3. ததியபண்ணாஸகம்

(11) 1. ஆஸாது³ப்பஜஹவக்³கோ³

119. ‘‘த்³வேமா, பி⁴க்க²வே, ஆஸா து³ப்பஜஹா. கதமா த்³வே? லாபா⁴ஸா ச ஜீவிதாஸா ச. இமா கோ², பி⁴க்க²வே, த்³வே ஆஸா து³ப்பஜஹா’’தி.

120. ‘‘த்³வேமே, பி⁴க்க²வே, புக்³க³லா து³ல்லபா⁴ லோகஸ்மிம். கதமே த்³வே? யோ ச புப்³ப³காரீ, யோ ச கதஞ்ஞூ கதவேதீ³. இமே கோ², பி⁴க்க²வே, த்³வே புக்³க³லா து³ல்லபா⁴ லோகஸ்மி’’ந்தி.

121. ‘‘த்³வேமே, பி⁴க்க²வே, புக்³க³லா து³ல்லபா⁴ லோகஸ்மிம். கதமே த்³வே? தித்தோ ச தப்பேதா ச. இமே கோ², பி⁴க்க²வே, த்³வே புக்³க³லா து³ல்லபா⁴ லோகஸ்மி’’ந்தி.

122. ‘‘த்³வேமே, பி⁴க்க²வே, புக்³க³லா து³த்தப்பயா. கதமே த்³வே? யோ ச லத்³த⁴ம் லத்³த⁴ம் நிக்கி²பதி, யோ ச லத்³த⁴ம் லத்³த⁴ம் விஸ்ஸஜ்ஜேதி. இமே கோ², பி⁴க்க²வே, த்³வே புக்³க³லா து³த்தப்பயா’’தி.

123. ‘‘த்³வேமே, பி⁴க்க²வே, புக்³க³லா ஸுதப்பயா. கதமே த்³வே? யோ ச லத்³த⁴ம் லத்³த⁴ம் ந நிக்கி²பதி, யோ ச லத்³த⁴ம் லத்³த⁴ம் ந விஸ்ஸஜ்ஜேதி. இமே கோ², பி⁴க்க²வே, த்³வே புக்³க³லா ஸுதப்பயா’’தி.

124. ‘‘த்³வேமே, பி⁴க்க²வே, பச்சயா ராக³ஸ்ஸ உப்பாதா³ய. கதமே த்³வே? ஸுப⁴னிமித்தஞ்ச அயோனிஸோ ச மனஸிகாரோ. இமே கோ², பி⁴க்க²வே, த்³வே பச்சயா ராக³ஸ்ஸ உப்பாதா³யா’’தி.

125. ‘‘த்³வேமே, பி⁴க்க²வே, பச்சயா தோ³ஸஸ்ஸ உப்பாதா³ய. கதமே த்³வே? படிக⁴னிமித்தஞ்ச அயோனிஸோ ச மனஸிகாரோ. இமே கோ², பி⁴க்க²வே, த்³வே பச்சயா தோ³ஸஸ்ஸ உப்பாதா³யா’’தி.

126. ‘‘த்³வேமே, பி⁴க்க²வே, பச்சயா மிச்சா²தி³ட்டி²யா உப்பாதா³ய. கதமே த்³வே? பரதோ ச கோ⁴ஸோ அயோனிஸோ ச மனஸிகாரோ. இமே கோ², பி⁴க்க²வே, த்³வே பச்சயா மிச்சா²தி³ட்டி²யா உப்பாதா³யா’’தி.

127. ‘‘த்³வேமே, பி⁴க்க²வே, பச்சயா ஸம்மாதி³ட்டி²யா உப்பாதா³ய. கதமே த்³வே? பரதோ ச கோ⁴ஸோ, யோனிஸோ ச மனஸிகாரோ. இமே கோ², பி⁴க்க²வே, த்³வே பச்சயா ஸம்மாதி³ட்டி²யா உப்பாதா³யா’’தி.

128. ‘‘த்³வேமா, பி⁴க்க²வே, ஆபத்தியோ. கதமா த்³வே? லஹுகா ச ஆபத்தி, க³ருகா ச ஆபத்தி. இமா கோ², பி⁴க்க²வே, த்³வே ஆபத்தியோ’’தி.

