7. විහාරකාරසික්ඛාපදං
365. තෙන සමයෙන බුද්ධො භගවා කොසම්බියං විහරති ඝොසිතාරාමෙ. තෙන ඛො පන සමයෙන ආයස්මතො ඡන්නස්ස උපට්ඨාකො ගහපති ආයස්මන්තං ඡන්නං එතදවොච – ‘‘විහාරවත්ථුං, භන්තෙ, ජානාහි අය්‍යස්ස විහාරං කාරාපෙස්සාමී’’ති. අථ ඛො ආයස්මා ඡන්නො විහාරවත්ථුං සොධෙන්තො අඤ්ඤතරං චෙතියරුක්ඛං ඡෙදාපෙසි ගාමපූජිතං නිගමපූජිතං නගරපූජිතං ජනපදපූජිතං රට්ඨපූජිතං. මනුස්සා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම සමණා සක්‍යපුත්තියා චෙතියරුක්ඛං ඡෙදාපෙස්සන්ති ගාමපූජිතං නිගමපූජිතං නගරපූජිතං ජනපදපූජිතං රට්ඨපූජිතං! එකින්ද්‍රියං සමණා සක්‍යපුත්තියා ජීවං විහෙඨෙන්තී’’ [විහෙඨෙස්සන්ති (කත්ථචි)] ති. අස්සොසුං ඛො භික්ඛූ තෙසං මනුස්සානං උජ්ඣායන්තානං ඛිය්‍යන්තානං විපාචෙන්තානං. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ආයස්මා ඡන්නො චෙතියරුක්ඛං ඡෙදාපෙස්සති ගාමපූජිතං…පෙ… රට්ඨපූජිත’’න්ති! අථ ඛො තෙ භික්ඛූ ආයස්මන්තං ඡන්නං අනෙකපරියායෙන විගරහිත්වා භගවතො එතමත්ථං ආරොචෙසුං…පෙ… ‘‘සච්චං කිර ත්වං, ඡන්න, චෙතියරුක්ඛං ඡෙදාපෙසි ගාමපූජිතං…පෙ… රට්ඨපූජිත’’න්ති? ‘‘සච්චං, භගවා’’ති. විගරහි බුද්ධො භගවා…පෙ… ‘‘කථඤ්හි නාම ත්වං, මොඝපුරිස, චෙතියරුක්ඛං ඡෙදාපෙස්සසි ගාමපූජිතං නිගමපූජිතං නගරපූජිතං ජනපදපූජිතං රට්ඨපූජිතං! ජීවසඤ්ඤිනො හි, මොඝපුරිස, මනුස්සා රුක්ඛස්මිං. නෙතං, මොඝපුරිස, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
366. ‘‘මහල්ලකං පන භික්ඛුනා විහාරං කාරයමානෙන සස්සාමිකං අත්තුද්දෙසං භික්ඛූ අභිනෙතබ්බා වත්ථුදෙසනාය. තෙහි භික්ඛූහි වත්ථු දෙසෙතබ්බං අනාරම්භං සපරික්කමනං. සාරම්භෙ චෙ භික්ඛු වත්ථුස්මිං අපරික්කමනෙ මහල්ලකං විහාරං කාරෙය්‍ය භික්ඛූ වා අනභිනෙය්‍ය වත්ථුදෙසනාය, සඞ්ඝාදිසෙසො’’ති.
367. මහල්ලකො නාම විහාරො සස්සාමිකො වුච්චති.
විහාරො නාම උල්ලිත්තො වා හොති අවලිත්තො වා උල්ලිත්තාවලිත්තො වා.
කාරයමානෙනාති කරොන්තො වා කාරාපෙන්තො වා.
සස්සාමිකන්ති අඤ්ඤො කොචි සාමිකො හොති ඉත්ථී වා පුරිසො වා ගහට්ඨො වා පබ්බජිතො වා.
අත්තුද්දෙසන්ති අත්තනො අත්ථාය.
