9. දුතියදුට්ඨදොසසික්ඛාපදං

391. තෙන සමයෙන බුද්ධො භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන මෙත්තියභූමජකා භික්ඛූ ගිජ්ඣකූටා පබ්බතා ඔරොහන්තා අද්දසංසු ඡගලකං [ඡකලකං (ස්‍යා.)] අජිකාය විප්පටිපජ්ජන්තං. දිස්වාන එවමාහංසු – ‘‘හන්ද මයං, ආවුසො, ඉමං ඡගලකං දබ්බං මල්ලපුත්තං නාම කරොම. ඉමං අජිකං මෙත්තියං නාම භික්ඛුනිං කරොම. එවං මයං වොහරිස්සාම. පුබ්බෙ මයං, ආවුසො, දබ්බං මල්ලපුත්තං සුතෙන අවොචුම්හා. ඉදානි පන අම්හෙහි සාමං දිට්ඨො මෙත්තියාය භික්ඛුනියා විප්පටිපජ්ජන්තො’’ති. තෙ තං ඡගලකං දබ්බං මල්ලපුත්තං නාම අකංසු. තං අජිකං මෙත්තියං නාම භික්ඛුනිං අකංසු. තෙ භික්ඛූනං ආරොචෙසුං – ‘‘පුබ්බෙ මයං, ආවුසො, දබ්බං මල්ලපුත්තං සුතෙන අවොචුම්හා. ඉදානි පන අම්හෙහි සාමං දිට්ඨො මෙත්තියාය භික්ඛුනියා විප්පටිපජ්ජන්තො’’ති. භික්ඛූ එවමාහංසු – ‘‘මාවුසො, එවං අවචුත්ථ. නායස්මා දබ්බො මල්ලපුත්තො එවං කරිස්සතී’’ති.

අථ ඛො තෙ භික්ඛූ භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා ආයස්මන්තං දබ්බං මල්ලපුත්තං පටිපුච්ඡි – ‘‘සරසි ත්වං, දබ්බ, එවරූපං කත්තා යථයිමෙ භික්ඛූ ආහංසූ’’ති? ‘‘යථා මං, භන්තෙ, භගවා ජානාතී’’ති. දුතියම්පි ඛො භගවා…පෙ… තතියම්පි ඛො භගවා ආයස්මන්තං දබ්බං මල්ලපුත්තං එතදවොච – ‘‘සරසි ත්වං, දබ්බ, එවරූපං කත්තා යථයිමෙ භික්ඛූ ආහංසූ’’ති? ‘‘යථා මං, භන්තෙ, භගවා ජානාතී’’ති. ‘‘න ඛො, දබ්බ, දබ්බා එවං නිබ්බෙඨෙන්ති. සචෙ තයා කතං කතන්ති වදෙහි, සචෙ තයා අකතං අකතන්ති වදෙහී’’ති. ‘‘යතො අහං, භන්තෙ, ජාතො නාභිජානාමි සුපිනන්තෙනපි මෙථුනධම්මං පටිසෙවිතා, පගෙව ජාගරො’’ති! අථ ඛො භගවා භික්ඛූ ආමන්තෙසි – ‘‘තෙන හි, භික්ඛුවෙ, ඉමෙ භික්ඛූ අනුයුඤ්ජථා’’ති. ඉදං වත්වා භගවා උට්ඨායාසනා විහාරං පාවිසි.

