபரிஞ்ஞாதானி வத்தூ²னி ஏதேஹீதி அபரிஞ்ஞாதவத்து²கா. ஏகமுஹுத்தமத்தேபி காலே. ரூபம் அத்ததோ ஸமனுபஸ்ஸதீதிஆதி³கம் சதுராவத்த²ம் ஸந்தா⁴ய ‘‘கதா³சி அத்ததோ’’திஆதி³ வுத்தம். ‘‘அத்தனிமித்தம்’’தி அபி⁴க்கமனாதீ³ஸு காயவசீமனோ க்ரியாஸு அஹம் அபி⁴க்கமாமி, அஹம் படிக்கமாமீதிஆதி³னா சித்தே தி³ஸ்ஸமானா அத்தச்சா²யா வுச்சதி.

‘‘காமனட்டே²னா’’தி இச்ச²னட்டே²ன. ‘‘ச²ந்த³னட்டே²னா’’தி பத்த²னட்டே²ன. லீனபா⁴வோ நாம சித்தசேதஸிகானம் படிகுடனம். ஆபாதீ³யதே ஆபாத³னம். லீனபா⁴வஸ்ஸ ஆபாத³னந்தி விக்³க³ஹோ. ‘‘தந்தீ³’’தி ஆலஸ்யம் வுச்சதி. ‘‘விஜம்பி⁴ததா’’ நாம கிலேஸவஸேன காயங்கா³னம் விஜம்ப⁴னம் ஸமிஞ்ஜனப்பஸாரணாதி³கரணம். ஸா ஏவ பச்சயோ ஏதஸ்ஸாதி விக்³க³ஹோ.

அனுஸயபத³த்தே². ‘‘உப்பஜ்ஜந்தீ’’தி உப்பஜ்ஜிதும் ஸக்கோந்தி. ந பன ஏகந்ததோ உப்பஜ்ஜந்தி. ஸந்தேஸுஹி ஏகந்ததோ உப்பஜ்ஜந்தேஸு அனுஸயா நாம ந ஹோந்தி ஸயனகிச்சஸ்ஸேவ அபா⁴வதோ. ‘‘உப்பஜ்ஜந்தீ’’தி வா உப்பஜ்ஜிதும் பஹோந்தி. பத்தோ²த³னோ ப³ஹூனம் ஜனானம் பஹோதீதிஆதீ³ஸு விய. பஞ்ஞத்தியோஹி அஸபா⁴வத⁴ம்மஜாதிகத்தா காரண லாபே⁴பி உப்பஜ்ஜிதும் நப்பஹோந்தி. இமே பன ஸபா⁴வத⁴ம்மஜாதிகத்தா காரண லாபே⁴ ஸதி உப்பஜ்ஜிதும் பஹோந்தீதி. ஏவஞ்ஹிஸதி, உப்பாத³ம் அபத்தானம்பி தேஸம் பரமத்த²ஜாதிகதா ஸித்³தா⁴ ஹோதீதி. ‘‘ஸஹ அனுஸேந்தீ’’தி ஏகதோ அனுஸேந்தீதி வுத்தா காமராகா³னுஸயோ ச படிகா⁴னுஸயோ ச மானானுஸயோ ச தி³ட்டா²னுஸயோ ச விசிகிச்சா²னுஸயோ ச. இமேஸம் ஸத்தானம் ஸத்தஸந்தானே அனுஸயகிச்சமத்தம் ட²பேத்வா ஏகதோ உப்பத்தி நாம நத்தி². யதி³ ஏகதோ உப்பஜ்ஜேய்யும். த்³வாத³ஸா குஸலசித்தானி ஸத்தஸந்தானே நிச்சகாலம்பி ஏகதோ உப்பஜ்ஜேய்யும். ந ச உப்பஜ்ஜந்தி. தஸ்மா விஞ்ஞாயதி உப்பஜ்ஜனம் நாம அப்பஹீனட்டே²ன உப்பஜ்ஜனாரஹபா⁴வோ வுத்தோதி. ஸேந்தீதி வத்வா தத³த்த²ம் த³ஸ்ஸேதி ‘‘விஸும்’’திஆதி³னா. ‘‘அவுட்டி²தா’’தி உப்பாத³ம் அபத்தா. ‘‘ததா²பவத்தா’’தி சாலனாகாரேன பவத்தா. புன ‘‘ததா²பவத்தா’’தி ஜவனஸஹஜாதாகாரேன பவத்தா. ‘‘யேஸம்’’தி காமராகா³னுஸயாதீ³னம். ‘‘ஆவஜ்ஜனம்’’தி ஆவஜ்ஜனசித்தம். ‘‘த³மத²ம்’’தி ஸுத³ந்தபா⁴வம். ‘‘ததா² பவத்தா’’தி சித்தஸந்தானானுஸயனாகாரேன பவத்தா. தாஅவத்தா² யேஸம் தே தத³வத்தி²கா. யதி³ தே உப்பாத³ம் அபத்தா. ஏவம்ஸதி, தே பரமத்தா²பி நாம ந ப⁴வேய்யுந்தி சோத³னம் பரிஹரதி ‘‘தே பனா’’திஆதி³னா. ஸசே தே குஸலாப்³யாகத சித்தஸந்தானம்பி அனுக³தா. ஏவம்ஸதி, தே குஸலாப்³யாகதானி நாம ஸியுந்தி சோத³னம் பரிஹரதி ‘‘ந சா’’திஆதி³னா. அத² தே ஏகந்த அகுஸலா ஸியும். ஏவம்ஸதி, குஸலாப்³யாகதேஹி விருத்³தா⁴ ப⁴வேய்யும்தி சோத³னம் பரிஹரதி ‘‘நாபீ’’திஆதி³னா. யதி³ உப்பாத³ம் அபத்தா. ஏவம்ஸதி, காலவிமுத்தா ஸியுந்தி ஆஹ ‘‘நாபிகாலத்தய வினிமுத்தா’’திஆதி³ம். ‘‘ஸானுஸயே சித்தஸந்தானே’’தி ஸேக்க²புது²ஜ்ஜனானம் சித்தஸந்தானே. ‘‘ஸஹ மக்³கு³ப்பாதா³’’தி மக்³கு³ப்பாதே³ன ஸஹேவ. ‘‘தத்த² தத்த² வுத்தோ’’தி அட்ட²கதா²டீகாஸு வுத்தோ. ‘‘அனாக³தஸாமஞ்ஞம்’’தி அனாக³தஸதி³ஸம். ந ஏகந்த அனாக³தந்திபி வத³ந்தி. கத²ம் தே ஸங்க²தஜாதிகா ஹோந்தீதி ஆஹ ‘‘தேஹி மக்³கே³’’திஆதி³ம். விபா⁴வனிபாடே². ‘‘அப்பஹீனா’’தி மக்³கே³ன அப்பஹீனா. ‘‘தத³வத்தா²’’தி உப்பஜ்ஜனாரஹாவத்தா². ‘‘தம் ஸபா⁴வத்தா’’தி காமராகா³தி³ ஸபா⁴வத்தா. ‘‘ததா² வுச்சந்தீ’’தி அனுஸயாதி வுச்சந்தி. அனாக³தா நாம ந ஹோந்தி. சித்தஸந்தானே வத்தமானபா⁴வேன ஸித்³த⁴த்தா. ‘‘ஹஞ்சி பஜஹதீ’’தி யதி³பஜஹதி. ‘‘தேனஹீ’’தி ததோ ஏவ. ‘‘ரத்தோ’’தி ராக³ஸமங்கீ³ ஹுத்வா. ‘‘து³ட்டோ²’’தி தோ³ஸஸமங்கீ³ ஹுத்வா. ‘‘முள்ஹோ’’தி மோஹஸமங்கீ³ ஹுத்வா பஜஹதீதி தோ³ஸோ ஆபஜ்ஜதீதி வுத்தம் ஹோதி. பரியுட்டா²ன பத்தானம் ராகா³தீ³னம். ‘‘மக்³க³வஜ்ஜ²ம்’’தி மக்³கே³ன வதி⁴தப்³ப³ம். ‘‘உப்பன்னம்’’தி பச்சுப்பன்னம். வத்தமானஞ்ச தம் உப்பன்னஞ்சாதி வத்தமானுப்பன்னம். ‘‘பு⁴த்வா’’தி ஆரம்மணம் பரிபு⁴ஞ்ஜித்வா. விக³ச்ச²தீதி விக³தம். பு⁴த்வா விக³தஞ்ச தம் உப்பன்னஞ்சாதி பு⁴த்வா விக³துப்பன்னம். விபச்சனத்தா²ய ஓகாஸம் கரோந்தீதி ஓகாஸகதம். ஓகாஸகதஞ்ச தம் உப்பன்னஞ்சாதி ஓகாஸகதுப்பன்னம். ஸமுதா³சாரோ வுச்சதி பி⁴ய்யோ பவத்தனம். ஸமுதா³சாரோ ச ஸோ உப்பன்னஞ்சாதி ஸமுதா³சாருப்பன்னம். க²ந்த⁴பஞ்சக ஸங்கா²தம் பூ⁴மிம் லப⁴தீதி பூ⁴மிலத்³த⁴ம். பூ⁴மிலத்³த⁴ஞ்ச தம் உப்பன்னஞ்சாதி பூ⁴மிலத்³து⁴ப்பன்னம். ஆரம்மணம் அதி⁴கதரம் க³ண்ஹாதீதி ஆரம்மணாதி⁴க்³க³ஹிதம். ஆரம்மணாதி⁴க்³க³ஹிதஞ்ச தம் உப்பன்னஞ்சாதி ஆரம்மணாதி⁴க்³க³ஹிதுப்பன்னம். மஹக்³க³தஜ்ஜா²னேன அவிக்க²ம்பி⁴தஞ்ச தம் உப்பன்னஞ்சாதி அவிக்க²ம்பி⁴துப்பன்னம். மக்³கே³ன அஸமுக்³கா⁴டிதஞ்ச தம் உப்பன்னஞ்சாதி அஸமுக்³கா⁴டிதுப்பன்னம். ஏவம் மக்³க³வஜ்ஜா²னம் அனுஸயானம் உப்பன்னபா⁴வேன வுத்தத்தா பச்சுப்பன்னதா பரியாயோவ தேஸம் வத்தப்³போ³தி. ‘‘ஸேக்கா²’’தி ஸத்தஸேக்க²புக்³க³லா.