129. ‘‘த்³வேமா, பி⁴க்க²வே, ஆபத்தியோ. கதமா த்³வே? து³ட்டு²ல்லா ச ஆபத்தி, அது³ட்டு²ல்லா ச ஆபத்தி. இமா கோ², பி⁴க்க²வே, த்³வே ஆபத்தியோ’’தி.

130. ‘‘த்³வேமா, பி⁴க்க²வே, ஆபத்தியோ. கதமா த்³வே? ஸாவஸேஸா ச ஆபத்தி, அனவஸேஸா ச ஆபத்தி. இமா கோ², பி⁴க்க²வே, த்³வே ஆபத்தியோ’’தி.

ஆஸாது³ப்பஜஹவக்³கோ³ பட²மோ.

(12) 2. ஆயாசனவக்³கோ³

131. ‘‘ஸத்³தோ⁴, பி⁴க்க²வே, பி⁴க்கு² ஏவம் ஸம்மா ஆயாசமானோ ஆயாசேய்ய – ‘தாதி³ஸோ ஹோமி யாதி³ஸா ஸாரிபுத்தமோக்³க³ல்லானா’தி. ஏஸா, பி⁴க்க²வே, துலா ஏதம் பமாணம் மம ஸாவகானம் பி⁴க்கூ²னம் யதி³த³ம் ஸாரிபுத்தமோக்³க³ல்லானா’’தி.

132. ‘‘ஸத்³தா⁴, பி⁴க்க²வே, பி⁴க்கு²னீ ஏவம் ஸம்மா ஆயாசமானா ஆயாசேய்ய – ‘தாதி³ஸீ ஹோமி யாதி³ஸீ கே²மா ச பி⁴க்கு²னீ உப்பலவண்ணா சா’தி. ஏஸா, பி⁴க்க²வே, துலா ஏதம் பமாணம் மம ஸாவிகானம் பி⁴க்கு²னீனம் யதி³த³ம் கே²மா ச பி⁴க்கு²னீ உப்பலவண்ணா சா’’தி.

133. ‘‘ஸத்³தோ⁴, பி⁴க்க²வே, உபாஸகோ ஏவம் ஸம்மா ஆயாசமானோ ஆயாசேய்ய – ‘தாதி³ஸோ ஹோமி யாதி³ஸோ சித்தோ ச க³ஹபதி ஹத்த²கோ ச ஆளவகோ’தி. ஏஸா, பி⁴க்க²வே, துலா ஏதம் பமாணம் மம ஸாவகானம் உபாஸகானம் யதி³த³ம் சித்தோ ச க³ஹபதி ஹத்த²கோ ச ஆளவகோ’’தி.

134. ‘‘ஸத்³தா⁴, பி⁴க்க²வே, உபாஸிகா ஏவம் ஸம்மா ஆயாசமானா ஆயாசேய்ய – ‘தாதி³ஸீ ஹோமி யாதி³ஸீ கு²ஜ்ஜுத்தரா ச உபாஸிகா வேளுகண்ட³கியா [வேளுகண்ட³கீ (அ. நி. 6.37; அ. நி. 4.176 ஆக³தம்] ச நந்த³மாதா’தி. ஏஸா, பி⁴க்க²வே, துலா ஏதம் பமாணம் மம ஸாவிகானம் உபாஸிகானம் யதி³த³ம் கு²ஜ்ஜுத்தரா ச உபாஸிகா வேளுகண்ட³கியா ச நந்த³மாதா’’தி.

135. ‘‘த்³வீஹி, பி⁴க்க²வே, த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. கதமேஹி த்³வீஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி, அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி. இமேஹி கோ², பி⁴க்க²வே, த்³வீஹி த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதீதி.

‘‘த்³வீஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. கதமேஹி த்³வீஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி, அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி. இமேஹி கோ², பி⁴க்க²வே, த்³வீஹி த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதீ’’தி.

