1. கிமத்தி²யஸுத்தம்

1. [அ. நி. 10.1] ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘கிமத்தி²யானி, ப⁴ந்தே, குஸலானி ஸீலானி கிமானிஸம்ஸானீ’’தி? ‘‘அவிப்படிஸாரத்தா²னி கோ², ஆனந்த³, குஸலானி ஸீலானி அவிப்படிஸாரானிஸம்ஸானீ’’தி.

‘‘அவிப்படிஸாரோ பன, ப⁴ந்தே, கிமத்தி²யோ கிமானிஸம்ஸோ’’? ‘‘அவிப்படிஸாரோ கோ², ஆனந்த³, பாமோஜ்ஜத்தோ² பாமோஜ்ஜானிஸம்ஸோ’’.

‘‘பாமோஜ்ஜம் பன, ப⁴ந்தே, கிமத்தி²யம் கிமானிஸம்ஸம்’’? ‘‘பாமோஜ்ஜம் கோ², ஆனந்த³, பீதத்த²ம் பீதானிஸம்ஸம்’’.

‘‘பீதி பன, ப⁴ந்தே, கிமத்தி²யா கிமானிஸம்ஸா’’? ‘‘பீதி கோ², ஆனந்த³, பஸ்ஸத்³த⁴த்தா² பஸ்ஸத்³தா⁴னிஸம்ஸா’’.

‘‘பஸ்ஸத்³தி⁴ பன, ப⁴ந்தே, கிமத்தி²யா கிமானிஸம்ஸா’’? ‘‘பஸ்ஸத்³தி⁴ கோ², ஆனந்த³, ஸுக²த்தா² ஸுகா²னிஸம்ஸா’’.

‘‘ஸுக²ம் பன, ப⁴ந்தே, கிமத்தி²யம் கிமானிஸம்ஸம்’’? ‘‘ஸுக²ம் கோ², ஆனந்த³, ஸமாத⁴த்த²ம் ஸமாதா⁴னிஸம்ஸம்’’.

‘‘ஸமாதி⁴ பன, ப⁴ந்தே, கிமத்தி²யோ கிமானிஸம்ஸோ’’? ‘‘ஸமாதி⁴ கோ², ஆனந்த³, யதா²பூ⁴தஞாணத³ஸ்ஸனத்தோ² யதா²பூ⁴தஞாணத³ஸ்ஸனானிஸம்ஸோ’’.

‘‘யதா²பூ⁴தஞாணத³ஸ்ஸனம் பன, ப⁴ந்தே, கிமத்தி²யம் கிமானிஸம்ஸம்’’? ‘‘யதா²பூ⁴தஞாணத³ஸ்ஸனம் கோ², ஆனந்த³, நிப்³பி³த³த்த²ம் நிப்³பி³தா³னிஸம்ஸம்’’.

‘‘நிப்³பி³தா³, பன, ப⁴ந்தே, கிமத்தி²யா கிமானிஸம்ஸா’’? ‘‘நிப்³பி³தா³ கோ², ஆனந்த³, விராக³த்தா² விராகா³னிஸம்ஸா ’’.

‘‘விராகோ³ பன, ப⁴ந்தே, கிமத்தி²யோ கிமானிஸம்ஸோ’’? ‘‘விராகோ³ கோ², ஆனந்த³, விமுத்திஞாணத³ஸ்ஸனத்தோ² விமுத்திஞாணத³ஸ்ஸனானிஸம்ஸோ.

‘‘இதி கோ², ஆனந்த³, குஸலானி ஸீலானி அவிப்படிஸாரத்தா²னி அவிப்படிஸாரானிஸம்ஸானி, அவிப்படிஸாரோ பாமோஜ்ஜத்தோ² பாமோஜ்ஜானிஸம்ஸோ, பாமோஜ்ஜம் பீதத்த²ம் பீதானிஸம்ஸம், பீதி பஸ்ஸத்³த⁴த்தா² பஸ்ஸத்³தா⁴னிஸம்ஸா, பஸ்ஸத்³தி⁴ ஸுக²த்தா² ஸுகா²னிஸம்ஸா, ஸுக²ம் ஸமாத⁴த்த²ம் ஸமாதா⁴னிஸம்ஸம், ஸமாதி⁴ யதா²பூ⁴தஞாணத³ஸ்ஸனத்தோ² யதா²பூ⁴தஞாணத³ஸ்ஸனானிஸம்ஸோ, யதா²பூ⁴தஞாணத³ஸ்ஸனம் நிப்³பி³த³த்த²ம் நிப்³பி³தா³னிஸம்ஸம், நிப்³பி³தா³ விராக³த்தா² விராகா³னிஸம்ஸா, விராகோ³ விமுத்திஞாணத³ஸ்ஸனத்தோ² விமுத்திஞாணத³ஸ்ஸனானிஸம்ஸோ. இதி கோ², ஆனந்த³, குஸலானி ஸீலானி அனுபுப்³பே³ன அக்³கா³ய பரேந்தீ’’தி. பட²மம்.