ஓரம்பா⁴கோ³ வுச்சதி காமலோகோசேவ புது²ஜ்ஜனபா⁴வோ ச. ஓரம்பா⁴கே³ ஸந்தி³ஸ்ஸந்தீதி ஓரம்பா⁴கி³யானி. உத்³த⁴ம்பா⁴கோ³ வுச்சதி மஹக்³க³தபா⁴வோசேவ அரியபா⁴வோ ச. உத்³த⁴ம்பா⁴கே³ ஸந்தி³ஸ்ஸந்தீதி உத்³த⁴ம்பா⁴கி³யானி. தத்த². காமச்ச²ந்தோ³, ப்³யாபாதோ³,தி இமானி த்³வேஸம் யோஜனானி காமலோகஸங்கா²தே ஓரம்பா⁴கே³ ஏவ ஸந்தி³ஸ்ஸந்தி. தி³ட்டி², விசிகிச்சா², ஸீலப்³ப³தபராமாஸோ,தி இமானி தீணி புது²ஜ்ஜனபா⁴வ ஸங்கா²தே. ஸேஸானி பன பஞ்ச மஹக்³க³தபா⁴வஸங்கா²தே ச அரியபா⁴வஸங்கா²தேச உத்³த⁴ம்பா⁴கே³பி ஸந்தி³ஸ்ஸந்தி. அத²வா. புரிமானி பஞ்சயஸ்ஸ தானி மக்³கே³ன அப்பஹீனானி, தம் உபரிப⁴வக்³கே³ டி²தம்பி காமலோகஸங்கா²தம் ஓரம்பா⁴க³ம் ஆகட்³ட⁴ந்தி, தஸ்மா ஓரம்பா⁴கா³ய ஸம்வத்தந்தீதி ஓரம்பா⁴கி³யானி. பச்சி²மானி பஞ்ச யஸ்ஸ தானி அப்பஹீனானி, தம் காமலோகே டி²தம்பி உத்³த⁴ம்பா⁴க³ம் ஆகட்³ட⁴ந்தி, தஸ்மா உத்³த⁴ம்பா⁴கா³ய ஸம்வத்தந்தீதி உத்³த⁴ம்பா⁴கி³யானி. தத்த²ஹி த்³வேரூபாரூபராகா³ ஏகந்தேன மஹக்³க³தபா⁴வம் ஆகட்³ட⁴ந்தியேவ. மானோ ச உத்³த⁴ச்சஞ்ச அவிஜ்ஜாசாதி இமானி ச ரூபாரூபராக³ஸஹக³தானி ஹுத்வா ஆகட்³ட⁴ந்தி. ஓரம் ஹேட்டி²மம் காமலோகம் ப⁴ஜந்தீதி ஓரம்பா⁴கி³யானி. உத்³த⁴ம் ரூபாரூபலோகம் ப⁴ஜந்தீதி உத்³த⁴ம்பா⁴கி³யானீதிபி வண்ணேந்தி. ‘‘இதரானி பனா’’தி த்³வே இஸ்ஸா ஸம்யோஜன மச்ச²ரியஸம்யோஜனானி. ‘‘கமோபன த்³வின்னம் பீ’’தி இத⁴ ஸங்க³ஹே த்³வின்னம்பி அனுக்கமோபன.

‘‘விபா³தே⁴ந்தீ’’தி விஹிம்ஸந்தி. ‘‘உபதாபேந்திசா’’தி உபக³ந்த்வா ஸந்தாபேந்தி. ஸேஸமேத்த² ஸுவிஞ்ஞேய்யம்.

அகுஸலஸங்க³ஹானுதீ³பனா நிட்டி²தா.

163. மிஸ்ஸகஸங்க³ஹே. ‘‘சித்தப்படிபாத³னம் சித்தனியோஜனம். ‘‘ஸுக³தி து³க்³க³தி விவட்டஸங்கா²தாஸு சா’’தி ஸுக³திப⁴வ து³க்³க³தி ப⁴வனிப்³பா³னஸங்கா²தாஸு ச. நிப்³பா³னஞ்ஹி வட்டதோ கி³க³தத்தா விவட்டந்தி வுச்சதி. ‘‘த³ஸ்ஸனாதீ³ஹி ஏவா’’தி த³ஸ்ஸனஸங்கப்பனாதீ³ஹி ஏவ. உஜுக³தி நாம ஹிதஸுக²ஸம்வத்தனிகா பவத்தி வுச்சதி. வங்கக³தினாம அஹித து³க்க²ஸம்வத்தனிகா பவத்தி. ‘‘பத²ங்கா³னீ’’தி பத²ஸ்ஸமக்³க³ஸ்ஸ அங்கா³னி. மக்³கோ³தி ச உபாயோ வுச்சதீதி ஆஹ ‘‘உபாயங்கா³னீ’’தி. ‘‘இதரானீ’’தி ஸம்மாதி³ட்டி² ஸம்மாஸங்கப்பாதீ³னி அங்கா³னி. உஜுக³தியா க³மனஸ்ஸ உபாயங்கா³னி. இமேபி சத்தாரோ மக்³க³ங்க³ த⁴ம்மா த⁴ம்மா நாம ஆக³தா. ‘‘ததா² ததா² பவத்தானம்’’தி முஸாவாதா³தி³வஸேன பவத்தானம். ‘‘நா நாமக்³கோ³வா’’தி மிச்சா²மக்³கோ³ ச ஸம்மாமக்³கோ³ ச.

