4. து³தியஉபனிஸாஸுத்தம்

4. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி [பி⁴க்க²வோதி (ஸீ. ஸ்யா. பீ.) ஏவம் ஸப்³ப³த்த² அ. நி. 10.4]. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸும். ஆயஸ்மா ஸாரிபுத்தோ ஏதத³வோச –

‘‘து³ஸ்ஸீலஸ்ஸ, ஆவுஸோ, ஸீலவிபன்னஸ்ஸ ஹதூபனிஸோ ஹோதி அவிப்படிஸாரோ, அவிப்படிஸாரே அஸதி அவிப்படிஸாரவிபன்னஸ்ஸ ஹதூபனிஸம் ஹோதி பாமோஜ்ஜம், பாமோஜ்ஜே அஸதி பாமோஜ்ஜவிபன்னஸ்ஸ ஹதூபனிஸா ஹோதி பீதி, பீதியா அஸதி பீதிவிபன்னஸ்ஸ ஹதூபனிஸா ஹோதி பஸ்ஸத்³தி⁴, பஸ்ஸத்³தி⁴யா அஸதி பஸ்ஸத்³தி⁴விபன்னஸ்ஸ ஹதூபனிஸம் ஹோதி ஸுக²ம், ஸுகே² அஸதி ஸுக²விபன்னஸ்ஸ ஹதூபனிஸோ ஹோதி ஸம்மாஸமாதி⁴, ஸம்மாஸமாதி⁴ம்ஹி அஸதி ஸம்மாஸமாதி⁴விபன்னஸ்ஸ ஹதூபனிஸம் ஹோதி யதா²பூ⁴தஞாணத³ஸ்ஸனம், யதா²பூ⁴தஞாணத³ஸ்ஸனே அஸதி யதா²பூ⁴தஞாணத³ஸ்ஸனவிபன்னஸ்ஸ ஹதூபனிஸா ஹோதி நிப்³பி³தா³, நிப்³பி³தா³ய அஸதி நிப்³பி³தா³விபன்னஸ்ஸ ஹதூபனிஸோ ஹோதி விராகோ³, விராகே³ அஸதி விராக³விபன்னஸ்ஸ ஹதூபனிஸம் ஹோதி விமுத்திஞாணத³ஸ்ஸனம்.

‘‘ஸேய்யதா²பி, ஆவுஸோ, ருக்கோ² ஸாகா²பலாஸவிபன்னோ. தஸ்ஸ பபடிகாபி ந பாரிபூரிம் க³ச்ச²தி, தசோபி… பே²க்³கு³பி… ஸாரோபி ந பாரிபூரிம் க³ச்ச²தி. ஏவமேவம் கோ², ஆவுஸோ, து³ஸ்ஸீலஸ்ஸ ஸீலவிபன்னஸ்ஸ ஹதூபனிஸோ ஹோதி அவிப்படிஸாரோ, அவிப்படிஸாரே அஸதி அவிப்படிஸாரவிபன்னஸ்ஸ ஹதூபனிஸம் ஹோதி பாமோஜ்ஜம்…பே… விமுத்திஞாணத³ஸ்ஸனம்.

‘‘ஸீலவதோ, ஆவுஸோ, ஸீலஸம்பன்னஸ்ஸ உபனிஸஸம்பன்னோ ஹோதி அவிப்படிஸாரோ, அவிப்படிஸாரே ஸதி அவிப்படிஸாரஸம்பன்னஸ்ஸ உபனிஸஸம்பன்னம் ஹோதி பாமோஜ்ஜம், பாமோஜ்ஜே ஸதி பாமோஜ்ஜஸம்பன்னஸ்ஸ உபனிஸஸம்பன்னா ஹோதி பீதி, பீதியா ஸதி பீதிஸம்பன்னஸ்ஸ உபனிஸஸம்பன்னா ஹோதி பஸ்ஸத்³தி⁴, பஸ்ஸத்³தி⁴யா ஸதி பஸ்ஸத்³தி⁴ஸம்பன்னஸ்ஸ உபனிஸஸம்பன்னம் ஹோதி ஸுக²ம், ஸுகே² ஸதி ஸுக²ஸம்பன்னஸ்ஸ உபனிஸஸம்பன்னோ ஹோதி ஸம்மாஸமாதி⁴, ஸம்மாஸமாதி⁴ம்ஹி ஸதி ஸம்மாஸமாதி⁴ஸம்பன்னஸ்ஸ உபனிஸஸம்பன்னம் ஹோதி யதா²பூ⁴தஞாணத³ஸ்ஸனம், யதா²பூ⁴தஞாணத³ஸ்ஸனே ஸதி யதா²பூ⁴தஞாணத³ஸ்ஸனஸம்பன்னஸ்ஸ உபனிஸஸம்பன்னா ஹோதி நிப்³பி³தா³, நிப்³பி³தா³ய ஸதி நிப்³பி³தா³ஸம்பன்னஸ்ஸ உபனிஸஸம்பன்னோ ஹோதி விராகோ³, விராகே³ ஸதி விராக³ஸம்பன்னஸ்ஸ உபனிஸஸம்பன்னம் ஹோதி விமுத்திஞாணத³ஸ்ஸனம்.

‘‘ஸேய்யதா²பி, ஆவுஸோ, ருக்கோ² ஸாகா²பலாஸஸம்பன்னோ. தஸ்ஸ பபடிகாபி பாரிபூரிம் க³ச்ச²தி, தசோபி… பே²க்³கு³பி… ஸாரோபி பாரிபூரிம் க³ச்ச²தி. ஏவமேவம் கோ², ஆவுஸோ, ஸீலவதோ ஸீலஸம்பன்னஸ்ஸ உபனிஸஸம்பன்னோ ஹோதி அவிப்படிஸாரோ, அவிப்படிஸாரே ஸதி அவிப்படிஸாரஸம்பன்னஸ்ஸ உபனிஸஸம்பன்னம் ஹோதி பாமோஜ்ஜம்…பே… விமுத்திஞாணத³ஸ்ஸன’’ந்தி. சதுத்த²ம்.