අථ ඛො තෙ භික්ඛූ මෙත්තියභූමජකෙ භික්ඛූ අනුයුඤ්ජිංසු. තෙ භික්ඛූහි අනුයුඤ්ජීයමානා භික්ඛූනං එතමත්ථං ආරොචෙසුං – ‘‘කිං පන තුම්හෙ, ආවුසො, ආයස්මන්තං දබ්බං මල්ලපුත්තං අඤ්ඤභාගියස්ස අධිකරණස්ස කිඤ්චිදෙසං ලෙසමත්තං උපාදාය පාරාජිකෙන ධම්මෙන අනුද්ධංසෙථා’’ති? ‘‘එවමාවුසො’’ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම මෙත්තියභූමජකා භික්ඛූ ආයස්මන්තං දබ්බං මල්ලපුත්තං අඤ්ඤභාගියස්ස අධිකරණස්ස කිඤ්චි දෙසං ලෙසමත්තං උපාදාය පාරාජිකෙන ධම්මෙන අනුද්ධංසෙස්සන්තී’’ති! අථ ඛො තෙ භික්ඛූ මෙත්තියභූමජකෙ භික්ඛූ අනෙකපරියායෙන විගරහිත්වා භගවතො එතමත්ථං ආරොචෙසුං…පෙ… ‘‘සච්චං කිර තුම්හෙ, භික්ඛවෙ, දබ්බං මල්ලපුත්තං අඤ්ඤභාගියස්ස අධිකරණස්ස කිඤ්චි දෙසං ලෙසමත්තං උපාදාය පාරාජිකෙන ධම්මෙන අනුද්ධංසෙථා’’ති? ‘‘සච්චං, භගවා’’ති. විගරහි බුද්ධො භගවා…පෙ… ‘‘කථඤ්හි නාම තුම්හෙ, මොඝපුරිසා, දබ්බං මල්ලපුත්තං අඤ්ඤභාගියස්ස අධිකරණස්ස කිඤ්චි දෙසං ලෙසමත්තං උපාදාය පාරාජිකෙන ධම්මෙන අනුද්ධංසෙස්සථ! නෙතං, මොඝපුරිසා, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –

392. ‘‘යො පන භික්ඛු භික්ඛුං දුට්ඨො දොසො අප්පතීතො අඤ්ඤභාගියස්ස අධිකරණස්ස කිඤ්චිදෙසං ලෙසමත්තං උපාදාය පාරාජිකෙන ධම්මෙන අනුද්ධංසෙය්‍ය – ‘අප්පෙව නාම නං ඉමම්හා බ්‍රහ්මචරියා චාවෙය්‍ය’න්ති. තතො අපරෙන සමයෙන සමනුග්ගාහීයමානො වා අසමනුග්ගාහීයමානො වා අඤ්ඤභාගියඤ්චෙව තං අධිකරණං හොති කොචිදෙසො ලෙසමත්තො උපාදින්නො, භික්ඛු ච දොසං පතිට්ඨාති, සඞ්ඝාදිසෙසො’’ති.

393. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.

භික්ඛුන්ති අඤ්ඤං භික්ඛුං.

දුට්ඨො දොසොති කුපිතො අනත්තමනො අනභිරද්ධො ආහතචිත්තො ඛිලජාතො.

අප්පතීතොති තෙන ච කොපෙන, තෙන ච දොසෙන, තාය ච අනත්තමනතාය, තාය ච අනභිරද්ධියා අප්පතීතො හොති.

අඤ්ඤභාගියස්ස අධිකරණස්සාති ආපත්තඤ්ඤභාගියං වා හොති අධිකරණඤ්ඤභාගියං වා. කථං අධිකරණං අධිකරණස්ස අඤ්ඤභාගියං? විවාදාධිකරණං අනුවාදාධිකරණස්ස ආපත්තාධිකරණස්ස කිච්චාධිකරණස්ස අඤ්ඤභාගියං. අනුවාදාධිකරණං ආපත්තාධිකරණස්ස කිච්චාධිකරණස්ස විවාදාධිකරණස්ස අඤ්ඤභාගියං. ආපත්තාධිකරණං කිච්චාධිකරණස්ස විවාදාධිකරණස්ස අනුවාදාධිකරණස්ස අඤ්ඤභාගියං. කිච්චාධිකරණං විවාදාධිකරණස්ස අනුවාදාධිකරණස්ස ආපත්තාධිකරණස්ස අඤ්ඤභාගියං. එවං අධිකරණං අධිකරණස්ස අඤ්ඤභාගියං.