‘‘அத்தாதீ⁴னவுத்திகே’’தி அத்தாயத்தப்பவத்திகே. அத்தனோ க³தி நாம சக்கு²ந்த்³ரியாதீ³னம் த³ஸ்ஸனாதி³ கிச்சமேவ வுச்சதி. ‘‘இஸ்ஸரா அதி⁴பதினோ’’தி இத³ம் ஆதி⁴ப்பச்சத்த²பாகடத்த²ம் வுத்தம். அத்தோ² பன பா⁴வப்பதா⁴னவஸேன க³ஹேதப்³போ³. இந்த்³ரியம் இஸ்ஸரியம் ஆதி⁴ப்பச்சந்திஹி இமே ஏகத்தா²தி. ‘‘இத்தா²காரானி’’ நாம இத்தி²லிங்க³புரிஸலிங்கா³தி³. ‘‘அஞ்ஞதா² அப்பவத்தியம்’’தி இத்தி²ஸண்டா²னே புரிஸலிங்கா³தீ³னம், புரிஸஸண்டா²னே இத்தி²லிங்கா³தீ³னம் அப்பவத்தியம். தேனாஹ ‘‘ததா²ஹீ’’திஆதி³ம். மனோ விஜானனகிச்சே ஸம்பயுத்தத⁴ம்மானம் இஸ்ஸரோ ஹோதி அனஞ்ஞாபி⁴ப⁴வனீயபா⁴வேன பவத்தனதோதி ஸம்ப³ந்தோ⁴. ஏவம் பரத்த². ‘‘ஆரம்மணாதி⁴முச்சனே’’தி ஆரம்மணே நிராஸங்கப்பவத்தியம். ‘‘ஆரம்மணுபட்டா²னே’’தி சித்தே பு³த்³த⁴கு³ணாதி⁴கஸ்ஸ ஆரம்மணஸ்ஸ உபட்டா²னே. ‘‘சதுஸச்சத⁴ம்மோ’’தி தேன புக்³க³லேன அனஞ்ஞாத புப்³போ³ சதுஸச்ச த⁴ம்மோ. அனஞ்ஞாத புப்³ப³ம் அமதம் வா பத³ம். அனஞ்ஞாதம் ஞஸ்ஸாமி இதி பவத்தம் இந்த்³ரியந்தி ஸமாஸோ. படிபன்னஸ்ஸாதி பன அத்த²தோ ஸித்³த⁴த்தா வுத்தம். ‘‘விப்பகதபா⁴வேனா’’தி அனிட்ட²ங்க³தபா⁴வேன. புனப்புனம் ஜானனகிச்சயுத்தானம் மஜ்ஜே² ச²ன்னம்ஸேக்கா²னம். ஏதேன அவஸத்³த³ஸ்ஸயாவ ஸப்³ப³கிலேஸப்பஹானா ஜானனந்தி அத்த²ம் தீ³பேதி. பத²ம மக்³கே³ன ஞாதம் மரியாத³ம் அனதிக்கம்ம ஜானனந்திபி வண்ணேந்தி. ஆஜானிதத்தா²தி அஞ்ஞாதாவீ. அரஹா கீ²ணாஸவோ கதகிச்சோ வுஸித ப்³ரஹ்மசரியோ. அஞ்ஞாதாவினோ இந்த்³ரியந்தி அஞ்ஞாதாவிந்த்³ரியந்தி அத்த²ம் த³ஸ்ஸேதும் ‘‘பரினிட்டி²த ஆஜானனகிச்சஸ்ஸா’’திஆதி³ வுத்தம். ‘‘தப்³பி³முத்தீ’’தி அத்தக்³கா³ஹ விமுத்தி. ‘‘தஸ்மிம் வா’’தி தஸ்மிம் அத்தனிவா. ‘‘ஸம்கிலிட்டோ²’’தி நானாகிலேஸேஹி ஸம்கிலேஸிதோ. ‘‘விப்ப²ந்தி³தோ’’தி நானாஸுக²து³க்கே²ஹி ஸம்கம்பிதோ. ‘‘வோதா³னபத்தியா’’தி விஸுத்³தி⁴பத்தத்தா²ய. ‘‘தாயபடி பத்தியா’’தி கரணத்தே², ஹேது அத்தே² வா கரணவசனம். ‘‘வோதா³னபத்தியா’’தி ஸாமிஅத்தே² ஸாமிவசனம்.

‘‘ப³லீயந்தீ’’தி நாமதா⁴துனித்³தே³ஸோ. தேனாஹ ‘‘ப³லஸா கரோந்தீ’’தி. ‘‘ப³லஸா’’தி ப³லேன. பரிதோ ஸமந்ததோ ஸேந்தி பரிவாரேந்தீதி பரிஸ்ஸயா. அஸ்ஸத்³த⁴ஸ்ஸ பா⁴வோ அஸ்ஸத்³தி⁴யம். கோஸஜ்ஜஸங்கா²தேன படிபக்க²த⁴ம்மேன. முட்டா² நட்டா² ஸதி யஸ்ஸாதி முட்ட²ஸ்ஸதி. முட்ட²ஸ்ஸதிஸ்ஸ பா⁴வோ முட்ட²ஸ்ஸச்சம். ‘‘ஸேஸது³க த்³வயம்’’தி அஹிரிகது³கம் ஹிரிது³கஞ்ச.

க³ஹபதி, ஜாயம்பதீ, திஆதீ³ஸு விய பதிஸத்³தோ³ ஸாமிஇஸ்ஸர பரியாயோதி ஆஹ ‘‘பதீதி ஸாமிஇஸ்ஸரோ’’தி. ‘‘பரேஸம்’’தி ஸஹஜாதேஸு பரேஸம் இந்த்³ரியானம். ‘‘பரேஹீ’’தி கம்மத்தே² கரணவசனம். பரே ஸஹஜாதே இந்த்³ரிய த⁴ம்மேதி அத்தோ². ‘‘அதி⁴கோ’’தி அதி⁴கதரோ. ‘‘அத்தாதீ⁴ன வுத்தீனம்’’தி அத்தாயத்தவுத்தீனம். ‘‘ச²ந்தா³க³மனவஸேன வா’’தி ஏத்த² ஆக³ச்ச²தி ப²லம் ஏதேனாதி ஆக³மனம். ஆதி³காரணம், மூலகாரணம், பப⁴வகாரணம். ச²ந்தோ³ ஏவ ஆக³மனம் ச²ந்தா³க³மனம். தேனாஹ ‘‘புப்³பே³ அதீதப⁴வேஸூ’’திஆதி³ம். ஸம்பயுத்த த⁴ம்மே அத்தபராதீ⁴னே கத்வாதி ஸம்ப³ந்தோ⁴. மஹோகோ⁴ திணபண்ணகஸடே அத்தபராதீ⁴னே கரோந்தோ வியாதி யோஜனா. தத்த² ‘‘அத்தபராதீ⁴னே’’தி அத்தஸங்கா²தோபரோ அத்தபரோ. அத்தபரேன அதீ⁴னா அத்தபராதீ⁴னாதி அத்தோ². ‘‘ஸேஸேஸுபீ’’தி ஸேஸேஸு வீரிய சித்த வீமம்ஸாதி⁴பதீஸுபி. ஏதேன ‘வீரியமேவ அதி⁴பதி வீரியாதி⁴பதி. வீரியவதோ கிம் நாம கம்மம் ந ஸிஜ்ஜ²தீதி ஏவம் புப்³பா³பி⁴ஸங்கா²ரவஸேன வா புப்³பே³ அதீதப⁴வேஸு ஸுட்டு² ஆஸேவிதவீரியாக³மனவஸேன வா தேஸு தேஸு கல்யாண பாபகம்மேஸு ஸம்பயுத்த த⁴ம்மே மஹோகோ⁴ விய திணபண்ணகஸடே அத்தபராதீ⁴னே நிச்சம் பக்³க³ஹிதது⁴ரேகத்வா பவத்தம் வீரிய’ந்திஆதி³னயம் அதிதி³ஸதி. ‘‘பச்சி²மா தயோ த⁴ம்மா’’தி வீரிய சித்த வீமம்ஸா த⁴ம்மா. பரவஸேபி வத்தந்தி, ததா³ தேஸம் அதி⁴பதிபா⁴வோ நத்தீ²தி சோத³னா. அதி⁴பதி கிச்சம் நாம து⁴ரவாஹிதாதி ஸம்ப³ந்தோ⁴. ‘‘தம் தம் கிச்ச விஸேஸம் அனபேக்கி²த்வா’’தி சக்கு²ந்த்³ரியம் த³ஸ்ஸன கிச்சே இஸ்ஸரோ, ஸோதிந்த்³ரியம் ஸவன கிச்சேதிஆதீ³ஸு தம் தம் கிச்சவிஸேஸம் அபேக்க²தி, ததா² அனபேக்கி²த்வா. ‘‘விஜானனாதி³ கிச்சம்’’தி ‘மனோ ஆரம்மண விஜானனே’திஆதி³னா வுத்தம் ஸப்³ப³ம் இந்த்³ரிய கிச்சம்.

