8. பட²மஸமாதி⁴ஸுத்தம்

18. [அ. நி. 10.6] அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் –

‘‘ஸியா நு கோ², ப⁴ந்தே, பி⁴க்கு²னோ ததா²ரூபோ ஸமாதி⁴படிலாபோ⁴ யதா² நேவ பத²வியம் பத²விஸஞ்ஞீ அஸ்ஸ, ந ஆபஸ்மிம் ஆபோஸஞ்ஞீ அஸ்ஸ, ந தேஜஸ்மிம் தேஜோஸஞ்ஞீ அஸ்ஸ, ந வாயஸ்மிம் வாயோஸஞ்ஞீ அஸ்ஸ, ந ஆகாஸானஞ்சாயதனே ஆகாஸானஞ்சாயதனஸஞ்ஞீ அஸ்ஸ, ந விஞ்ஞாணஞ்சாயதனே விஞ்ஞாணஞ்சாயதனஸஞ்ஞீ அஸ்ஸ, ந ஆகிஞ்சஞ்ஞாயதனே ஆகிஞ்சஞ்ஞாயதனஸஞ்ஞீ அஸ்ஸ, ந நேவஸஞ்ஞானாஸஞ்ஞாயதனே நேவஸஞ்ஞானாஸஞ்ஞாயதனஸஞ்ஞீ அஸ்ஸ, ந இத⁴லோகே இத⁴லோகஸஞ்ஞீ அஸ்ஸ, ந பரலோகே பரலோகஸஞ்ஞீ அஸ்ஸ, யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தத்ராபி ந ஸஞ்ஞீ அஸ்ஸ; ஸஞ்ஞீ ச பன அஸ்ஸா’’தி?

‘‘ஸியா, பி⁴க்க²வே, பி⁴க்கு²னோ ததா²ரூபோ ஸமாதி⁴படிலாபோ⁴ யதா² நேவ பத²வியம் பத²விஸஞ்ஞீ அஸ்ஸ…பே. … யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தத்ராபி ந ஸஞ்ஞீ அஸ்ஸ; ஸஞ்ஞீ ச பன அஸ்ஸா’’தி.

‘‘யதா² கத²ம் பன, ப⁴ந்தே, ஸியா பி⁴க்கு²னோ ததா²ரூபோ ஸமாதி⁴படிலாபோ⁴ யதா² நேவ பத²வியம் பத²விஸஞ்ஞீ அஸ்ஸ…பே… யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தத்ராபி ந ஸஞ்ஞீ அஸ்ஸ; ஸஞ்ஞீ ச பன அஸ்ஸா’’தி?

‘‘இத⁴, பி⁴க்க²வே, பி⁴க்கு² ஏவம்ஸஞ்ஞீ ஹோதி – ‘ஏதம் ஸந்தம் ஏதம் பணீதம், யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஏவம் கோ², பி⁴க்க²வே, ஸியா பி⁴க்கு²னோ ததா²ரூபோ ஸமாதி⁴படிலாபோ⁴ யதா² நேவ பத²வியம் பத²விஸஞ்ஞீ அஸ்ஸ, ந ஆபஸ்மிம் ஆபோஸஞ்ஞீ அஸ்ஸ, ந தேஜஸ்மிம் தேஜோஸஞ்ஞீ அஸ்ஸ, ந வாயஸ்மிம் வாயோஸஞ்ஞீ அஸ்ஸ, ந ஆகாஸானஞ்சாயதனே ஆகாஸானஞ்சாயதனஸஞ்ஞீ அஸ்ஸ, ந விஞ்ஞாணஞ்சாயதனே விஞ்ஞாணஞ்சாயதனஸஞ்ஞீ அஸ்ஸ, ந ஆகிஞ்சஞ்ஞாயதனே ஆகிஞ்சஞ்ஞாயதனஸஞ்ஞீ அஸ்ஸ, ந நேவஸஞ்ஞானாஸஞ்ஞாயதனே நேவஸஞ்ஞானாஸஞ்ஞாயதனஸஞ்ஞீ அஸ்ஸ, ந இத⁴லோகே இத⁴லோகஸஞ்ஞீ அஸ்ஸ, ந பரலோகே பரலோகஸஞ்ஞீ அஸ்ஸ, யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தத்ராபி ந ஸஞ்ஞீ அஸ்ஸ; ஸஞ்ஞீ ச பன அஸ்ஸா’’தி. அட்ட²மம்.