භික්ඛූ අභිනෙතබ්බා වත්ථුදෙසනායාති තෙන විහාරකාරකෙන භික්ඛුනා විහාරවත්ථුං සොධෙත්වා සඞ්ඝං උපසඞ්කමිත්වා එකංසං උත්තරාසඞ්ගං කරිත්වා වුඩ්ඪානං භික්ඛූනං පාදෙ වන්දිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො – ‘‘අහං, භන්තෙ, මහල්ලකං විහාරං කත්තුකාමො සස්සාමිකං අත්තුද්දෙසං. සොහං, භන්තෙ, සඞ්ඝං විහාරවත්ථුඔලොකනං යාචාමී’’ති. දුතියම්පි යාචිතබ්බා. තතියම්පි යාචිතබ්බා. සචෙ සබ්බො සඞ්ඝො උස්සහති විහාරවත්ථුං ඔලොකෙතුං සබ්බෙන සඞ්ඝෙන ඔලොකෙතබ්බං. නො චෙ සබ්බො සඞ්ඝො උස්සහති විහාරවත්ථුං ඔලොකෙතුං, යෙ තත්ථ හොන්ති භික්ඛූ බ්‍යත්තා පටිබලා සාරම්භං අනාරම්භං සපරික්කමනං අපරික්කමනං ජානිතුං තෙ යාචිත්වා සම්මන්නිතබ්බා. එවඤ්ච පන, භික්ඛවෙ, සම්මන්නිතබ්බා. බ්‍යත්තෙන භික්ඛුනා පටිබලෙන සඞ්ඝො ඤාපෙතබ්බො –
368. ‘‘සුණාතු මෙ, භන්තෙ, සඞ්ඝො. අයං ඉත්ථන්නාමො භික්ඛු මහල්ලකං විහාරං කත්තුකාමො සස්සාමිකං අත්තුද්දෙසං. සො සඞ්ඝං විහාරවත්ථුඔලොකනං යාචති. යදි සඞ්ඝස්ස පත්තකල්ලං, සඞ්ඝො ඉත්ථන්නාමඤ්ච ඉත්ථන්නාමඤ්ච භික්ඛු සම්මන්නෙය්‍ය ඉත්ථන්නාමස්ස භික්ඛුනො විහාරවත්ථුං ඔලොකෙතුං. එසා ඤත්ති.
‘‘සුණාතු මෙ, භන්තෙ, සඞ්ඝො. අයං ඉත්ථන්නාමො භික්ඛු මහල්ලකං විහාරං කත්තුකාමො සස්සාමිකං අත්තුද්දෙසං. සො සඞ්ඝං විහාරවත්ථුඔලොකනං යාචති. සඞ්ඝො ඉත්ථන්නාමඤ්ච ඉත්ථන්නාමඤ්ච භික්ඛූ සම්මන්නති ඉත්ථන්නාමස්ස භික්ඛුනො විහාරවත්ථුං ඔලොකෙතුං. යස්සායස්මතො ඛමති ඉත්ථන්නාමස්ස ච ඉත්ථන්නාමස්ස ච භික්ඛූනං සම්මුති ඉත්ථන්නාමස්ස භික්ඛුනො විහාරවත්ථුං ඔලොකෙතුං, සො තුණ්හස්ස; යස්ස නක්ඛමති, සො භාසෙය්‍ය.
‘‘සම්මතා සඞ්ඝෙන ඉත්ථන්නාමො ච ඉත්ථන්නාමො ච භික්ඛූ ඉත්ථන්නාමස්ස භික්ඛුනො විහාරවත්ථුං ඔලොකෙතුං. ඛමති සඞ්ඝස්ස, තස්මා තුණ්හී, එවමෙතං ධාරයාමී’’ති.
369. තෙහි සම්මතෙහි භික්ඛූහි තත්ථ ගන්ත්වා විහාරවත්ථු ඔලොකෙතබ්බං; සාරම්භං අනාරම්භං සපරික්කමනං අපරික්කමනං ජානිතබ්බං. සචෙ සාරම්භං හොති අපරික්කමනං, ‘මායිධ කරී’ති වත්තබ්බො. සචෙ අනාරම්භං හොති සපරික්කමනං, සඞ්ඝස්ස ආරොචෙතබ්බං – ‘අනාරම්භං සපරික්කමන’න්ති. තෙන විහාරකාරකෙන භික්ඛුනා සඞ්ඝං උපසඞ්කමිත්වා එකංසං උත්තරාසඞ්ගං කරිත්වා වුඩ්ඪානං භික්ඛූනං පාදෙ වන්දිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො – ‘‘අහං, භන්තෙ, මහල්ලකං විහාරං කත්තුකාමො සස්සාමිකං අත්තුද්දෙසං. සොහං, භන්තෙ, සඞ්ඝං විහාරවත්ථුදෙසනං යාචාමී’’ති. දුතියම්පි යාචිතබ්බා. තතියම්පි යාචිතබ්බා. බ්‍යත්තෙන භික්ඛුනා පටිබලෙන සඞ්ඝො ඤාපෙතබ්බො –
370. ‘‘සුණාතු මෙ, භන්තෙ, සඞ්ඝො. අයං ඉත්ථන්නාමො භික්ඛු මහල්ලකං විහාරං කත්තුකාමො සස්සාමිකං අත්තුද්දෙසං. සො සඞ්ඝං විහාරවත්ථුදෙසනං යාචති. යදි සඞ්ඝස්ස පත්තකල්ලං, සඞ්ඝො ඉත්ථන්නාමස්ස භික්ඛුනො විහාරවත්ථුං දෙසෙය්‍ය. එසා ඤත්ති.