කථං අධිකරණං අධිකරණස්ස තබ්භාගියං? විවාදාධිකරණං විවාදාධිකරණස්ස තබ්භාගියං. අනුවාදාධිකරණං අනුවාදාධිකරණස්ස තබ්භාගියං. ආපත්තාධිකරණං ආපත්තාධිකරණස්ස සියා තබ්භාගියං සියා අඤ්ඤභාගියං.

කථං ආපත්තාධිකරණං ආපත්තාධිකරණස්ස අඤ්ඤභාගියං? මෙථුනධම්මපාරාජිකාපත්ති අදින්නාදානපාරාජිකාපත්තියා මනුස්සවිග්ගහපාරාජිකාපත්තියා උත්තරිමනුස්සධම්මපාරාජිකාපත්තියා අඤ්ඤභාගියා. අදින්නාදානපාරාජිකාපත්ති මනුස්සවිග්ගහපාරාජිකාපත්තියා උත්තරිමනුස්සධම්මපාරාජිකාපත්තියා මෙථුනධම්මපාරාජිකාපත්තියා අඤ්ඤභාගියා. මනුස්සවිග්ගහපාරාජිකාපත්ති උත්තරිමනුස්සධම්මපාරාජිකාපත්තියා මෙථුනධම්මපාරාජිකාපත්තියා අදින්නාදානපාරාජිකාපත්තියා අඤ්ඤභාගියා. උත්තරිමනුස්සධම්මපාරාජිකාපත්ති මෙථුනධම්මපාරාජිකාපත්තියා අදින්නාදානපාරාජිකාපත්තියා මනුස්සවිග්ගහපාරාජිකාපත්තියා අඤ්ඤභාගියා. එවං ආපත්තාධිකරණං ආපත්තාධිකරණස්ස අඤ්ඤභාගියං.

කථං ආපත්තාධිකරණං ආපත්තාධිකරණස්ස තබ්භාගියං? මෙථුනධම්මපාරාජිකාපත්ති මෙථුනධම්මපාරාජිකාපත්තියා තබ්භාගියා. අදින්නාදානපාරාජිකාපත්ති අදින්නාදානපාරාජිකාපත්තියා තබ්භාගියා. මනුස්සවිග්ගහපාරාජිකාපත්ති මනුස්සවිග්ගහපාරාජිකාපත්තියා තබ්භාගියා. උත්තරිමනුස්සධම්මපාරාජිකාපත්ති උත්තරිමනුස්සධම්මපාරාජිකාපත්තියා තබ්භාගියා. එවං ආපත්තාධිකරණං ආපත්තාධිකරණස්ස තබ්භාගියං.

කිච්චාධිකරණං කිච්චාධිකරණස්ස තබ්භාගියං. එවං අධිකරණං අධිකරණස්ස තබ්භාගියං.

394. කිඤ්චි දෙසං ලෙසමත්තං උපාදායාති ලෙසො නාම දස ලෙසා – ජාතිලෙසො, නාමලෙසො, ගොත්තලෙසො, ලිඞ්ගලෙසො, ආපත්තිලෙසො, පත්තලෙසො, චීවරලෙසො, උපජ්ඣායලෙසො, ආචරියලෙසො, සෙනාසනලෙසො.

395. ජාතිලෙසො නාම ඛත්තියො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං ඛත්තියං පස්සිත්වා චොදෙති – ‘‘ඛත්තියො මයා දිට්ඨො [එත්ථ ‘‘පාරාජිකං ධම්මං අජ්ඣාපජ්ජන්තො’’ති පාඨො ඌනො මඤ්ඤෙ, අට්ඨකථායං හි ‘‘ඛත්තියො මයා දිට්ඨො පාරාජිකං ධම්මං අජ්ඣාපජ්ජන්තො’’ති දිස්සති]. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි, නත්ථි තයා සද්ධිං උපොසථො වා පවාරණා වා සඞ්ඝකම්මං වා’’ති, ආපත්ති වාචාය, වාචාය සඞ්ඝාදිසෙසස්ස.

