10. කයවික්කයසික්ඛාපදං
593. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා උපනන්දො සක්‍යපුත්තො පට්ටො හොති චීවරකම්මං කාතුං. සො පටපිලොතිකානං සඞ්ඝාටිං කරිත්වා සුරත්තං සුපරිකම්මකතං කත්වා පාරුපි. අථ ඛො අඤ්ඤතරො පරිබ්බාජකො මහග්ඝං පටං පාරුපිත්වා යෙනායස්මා උපනන්දො සක්‍යපුත්තො තෙනුපසඞ්කමි; උපසඞ්කමිත්වා ආයස්මන්තං උපනන්දං සක්‍යපුත්තං එතදවොච – ‘‘සුන්දරා ඛො ත්‍යායං, ආවුසො, සඞ්ඝාටි; දෙහි මෙ පටෙනා’’ති. ‘‘ජානාහි, ආවුසො’’ති. ‘‘ආමාවුසො, ජානාමී’’ති. ‘‘හන්දාවුසො’’ති, අදාසි. අථ ඛො සො පරිබ්බාජකො තං සඞ්ඝාටිං පාරුපිත්වා පරිබ්බාජකාරාමං අගමාසි. පරිබ්බාජකා තං පරිබ්බාජකං එතදවොචුං – ‘‘සුන්දරා ඛො ත්‍යායං, ආවුසො, සඞ්ඝාටි; කුතො තයා ලද්ධා’’ති? ‘‘තෙන මෙ, ආවුසො, පටෙන පරිවත්තිතා’’ති. ‘‘කතිහිපි ත්‍යායං, ආවුසො, සඞ්ඝාටි භවිස්සති, සොයෙව තෙ පටො වරො’’ති.
අථ ඛො සො පරිබ්බාජකො – ‘‘සච්චං ඛො පරිබ්බාජකා ආහංසු – ‘කතිහිපි ම්‍යායං සඞ්ඝාටි භවිස්සති! සොයෙව මෙ පටො වරො’’’ති යෙනායස්මා උපනන්දො සක්‍යපුත්තො තෙනුපසඞ්කමි; උපසඞ්කමිත්වා ආයස්මන්තං උපනන්දං සක්‍යපුත්තං එතදවොච – ‘‘හන්ද තෙ, ආවුසො, සඞ්ඝාටි [සඞ්ඝාටිං (ස්‍යා. ක.)]; දෙහි මෙ පට’’න්ති. ‘‘නනු ත්වං, ආවුසො, මයා වුත්තො – ‘ජානාහි, ආවුසො’ති! නාහ දස්සාමී’’ති. අථ ඛො සො පරිබ්බාජකො උජ්ඣායති ඛිය්‍යති විපාචෙති – ‘‘ගිහීපි නං ගිහිස්ස විප්පටිසාරිස්ස දෙන්ති, කිං පන පබ්බජිතො පබ්බජිතස්ස න දස්සතී’’ති! අස්සොසුං ඛො භික්ඛූ තස්ස පරිබ්බාජකස්ස උජ්ඣායන්තස්ස ඛිය්‍යන්තස්ස විපාචෙන්තස්ස. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ආයස්මා උපනන්දො සක්‍යපුත්තො පරිබ්බාජකෙන සද්ධිං කයවික්කයං සමාපජ්ජිස්සතී’’ති! අථ ඛො තෙ භික්ඛූ ආයස්මන්තං උපනන්දං සක්‍යපුත්තං අනෙකපරියායෙන විගරහිත්වා භගවතො එතමත්ථං ආරොචෙසුං…පෙ… ‘‘සච්චං කිර ත්වං, උපනන්ද, පරිබ්බාජකෙන සද්ධිං කයවික්කයං සමාපජ්ජසී’’ති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම ත්වං, මොඝපුරිස, පරිබ්බාජකෙන සද්ධිං කයවික්කයං සමාපජ්ජිස්සසි! නෙතං, මොඝපුරිස, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
594. ‘‘යො පන භික්ඛු නානප්පකාරකං කයවික්කයං සමාපජ්ජෙය්‍ය, නිස්සග්ගියං පාචිත්තිය’’න්ති.
595. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.
නානප්පකාරකං නාම චීවරපිණ්ඩපාතසෙනාසනගිලානප්පච්චයභෙසජ්ජපරික්ඛාරා, අන්තමසො චුණ්ණපිණ්ඩොපි දන්තකට්ඨම්පි දසිකසුත්තම්පි.
කයවික්කයං සමාපජ්ජෙය්‍යාති ඉමිනා ඉමං දෙහි, ඉමිනා ඉමං ආහර, ඉමිනා ඉමං පරිවත්තෙහි, ඉමිනා ඉමං චෙතාපෙහීති. අජ්ඣාචරති, ආපත්ති දුක්කටස්ස. යතො කයිතඤ්ච හොති වික්කයිතඤ්ච අත්තනො භණ්ඩං පරහත්ථගතං පරභණ්ඩං අත්තනො හත්ථගතං, නිස්සග්ගියං හොති. නිස්සජ්ජිතබ්බං සඞ්ඝස්ස වා ගණස්ස වා පුග්ගලස්ස වා. එවඤ්ච පන, භික්ඛවෙ, නිස්සජ්ජිතබ්බං…පෙ… අහං, භන්තෙ, නානප්පකාරකං කයවික්කයං සමාපජ්ජිං. ඉදං මෙ නිස්සග්ගියං. ඉමාහං සඞ්ඝස්ස නිස්සජ්ජාමීති…පෙ… දදෙය්‍යාති…පෙ… දදෙය්‍යුන්ති…පෙ… ආයස්මතො දම්මීති.
596. කයවික්කයෙ කයවික්කයසඤ්ඤී, නිස්සග්ගියං පාචිත්තියං. කයවික්කයෙ වෙමතිකො, නිස්සග්ගියං පාචිත්තියං. කයවික්කයෙ නකයවික්කයසඤ්ඤී, නිස්සග්ගියං පාචිත්තියං.
නකයවික්කයෙ කයවික්කයසඤ්ඤී, ආපත්ති දුක්කටස්ස. නකයවික්කයෙ වෙමතිකො, ආපත්ති දුක්කටස්ස. නකයවික්කයෙ නකයවික්කයසඤ්ඤී, අනාපත්ති.
597. අනාපත්ති – අග්ඝං පුච්ඡති, කප්පියකාරකස්ස ආචික්ඛති, ‘‘ඉදං අම්හාකං අත්ථි, අම්හාකඤ්ච ඉමිනා ච ඉමිනා ච අත්ථො’’ති භණති, උම්මත්තකස්ස, ආදිකම්මිකස්සාති.
කයවික්කයසික්ඛාපදං නිට්ඨිතං දසමං.
කොසියවග්ගො දුතියො.
තස්සුද්දානං –
කොසියා සුද්ධද්වෙභාගා, ඡබ්බස්සානි නිසීදනං;
ද්වෙ ච ලොමානි උග්ගණ්හෙ, උභො නානප්පකාරකාති.