‘‘සුණාතු මෙ, භන්තෙ, සඞ්ඝො. අයං ඉත්ථන්නාමො භික්ඛු මහල්ලකං විහාරං කත්තුකාමො සස්සාමිකං අත්තුද්දෙසං. සො සඞ්ඝං විහාරවත්ථුදෙසනං යාචති. සඞ්ඝො ඉත්ථන්නාමස්ස භික්ඛුනො විහාරවත්ථුං දෙසෙති. යස්සායස්මතො ඛමති ඉත්ථන්නාමස්ස භික්ඛුනො විහාරවත්ථුස්ස දෙසනා, සො තුණ්හස්ස; යස්ස නක්ඛමති, සො භාසෙය්‍ය.
‘‘දෙසිතං සඞ්ඝෙන ඉත්ථන්නාමස්ස භික්ඛුනො විහාරවත්ථුං. ඛමති සඞ්ඝස්ස, තස්මා තුණ්හී, එවමෙතං ධාරයාමී’’ති.
371. සාරම්භං නාම කිපිල්ලිකානං වා ආසයො හොති, උපචිකානං වා ආසයො හොති, උන්දූරානං වා…පෙ… අහීනං වා විච්ඡිකානං වා සතපදීනං වා හත්ථීනං වා අස්සානං වා සීහානං වා බ්‍යග්ඝානං වා දීපීනං වා අච්ඡානං වා තරච්ඡානං වා ආසයො හොති, යෙසං කෙසඤ්චි තිරච්ඡානගතානං පාණානං ආසයො හොති, පුබ්බණ්ණනිස්සිතං වා හොති, අපරණ්ණනිස්සිතං වා හොති, අබ්භාඝාතනිස්සිතං වා හොති, ආඝාතනනිස්සිතං වා හොති, සුසානනිස්සිතං වා හොති, උය්‍යානනිස්සිතං වා හොති, රාජවත්ථුනිස්සිතං වා හොති, හත්ථිසාලානිස්සිතං වා හොති, අස්සසාලානිස්සිතං වා හොති, බන්ධනාගාරනිස්සිතං වා හොති, පානාගාරනිස්සිතං වා හොති, සූනනිස්සිතං වා හොති, රච්ඡානිස්සිතං වා හොති, චච්චරනිස්සිතං වා හොති, සභානිස්සිතං වා හොති, සංසරණනිස්සිතං වා හොති. එතං සාරම්භං නාම.
අපරික්කමනං නාම න සක්කා හොති යථායුත්තෙන සකටෙන අනුපරිගන්තුං, සමන්තා නිස්සෙණියා අනුපරිගන්තුං. එතං අපරික්කමනං නාම.
අනාරම්භං නාම න කිපිල්ලිකානං වා ආසයො හොති…පෙ… න සංසරණනිස්සිතං වා හොති. එතං අනාරම්භං නාම.
සපරික්කමනං නාම සක්කා හොති යථායුත්තෙන සකටෙන අනුපරිගන්තුං, සමන්තා නිස්සෙණියා අනුපරිගන්තුං. එතං සපරික්කමනං නාම.
මහල්ලකො නාම විහාරො සස්සාමිකො වුච්චති.
විහාරො නාම උල්ලිත්තො වා හොති අවලිත්තො වා උල්ලිත්තාවලිත්තො වා.
කාරෙය්‍යාති කරොති වා කාරාපෙති වා.
භික්ඛූ වා අනභිනෙය්‍ය වත්ථුදෙසනායාති ඤත්තිදුතියෙන කම්මෙන විහාරවත්ථුං න දෙසාපෙත්වා කරොති වා කාරාපෙති වා, පයොගෙ දුක්කටං. එකං පිණ්ඩං අනාගතෙ, ආපත්ති ථුල්ලච්චයස්ස. තස්මිං පිණ්ඩෙ ආගතෙ, ආපත්ති සඞ්ඝාදිසෙසස්ස.
