12. அனாபத்திவக்³கோ³

150. ‘‘யே தே, பி⁴க்க²வே, பி⁴க்கூ² அனாபத்திம் ஆபத்தீதி தீ³பேந்தி தே, பி⁴க்க²வே, பி⁴க்கூ² ப³ஹுஜனஅஹிதாய படிபன்னா ப³ஹுஜனஅஸுகா²ய, ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். ப³ஹுஞ்ச தே, பி⁴க்க²வே, பி⁴க்கூ² அபுஞ்ஞம் பஸவந்தி, தே சிமம் ஸத்³த⁴ம்மம் அந்தரதா⁴பேந்தீ’’தி. பட²மம்.

151. ‘‘யே தே, பி⁴க்க²வே, பி⁴க்கூ² ஆபத்திம் அனாபத்தீதி தீ³பேந்தி தே, பி⁴க்க²வே, பி⁴க்கூ² ப³ஹுஜனஅஹிதாய படிபன்னா ப³ஹுஜனஅஸுகா²ய, ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். ப³ஹுஞ்ச தே, பி⁴க்க²வே, பி⁴க்கூ² அபுஞ்ஞம் பஸவந்தி, தே சிமம் ஸத்³த⁴ம்மம் அந்தரதா⁴பேந்தீ’’தி. து³தியம்.

152-159. ‘‘யே தே, பி⁴க்க²வே, பி⁴க்கூ² லஹுகம் ஆபத்திம் க³ருகா ஆபத்தீதி தீ³பேந்தி…பே… க³ருகம் ஆபத்திம் லஹுகா ஆபத்தீதி தீ³பேந்தி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தி…பே… அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தி…பே… ஸாவஸேஸம் ஆபத்திம் அனவஸேஸா ஆபத்தீதி தீ³பேந்தி…பே… அனவஸேஸம் ஆபத்திம் ஸாவஸேஸா ஆபத்தீதி தீ³பேந்தி…பே… ஸப்படிகம்மம் ஆபத்திம் அப்படிகம்மா ஆபத்தீதி தீ³பேந்தி…பே… அப்படிகம்மம் ஆபத்திம் ஸப்படிகம்மா ஆபத்தீதி தீ³பேந்தி தே, பி⁴க்க²வே, பி⁴க்கூ² ப³ஹுஜனஅஹிதாய படிபன்னா ப³ஹுஜனஅஸுகா²ய, ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். ப³ஹுஞ்ச தே, பி⁴க்க²வே, பி⁴க்கூ² அபுஞ்ஞம் பஸவந்தி, தே சிமம் ஸத்³த⁴ம்மம் அந்தரதா⁴பேந்தீ’’தி. த³ஸமம்.

160. ‘‘யே தே, பி⁴க்க²வே, பி⁴க்கூ² அனாபத்திம் அனாபத்தீதி தீ³பேந்தி தே, பி⁴க்க²வே, பி⁴க்கூ² ப³ஹுஜனஹிதாய படிபன்னா ப³ஹுஜனஸுகா²ய, ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானம். ப³ஹுஞ்ச தே, பி⁴க்க²வே, பி⁴க்கூ² புஞ்ஞம் பஸவந்தி, தே சிமம் ஸத்³த⁴ம்மம் ட²பேந்தீ’’தி. ஏகாத³ஸமம்.

161. ‘‘யே தே, பி⁴க்க²வே, பி⁴க்கூ² ஆபத்திம் ஆபத்தீதி தீ³பேந்தி தே, பி⁴க்க²வே, பி⁴க்கூ² ப³ஹுஜனஹிதாய படிபன்னா ப³ஹுஜனஸுகா²ய, ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானம். ப³ஹுஞ்ச தே, பி⁴க்க²வே, பி⁴க்கூ² புஞ்ஞம் பஸவந்தி, தே சிமம் ஸத்³த⁴ம்மம் ட²பேந்தீ’’தி. த்³வாத³ஸமம்.

162-169. ‘‘யே தே, பி⁴க்க²வே, பி⁴க்கூ² லஹுகம் ஆபத்திம் லஹுகா ஆபத்தீதி தீ³பேந்தி… க³ருகம் ஆபத்திம் க³ருகா ஆபத்தீதி தீ³பேந்தி… து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தி… அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தி… ஸாவஸேஸம் ஆபத்திம் ஸாவஸேஸா ஆபத்தீதி தீ³பேந்தி… அனவஸேஸம் ஆபத்திம் அனவஸேஸா ஆபத்தீதி தீ³பேந்தி… ஸப்படிகம்மம் ஆபத்திம் ஸப்படிகம்மா ஆபத்தீதி தீ³பேந்தி… அப்படிகம்மம் ஆபத்திம் அப்படிகம்மா ஆபத்தீதி தீ³பேந்தி தே, பி⁴க்க²வே, பி⁴க்கூ² ப³ஹுஜனஹிதாய படிபன்னா ப³ஹுஜனஸுகா²ய, ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானம். ப³ஹுஞ்ச தே, பி⁴க்க²வே, பி⁴க்கூ² புஞ்ஞம் பஸவந்தி, தே சிமம் ஸத்³த⁴ம்மம் ட²பேந்தீ’’தி. வீஸதிமம்.

அனாபத்திவக்³கோ³ த்³வாத³ஸமோ.