බ්‍රාහ්මණො දිට්ඨො හොති…පෙ… වෙස්සො දිට්ඨො හොති…පෙ… සුද්දො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං සුද්දං පස්සිත්වා චොදෙති – ‘‘සුද්දො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

396. නාමලෙසො නාම බුද්ධරක්ඛිතො දිට්ඨො හොති…පෙ… ධම්මරක්ඛිතො දිට්ඨො හොති…පෙ… සඞ්ඝරක්ඛිතො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං සඞ්ඝරක්ඛිතං පස්සිත්වා චොදෙති – ‘‘සඞ්ඝරක්ඛිතො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

397. ගොත්තලෙසො නාම ගොතමො දිට්ඨො හොති…පෙ… මොග්ගල්ලානො දිට්ඨො හොති…පෙ… කච්චායනො දිට්ඨො හොති…පෙ… වාසිට්ඨො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං වාසිට්ඨං පස්සිත්වා චොදෙති – ‘‘වාසිට්ඨො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

398. ලිඞ්ගලෙසො නාම දීඝො දිට්ඨො හොති…පෙ… රස්සො දිට්ඨො හොති…පෙ… කණ්හො දිට්ඨො හොති…පෙ… ඔදාතො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං ඔදාතං පස්සිත්වා චොදෙති – ‘‘ඔදාතො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

399. ආපත්තිලෙසො නාම ලහුකං ආපත්තිං ආපජ්ජන්තො දිට්ඨො හොති. තඤ්චෙ පාරාජිකෙන චොදෙති – ‘‘අස්සමණොසි, අසක්‍යපුත්තියොසි…පෙ… ආපත්ති වාචාය, වාචාය සඞ්ඝාදිසෙසස්ස.

400. පත්තලෙසො නාම ලොහපත්තධරො දිට්ඨො හොති…පෙ… සාටකපත්තධරො දිට්ඨො හොති…පෙ… සුම්භකපත්තධරො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං සුම්භකපත්තධරං පස්සිත්වා චොදෙති – ‘‘සුම්භකපත්තධරො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

401. චීවරලෙසො නාම පංසුකූලිකො දිට්ඨො හොති…පෙ… ගහපතිචීවරධරො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං ගහපතිචීවරධරං පස්සිත්වා චොදෙති – ‘‘ගහපතිචීවරධරො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

402. උපජ්ඣායලෙසො නාම ඉත්ථන්නාමස්ස සද්ධිවිහාරිකො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං ඉත්ථන්නාමස්ස සද්ධිවිහාරිකං පස්සිත්වා චොදෙති – ‘‘ඉත්ථන්නාමස්ස සද්ධිවිහාරිකො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

403. ආචරියලෙසො නාම ඉත්ථන්නාමස්ස අන්තෙවාසිකො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං ඉත්ථන්නාමස්ස අන්තෙවාසිකං පස්සිත්වා චොදෙති – ‘‘ඉත්ථන්නාමස්ස අන්තෙවාසිකො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි’’…පෙ… ආපත්ති වාචාය, වාචාය සඞ්ඝාදිසෙසස්ස.

404. සෙනාසනලෙසො නාම ඉත්ථන්නාමසෙනාසනවාසිකො දිට්ඨො හොති පාරාජිකං ධම්මං අජ්ඣාපජ්ජන්තො. අඤ්ඤං ඉත්ථන්නාමසෙනාසනවාසිකං පස්සිත්වා චොදෙති – ‘‘ඉත්ථන්නාමසෙනාසනවාසිකො මයා දිට්ඨො. පාරාජිකං ධම්මං අජ්ඣාපන්නොසි, අස්සමණොසි, අසක්‍යපුත්තියොසි, නත්ථි තයා සද්ධිං උපොසථො වා පවාරණා වා සඞ්ඝකම්මං වා’’ති, ආපත්ති වාචාය, වාචාය සඞ්ඝාදිසෙසස්ස.