பு⁴ஸோ ஹரந்தி வஹந்தீதி ஆஹாரா. ‘‘பு⁴ஸோ’’தி அதிரேகதரந்தி அத்தோ². கத²ம் பன பு⁴ஸோ ஹரந்தீதி ஆஹ ‘‘ஸஹஜாதாதீ³’’திஆதி³ம். தேதே பச்சய த⁴ம்மா தேதே பச்சயுப்பன்ன த⁴ம்மா சாதி யோஜனா. ‘‘ஏத்தா²’’தி இமிஸ்ஸம் பாளியம். ‘‘பச்சயாஹாரோ வா’’தி ஏத்த² ஹேது ஆரம்மணாதி³கோ ஸப்³போ³பச்சயோ பச்சயாஹாரோ நாம. ஆஹார பச்சயோபன விஸும் ஏகோ பச்சயவிஸேஸோ. ‘‘பச்சயட்டே²னா’’தி ஹேது ஆரம்மணாதி³ பச்சயட்டே²ன. ‘‘ஆஹாரபூ⁴தா’’தி உபத்த²ம்ப⁴னகிச்சவிஸேஸபூ⁴தாதி வுத்தம் ஹோதி. ‘‘களீரங்குரானம்’’தி கம்மத்தே² ஸாமிவசனம். ‘‘வட்³டி⁴யா’’தி வட்³ட⁴னத்தா²ய. ‘‘டி²தியா’’தி டி²தத்தா²ய. இமேஸத்தா வட்டே பவத்தந்தீதி ஸம்ப³ந்தோ⁴. ஸேஸமேத்த² ஸுவிஞ்ஞேய்யம். ‘‘பக்கே² வியூஹித்வா’’தி பக்கே² ஸஞ்சாலேத்வாதி வுத்தம் ஹோதி. ‘‘பக்கே²’’தி வா பக்கே²ஹி வாதம் ப்³யூஹித்வா. ‘‘தத³னுஸயிதஸ்ஸா’’தி தஸ்மிம் விபாக ஸந்தானே அனுஸயி தஸ்ஸ. ‘‘விபா⁴வேத்வா’’தி பச்சக்க²தோ விபூ⁴தம் பாகடம் கத்வா. ‘‘அலபி⁴த்வா’’தி சக்கு²ம்ஹி அலபி⁴த்வா. அபஸ்ஸித்வாதி வுத்தம் ஹோதி. ‘‘தத்தே²வா’’தி நிவாஸட்டா²னே ஏவ. ‘‘ஸம்பயுத்தா’’தி விஞ்ஞாணேன ஸம்பயுத்தா. ப⁴விம்ஸு வட்³டி⁴ம் ஸூதி பூ⁴தா. ஸம்ப⁴வம் வுட்³டி⁴காரணம் ஏஸந்தி க³வேஸந்தீதி ஸம்ப⁴வேஸினோ. ‘‘வுத்தனயேனா’’தி ‘யதா² யவபீ³ஜானம் வா ஸாலிபீ³ஜானம் வா’திஆதி³னா வுத்தனயேன. ‘‘ஆஹாரேதீ’’தி பவத்தேதி. ‘‘மனோஸஞ்சேதனாஹாரோ’’தி குஸலாகுஸல கம்மபூ⁴தோ மனோஸஞ்சேதனாஹாரோ. ‘‘தயோ ப⁴வே’’தி தயோ காமப⁴வாதி³கே உபபத்திப⁴வே. டி²தியாதி ச அனுக்³க³ஹாயாதி ச வுத்தம். இதரதா² உப்பத்தியாதி ச வுத்தம் ஸியாதி அதி⁴ப்பாயோ.

‘‘து³ப்³ப³லகிச்சட்டா²னவத்து²கத்தா’’தி து³ப்³ப³லகிச்சத்தா து³ப்³ப³லட்டா²னத்தா து³ப்³ப³லவத்து²கத்தா. ‘‘அபி⁴னிபாத மத்தானி ஹோந்தீ’’தி த³ஸ்ஸன ஸவனாதி³ மத்தானி ஹோந்தீதி அதி⁴ப்பாயோ. ‘‘விதக்க பச்சி²மகம் ஜா²னம்’’தி ஜா²னானி நாம விதக்கஸ்ஸ பச்சா²னுக³தம் ஹோதீதி அத்தோ². ‘‘தத்தா²’’தி தேஸுபஞ்சவிஞ்ஞாணேஸு. ‘‘தா’’தி வேத³னா ஏகக்³க³தா. ‘‘தம்’’தி ஜா²னகிச்சம். ஏகக்³க³தா ப³லவதீ ந ஹோதீதி ஸம்ப³ந்தோ⁴. ‘‘மக்³கி³ந்த்³ரிய ப³லபா⁴வாயா’’தி மக்³கி³ந்த்³ரிய ப³லபா⁴வத்தா²ய. லோகுத்தரவிபாகானி ஜவனகிச்சானி ச ஸாதி⁴பதிகானி ச ஹோந்தீதி வுத்தம் ‘‘திபூ⁴மகானீ’’திஆதி³. ஸேஸமேத்த² ஸுபோ³த⁴ம்.

மிஸ்ஸகஸங்க³ஹானுதீ³பனா நிட்டி²தா.

164. போ³தி⁴பக்கி²யஸங்க³ஹே. ‘‘ஸதிபட்டா²னா’’தி ஏத்த² பஸத்³தோ³ பமுக²த்தோ² பதா⁴னத்தோ²தி ஆஹ ‘‘பமுகா² பதா⁴னா ஹுத்வா’’தி. டா²ஸத்³தோ³ க³தினிவத்தி அத்தோ²தி ஆஹ ‘‘சித்தக³மனம் நிவத்தேத்வா பவத்தந்தீ’’தி. ‘‘காயே அனுபஸ்ஸனா’’தி காயே பவத்தா அனுபஸ்ஸனா. புனப்புனம் பஸ்ஸந்தி யோகி³னோ ஏதாயாதி அனுபஸ்ஸனா. கதமம் பஸ்ஸந்தீதி ஆஹ ‘‘அஸ்ஸாஸபஸ்ஸாஸாதி³கஸ்ஸா’’திஆதி³ம். கத²ஞ்சதம் பஸ்ஸந்தீதி வுத்தம் ‘‘தம் தம் காயபா⁴வேனா’’திஆதி³. இதா³னி புனப்புன ஸத்³த³ஸ்ஸ அத்த²ம் த³ஸ்ஸேந்தோ ‘‘யாவா’’திஆதி³மாஹ. வேத³னானு பஸ்ஸனாதீ³ஸுபி ஏஸேவனயோ. தம் ந ஸுந்த³ரம். கஸ்மா, ஸகலஸ்ஸ ரூபகாயஸ்ஸ அதி⁴ப்பேதத்தா. ஸேஸமேத்த² ஸுவிஞ்ஞேய்யம். யதி³ ஏவந்திஆதீ³ஸு. ‘‘இதராபி ஸித்³தா⁴’’தி காயானுபஸ்ஸனாத³யோபி ஸித்³தா⁴. கஸ்மா, த⁴ம்மானுபஸ்ஸனாய அந்தோக³த⁴த்தா. ‘‘ததா² அனுபஸ்ஸந்தஸ்ஸா’’தி ரூப்பனலக்க²ணதோ அனுபஸ்ஸந்தஸ்ஸ. ‘‘தம் தம் ஸமூஹபூ⁴தரூபத⁴ம்மவஸேனா’’தி அஸ்ஸாஸபஸ்ஸாஸாதி³ ஸமூஹபூ⁴தஸ்ஸ ரூப த⁴ம்மஸ்ஸ வஸேன. ‘‘ஸுபா⁴தி³விபல்லாஸஸ்ஸா’’தி ஸுப⁴ ஸுக² நிச்சவிபல்லாஸஸ்ஸ. ‘‘ஓளாரிகஸ்ஸா’’தி ஸுபாகடவஸேன ஓளாரிகஸ்ஸ. ‘‘அத்தூபனிப³ந்தா⁴’’தி அத்தேன உபனிப³ந்தா⁴, படிப³த்³தா⁴.