136. ‘‘த்³வீஹி, பி⁴க்க²வே, த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. கதமேஹி த்³வீஹி? அனனுவிச்ச அபரியோகா³ஹேத்வா அப்பஸாத³னீயே டா²னே பஸாத³ம் உபத³ம்ஸேதி, அனனுவிச்ச அபரியோகா³ஹேத்வா பஸாத³னீயே டா²னே அப்பஸாத³ம் உபத³ம்ஸேதி. இமேஹி கோ², பி⁴க்க²வே, த்³வீஹி த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதீதி.

‘‘த்³வீஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. கதமேஹி த்³வீஹி? அனுவிச்ச பரியோகா³ஹேத்வா அப்பஸாத³னீயே டா²னே அப்பஸாத³ம் உபத³ம்ஸேதி, அனுவிச்ச பரியோகா³ஹேத்வா பஸாத³னீயே டா²னே பஸாத³ம் உபத³ம்ஸேதி. இமேஹி கோ², பி⁴க்க²வே, த்³வீஹி த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதீ’’தி.

137. ‘‘த்³வீஸு, பி⁴க்க²வே, மிச்சா²படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. கதமேஸு த்³வீஸு? மாதரி ச பிதரி ச. இமேஸு கோ², பி⁴க்க²வே, த்³வீஸு மிச்சா²படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதீதி.

‘‘த்³வீஸு, பி⁴க்க²வே, ஸம்மாபடிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. கதமேஸு த்³வீஸு? மாதரி ச பிதரி ச. இமேஸு கோ², பி⁴க்க²வே, த்³வீஸு ஸம்மாபடிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதீ’’தி.

138. ‘‘த்³வீஸு, பி⁴க்க²வே, மிச்சா²படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. கதமேஸு த்³வீஸு? ததா²க³தே ச ததா²க³தஸாவகே ச. இமேஸு கோ², பி⁴க்க²வே, மிச்சா²படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதீதி.

‘‘த்³வீஸு, பி⁴க்க²வே, ஸம்மாபடிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. கதமேஸு த்³வீஸு? ததா²க³தே ச ததா²க³தஸாவகே ச. இமேஸு கோ², பி⁴க்க²வே, த்³வீஸு ஸம்மாபடிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதீ’’தி.

139. ‘‘த்³வேமே, பி⁴க்க²வே, த⁴ம்மா. கதமே த்³வே? ஸசித்தவோதா³னஞ்ச ந ச கிஞ்சி லோகே உபாதி³யதி. இமே கோ², பி⁴க்க²வே, த்³வே த⁴ம்மா’’தி.

140. ‘‘த்³வேமே, பி⁴க்க²வே, த⁴ம்மா. கதமே த்³வே? கோதோ⁴ ச உபனாஹோ ச. இமே கோ², பி⁴க்க²வே, த்³வே த⁴ம்மா’’தி.

141. ‘‘த்³வேமே, பி⁴க்க²வே, த⁴ம்மா. கதமே த்³வே? கோத⁴வினயோ ச உபனாஹவினயோ ச. இமே கோ², பி⁴க்க²வே, த்³வே த⁴ம்மா’’தி.

ஆயாசனவக்³கோ³ து³தியோ.

(13) 3. தா³னவக்³கோ³

142. ‘‘த்³வேமானி, பி⁴க்க²வே, தா³னானி. கதமானி த்³வே? ஆமிஸதா³னஞ்ச த⁴ம்மதா³னஞ்ச. இமானி கோ², பி⁴க்க²வே, த்³வே தா³னானி. ஏதத³க்³க³ம், பி⁴க்க²வே, இமேஸம் த்³வின்னம் தா³னானம் யதி³த³ம் த⁴ம்மதா³ன’’ந்தி.

143. ‘‘த்³வேமே, பி⁴க்க²வே, யாகா³. கதமே த்³வே? ஆமிஸயாகோ³ ச த⁴ம்மயாகோ³ ச. இமே கோ², பி⁴க்க²வே, த்³வே யாகா³. ஏதத³க்³க³ம், பி⁴க்க²வே, இமேஸம் த்³வின்னம் யாகா³னம் யதி³த³ம் த⁴ம்மயாகோ³’’தி.