සඞ්ඝාදිසෙසොති…පෙ… තෙනපි වුච්චති – ‘සඞ්ඝාදිසෙසො’ති.
372. භික්ඛු විහාරං කරොති අදෙසිතවත්ථුකං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං. භික්ඛු විහාරං කරොති අදෙසිතවත්ථුකං සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස. භික්ඛු විහාරං කරොති අදෙසිතවත්ථුකං අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස. භික්ඛු විහාරං කරොති අදෙසිතවත්ථුකං අනාරම්භං සපරික්කමනං, ආපත්ති සඞ්ඝාදිසෙසස්ස.
භික්ඛු විහාරං කරොති දෙසිතවත්ථුකං සාරම්භං අපරික්කමනං, ආපත්ති ද්වින්නං දුක්කටානං. භික්ඛු විහාරං කරොති දෙසිතවත්ථුකං සාරම්භං සපරික්කමනං, ආපත්ති දුක්කටස්ස. භික්ඛු විහාරං කරොති දෙසිතවත්ථුකං අනාරම්භං අපරික්කමනං, ආපත්ති දුක්කටස්ස. භික්ඛු විහාරං කරොති දෙසිතවත්ථුකං අනාරම්භං සපරික්කමනං, අනාපත්ති.
373. භික්ඛු සමාදිසති – ‘‘විහාරං මෙ කරොථා’’ති. තස්ස විහාරං කරොන්ති අදෙසිතවත්ථුකං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං…පෙ… සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස…පෙ… අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස…පෙ… අනාරම්භං සපරික්කමනං, ආපත්ති සඞ්ඝාදිසෙසස්ස.
භික්ඛු සමාදිසති – ‘‘විහාරං මෙ කරොථා’’ති. තස්ස විහාරං කරොන්ති දෙසිතවත්ථුකං සාරම්භං අපරික්කමනං, ආපත්ති ද්වින්නං දුක්කටානං…පෙ… සාරම්භං සපරික්කමනං, ආපත්ති දුක්කටස්ස…පෙ… අනාරම්භං අපරික්කමනං, ආපත්ති දුක්කටස්ස…පෙ… අනාරම්භං සපරික්කමනං, අනාපත්ති.
374. භික්ඛු සමාදිසිත්වා පක්කමති – ‘‘විහාරං මෙ කරොථා’’ති. න ච සමාදිසති – ‘‘දෙසිතවත්ථුකො ච හොතු අනාරම්භො ච සපරික්කමනො චා’’ති. තස්ස විහාරං කරොන්ති අදෙසිතවත්ථුකං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං…පෙ… සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස…පෙ… අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස…පෙ… අනාරම්භං සපරික්කමනං, ආපත්ති සඞ්ඝාදිසෙසස්ස.
භික්ඛු සමාදිසිත්වා පක්කමති – ‘‘විහාරං මෙ කරොථා’’ති. න ච සමාදිසති – ‘‘දෙසිතවත්ථුකො ච හොතු අනාරම්භො ච සපරික්කමනො චා’’ති. තස්ස විහාරං කරොන්ති දෙසිතවත්ථුකං සාරම්භං අපරික්කමනං, ආපත්ති ද්වින්නං දුක්කටානං…පෙ… සාරම්භං සපරික්කමනං, ආපත්ති දුක්කටස්ස…පෙ… අනාරම්භං අපරික්කමනං, ආපත්ති දුක්කටස්ස…පෙ… අනාරම්භං සපරික්කමනං, අනාපත්ති.
375. භික්ඛු සමාදිසිත්වා පක්කමති – ‘‘විහාරං මෙ කරොථා’’ති. සමාදිසති ච – ‘‘දෙසිතවත්ථුකො ච හොතු අනාරම්භො ච සපරික්කමනො චා’’ති. තස්ස විහාරං කරොන්ති අදෙසිතවත්ථුකං සාරම්භං අපරික්කමනං. සො සුණාති – ‘‘විහාරො කිර මෙ කයිරති අදෙසිතවත්ථුකො සාරම්භො අපරික්කමනො’’ති. තෙන භික්ඛුනා සාමං වා ගන්තබ්බං දූතො වා පාහෙතබ්බො – ‘‘දෙසිතවත්ථුකො ච හොතු අනාරම්භො ච සපරික්කමනො චා’’ති …පෙ… ‘‘දෙසිතවත්ථුකො ච හොතු අනාරම්භො චා’’ති…පෙ… ‘‘දෙසිතවත්ථුකො ච හොතු සපරික්කමනො චා’’ති …පෙ… ‘‘දෙසිතවත්ථුකො හොතූ’’ති. නො චෙ සාමං වා ගච්ඡෙය්‍ය දූතං වා පහිණෙය්‍ය, ආපත්ති දුක්කටස්ස.