‘‘காமம்’’தி ஏகந்தேன. உபஸுஸ்ஸதூதி ஸம்ப³ந்தோ⁴. ‘‘யந்தம்’’தி ஜா²னாபி⁴ஞ்ஞா மக்³க³ப²லனிப்³பா³னம். ‘‘வீரியஸ்ஸ ஸண்டா²னம்’’தி வீரியக³மனஸ்ஸ வீரியப்பவத்தனஸ்ஸ நிவத்திவஸேன ஸண்டா²னம். உப்பன்னஸத்³தே³ன அதீத கிலேஸாபி பச்சுப்பன்ன கிலேஸாபி க³ஹேதப்³பா³ ஹோந்தீதி ஆஹ ‘‘அஸுகஸ்மிம் காலே’’திஆதி³ம். ‘‘மய்ஹம் உப்பன்னம்’’தி இதா³னி உப்பன்னம். ‘‘பஹானாயா’’தி ஏத்த² ஸமுச்சே²த³ப்பஹானம் அதி⁴ப்பேதந்தி ஆஹ ‘‘அனுப்பாத³ த⁴ம்மதாபாத³னகரணத்த²ம்’’தி. தத்த² அனுப்பாதோ³ த⁴ம்மோ யேஸம் தே அனுப்பாத³ த⁴ம்மா. மக்³கே³ன பஹீனா அகுஸல த⁴ம்மா. அனுப்பாத³ த⁴ம்மானம் பா⁴வோதி விக்³க³ஹோ. அனுப்பாத³ த⁴ம்மதாய ஆபாத³னம். தஸ்ஸ கரணந்தி ஸமாஸோ. ‘‘தி³ஸ்வா’’தி தேஸம் உப்பத்தி வத்து²ம் தி³ஸ்வா. ‘‘பச்சயஸமுச்சி²ந்த³னத்த²ம்’’தி பச்சயபூ⁴தஸ்ஸ அனுஸயஸ்ஸ ஸமுச்சி²ந்த³னத்த²ம். ‘‘அபத்தா’’தி இதா³னி அபத்தா. ‘‘ஸமயே’’தி பு³த்³து⁴ப்பாத³னவமக்க²ணே. ‘‘நியாமம் ந ஓக்கமந்தீ’’தி அரியமக்³க³ஸங்கா²தம் ஸம்மத்தனியாமம் ந ஓக்கமந்தி. நப்பவிஸந்தி. கிலேஸேஹி அகோபேதப்³ப³தாய அகுப்போ த⁴ம்மோ யஸ்ஸாதி அகுப்ப த⁴ம்மோ. கீ²ணாஸவோ. அகுப்ப த⁴ம்மஸ்ஸ பா⁴வோ அகுப்ப த⁴ம்மதா. அரஹத்த ப²லம். ‘‘தேஸம்’’தி குஸலானம் த⁴ம்மானம். உப்பன்னானம் பாபகானம் பஹானாயாதி கத்வா விஸுத்³தி⁴த⁴ம்மேஸு யோக³ம் கரோந்தஸ்ஸ அனுக்கமேன பா⁴வனா கம்மே மத்த²கம் பத்தேஆதி³தோ பட்டா²ய உப்பன்னாபி பாபகா பஹிய்யந்தி. அனுப்பன்னாபி நுப்பஜ்ஜந்தி. அனுப்பன்னாபி குஸலா உப்பஜ்ஜந்தி. உப்பன்னாபி பா⁴வனா பாரிபூரிம் க³ச்ச²ந்தி. ஏஸனயோ அனுப்பன்னானம் பாபகானம் அனுப்பாதா³யாதிஆதீ³ஸு. ஏவம் சதூஸு முகே²ஸு ஏகேகமுகே²னபி ஸம்மா பத³ஹந்தஸ்ஸ ஸம்மப்பதா⁴னம் சதுகிச்சஸாத⁴கம் ஹோதி. தேனாஹ ‘‘ஏதேஸு பனா’’திஆதி³ம்.

அபி⁴விஸிட்டே²ன த⁴ம்மவவத்தா²னஞ்ஞாணேன ஞாதப்³பா³ ஸப்³பே³ பரமத்த² த⁴ம்மா அபி⁴ஞ்ஞேய்யா நாம. ‘‘அபி⁴ஞ்ஞா ஸித்³தீ⁴’’தி அபி⁴ஜானன கிச்சஸித்³தி⁴. விஸும் விஸும் பரிச்சி²ந்தி³த்வா ஞாதப்³பா³ சதுஸச்ச த⁴ம்மா பரிஞ்ஞேய்யா நாம. தேஹி து³க்க²ஸச்ச த⁴ம்மா பரிஞ்ஞாதப்³ப³பா⁴வேன, ஸமுத³ய ஸச்ச த⁴ம்மா பஹாதப்³ப³ பா⁴வேன, நிரோத⁴ஸச்ச த⁴ம்மா ஸச்சி²காதப்³ப³ பா⁴வேன, மக்³க³ஸச்ச த⁴ம்மா பா⁴வேதப்³ப³பா⁴வேன ஞாதப்³பா³ ஹோந்தீதி. ‘‘பா⁴வனாஸித்³தீ⁴’’தி பா⁴வனாகிச்ச ஸித்³தி⁴. தம் ஸம்யுத்தகே இமாயபாளியா ஸமேதீதி ஸம்ப³ந்தோ⁴. ‘‘விப⁴ங்கே³ பனா’’தி இத்³தி⁴பாத³விப⁴ங்கே³ பன. ‘‘சித்த சேதஸிகராஸீ’’தி ஸஹ புப்³ப³பா⁴க³பா⁴வனாய உத்தரி மனுஸ்ஸ த⁴ம்மபரியா பன்னா சித்தசேதஸிகராஸி. ‘‘தத்த² பனா’’தி விப⁴ங்கே³ தஸ்மிம் உத்தரசூளபா⁴ஜனீயே பன. ‘‘இதா⁴’’தி இமஸ்மிம் ஸங்க³ஹே.

சத்தாரி ஸோதாபத்தியங்கா³னி நாம பு³த்³தே⁴ அவேச்சப்பஸாதே³ன ஸமன்னாக³தோ. த⁴ம்மே, ஸங்கே⁴, அரியகந்தேஹி ஸீலேஹி ஸமன்னாக³தோதி ஏவம் வுத்தானி ஸோதாபத்தியா அங்கா³னி. தத்த² ‘‘அரியகந்தேஹீ’’தி அரியஜனேஹி காமிதேஹி இச்சி²தேஹி. ‘‘ஸீலேஹீ’’தி பஞ்சனிச்சஸீலேஹி, ஆஜீவட்ட²மகஸீலேஹி வா. ‘‘ஸம்மப்பதா⁴னேஸூ’’தி ஸம்மப்பதா⁴னகிச்சேஸு.

