1. පාරාජිකං
470. අත්ථාපත්ති අචිත්තකො ආපජ්ජති, සචිත්තකො වුට්ඨාති. අත්ථාපත්ති සචිත්තකො ආපජ්ජති, අචිත්තකො වුට්ඨාති. අත්ථාපත්ති අචිත්තකො ආපජ්ජති, අචිත්තකො වුට්ඨාති. අත්ථාපත්ති සචිත්තකො ආපජ්ජති, සචිත්තකො වුට්ඨාති. අත්ථාපත්ති කුසලචිත්තො ආපජ්ජති, කුසලචිත්තො වුට්ඨාති. අත්ථාපත්ති කුසලචිත්තො ආපජ්ජති, අකුසලචිත්තො වුට්ඨාති. අත්ථාපත්ති කුසලචිත්තො ආපජ්ජති, අබ්‍යාකතචිත්තො වුට්ඨාති. අත්ථාපත්ති අකුසලචිත්තො ආපජ්ජති, කුසලචිත්තො වුට්ඨාති. අත්ථාපත්ති අකුසලචිත්තො ආපජ්ජති, අකුසලචිත්තො වුට්ඨාති. අත්ථාපත්ති අකුසලචිත්තො ආපජ්ජති, අබ්‍යාකතචිත්තො වුට්ඨාති. අත්ථාපත්ති අබ්‍යාකතචිත්තො ආපජ්ජති, කුසලචිත්තො වුට්ඨාති. අත්ථාපත්ති අබ්‍යාකතචිත්තො ආපජ්ජති, අකුසලචිත්තො වුට්ඨාති. අත්ථාපත්ති අබ්‍යාකතචිත්තො ආපජ්ජති, අබ්‍යාකතචිත්තො වුට්ඨාති.
පඨමං පාරාජිකං කතිහි සමුට්ඨානෙහි සමුට්ඨාති? පඨමං පාරාජිකං එකෙන සමුට්ඨානෙන සමුට්ඨාති. කායතො ච චිත්තතො ච සමුට්ඨාති, න වාචතො.
දුතියං පාරාජිකං කතිහි සමුට්ඨානෙහි සමුට්ඨාති? දුතියං පාරාජිකං තීහි සමුට්ඨානෙහි සමුට්ඨාති – සියා කායතො ච චිත්තතො ච සමුට්ඨාති, න වාචතො; සියා වාචතො ච චිත්තතො ච සමුට්ඨාති, න කායතො; සියා කායතො ච වාචතො ච චිත්තතො ච සමුට්ඨාති.
තතියං පාරාජිකං කතිහි සමුට්ඨානෙහි සමුට්ඨාති? තතියං පාරාජිකං තීහි සමුට්ඨානෙහි සමුට්ඨාති – සියා කායතො ච චිත්තතො ච සමුට්ඨාති, න වාචතො; සියා වාචතො ච චිත්තතො ච සමුට්ඨාති, න කායතො; සියා කායතො ච වාචතො ච චිත්තතො ච සමුට්ඨාති.
චතුත්ථං පාරාජිකං කතිහි සමුට්ඨානෙහි සමුට්ඨාති? චතුත්ථං පාරාජිකං තීහි සමුට්ඨානෙහි සමුට්ඨාති – සියා කායතො ච චිත්තතො ච සමුට්ඨාති, න වාචතො; සියා වාචතො ච චිත්තතො ච සමුට්ඨාති, න කායතො; සියා කායතො ච වාචතො ච චිත්තතො ච සමුට්ඨාති.
චත්තාරො පාරාජිකා නිට්ඨිතා.