1. சரஸுத்தம்

11. [இதிவு. 110] ‘‘சரதோ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² அதி⁴வாஸேதி, நப்பஜஹதி ந வினோதே³தி ந ப்³யந்தீகரோதி [ப்³யந்திகரோதி (பீ.), ப்³யந்திம் கரோதி (க.)] ந அனபா⁴வம் க³மேதி, சரம்பி, பி⁴க்க²வே, பி⁴க்கு² ஏவம்பூ⁴தோ ‘அனாதாபீ அனோத்தாபீ ஸததம் ஸமிதம் குஸீதோ ஹீனவீரியோ’தி வுச்சதி.

‘‘டி²தஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² அதி⁴வாஸேதி, நப்பஜஹதி ந வினோதே³தி ந ப்³யந்தீகரோதி ந அனபா⁴வம் க³மேதி, டி²தோபி, பி⁴க்க²வே, பி⁴க்கு² ஏவம்பூ⁴தோ ‘அனாதாபீ அனோத்தாபீ ஸததம் ஸமிதம் குஸீதோ ஹீனவீரியோ’தி வுச்சதி.

‘‘நிஸின்னஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² அதி⁴வாஸேதி, நப்பஜஹதி ந வினோதே³தி ந ப்³யந்தீகரோதி ந அனபா⁴வம் க³மேதி, நிஸின்னோபி, பி⁴க்க²வே, பி⁴க்கு² ஏவம்பூ⁴தோ ‘அனாதாபீ அனோத்தாபீ ஸததம் ஸமிதம் குஸீதோ ஹீனவீரியோ’தி வுச்சதி.

‘‘ஸயானஸ்ஸ சேபி, பி⁴க்க²வே, பி⁴க்கு²னோ ஜாக³ரஸ்ஸ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² அதி⁴வாஸேதி, நப்பஜஹதி ந வினோதே³தி ந ப்³யந்தீகரோதி ந அனபா⁴வம் க³மேதி, ஸயானோபி, பி⁴க்க²வே, பி⁴க்கு² ஜாக³ரோ ஏவம்பூ⁴தோ ‘அனாதாபீ அனோத்தாபீ ஸததம் ஸமிதம் குஸீதோ ஹீனவீரியோ’தி வுச்சதி.

‘‘சரதோ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² நாதி⁴வாஸேதி, பஜஹதி வினோதே³தி ப்³யந்தீகரோதி அனபா⁴வம் க³மேதி, சரம்பி, பி⁴க்க²வே, பி⁴க்கு² ஏவம்பூ⁴தோ ‘ஆதாபீ ஓத்தாபீ ஸததம் ஸமிதம் ஆரத்³த⁴வீரியோ பஹிதத்தோ’தி வுச்சதி.

‘‘டி²தஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² நாதி⁴வாஸேதி, பஜஹதி வினோதே³தி ப்³யந்தீகரோதி அனபா⁴வம் க³மேதி, டி²தோபி, பி⁴க்க²வே, பி⁴க்கு² ஏவம்பூ⁴தோ ‘ஆதாபீ ஓத்தாபீ ஸததம் ஸமிதம் ஆரத்³த⁴வீரியோ பஹிதத்தோ’தி வுச்சதி.

‘‘நிஸின்னஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² நாதி⁴வாஸேதி, பஜஹதி வினோதே³தி ப்³யந்தீகரோதி அனபா⁴வம் க³மேதி, நிஸின்னோபி, பி⁴க்க²வே, பி⁴க்கு² ஏவம்பூ⁴தோ ‘ஆதாபீ ஓத்தாபீ ஸததம் ஸமிதம் ஆரத்³த⁴வீரியோ பஹிதத்தோ’தி வுச்சதி.

‘‘ஸயானஸ்ஸ சேபி, பி⁴க்க²வே, பி⁴க்கு²னோ ஜாக³ரஸ்ஸ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தம் சே பி⁴க்கு² நாதி⁴வாஸேதி, பஜஹதி வினோதே³தி ப்³யந்தீகரோதி அனபா⁴வம் க³மேதி, ஸயானோபி, பி⁴க்க²வே, பி⁴க்கு² ஜாக³ரோ ஏவம்பூ⁴தோ ‘ஆதாபீ ஓத்தாபீ ஸததம் ஸமிதம் ஆரத்³த⁴வீரியோ பஹிதத்தோ’தி வுச்சதீ’’தி.

‘‘சரம் வா யதி³ வா திட்ட²ம், நிஸின்னோ உத³ வா ஸயம்;

யோ விதக்கம் விதக்கேதி, பாபகம் கே³ஹனிஸ்ஸிதம்.

‘‘கும்மக்³க³ப்படிபன்னோ ஸோ, மோஹனேய்யேஸு முச்சி²தோ;

அப⁴ப்³போ³ தாதி³ஸோ பி⁴க்கு², பு²ட்டு²ம் ஸம்போ³தி⁴முத்தமம்.

‘‘யோ ச சரம் வா திட்ட²ம் வா, நிஸின்னோ உத³ வா ஸயம்;

விதக்கம் ஸமயித்வான, விதக்கூபஸமே ரதோ;

ப⁴ப்³போ³ ஸோ தாதி³ஸோ பி⁴க்கு², பு²ட்டு²ம் ஸம்போ³தி⁴முத்தம’’ந்தி. பட²மம்;