3. අධිකරණමූලාදි

343. චතුන්නං අධිකරණානං කති මූලානි, කති සමුට්ඨානා? චතුන්නං අධිකරණානං තෙත්තිංස මූලානි, තෙත්තිංස සමුට්ඨානා.

චතුන්නං අධිකරණානං කතමානි තෙත්තිංස මූලානි? විවාදාධිකරණස්ස ද්වාදස මූලානි, අනුවාදාධිකරණස්ස චුද්දස මූලානි, ආපත්තාධිකරණස්ස ඡ මූලානි, කිච්චාධිකරණස්ස එකං මූලං, සඞ්ඝො – චතුන්නං අධිකරණානං ඉමානි තෙත්තිංස මූලානි.

චතුන්නං අධිකරණානං කතමෙ තෙත්තිංස සමුට්ඨානා? විවාදාධිකරණස්ස අට්ඨාරසභෙදකරවත්ථූනි සමුට්ඨානා, අනුවාදාධිකරණස්ස චතස්සො විපත්තියො සමුට්ඨානා, ආපත්තාධිකරණස්ස සත්තාපත්තික්ඛන්ධා සමුට්ඨානා, කිච්චාධිකරණස්ස චත්තාරි කම්මානි සමුට්ඨානා – චතුන්නං අධිකරණානං ඉමෙ තෙත්තිංස සමුට්ඨානා.