‘‘ஸோளஸஹிகிச்சேஹீ’’தி ஏகேகஸ்மிம் ஸச்சே சத்தாரி சத்தாரி கத்வா ஸோளஸஹி கிச்சேஹி. பீளனட்டோ², ஸங்க²தட்டோ², திஆதீ³ஹி ஸோளஸஹி அத்தே²ஹீதி வுத்தம் ஹோதி. தே ச அத்தா² பரதோ ஆக³மிஸ்ஸந்தி. ஸதி ஏவ ஸம்போ³ஜ்ஜ²ங்கோ³தி வுத்தம், கத²ம் பன ஸாஸதி ஸம்போ³தி⁴ம் ஸமுட்டா²பேதீதி ஆஹ ‘‘ஸாஹீ’’திஆதி³ம். ஏஸனயோ ஸேஸபோ³ஜ்ஜ²ங்கே³ஸுபி. ‘‘தேஸு த⁴ம்மேஸூ’’தி அஜ்ஜ²த்தப³ஹித்³தா⁴ த⁴ம்மேஸு. ‘‘லீனஸங்கோச கோஸஜ்ஜபக்க²ம்’’தி லீனபக்க² ஸங்கோச பக்க²கோஸஜ்ஜ பக்க²ம். து⁴ரம் ஸுட்டு² பக்³க³ண்ஹாதி உக்கி²பதீதி து⁴ரஸம்பக்³க³ஹோ. ‘‘து⁴ரம்’’தி ஸமத²து⁴ரம் விபஸ்ஸனா து⁴ரஞ்ச. ‘‘அரதி உக்கண்ட² பக்க²ம்’’தி அரதிபக்க² நிப்³பி³தா³பக்க²ம். த⁴ம்மே ரதி த⁴ம்மரதி. த⁴ம்மே நந்தீ³ த⁴ம்மனந்தீ³. த⁴ம்மே ஆராமோ த⁴ம்மாராமோ. ‘‘ஸாரம்போ⁴’’ நாம சித்தவிஹேஸா. ‘‘த³ரதோ²’’ நாம சித்தஸந்தாபோ. ஸமாஹிதோ பி⁴க்க²வே யதா²பூ⁴தம் பஜானாதி பஸ்ஸதீதி வசனதோ பஞ்ஞாய ஸமாதி⁴ பாத³கதா பாகடாதி வுத்தம் ‘‘தஸ்ஸா’’திஆதி³ம். ஸமம் அவிஸமம் அத்தனோ கிச்சம் வஹதி ஸீலேனாதி ஸமவாஹீ. ஸமவாஹிஸ்ஸ பா⁴வோ ஸமவாஹிதா.

ஸா பன சதுப்³பி³தா⁴ ஹோதீதி ஸம்ப³ந்தோ⁴. ‘‘தஸ்ஸா’’தி ஸம்மாதி³ட்டி²யா. ‘‘விஸாகா²’’தி ஆலபன பத³ம். ‘ஸப்³பே³ லோகுத்தரே ஹோந்தீ’தி வசனஸ்ஸ ஸம்ப³ந்த⁴ம் த³ஸ்ஸேதும் ‘‘தே பன ஸத்ததிம்ஸப்பபே⁴தா³’’திஆதி³மாஹ. ந வட்டா²னானி அஸ்ஸ அத்தீ²தி நவட்டா²னிகம். ‘‘லோகுத்தரே’’தி லோகுத்தர சித்தே. ‘‘அத்தப்படிபக்கா²னம்’’தி அத்தனா உஜுப்படிபக்கா²னம். ‘‘தே’’தி போ³தி⁴பக்கி²ய த⁴ம்மா. ஏதேன த³ஸ்ஸேதீதி ஸம்ப³ந்தோ⁴. ‘‘குண்ட³லியா’’தி ஏவம் நாமகம் ப்³ராஹ்மணம் ஆலபதி. ‘‘விஜ்ஜா’’தி மக்³க³விஜ்ஜா. ‘‘விமுத்தீ’’தி ப²லவிமுத்தி.

போ³தி⁴பக்கி²யானுதீ³பனா நிட்டி²தா.

165. ஸப்³ப³ஸங்க³ஹே. ‘‘பஞ்சராஸயோ’’தி பஞ்சஸங்க³ஹா. ‘‘அதீதாதி³பே⁴த³பி⁴ன்னானம்’’தி அதீதானாக³தபச்சுப்பன்னபே⁴தே³ன, அஜ்ஜ²த்த ப³ஹித்³தா⁴பே⁴தே³ன, ஓளாரிகஸுகு²மபே⁴தே³ன, ஹீனபணீதபே⁴தே³ன, தூ³ரஸந்திகபே⁴தே³ன ச பி⁴ன்னானம். ‘‘உபபத்தி த்³வாரேஸூ’’தி சக்கா²தி³ த்³வாரேஸு. ‘‘கம்மத்³வாரேஸூ’’தி காயகம்மத்³வாராதீ³ஸு. ‘‘ஸங்க³ம்மா’’தி ஸங்க³ந்த்வா. ‘‘ஸமாக³ம்மா’’தி ஸமாக³ந்த்வா. ‘‘ஸாதா⁴ரண கிச்சானி வா’’தி ஸப்³பி³ரியாபதே²ஹி ஸாதா⁴ரண கிச்சானிவா. பாளிபாடே². ‘‘கிஞ்சா’’தி கஸ்மா ச. ‘‘ஸங்கா²ரேவதே³தா²’’தி ஸங்கா²ரா ஸங்கா²ரா இதி தும்ஹே வதே³த². ‘‘கிஞ்சஸங்க²தம்’’தி கதமஞ்சஸங்க²தம். ‘‘ரூபம் ரூபத்தா²யா’’தி ரூபவிகதியா ஜாதத்தா²ய ரூபஸங்கா²தம் ஸங்க²தம் அபி⁴ஸங்க²ரோந்தீதி அத்தோ². உபபோ⁴கோ³ நாம வத்தா²ப⁴ரணாதி³கோ அந்தோபோ⁴கோ³. பரிபோ⁴கோ³ நாம மஞ்சபீடா²தி³கோ பா³ஹிர பரிபோ⁴கோ³. ஸம்பராயிகஞ்ச வேத³னந்தி அதி⁴காரோ. ஸேஸேஸுபி ஸஞ்ஞாஸங்கா²ர விஞ்ஞாணேஸுபி. ‘‘தா³னம் தா³னத்தா²யா’’தி தா³னபுஞ்ஞஸ்ஸ ஜாதத்தா²ய. தா³னஸங்கா²தம் ஸங்க²தம் அபி⁴ஸங்க²ரோந்தீதி அத்தோ². அத²வா தா³னஸ்ஸ அத்தோ² தா³னத்தோ². ‘‘அத்தோ²’’தி ச விபாகத்தோ² ப²லத்தோ². தா³னவிபாகத்தா²ய தா³னப²லத்தா²ய தா³னபுஞ்ஞஸங்கா²தம் ஸங்க²தம் அபி⁴ஸங்க²ரோந்தீதி அத்தோ². ஏவம் ஸேஸேஸுபி. ‘‘அனுயுஞ்ஜந்தா’’தி விபஸ்ஸனா கம்மம் அனுயுஞ்ஜந்தா. ‘‘தீஸு த⁴ம்மேஸு கிலமிஸ்ஸந்தீ’’தி வுத்தம். கத²ம் கிலமிஸ்ஸந்தீதி ஆஹ ‘‘ததா²ஹி யதா²’’திஆதி³ம். ‘‘ஸுக²ஸஞ்ஞிதேஸு படிஸரணேஸூ’’தி சித்தஸாதசித்தரதி படிலாப⁴த்தா²ய படிஸரணேஸு ஆரம்மணேஸு. ‘‘தாஹீ’’தி ஸம்பத்தீஹி. ‘‘தா’’தி ஸம்பத்தியோ. பரமுக்கம்ஸக³தம் ஸுக²ஸஞ்ஞிதட்டா²னம் ஹோதி. தஸ்மா தத்த² து³க்கா²னுபஸ்ஸனாஞாணம் அதிரேகதரம் பவத்தேதப்³ப³ந்தி தத³த்தா²ய ப⁴க³வா தம் வேத³னம் விஸும் ஏகம் க²ந்த⁴ம் கத்வா க²ந்த⁴ தே³ஸனம் தே³ஸேதீதி அதி⁴ப்பாயோ. ஏஸனயோ பரத்த²பி. ‘‘ஞாணஸம்மதம்’’தி புது²ஜ்ஜனேஹி ஞாணஸம்மதம். ‘‘பரமம் அத்தானம் கத்வா’’தி லோகே விஞ்ஞுத்தம் பரமம் ஹோதி, தஸ்மா விஜானனம் பரமம் அத்தானம் கத்வா. ஸேஸமேத்த² ஸுபாகடம். ‘‘யத்த²பு⁴ஞ்ஜதீ’’திஆதீ³ஸு. ‘‘யத்த² பு⁴ஞ்ஜதீ’’தி யஸ்மிம் பா⁴ஜனே பு⁴ஞ்ஜதி. ‘‘யஞ்ச பு⁴ஞ்ஜதீ’’தி யஞ்ச போ⁴ஜனம் பு⁴ஞ்ஜதி. ‘‘யேன ச பு⁴ஞ்ஜதீ’’தி யேனப்³யஞ்ஜனேன பு⁴ஞ்ஜதி. ‘‘யோ ச போ⁴ஜகோ’’தி ஸமீபே ட²த்வா பரிவேஸகோ. ‘‘யோ ச பு⁴ஞ்ஜிதா’’தி யோ ச பு⁴ஞ்ஜகோ.