405. පාරාජිකෙන ධම්මෙනාති චතුන්නං අඤ්ඤතරෙන.

අනුද්ධංසෙය්‍යාති චොදෙති වා චොදාපෙති වා.

අප්පෙව නාම නං ඉමම්හා බ්‍රහ්මචරියාචාවෙය්‍යන්ති භික්ඛුභාවා චාවෙය්‍යං, සමණධම්මා චාවෙය්‍යං, සීලක්ඛන්ධා චාවෙය්‍යං, තපොගුණා චාවෙය්‍යං.

තතො අපරෙන සමයෙනාති යස්මිං ඛණෙ අනුද්ධංසිතො හොති, තං ඛණං තං ලයං තං මුහුත්තං වීතිවත්තෙ.

සමනුග්ගාහීයමානොති යෙන වත්ථුනා අනුද්ධංසිතො හොති තස්මිං වත්ථුස්මිං සමනුග්ගාහීයමානො.

අසමනුග්ගාහීයමානොති න කෙනචි වුච්චමානො.

අධිකරණං නාම චත්තාරි අධිකරණානි – විවාදාධිකරණං, අනුවාදාධිකරණං, ආපත්තාධිකරණං, කිච්චාධිකරණං.

කොචි දෙසො ලෙසමත්තො උපාදින්නොති තෙසං දසන්නං ලෙසානං අඤ්ඤතරො ලෙසො උපාදින්නො හොති.

භික්ඛු ච දොසං පතිට්ඨාතීති තුච්ඡකං මයා භණිතං, මුසා මයා භණිතං, අභූතං මයා භණිතං, අජානන්තෙන මයා භණිතං.

සඞ්ඝාදිසෙසොති …පෙ… තෙනපි වුච්චති සඞ්ඝාදිසෙසොති.

406. භික්ඛු සඞ්ඝාදිසෙසං අජ්ඣාපජ්ජන්තො දිට්ඨො හොති, සඞ්ඝාදිසෙසෙ සඞ්ඝාදිසෙසදිට්ඨි හොති. තඤ්චෙ පාරාජිකෙන චොදෙති – ‘‘අස්සමණොසි, අසක්‍යපුත්තියොසි, නත්ථි තයා සද්ධිං උපොසථො වා පවාරණා වා සඞ්ඝකම්මං වා’’ති, එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

භික්ඛු සඞ්ඝාදිසෙසං අජ්ඣාපජ්ජන්තො දිට්ඨො හොති, සඞ්ඝාදිසෙසෙ ථුල්ලච්චයදිට්ඨි හොති…පෙ… පාචිත්තියදිට්ඨි හොති… පාටිදෙසනීයදිට්ඨි හොති… දුක්කටදිට්ඨි හොති… දුබ්භාසිතදිට්ඨි හොති. තඤ්චෙ පාරාජිකෙන චොදෙති – ‘‘අස්සමණොසි’’…පෙ… එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

භික්ඛු ථුල්ලච්චයං අජ්ඣාපජ්ජන්තො දිට්ඨො හොති ථුල්ලච්චයෙ ථුල්ලච්චයදිට්ඨි හොති…පෙ… ථුල්ලච්චයෙ පාචිත්තියදිට්ඨි හොති… පාටිදෙසනීයදිට්ඨි හොති… දුක්කටදිට්ඨි හොති… දුබ්භාසිතදිට්ඨි හොති… සඞ්ඝාදිසෙසදිට්ඨි හොති. තඤ්චෙ පාරාජිකෙන චොදෙති – ‘‘අස්සමණොසි’’ …පෙ… එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