144. ‘‘த்³வேமே, பி⁴க்க²வே, சாகா³. கதமே த்³வே? ஆமிஸசாகோ³ ச த⁴ம்மசாகோ³ ச. இமே கோ², பி⁴க்க²வே, த்³வே சாகா³. ஏதத³க்³க³ம், பி⁴க்க²வே, இமேஸம் த்³வின்னம் சாகா³னம் யதி³த³ம் த⁴ம்மசாகோ³’’தி.

145. ‘‘த்³வேமே, பி⁴க்க²வே, பரிச்சாகா³. கதமே த்³வே? ஆமிஸபரிச்சாகோ³ ச த⁴ம்மபரிச்சாகோ³ ச. இமே கோ², பி⁴க்க²வே, த்³வே பரிச்சாகா³. ஏதத³க்³க³ம், பி⁴க்க²வே, இமேஸம் த்³வின்னம் பரிச்சாகா³னம் யதி³த³ம் த⁴ம்மபரிச்சாகோ³’’தி.

146. ‘‘த்³வேமே, பி⁴க்க²வே, போ⁴கா³. கதமே த்³வே? ஆமிஸபோ⁴கோ³ ச த⁴ம்மபோ⁴கோ³ ச. இமே கோ², பி⁴க்க²வே, த்³வே போ⁴கா³. ஏதத³க்³க³ம், பி⁴க்க²வே, இமேஸம் த்³வின்னம் போ⁴கா³னம் யதி³த³ம் த⁴ம்மபோ⁴கோ³’’தி.

147. ‘‘த்³வேமே, பி⁴க்க²வே, ஸம்போ⁴கா³. கதமே த்³வே? ஆமிஸஸம்போ⁴கோ³ ச த⁴ம்மஸம்போ⁴கோ³ ச. இமே கோ², பி⁴க்க²வே, த்³வே ஸம்போ⁴கா³. ஏதத³க்³க³ம், பி⁴க்க²வே, இமேஸம் த்³வின்னம் ஸம்போ⁴கா³னம் யதி³த³ம் த⁴ம்மஸம்போ⁴கோ³’’தி.

148. ‘‘த்³வேமே, பி⁴க்க²வே, ஸம்விபா⁴கா³. கதமே த்³வே? ஆமிஸஸம்விபா⁴கோ³ ச த⁴ம்மஸம்விபா⁴கோ³ ச. இமே கோ², பி⁴க்க²வே, த்³வே ஸம்விபா⁴கா³. ஏதத³க்³க³ம், பி⁴க்க²வே, இமேஸம் த்³வின்னம் ஸம்விபா⁴கா³னம் யதி³த³ம் த⁴ம்மஸம்விபா⁴கோ³’’தி.

149. ‘‘த்³வேமே, பி⁴க்க²வே, ஸங்க³ஹா. கதமே த்³வே? ஆமிஸஸங்க³ஹோ ச த⁴ம்மஸங்க³ஹோ ச. இமே கோ², பி⁴க்க²வே, த்³வே ஸங்க³ஹா. ஏதத³க்³க³ம், பி⁴க்க²வே, இமேஸம் த்³வின்னம் ஸங்க³ஹானம் யதி³த³ம் த⁴ம்மஸங்க³ஹோ’’தி.

150. ‘‘த்³வேமே, பி⁴க்க²வே, அனுக்³க³ஹா. கதமே த்³வே? ஆமிஸானுக்³க³ஹோ ச த⁴ம்மானுக்³க³ஹோ ச. இமே கோ², பி⁴க்க²வே, த்³வே அனுக்³க³ஹா. ஏதத³க்³க³ம், பி⁴க்க²வே, இமேஸம் த்³வின்னம் அனுக்³க³ஹானம் யதி³த³ம் த⁴ம்மானுக்³க³ஹோ’’தி.

151. ‘‘த்³வேமா, பி⁴க்க²வே, அனுகம்பா. கதமா த்³வே? ஆமிஸானுகம்பா ச த⁴ம்மானுகம்பா ச. இமா கோ², பி⁴க்க²வே, த்³வே அனுகம்பா. ஏதத³க்³க³ம், பி⁴க்க²வே, இமாஸம் த்³வின்னம் அனுகம்பானம் யதி³த³ம் த⁴ம்மானுகம்பா’’தி.

