3. நக³ரோபமஸுத்தம்

67. ‘‘யதோ கோ², பி⁴க்க²வே, ரஞ்ஞோ பச்சந்திமம் நக³ரம் ஸத்தஹி நக³ரபரிக்கா²ரேஹி ஸுபரிக்க²தம் [ஸுபரிக்கி²த்தம் (க.)] ஹோதி, சதுன்னஞ்ச ஆஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. இத³ம் வுச்சதி, பி⁴க்க²வே, ரஞ்ஞோ பச்சந்திமம் நக³ரம் அகரணீயம் பா³ஹிரேஹி பச்சத்தி²கேஹி பச்சாமித்தேஹி.

‘‘கதமேஹி ஸத்தஹி நக³ரபரிக்கா²ரேஹி ஸுபரிக்க²தம் ஹோதி? இத⁴, பி⁴க்க²வே, ரஞ்ஞோ பச்சந்திமே நக³ரே ஏஸிகா ஹோதி க³ம்பீ⁴ரனேமா [க³ம்பீ⁴ரனேமி (க.)] ஸுனிகா²தா அசலா அஸம்பவேதீ⁴ [அஸம்பவேதி⁴ (ஸீ. ஸ்யா.)]. இமினா பட²மேன நக³ரபரிக்கா²ரேன ஸுபரிக்க²தம் ஹோதி ரஞ்ஞோ பச்சந்திமம் நக³ரம் அப்³ப⁴ந்தரானம் கு³த்தியா பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே பரிகா² ஹோதி க³ம்பீ⁴ரா சேவ வித்த²தா ச. இமினா து³தியேன நக³ரபரிக்கா²ரேன ஸுபரிக்க²தம் ஹோதி ரஞ்ஞோ பச்சந்திமம் நக³ரம் அப்³ப⁴ந்தரானம் கு³த்தியா பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே அனுபரியாயபதோ² ஹோதி உச்சோ சேவ வித்த²தோ ச. இமினா ததியேன நக³ரபரிக்கா²ரேன ஸுபரிக்க²தம் ஹோதி ரஞ்ஞோ பச்சந்திமம் நக³ரம் அப்³ப⁴ந்தரானம் கு³த்தியா பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே ப³ஹும் ஆவுத⁴ம் ஸன்னிசிதம் ஹோதி ஸலாகஞ்சேவ ஜேவனிகஞ்ச [ஜேவனியஞ்ச (ஸீ. அட்ட².)]. இமினா சதுத்தே²ன நக³ரபரிக்கா²ரேன ஸுபரிக்க²தம் ஹோதி ரஞ்ஞோ பச்சந்திமம் நக³ரம் அப்³ப⁴ந்தரானம் கு³த்தியா பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே ப³ஹுப³லகாயோ படிவஸதி, ஸேய்யதி²த³ம் – ஹத்தா²ரோஹா அஸ்ஸாரோஹா ரதி²கா த⁴னுக்³க³ஹா சேலகா சலகா பிண்ட³தா³யகா உக்³கா³ ராஜபுத்தா பக்க²ந்தி³னோ மஹானாகா³ ஸூரா சம்மயோதி⁴னோ தா³ஸகபுத்தா. இமினா பஞ்சமேன நக³ரபரிக்கா²ரேன ஸுபரிக்க²தம் ஹோதி ரஞ்ஞோ பச்சந்திமம் நக³ரம் அப்³ப⁴ந்தரானம் கு³த்தியா பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே தோ³வாரிகோ ஹோதி பண்டி³தோ ப்³யத்தோ மேதா⁴வீ அஞ்ஞாதானம் நிவாரேதா ஞாதானம் பவேஸேதா. இமினா ச²ட்டே²ன நக³ரபரிக்கா²ரேன ஸுபரிக்க²தம் ஹோதி ரஞ்ஞோ பச்சந்திமம் நக³ரம் அப்³ப⁴ந்தரானம் கு³த்தியா பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே பாகாரோ ஹோதி உச்சோ சேவ வித்த²தோ ச வாஸனலேபனஸம்பன்னோ ச. இமினா ஸத்தமேன நக³ரபரிக்கா²ரேன ஸுபரிக்க²தம் ஹோதி ரஞ்ஞோ பச்சந்திமம் நக³ரம் அப்³ப⁴ந்தரானம் கு³த்தியா பா³ஹிரானம் படிகா⁴தாய. இமேஹி ஸத்தஹி நக³ரபரிக்கா²ரேஹி ஸுபரிக்க²தம் ஹோதி.

‘‘கதமேஸம் சதுன்னம் ஆஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴? இத⁴, பி⁴க்க²வே, ரஞ்ஞோ பச்சந்திமே நக³ரே ப³ஹும் திணகட்டோ²த³கம் ஸன்னிசிதம் ஹோதி அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே ப³ஹும் ஸாலியவகம் ஸன்னிசிதம் ஹோதி அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே ப³ஹும் திலமுக்³க³மாஸாபரண்ணம் ஸன்னிசிதம் ஹோதி அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய.