භික්ඛු පාචිත්තියං…පෙ… පාටිදෙසනීයං… දුක්කටං… දුබ්භාසිතං අජ්ඣාපජ්ජන්තො දිට්ඨො හොති, දුබ්භාසිතෙ දුබ්භාසිතදිට්ඨි හොති…පෙ… දුබ්භාසිතෙ සඞ්ඝාදිසෙසදිට්ඨි හොති… ථුල්ලච්චයදිට්ඨි හොති… පාචිත්තියදිට්ඨි හොති… පාටිදෙසනීයදිට්ඨි හොති… දුක්කටදිට්ඨි හොති. තඤ්චෙ පාරාජිකෙන චොදෙති – ‘‘අස්සමණොසි, අසක්‍යපුත්තියොසි, නත්ථි තයා සද්ධිං උපොසථො වා පවාරණා වා සඞ්ඝකම්මං වා’’ති, එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

එකෙකං මූලං කාතුන චක්කං බන්ධිතබ්බං.

407. භික්ඛු සඞ්ඝාදිසෙසං අජ්ඣාපජ්ජන්තො දිට්ඨො හොති සඞ්ඝාදිසෙසෙ සඞ්ඝාදිසෙසදිට්ඨි හොති. තඤ්චෙ පාරාජිකෙන චොදාපෙති – ‘‘අස්සමණොසි’’…පෙ… එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

භික්ඛු සඞ්ඝාදිසෙසං අජ්ඣාපජ්ජන්තො දිට්ඨො හොති, සඞ්ඝාදිසෙසෙ ථුල්ලච්චයදිට්ඨි හොති…පෙ… පාචිත්තියදිට්ඨි හොති… පාටිදෙසනීයදිට්ඨි හොති… දුක්කටදිට්ඨි හොති… දුබ්භාසිතදිට්ඨි හොති. තඤ්චෙ පාරාජිකෙන චොදාපෙති – ‘‘අස්සමණොසි’’…පෙ… එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

භික්ඛු ථුල්ලච්චයං අජ්ඣාපජ්ජන්තො දිට්ඨො හොති ථුල්ලච්චයෙ ථුල්ලච්චයදිට්ඨි හොති…පෙ… ථුල්ලච්චයෙ පාචිත්තියදිට්ඨි හොති… පාටිදෙසනීයදිට්ඨි හොති… දුක්කටදිට්ඨි හොති… දුබ්භාසිතදිට්ඨි හොති… සඞ්ඝාදිසෙසදිට්ඨි හොති. තඤ්චෙ පාරාජිකෙන චොදාපෙති – ‘‘අස්සමණොසි’’…පෙ… එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

භික්ඛු පාචිත්තියං…පෙ… පාටිදෙසනීයං… දුක්කටං… දුබ්භාසිතං අජ්ඣාපජ්ජන්තො දිට්ඨො හොති දුබ්භාසිතෙ දුබ්භාසිතදිට්ඨි හොති…පෙ… දුබ්භාසිතෙ සඞ්ඝාදිසෙසදිට්ඨි හොති… ථුල්ලච්චයදිට්ඨි හොති… පාචිත්තියදිට්ඨි හොති… පාටිදෙසනීයදිට්ඨි හොති… දුක්කටදිට්ඨි හොති. තඤ්චෙ පාරාජිකෙන චොදාපෙති – ‘‘අස්සමණොසි, අසක්‍යපුත්තියොසි, නත්ථි තයා සද්ධිං උපොසථො වා පවාරණා වා සඞ්ඝකම්මං වා’’ති, එවම්පි ආපත්තඤ්ඤභාගියං හොති ලෙසො ච උපාදින්නො, ආපත්ති වාචාය, වාචාය සඞ්ඝාදිසෙසස්ස.

408. අනාපත්ති තථාසඤ්ඤී චොදෙති වා චොදාපෙති වා, උම්මත්තකස්ස, ආදිකම්මිකස්සාති.

දුතියදුට්ඨදොසසික්ඛාපදං නිට්ඨිතං නවමං.