9. නවකවාරො

329. නව ආඝාතවත්ථූනි. නව ආඝාතපටිවිනයා. නව විනීතවත්ථූනි. නව පඨමාපත්තිකා. නවහි සඞ්ඝො භිජ්ජති. නව පණීතභොජනානි. නවමංසෙහි දුක්කටං. නව පාතිමොක්ඛුද්දෙසා. නව පරමානි. නව තණ්හාමූලකා ධම්මා. නව විධමානා. නව චීවරානි අධිට්ඨාතබ්බානි. නව චීවරානි න විකප්පෙතබ්බානි. දීඝසො නව විදත්ථියො සුගතවිදත්ථියා. නව අධම්මිකානි දානානි. නව අධම්මිකා පටිග්ගහා. නව අධම්මිකා පරිභොගා – තීණි ධම්මිකානි දානානි, තයො ධම්මිකා පටිග්ගහා, තයො ධම්මිකා පරිභොගා. නව අධම්මිකා සඤ්ඤත්තියො [පඤ්ඤත්තියො (සබ්බත්ථ) අට්ඨකථා ච සමථක්ඛන්ධකෙ කණ්හපක්ඛනවකඤ්ච ඔලොකෙතබ්බං]. නව ධම්මිකා සඤ්ඤත්තියො. අධම්මකම්මෙ ද්වෙ නවකානි. ධම්මකම්මෙ ද්වෙ නවකානි. නව අධම්මිකානි පාතිමොක්ඛට්ඨපනානි. නව ධම්මිකානි පාතිමොක්ඛට්ඨපනානීති.

නවකං නිට්ඨිතං.

තස්සුද්දානං –

ආඝාතවත්ථුවිනයා, විනීතා පඨමෙන ච;

භිජ්ජති ච පණීතඤ්ච, මංසුද්දෙසපරමානි ච.

තණ්හා මානා අධිට්ඨානා, විකප්පෙ ච විදත්ථියො;

දානා පටිග්ගහා භොගා, තිවිධා පුන ධම්මිකා.

අධම්මධම්මසඤ්ඤත්ති, දුවෙ ද්වෙ නවකානි ච;

පාතිමොක්ඛට්ඨපනානි, අධම්මධම්මිකානි චාති.