தா³னவக்³கோ³ ததியோ.

(14) 4. ஸந்தா²ரவக்³கோ³

152. ‘‘த்³வேமே, பி⁴க்க²வே, ஸந்தா²ரா [ஸந்தா⁴ரா (க.)]. கதமே த்³வே? ஆமிஸஸந்தா²ரோ ச த⁴ம்மஸந்தா²ரோ ச. இமே கோ², பி⁴க்க²வே, த்³வே ஸந்தா²ரா. ஏதத³க்³க³ம், பி⁴க்க²வே, இமேஸம் த்³வின்னம் ஸந்தா²ரானம் யதி³த³ம் த⁴ம்மஸந்தா²ரோ’’தி.

153. ‘‘த்³வேமே, பி⁴க்க²வே, படிஸந்தா²ரா [படிஸந்தா⁴ரா (க.)]. கதமே த்³வே? ஆமிஸபடிஸந்தா²ரோ ச த⁴ம்மபடிஸந்தா²ரோ ச. இமே கோ², பி⁴க்க²வே, த்³வே படிஸந்தா²ரா. ஏதத³க்³க³ம், பி⁴க்க²வே, இமேஸம் த்³வின்னம் படிஸந்தா²ரானம் யதி³த³ம் த⁴ம்மபடிஸந்தா²ரோ’’தி.

154. ‘‘த்³வேமா, பி⁴க்க²வே, ஏஸனா. கதமா த்³வே? ஆமிஸேஸனா ச த⁴ம்மேஸனா ச. இமா கோ², பி⁴க்க²வே, த்³வே ஏஸனா. ஏதத³க்³க³ம், பி⁴க்க²வே, இமாஸம் த்³வின்னம் ஏஸனானம் யதி³த³ம் த⁴ம்மேஸனா’’தி.

155. ‘‘த்³வேமா, பி⁴க்க²வே, பரியேஸனா. கதமா த்³வே? ஆமிஸபரியேஸனா ச த⁴ம்மபரியேஸனா ச. இமா கோ², பி⁴க்க²வே, த்³வே பரியேஸனா. ஏதத³க்³க³ம், பி⁴க்க²வே, இமாஸம் த்³வின்னம் பரியேஸனானம் யதி³த³ம் த⁴ம்மபரியேஸனா’’தி.

156. ‘‘த்³வேமா, பி⁴க்க²வே, பரியேட்டி²யோ. கதமா த்³வே? ஆமிஸபரியேட்டி² ச த⁴ம்மபரியேட்டி² ச. இமா கோ², பி⁴க்க²வே, த்³வே பரியேட்டி²யோ. ஏதத³க்³க³ம், பி⁴க்க²வே, இமாஸம் த்³வின்னம் பரியேட்டீ²னம் யதி³த³ம் த⁴ம்மபரியேட்டீ²’’தி.

157. ‘‘த்³வேமா, பி⁴க்க²வே, பூஜா. கதமா த்³வே? ஆமிஸபூஜா ச த⁴ம்மபூஜா ச. இமா கோ² பி⁴க்க²வே, த்³வே பூஜா. ஏதத³க்³க³ம், பி⁴க்க²வே, இமாஸம் த்³வின்னம் பூஜானம் யதி³த³ம் த⁴ம்மபூஜா’’தி.

158. ‘‘த்³வேமானி, பி⁴க்க²வே, ஆதிதே²ய்யானி. கதமானி த்³வே? ஆமிஸாதிதே²ய்யஞ்ச த⁴ம்மாதிதே²ய்யஞ்ச. இமானி கோ², பி⁴க்க²வே, த்³வே ஆதிதே²ய்யானி. ஏதத³க்³க³ம், பி⁴க்க²வே, இமேஸம் த்³வின்னம் ஆதிதே²ய்யானம் யதி³த³ம் த⁴ம்மாதிதே²ய்ய’’ந்தி.