‘‘புன சபரம், பி⁴க்க²வே, ரஞ்ஞோ பச்சந்திமே நக³ரே ப³ஹும் பே⁴ஸஜ்ஜம் ஸன்னிசிதம் ஹோதி, ஸேய்யதி²த³ம் – ஸப்பி நவனீதம் தேலம் மது⁴ பா²ணிதம் லோணம் அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய. இமேஸம் கோ², பி⁴க்க²வே, சதுன்னம் ஆஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴.

‘‘யதோ கோ², பி⁴க்க²வே, ரஞ்ஞோ பச்சந்திமம் நக³ரம் இமேஹி ஸத்தஹி நக³ரபரிக்கா²ரேஹி ஸுபரிக்க²தம் ஹோதி, இமேஸஞ்ச சதுன்னம் ஆஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. இத³ம் வுச்சதி, பி⁴க்க²வே, ரஞ்ஞோ பச்சந்திமம் நக³ரம் அகரணீயம் பா³ஹிரேஹி பச்சத்தி²கேஹி பச்சாமித்தேஹி. ஏவமேவம் கோ², பி⁴க்க²வே, யதோ அரியஸாவகோ ஸத்தஹி ஸத்³த⁴ம்மேஹி ஸமன்னாக³தோ ஹோதி, சதுன்னஞ்ச ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. அயம் வுச்சதி, பி⁴க்க²வே, அரியஸாவகோ அகரணீயோ மாரஸ்ஸ அகரணீயோ பாபிமதோ. கதமேஹி ஸத்தஹி ஸத்³த⁴ம்மேஹி ஸமன்னாக³தோ ஹோதி?

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே ஏஸிகா ஹோதி க³ம்பீ⁴ரனேமா ஸுனிகா²தா அசலா அஸம்பவேதீ⁴ அப்³ப⁴ந்தரானம் கு³த்தியா பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ம் ‘இதிபி ஸோ…பே… பு³த்³தோ⁴ ப⁴க³வா’தி. ஸத்³தே⁴ஸிகோ, பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி; ஸாவஜ்ஜம் பஜஹதி, அனவஜ்ஜம் பா⁴வேதி; ஸுத்³த⁴ம் அத்தானம் பரிஹரதி. இமினா பட²மேன ஸத்³த⁴ம்மேன ஸமன்னாக³தோ ஹோதி.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே பரிக்கா² ஹோதி க³ம்பீ⁴ரா சேவ வித்த²தா ச அப்³ப⁴ந்தரானம் கு³த்தியா பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ ஹிரீமா ஹோதி, ஹிரீயதி காயது³ச்சரிதேன வசீது³ச்சரிதேன மனோது³ச்சரிதேன, ஹிரீயதி பாபகானம் அகுஸலானம் த⁴ம்மானம் ஸமாபத்தியா. ஹிரீபரிக்கோ² கோ², பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி; ஸாவஜ்ஜம் பஜஹதி, அனவஜ்ஜம் பா⁴வேதி; ஸுத்³த⁴ம் அத்தானம் பரிஹரதி. இமினா து³தியேன ஸத்³த⁴ம்மேன ஸமன்னாக³தோ ஹோதி.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே அனுபரியாயபதோ² ஹோதி உச்சோ சேவ வித்த²தோ ச அப்³ப⁴ந்தரானம் கு³த்தியா பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ ஓத்தப்பீ ஹோதி, ஓத்தப்பதி காயது³ச்சரிதேன வசீது³ச்சரிதேன மனோது³ச்சரிதேன, ஓத்தப்பதி பாபகானம் அகுஸலானம் த⁴ம்மானம் ஸமாபத்தியா. ஓத்தப்பபரியாயபதோ², பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி; ஸாவஜ்ஜம் பஜஹதி, அனவஜ்ஜம் பா⁴வேதி; ஸுத்³த⁴ம் அத்தானம் பரிஹரதி. இமினா ததியேன ஸத்³த⁴ம்மேன ஸமன்னாக³தோ ஹோதி.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே ப³ஹும் ஆவுத⁴ம் ஸன்னிசிதம் ஹோதி ஸலாகஞ்சேவ ஜேவனிகஞ்ச அப்³ப⁴ந்தரானம் கு³த்தியா பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ ப³ஹுஸ்ஸுதோ ஹோதி…பே… தி³ட்டி²யா ஸுப்படிவித்³தா⁴. ஸுதாவுதோ⁴, பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி; ஸாவஜ்ஜம் பஜஹதி, அனவஜ்ஜம் பா⁴வேதி; ஸுத்³த⁴ம் அத்தானம் பரிஹரதி. இமினா சதுத்தே²ன ஸத்³த⁴ம்மேன ஸமன்னாக³தோ ஹோதி.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே ப³ஹுப³லகாயோ படிவஸதி, ஸேய்யதி²த³ம் – ஹத்தா²ரோஹா அஸ்ஸாரோஹா ரதி²கா த⁴னுக்³க³ஹா சேலகா சலகா பிண்ட³தா³யகா உக்³கா³ ராஜபுத்தா பக்க²ந்தி³னோ மஹானாகா³ ஸூரா சம்மயோதி⁴னோ தா³ஸகபுத்தா அப்³ப⁴ந்தரானம் கு³த்தியா பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ ஆரத்³த⁴வீரியோ விஹரதி அகுஸலானம் த⁴ம்மானம் பஹானாய, குஸலானம் த⁴ம்மானம் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. வீரியப³லகாயோ, பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி; ஸாவஜ்ஜம் பஜஹதி, அனவஜ்ஜம் பா⁴வேதி; ஸுத்³த⁴ம் அத்தானம் பரிஹரதி. இமினா பஞ்சமேன ஸத்³த⁴ம்மேன ஸமன்னாக³தோ ஹோதி.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே தோ³வாரிகோ ஹோதி பண்டி³தோ ப்³யத்தோ மேதா⁴வீ அஞ்ஞாதானம் நிவாரேதா ஞாதானம் பவேஸேதா அப்³ப⁴ந்தரானம் கு³த்தியா பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ ஸதிமா ஹோதி பரமேன ஸதினேபக்கேன ஸமன்னாக³தோ சிரகதம்பி சிரபா⁴ஸிதம்பி ஸரிதா அனுஸ்ஸரிதா. ஸதிதோ³வாரிகோ, பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி; ஸாவஜ்ஜம் பஜஹதி, அனவஜ்ஜம் பா⁴வேதி; ஸுத்³த⁴ம் அத்தானம் பரிஹரதி. இமினா ச²ட்டே²ன ஸத்³த⁴ம்மேன ஸமன்னாக³தோ ஹோதி.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே பாகாரோ ஹோதி உச்சோ சேவ வித்த²தோ ச வாஸனலேபனஸம்பன்னோ ச அப்³ப⁴ந்தரானம் கு³த்தியா பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. பஞ்ஞாவாஸனலேபனஸம்பன்னோ, பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி; ஸாவஜ்ஜம் பஜஹதி, அனவஜ்ஜம் பா⁴வேதி; ஸுத்³த⁴ம் அத்தானம் பரிஹரதி. இமினா ஸத்தமேன ஸத்³த⁴ம்மேன ஸமன்னாக³தோ ஹோதி. இமேஹி ஸத்தஹி ஸத்³த⁴ம்மேஹி ஸமன்னாக³தோ ஹோதி.

