5. නවසඞ්ගහවග්ගො

501. නවසඞ්ගහා – වත්ථුසඞ්ගහො, විපත්තිසඞ්ගහො ආපත්තිසඞ්ගහො, නිදානසඞ්ගහො, පුග්ගලසඞ්ගහො, ඛන්ධසඞ්ගහො, සමුට්ඨානසඞ්ගහො, අධිකරණසඞ්ගහො, සමථසඞ්ගහොති.

අධිකරණෙ සමුප්පන්නෙ සචෙ උභො අත්ථපච්චත්ථිකා ආගච්ඡන්ති උභින්නම්පි වත්ථු ආරොචාපෙතබ්බං. උභින්නම්පි වත්ථු ආරොචාපෙත්වා උභින්නම්පි පටිඤ්ඤා සොතබ්බා. උභින්නම්පි පටිඤ්ඤං සුත්වා උභොපි වත්තබ්බා – ‘‘අම්හාකං ඉමස්මිං අධිකරණෙ වූපසමිතෙ [වූපසමෙපි (ක.)] උභොපි තුට්ඨා භවිස්සථා’’ති. සචෙ ආහංසු – ‘‘උභොපි තුට්ඨා භවිස්සාමා’’ති, සඞ්ඝෙන තං අධිකරණං සම්පටිච්ඡිතබ්බං. සචෙ අලජ්ජුස්සන්නා හොති, පරිසා උබ්බාහිකාය වූපසමෙතබ්බං. සචෙ බාලුස්සන්නා හොති, පරිසා විනයධරො පරියෙසිතබ්බො යෙන ධම්මෙන යෙන විනයෙන යෙන සත්ථුසාසනෙන තං අධිකරණං වූපසම්මති. තථා තං අධිකරණං වූපසමෙතබ්බං.

වත්ථු ජානිතබ්බං, ගොත්තං ජානිතබ්බං, නාමං ජානිතබ්බං, ආපත්ති ජානිතබ්බා.

මෙථුනධම්මොති වත්ථු චෙව ගොත්තඤ්ච – පාරාජිකන්ති නාමඤ්චෙව ආපත්ති ච.

අදින්නාදානන්ති වත්ථු චෙව ගොත්තඤ්ච – පාරාජිකන්ති නාමඤ්චෙව ආපත්ති ච.

මනුස්සවිග්ගහොති වත්ථු චෙව ගොත්තඤ්ච – පාරාජිකන්ති නාමඤ්චෙව ආපත්ති ච.

උත්තරිමනුස්සධම්මොති වත්ථු චෙව ගොත්තඤ්ච – පාරාජිකන්ති නාමඤ්චෙව ආපත්ති ච.

සුක්කවිස්සට්ඨීති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

කායසංසග්ගොති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

දුට්ඨුල්ලවාචාති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

අත්තකාමන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

සඤ්චරිත්තන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

සඤ්ඤාචිකාය කුටිං කාරාපනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

මහල්ලකං විහාරං කාරාපනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

භික්ඛුං අමූලකෙන පාරාජිකෙන ධම්මෙන අනුද්ධංසනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

භික්ඛුං අඤ්ඤභාගියස්ස අධිකරණස්ස කිඤ්චි දෙසං ලෙසමත්තං උපාදාය පාරාජිකෙන ධම්මෙන අනුද්ධංසනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

සඞ්ඝභෙදකස්ස භික්ඛුනො යාවතතියං සමනුභාසනාය න පටිනිස්සජ්ජනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

භෙදකානුවත්තකානං භික්ඛූනං යාවතතියං සමනුභාසනාය න පටිනිස්සජ්ජනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

දුබ්බචස්ස භික්ඛුනො යාවතතියං සමනුභාසනාය න පටිනිස්සජ්ජනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච.

කුලදූසකස්ස භික්ඛුනො යාවතතියං සමනුභාසනාය න පටිනිස්සජ්ජනන්ති වත්ථු චෙව ගොත්තඤ්ච – සඞ්ඝාදිසෙසොති නාමඤ්චෙව ආපත්ති ච…පෙ….

අනාදරියං පටිච්ච උදකෙ උච්චාරං වා පස්සාවං වා ඛෙළං වා කරණන්ති වත්ථු චෙව ගොත්තඤ්ච – දුක්කටන්ති නාමඤ්චෙව ආපත්ති චාති.

නවසඞ්ගහවග්ගො නිට්ඨිතො පඤ්චමො.