‘‘ஸாஸவா ஏவா’’தி ஸாஸவா நாம லோகிய த⁴ம்மா. ‘‘உஸ்ஸாஹந்தா விய ஹோந்தீ’’தி அப்³யாபார த⁴ம்மத்தா வுத்தம். ந ஹி அப்³யாபார த⁴ம்மானம் ஏகந்தேன உஸ்ஸாஹோ நாம அத்தி². ப²லஸ்ஸ நிப்³ப³த்தனதோ ப²லத்தா²ய உஸ்ஸாஹந்தா விய ஹோந்தீதி. ‘‘ஆகிரித்வா’’தி பத்த²ரித்வா. ஸேஸமேத்த² ஸுபோ³த⁴ம்.

தா⁴துஸங்க³ஹே. ‘‘அத்தனோ ஏவ ஸபா⁴வம்’’தி அத்தனோ ஸபா⁴வம் ஏவாதிபி யுஜ்ஜதி. ‘‘ஈஹா ச ப்³யாபாரோ சா’’தி அபி⁴க்கமாமி படிக்கமாமீதிஆதி³னா உஸ்ஸாஹோ ச, அபி⁴க்கமனாதி³ ப்³யாபாரோ ச. ‘‘ந ச ஜீவயோகா³’’தி ந ச லோகியமஹாஜன ஸம்மதேன ஜீவேன யுத்தா. அட்ட²கதா²பாடே². யாயதி ஏத்தா²தி யந்தம். உது³க்க²லம். யந்த சக்கயட்டி²னாம யந்த சக்கஸம்ப³ந்தா⁴ முஸலயட்டி². அரணீ வுச்சதி அக்³கி³னிப்³ப³த்தகத்தா²ய கதா த்³வே ஸாரக⁴டிகா. அத⁴ராரணீ நாம ஹேட்டா²ரணீ. உத்தராரணீ நாம உத்³தா⁴ரணீ. ‘‘ஸல்லமிவா’’தி கண்டோ³விய. ‘‘ஸூலமிவா’’தி விஜ்ஜ²னகத³ண்டோ³ விய. ‘‘ஆதுராவியா’’தி தேஹிஸல்லஸூலேஹி வித்³த⁴கி³லானா விய. அயதா²பு⁴ச்ச நிமித்தம் நாம அயதா²பூ⁴தம் ஸத்தபுக்³க³லாதி³னிமித்தம். ‘‘வனமிகோ³ வியா’’தி திண ரூபே புரிஸ ஸஞ்ஞாலாபோ⁴ வனமிகோ³ விய. ‘‘அங்கா³ரகாஸுயம்’’தி அங்கா³ரகூபே. ‘‘நானாவிது⁴பத்³த³வ நிமித்ததோ’’தி நானாவிதா⁴னம் உபத்³த³வானம் உப்பத்தி பச்சயதோ. ‘‘வனமக்கடோ வியா’’தி வனவானரோ விய. து³க்கே²ன த³மனம் அஸ்ஸாதி து³த்³த³மனோ. ‘‘அஸ்ஸக²ளுங்கோ’’தி து³ட்ட² அஸ்ஸோ. ‘‘யத்த² காமனிபாதிதோ’’தி யஸ்மிம் யஸ்மிம் ஆரம்மணே பதிதும் காமேதி இச்ச²தி, தத்த² தத்த² நிபாதிதோ. புக்³க³லவஸே அவத்தித்வா ஆரம்மணேஸு யதி³ச்ச²கம் நிபதனதோதி வுத்தம் ஹோதி. ‘‘ரங்க³னடோ வியா’’தி ஸமஜ்ஜனடகோ விய. ஸபா⁴வதோ அத்தி² ஸம்விஜ்ஜதீதி ஸந்தோ. ததோ²தி ச அவிததோ²தி ச அத்த²தோ ஏகம். அஞ்ஞோ பகாரோ அஞ்ஞதா². நத்தி² அஞ்ஞதா² அஸ்ஸாதி அனஞ்ஞத²ம். து³க்க²து³க்க²ம் நாம காயிகது³க்க² சேதஸிகது³க்க²ம். ‘‘கம்மஜானம்’’தி விபாகக்க²ந்த⁴கடத்தா ரூபானம். ‘‘உப்பத்தியா’’தி உப்பாத³த்தா²ய. ‘‘பகே³வா’’தி புரேதரமேவ. ‘‘உப்பன்னம் பீ’’தி உப்பன்னம்பி சக்கு². ‘‘பவத்தியா’’தி ஸந்தானட்டி²தியா டி²தத்தா²ய. ‘‘படிஜக்³க³ன து³க்க²ம்’’தி ஸோத⁴ன து³க்க²ம். பச்சயவேகல்லம் நாம ஆஹாரச்சே²தா³தி³கம். நனு பி⁴ஜ்ஜனப⁴யேன பகே³வ பச்சயஸம்பாத³னம் நாம ஸங்கா²ர து³க்க²மேவ ஸியாதி. ஸச்சம். இத⁴ பன ஆஸன்னே பி⁴ஜ்ஜனனிமித்தம் தி³ஸ்வா கதம் பச்சய ஸம்பாத³னம் அதி⁴ப்பேதம். ‘‘ரக்கா²வரணகு³த்தி ஸம்விதா⁴ன து³க்க²ம்’’தி நானாப⁴யதோ ரக்க²ணஸ்ஸ ச ஆவரணஸ்ஸ ச கோ³பனஸ்ஸ ச ஸம்விதா⁴ன து³க்க²ம். ‘‘தது³ப⁴யேன ஸஹேவ ஸிஜ்ஜ²தீ’’தி கஸிகோ³ரக்கா²தீ³னி ஸங்கா²ர கம்மானி வா ரக்கா²வரண கு³த்திஸம் விதா⁴னாதீ³னிவா கரோந்தானம் தம் து³க்க² து³க்க²ம் தது³ப⁴யேன து³க்கே²ன ஸஹேவ ஸிஜ்ஜ²தி. ‘‘தேஸம்’’தி சக்கா²தீ³னி அஸ்ஸாதே³ந்தானம் ந முச்சதீதி ஸம்ப³ந்தோ⁴. ‘‘பவத்தி நிரோத⁴ பூ⁴தஸ்ஸா’’தி பவத்தியா நிரோத⁴ பூ⁴தஸ்ஸ. ‘‘தம் பஜஹதி யேவா’’தி தம் லோப⁴ம் பஜஹதியேவ. ‘‘யாவதே³வா’’தி உபரிமபரியந்தேன. அஹம் அஸ்மீதி பவத்தோ மானோ அஸ்மிமானோ. தஸ்ஸ ஸமுக்³கா⁴தனம் ஸமுச்சி²ந்த³னம். ‘‘பரிஞ்ஞாதேஸூ’’தி தேஸு அனுஸயிதாய தண்ஹாய பஹானவஸேன பரிஞ்ஞாதேஸு. ‘‘தப்³பி³பரீதேன பனா’’தி ததோ விபரீதேன பன. அஸ்மிமானஸ்ஸ அனதி⁴ட்டா²னபூ⁴தாதிஆதி³ அத்தே²ன. அனிந்த்³ரியப³த்³த⁴ த⁴ம்மா நாம பத²வீபப்³ப³தாதீ³ஸு பவத்தா ரூப த⁴ம்மா.