‘‘கதமேஸம் சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴? ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே ப³ஹும் திணகட்டோ²த³கம் ஸன்னிசிதம் ஹோதி அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி அத்தனோ ரதியா அபரிதஸ்ஸாய பா²ஸுவிஹாராய ஓக்கமனாய நிப்³பா³னஸ்ஸ.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே ப³ஹும் ஸாலியவகம் ஸன்னிசிதம் ஹோதி அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரதி அத்தனோ ரதியா அபரிதஸ்ஸாய பா²ஸுவிஹாராய ஓக்கமனாய நிப்³பா³னஸ்ஸ.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே ப³ஹும் திலமுக்³க³மாஸாபரண்ணம் ஸன்னிசிதம் ஹோதி அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய. ஏவமேவம் கோ², பி⁴க்க²வே, அரியஸாவகோ பீதியா ச விராகா³…பே… ததியம் ஜா²னம் உபஸம்பஜ்ஜ விஹரதி அத்தனோ ரதியா அபரிதஸ்ஸாய பா²ஸுவிஹாராய ஓக்கமனாய நிப்³பா³னஸ்ஸ.

‘‘ஸேய்யதா²பி, பி⁴க்க²வே, ரஞ்ஞோ பச்சந்திமே நக³ரே ப³ஹும் பே⁴ஸஜ்ஜம் ஸன்னிசிதம் ஹோதி, ஸேய்யதி²த³ம் – ஸப்பி நவனீதம் தேலம் மது⁴ பா²ணிதம் லோணம் அப்³ப⁴ந்தரானம் ரதியா அபரிதஸ்ஸாய பா²ஸுவிஹாராய பா³ஹிரானம் படிகா⁴தாய. ஏவமேவம் கோ² பி⁴க்க²வே, அரியஸாவகோ ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி அத்தனோ ரதியா அபரிதஸ்ஸாய பா²ஸுவிஹாராய ஓக்கமனாய நிப்³பா³னஸ்ஸ. இமேஸம் சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴.

‘‘யதோ கோ², பி⁴க்க²வே, அரியஸாவகோ இமேஹி ஸத்தஹி ஸத்³த⁴ம்மேஹி ஸமன்னாக³தோ ஹோதி, இமேஸஞ்ச சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. அயம் வுச்சதி, பி⁴க்க²வே, அரியஸாவகோ அகரணீயோ மாரஸ்ஸ அகரணீயோ பாபிமதோ’’தி. ததியம்.