6. එළකලොමසික්ඛාපදං
571. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන අඤ්ඤතරස්ස භික්ඛුනො කොසලෙසු ජනපදෙ සාවත්ථිං ගච්ඡන්තස්ස අන්තරාමග්ගෙ එළකලොමානි උප්පජ්ජිංසු. අථ ඛො සො භික්ඛු තානි එළකලොමානි උත්තරාසඞ්ගෙන භණ්ඩිකං බන්ධිත්වා අගමාසි. මනුස්සා තං භික්ඛුං පස්සිත්වා උප්පණ්ඩෙසුං – ‘‘කිත්තකෙන තෙ, භන්තෙ, කීතානි? කිත්තකො උදයො භවිස්සතී’’ති? සො භික්ඛු තෙහි මනුස්සෙහි උප්පණ්ඩියමානො මඞ්කු අහොසි. අථ ඛො සො භික්ඛු සාවත්ථිං ගන්ත්වා තානි එළකලොමානි ඨිතකොව ආසුම්භි. භික්ඛූ තං භික්ඛුං එතදවොචුං – ‘‘කිස්ස ත්වං, ආවුසො, ඉමානි එළකලොමානි ඨිතකොව ආසුම්භසී’’ති? ‘‘තථා හි පනාහං, ආවුසො, ඉමෙසං එළකලොමානං කාරණා මනුස්සෙහි උප්පණ්ඩිතො’’ති. ‘‘කීව දූරතො පන ත්වං, ආවුසො, ඉමානි එළකලොමානි ආහරී’’ති? ‘‘අතිරෙකතියොජනං, ආවුසො’’ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛු අතිරෙකතියොජනං එළකලොමානි ආහරිස්සතී’’ති! අථ ඛො තෙ භික්ඛූ තං භික්ඛුං අනෙකපරියායෙන විගරහිත්වා භගවතො එතමත්ථං ආරොචෙසුං…පෙ… සච්චං කිර ත්වං, භික්ඛු, අතිරෙකතියොජනං එළකලොමානි ආහරීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම ත්වං, මොඝපුරිස, අතිරෙකතියොජනං එළකලොමානි ආහරිස්සසි! නෙතං මොඝපුරිස, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
572. ‘‘භික්ඛුනො පනෙව අද්ධානමග්ගප්පටිපන්නස්ස එළකලොමානි උප්පජ්ජය්‍යුං. ආකඞ්ඛමානෙන භික්ඛුනා පටිග්ගහෙතබ්බානි. පටිග්ගහෙත්වා තියොජනපරමං සහත්ථා හරිතබ්බානි [හාරෙතබ්බානි (සී. ස්‍යා. ක.)], අසන්තෙ හාරකෙ. තතො චෙ උත්තරි හරෙය්‍ය, අසන්තෙපි හාරකෙ, නිස්සග්ගියං පාචිත්තිය’’න්ති.
573. භික්ඛුනො පනෙව අද්ධානමග්ගප්පටිපන්නස්සාති පන්ථං ගච්ඡන්තස්ස.
එළකලොමානි උප්පජ්ජෙය්‍යුන්ති උප්පජ්ජෙය්‍යුං සඞ්ඝතො වා ගණතො වා ඤාතිතො වා මිත්තතො වා පංසුකූලං වා අත්තනො වා ධනෙන.
ආකඞ්ඛමානෙනාති ඉච්ඡමානෙන පටිග්ගහෙතබ්බානි.
පටිග්ගහෙත්වා තියොජනපරමං සහත්ථා හරිතබ්බානීති තියොජනපරමතා සහත්ථා හරිතබ්බානි.
අසන්තෙ හාරකෙති නාඤ්ඤො කොචි හාරකො හොති ඉත්ථී වා පුරිසො වා ගහට්ඨො වා පබ්බජිතො වා.
තතො චෙ උත්තරි හරෙය්‍ය, අසන්තෙපි හාරකෙති පඨමං පාදං තියොජනං අතික්කාමෙති, ආපත්ති දුක්කටස්ස. දුතියං පාදං අතික්කාමෙති, නිස්සග්ගියං පාචිත්තියං [නිස්සග්ගියානි හොන්ති (ස්‍යා.)]. අන්තොතියොජනෙ ඨිතො බහිතියොජනං පාතෙති, නිස්සග්ගියං පාචිත්තියං [නිස්සග්ගියානි හොන්ති (ස්‍යා.)]. අඤ්ඤස්ස යානෙ වා භණ්ඩෙ වා අජානන්තස්ස පක්ඛිපිත්වා තියොජනං අතික්කාමෙති, නිස්සග්ගියානි හොන්ති. නිස්සජ්ජිතබ්බානි සඞ්ඝස්ස වා ගණස්ස වා පුග්ගලස්ස වා. එවඤ්ච පන, භික්ඛවෙ, නිස්සජ්ජිතබ්බානි…පෙ… ඉමානි මෙ, භන්තෙ, එළකලොමානි තියොජනං අතික්කාමිතානි නිස්සග්ගියානි. ඉමානාහං සඞ්ඝස්ස නිස්සජ්ජාමීති…පෙ… දදෙය්‍යාති…පෙ… දදෙය්‍යුන්ති…පෙ… ආයස්මතො දම්මීති.
574. අතිරෙකතියොජනෙ අතිරෙකසඤ්ඤී අතික්කාමෙති [තියොජනං අතික්කාමෙති (ස්‍යා.)], නිස්සග්ගියං පාචිත්තියං. අතිරෙකතියොජනෙ වෙමතිකො අතික්කාමෙති [තියොජනං අතික්කාමෙති (ස්‍යා.)], නිස්සග්ගියං පාචිත්තියං. අතිරෙකතියොජනෙ ඌනකසඤ්ඤී අතික්කාමෙති [තියොජනං අතික්කාමෙති (ස්‍යා.)], නිස්සග්ගියං පාචිත්තියං.
ඌනකතියොජනෙ අතිරෙකසඤ්ඤී, ආපත්ති දුක්කටස්ස. ඌනකතියොජනෙ වෙමතිකො, ආපත්ති දුක්කටස්ස. ඌනකතියොජනෙ ඌනකසඤ්ඤී, අනාපත්ති.
575. අනාපත්ති තියොජනං හරති, ඌනකතියොජනං හරති, තියොජනං හරතිපි, පච්චාහරතිපි, තියොජනං වාසාධිප්පායො ගන්ත්වා තතො පරං හරති, අච්ඡින්නං පටිලභිත්වා හරති, නිස්සට්ඨං පටිලභිත්වා හරති, අඤ්ඤං හරාපෙති කතභණ්ඩං, උම්මත්තකස්ස, ආදිකම්මිකස්සාති.
එළකලොමසික්ඛාපදං නිට්ඨිතං ඡට්ඨං.