ஸத்தே அனுக்கண்ட²மானே கரோதீதி ஸம்ப³ந்தோ⁴. ‘‘இதீ’’தி தஸ்மா. தேஸம் ஸத்தானம். து³ஜ்ஜஹோ நாம நத்தி². தஸ்மா லோபோ⁴யேவ து³க்க²ஸமுத³யாரிய ஸச்சம் நாமாதி யோஜனா. ஸாஸவா குஸலா குஸல த⁴ம்மா ஸமுத³யஸச்சம் நாம, து³க்க² ஸச்சபூ⁴தானம் விபாகக்க²ந்த⁴கடத்தா ரூபானம் ஸமுத³யத்தா ஸம்வட்³ட⁴னத்தா. மூலபா⁴வேன வுத்தா ‘அவிஜ்ஜா பச்சயா ஸங்கா²ரா’திஆதீ³ஸு. ‘‘நந்த³னஸதி³ஸம்’’தி தே³வலோகே நந்த³னவனுய்யானஸதி³ஸம். ‘‘ஆதி³பப⁴வபதா⁴னபூ⁴தா’’தி து³க்க² த⁴ம்மானம் ஆதி³பூ⁴தா, பப⁴வபூ⁴தா, பதா⁴னபூ⁴தா. ‘‘பப⁴வபூ⁴தா’’தி ச பத²முப்பத்திஹேதுபூ⁴தா. ‘‘தேஸம்’’தி து³க்க² த⁴ம்மானம்.

‘‘கத்த²சீ’’தி காமப⁴வாதீ³ஸு கிஸ்மிஞ்சிப⁴வே. ‘‘கதா³சீ’’தி அதீதாதி³காலேஸு கிஸ்மிஞ்சிகாலே. ‘‘கேஸஞ்சீ’’தி தே³வமனுஸ்ஸாதீ³ஸு ஸத்தேஸு கேஸஞ்சிஸத்தானம். ‘‘குதோசீ’’தி ப³ஹூஸுகாரணேஸு குதோசிகாரணா. ‘‘கத²ஞ்சீ’’தி கேனசிபகாரேன.

‘‘பரிணாமோ’’தி பரிணமனம் அஞ்ஞதா²பா⁴வோ. ‘‘தம் ஸமங்கீ³னம்’’தி தேஹி சக்கா²தீ³ஹி ஸமங்கீ³னம் புக்³க³லம். பாளிபாடே². ‘‘ஆதி³த்தம்’’திஆதீ³பிதம் ஸமுஜ்ஜலந்தம். ‘‘கேனா’’தி கரணபூ⁴தேன கேன அக்³கி³னா. ததா² அரியமக்³கோ³ விபரிணாம த⁴ம்மோ ச ஹோதி. ஸோவிபரிணாம து³க்கே²னபி புக்³க³லம் பு⁴ஸம் பீளேதியேவாதி யோஜனா. ‘‘நா’’தி ந ஸியா. ஸமனம் வூபஸமனம் ஸந்தி. ஸப்³ப³து³க்கா²னம் ஸந்தீதி விக்³க³ஹோ. ஸப்³ப³ம் வட்டது³க்க²ந்தி ஸம்ப³ந்தோ⁴. ‘‘தஸ்ஸா’’தி அரியமக்³க³ஸ்ஸ. ‘‘பவத்தமானா சா’’தி ஸந்ததிடி²திவஸேன வத்தமானா ச. ‘‘மஹந்தம் பரிளாஹது³க்க²ம்’’தி ஸோக பரிதே³வ து³க்க² தோ³மனஸ்ஸுபாயாஸானம் பவத்திவஸேன மஹந்தம் பரிளாஹ து³க்க²ம். நிப்³பா³னஸ்ஸ அனுப்பாத³ த⁴ம்மத்தா உப்பாத³த்தா²ய பச்சயோ நாம நத்தி². ததா² அப்பவத்தி த⁴ம்மத்தா பவத்தத்தா²ய. ஸம்பாபுணிதப்³ப³த்தா பன ஸம்பாபனத்தா²ய பச்சயோ அத்தீ²தி ஆஹ ‘‘ஸம்பாபக பச்சயாபி⁴ஸங்க²ரணலேஸம்’’தி. ஸம்பாபக பச்சயா நாம அரிய மக்³கோ³ ச தஸ்ஸ பச்சயா ச.

ப⁴வாப⁴வஸங்கா²தஸ்ஸ து³க்க²க்க²ந்த⁴ஸ்ஸாதி ஸம்ப³ந்தோ⁴. ‘‘ததே³வா’’தி தம் து³க்க²க்க²ந்த⁴ம் ஏவ. அனுபுனப்புனம் பதீ³யதே அனுப்பதா³னம். ‘‘நிய்யாதனட்டோ²’’தி ஹந்த³ க³ண்ஹாதி ஸம்படிச்சா²பனட்டோ². ‘‘ததோ’’தி வட்டது³க்க²தோ. ‘‘முச்சனூபாயஸ்ஸா’’தி தா³னஸீலனிக்க²மாதி³கஸ்ஸ முச்சனூபாயஸ்ஸ. ‘‘நிஸ்ஸரணவிமுத்தியா’’தி நிஸ்ஸரண ஸங்கா²தாய விமுத்தியா. ஸங்கா²ர து³க்க²ஸ்ஸ அபா⁴வட்டோ². ‘‘ஸம்மோஹஸ்ஸ பஹானவஸேனா’’தி ஏதேன இத⁴ த³ஸ்ஸனம் நாம இதோ பட்டா²ய சதூஸு ஸச்சேஸு அஸம்மோஹ பா⁴வபத்தி ஏவ ஆலோகபத்தி ஏவ வுச்சதீதி த³ஸ்ஸேதி. தேனாஹ ‘‘படிவிஜ்ஜ²னட்டோ²’’தி. தண்ஹாய தா³ஸோ தண்ஹாதா³ஸோ. தண்ஹாதா³ஸஸ்ஸ பா⁴வோ தண்ஹாதா³ஸப்³யம். பரவஸதோ விமுத்திவஸேன அபராதீ⁴னதா பு⁴ஜிஸ்ஸபா⁴வோ நாம. லோகியமக்³கா³ஹி தண்ஹாதா³ஸப்³யம் நாதிவத்தந்தி. தண்ஹாவஸம் பூரயமானா தண்ஹாவிஸயம் விபாகம் ஜனேந்தி. அயம் அரியமக்³கோ³ ஏவ தண்ஹாய அனாரம்மணபா⁴வே டி²தோ தண்ஹாதா³ஸப்³யம் அதிவத்ததி. தண்ஹாவஸம் பி⁴ந்த³மானோ தண்ஹாய அவிஸயம் விபாகம் ஜனேதீதி அதி⁴ப்பாயோ. ‘‘து³க்க²முத்தியா’’தி து³க்க²தோ முச்சனத்த²ம். ‘‘து³க்க²வட்³டி⁴யா’’தி து³க்க²வட்³ட⁴னத்தா²ய. ஸேஸமேத்த² ஸுபோ³த⁴ம். ‘‘க²யவிராக³ நிரோத⁴ பூ⁴தோ’’தி ஏத்த² கிலேஸ த⁴ம்மானம் விரஜ்ஜனம் விக³மனம் அந்தரதா⁴னம் விராகோ³. ‘‘அனத்த² பதா³னீ’’தி அஹிதபதா³னி. ப⁴யாதீ³னவபதா³னி. ‘‘த்³வாரச²க்கஆரம்மண ச²க்கபே⁴தே³னா’’தி த்³வாரச²க்கம் த⁴ம்மாரம்மணம் ஹோதி. ஏவம்ஸதி, ஆரம்மண ச²க்கந்தி ந வத்தப்³ப³ம் த⁴ம்மாரம்மணஸ்ஸ விஸும் க³ஹிதத்தாதி. நோ நவத்தப்³ப³ம். கஸ்மா, த்³வாரச²க்கதோ ஸேஸானம் த⁴ம்மாரம்மணானம் அத்தி²தாயாதி த³ஸ்ஸேதும் ‘‘ஏத்த² சா’’திஆதி³ வுத்தம். பரதோ ‘‘ஏத்த²பீ’’திஆதீ³ஸு ஏஸேவனயோதி.

ஸப்³ப³ஸங்க³ஹானுதீ³பனா நிட்டி²தா.

ஸமுச்சயஸங்க³ஹதீ³பனியாஅனுதீ³பனா நிட்டி²தா.