159. ‘‘த்³வேமா, பி⁴க்க²வே, இத்³தி⁴யோ. கதமா த்³வே? ஆமிஸித்³தி⁴ ச த⁴ம்மித்³தி⁴ ச. இமா கோ², பி⁴க்க²வே, த்³வே இத்³தி⁴யோ. ஏதத³க்³க³ம், பி⁴க்க²வே, இமாஸம் த்³வின்னம் இத்³தீ⁴னம் யதி³த³ம் த⁴ம்மித்³தீ⁴’’தி.

160. ‘‘த்³வேமா, பி⁴க்க²வே, வுத்³தி⁴யோ. கதமா த்³வே? ஆமிஸவுத்³தி⁴ ச த⁴ம்மவுத்³தி⁴ ச. இமா கோ², பி⁴க்க²வே, த்³வே வுத்³தி⁴யோ. ஏதத³க்³க³ம், பி⁴க்க²வே, இமாஸம் த்³வின்னம் வுத்³தீ⁴னம் யதி³த³ம் த⁴ம்மவுத்³தீ⁴’’தி.

161. ‘‘த்³வேமானி, பி⁴க்க²வே, ரதனானி. கதமானி த்³வே? ஆமிஸரதனஞ்ச த⁴ம்மரதனஞ்ச. இமானி கோ², பி⁴க்க²வே, த்³வே ரதனானி. ஏதத³க்³க³ம், பி⁴க்க²வே, இமேஸம் த்³வின்னம் ரதனானம் யதி³த³ம் த⁴ம்மரதன’’ந்தி.

162. ‘‘த்³வேமே, பி⁴க்க²வே, ஸன்னிசயா. கதமே த்³வே? ஆமிஸஸன்னிசயோ ச த⁴ம்மஸன்னிசயோ ச. இமே கோ², பி⁴க்க²வே, த்³வே ஸன்னிசயா. ஏதத³க்³க³ம், பி⁴க்க²வே, இமேஸம் த்³வின்னம் ஸன்னிசயானம் யதி³த³ம் த⁴ம்மஸன்னிசயோ’’தி.

163. ‘‘த்³வேமானி, பி⁴க்க²வே, வேபுல்லானி. கதமானி த்³வே? ஆமிஸவேபுல்லஞ்ச த⁴ம்மவேபுல்லஞ்ச. இமானி கோ², பி⁴க்க²வே, த்³வே வேபுல்லானி. ஏதத³க்³க³ம், பி⁴க்க²வே, இமேஸம் த்³வின்னம் வேபுல்லானம் யதி³த³ம் த⁴ம்மவேபுல்ல’’ந்தி.

ஸந்தா²ரவக்³கோ³ சதுத்தோ².

(15) 5. ஸமாபத்திவக்³கோ³

164. ‘‘த்³வேமே, பி⁴க்க²வே, த⁴ம்மா. கதமே த்³வே? ஸமாபத்திகுஸலதா ச ஸமாபத்திவுட்டா²னகுஸலதா ச. இமே கோ², பி⁴க்க²வே, த்³வே த⁴ம்மா’’தி.

165. ‘‘த்³வேமே, பி⁴க்க²வே, த⁴ம்மா. கதமே த்³வே? அஜ்ஜவஞ்ச மத்³த³வஞ்ச. இமே கோ², பி⁴க்க²வே, த்³வே த⁴ம்மா’’.

166. ‘‘த்³வேமே, பி⁴க்க²வே, த⁴ம்மா. கதமே த்³வே? க²ந்தி ச ஸோரச்சஞ்ச. இமே கோ², பி⁴க்க²வே, த்³வே த⁴ம்மா’’.

167. ‘‘த்³வேமே, பி⁴க்க²வே, த⁴ம்மா. கதமே த்³வே? ஸாக²ல்யஞ்ச படிஸந்தா²ரோ ச. இமே கோ², பி⁴க்க²வே, த்³வே த⁴ம்மா’’.

168. ‘த்³வேமே, பி⁴க்க²வே, த⁴ம்மா. கதமே த்³வே? அவிஹிம்ஸா ச ஸோசேய்யஞ்ச. இமே கோ², பி⁴க்க²வே, த்³வே த⁴ம்மா’’.

169. ‘‘த்³வேமே, பி⁴க்க²வே, த⁴ம்மா. கதமே த்³வே? இந்த்³ரியேஸு அகு³த்தத்³வாரதா ச போ⁴ஜனே அமத்தஞ்ஞுதா ச. இமே கோ², பி⁴க்க²வே, த்³வே த⁴ம்மா’’.

170. ‘‘த்³வேமே, பி⁴க்க²வே, த⁴ம்மா. கதமே த்³வே? இந்த்³ரியேஸு கு³த்தத்³வாரதா ச போ⁴ஜனே மத்தஞ்ஞுதா ச. இமே கோ², பி⁴க்க²வே, த்³வே த⁴ம்மா’’.

171. ‘‘த்³வேமே, பி⁴க்க²வே, த⁴ம்மா. கதமே த்³வே? படிஸங்கா²னப³லஞ்ச பா⁴வனாப³லஞ்ச. இமே கோ², பி⁴க்க²வே, த்³வே த⁴ம்மா’’.

172. ‘‘த்³வேமே, பி⁴க்க²வே, த⁴ம்மா. கதமே த்³வே? ஸதிப³லஞ்ச ஸமாதி⁴ப³லஞ்ச. இமே கோ², பி⁴க்க²வே, த்³வே த⁴ம்மா’’.

173. ‘‘த்³வேமே, பி⁴க்க²வே, த⁴ம்மா. கதமே த்³வே? ஸமதோ² ச விபஸ்ஸனா ச. இமே கோ², பி⁴க்க²வே, த்³வே த⁴ம்மா’’.

174. ‘‘த்³வேமே, பி⁴க்க²வே, த⁴ம்மா. கதமே த்³வே? ஸீலவிபத்தி ச தி³ட்டி²விபத்தி ச. இமே கோ², பி⁴க்க²வே, த்³வே த⁴ம்மா’’.

175. ‘‘த்³வேமே, பி⁴க்க²வே, த⁴ம்மா. கதமே த்³வே? ஸீலஸம்பதா³ ச தி³ட்டி²ஸம்பதா³ ச. இமே கோ², பி⁴க்க²வே, த்³வே த⁴ம்மா’’.

176. ‘‘த்³வேமே, பி⁴க்க²வே, த⁴ம்மா. கதமே த்³வே? ஸீலவிஸுத்³தி⁴ ச தி³ட்டி²விஸுத்³தி⁴ ச. இமே கோ², பி⁴க்க²வே, த்³வே த⁴ம்மா’’.

177. ‘‘த்³வேமே, பி⁴க்க²வே, த⁴ம்மா. கதமே த்³வே? தி³ட்டி²விஸுத்³தி⁴ ச யதா²தி³ட்டி²ஸ்ஸ ச பதா⁴னம். இமே கோ², பி⁴க்க²வே, த்³வே த⁴ம்மா’’.

178. ‘‘த்³வேமே, பி⁴க்க²வே, த⁴ம்மா. கதமே த்³வே? அஸந்துட்டி²தா ச குஸலேஸு த⁴ம்மேஸு, அப்படிவானிதா ச பதா⁴னஸ்மிம். இமே கோ², பி⁴க்க²வே, த்³வே த⁴ம்மா’’.

179. ‘‘த்³வேமே, பி⁴க்க²வே, த⁴ம்மா. கதமே த்³வே? முட்ட²ஸ்ஸச்சஞ்ச அஸம்பஜஞ்ஞஞ்ச. இமே கோ², பி⁴க்க²வே, த்³வே த⁴ம்மா’’.

180. ‘‘த்³வேமே, பி⁴க்க²வே, த⁴ம்மா. கதமே த்³வே? ஸதி ச ஸம்பஜஞ்ஞஞ்ச. இமே கோ², பி⁴க்க²வே, த்³வே த⁴ம்மா’’தி.

ஸமாபத்திவக்³கோ³ பஞ்சமோ.

ததியோ பண்ணாஸகோ ஸமத்தோ.