භික්ඛු සමාදිසිත්වා පක්කමති – ‘‘විහාරං මෙ කරොථා’’ති. සමාදිසති ච – ‘‘දෙසිතවත්ථුකො ච හොතු අනාරම්භො ච සපරික්කමනො චා’’ති. තස්ස විහාරං කරොන්ති දෙසිතවත්ථුකං සාරම්භං අපරික්කමනං. සො සුණාති – ‘‘විහාරො කිර මෙ කයිරති දෙසිතවත්ථුකො සාරම්භො අපරික්කමනො’’ති. තෙන භික්ඛුනා සාමං වා ගන්තබ්බං දූතො වා පාහෙතබ්බො – ‘‘අනාරම්භො ච හොතු සපරික්කමනො චා’’ති…පෙ… ‘‘අනාරම්භො හොතූ’’ති ‘‘සපරික්කමනො හොතූ’’ති, අනාපත්ති.
376. භික්ඛු සමාදිසිත්වා පක්කමති – ‘‘විහාරං මෙ කරොථා’’ති. සමාදිසති ච – ‘‘දෙසිතවත්ථුකො ච හොතු අනාරම්භො ච සපරික්කමනො චා’’ති. තස්ස විහාරං කරොන්ති අදෙසිතවත්ථුකං සාරම්භං අපරික්කමනං, ආපත්ති කාරුකානං තිණ්ණං දුක්කටානං…පෙ… සාරම්භං සපරික්කමනං, ආපත්ති කාරුකානං ද්වින්නං දුක්කටානං…පෙ… අනාරම්භං අපරික්කමනං, ආපත්ති කාරුකානං ද්වින්නං දුක්කටානං…පෙ… අනාරම්භං සපරික්කමනං, ආපත්ති කාරුකානං දුක්කටස්ස.
භික්ඛු සමාදිසිත්වා පක්කමති – ‘‘විහාරං මෙ කරොථා’’ති. සමාදිසති ච – ‘‘දෙසිතවත්ථුකො ච හොතු අනාරම්භො ච සපරික්කමනො චා’’ති. තස්ස විහාරං කරොන්ති දෙසිතවත්ථුකං සාරම්භං අපරික්කමනං, ආපත්ති කාරුකානං ද්වින්නං දුක්කටානං…පෙ… සාරම්භං සපරික්කමනං, ආපත්ති කාරුකානං දුක්කටස්ස…පෙ… අනාරම්භං අපරික්කමනං, ආපත්ති කාරුකානං දුක්කටස්ස…පෙ… අනාරම්භං සපරික්කමනං, අනාපත්ති.
377. භික්ඛු සමාදිසිත්වා පක්කමති – ‘‘විහාරං මෙ කරොථා’’ති. තස්ස විහාරං කරොන්ති අදෙසිතවත්ථුකං සාරම්භං අපරික්කමනං. සො චෙ විප්පකතෙ ආගච්ඡති, තෙන භික්ඛුනා සො විහාරො අඤ්ඤස්ස වා දාතබ්බො භින්දිත්වා වා පුන කාතබ්බො. නො චෙ අඤ්ඤස්ස වා දදෙය්‍ය භින්දිත්වා වා පුන කාරෙය්‍ය, ආපත්ති සඞ්ඝාදිසෙසෙන ද්වින්නං දුක්කටානං…පෙ… සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස…පෙ… අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස…පෙ… අනාරම්භං සපරික්කමනං, ආපත්ති සඞ්ඝාදිසෙසස්ස.
භික්ඛු සමාදිසිත්වා පක්කමති – ‘‘විහාරං මෙ කරොථා’’ති. තස්ස විහාරං කරොන්ති දෙසිතවත්ථුකං සාරම්භං අපරික්කමනං. සො චෙ විප්පකතෙ ආගච්ඡති, තෙන භික්ඛුනා සො විහාරො අඤ්ඤස්ස වා දාතබ්බො භින්දිත්වා වා පුන කාතබ්බො. නො චෙ අඤ්ඤස්ස වා දදෙය්‍ය භින්දිත්වා වා පුන කාරෙය්‍ය, ආපත්ති ද්වින්නං දුක්කටානං…පෙ… සාරම්භං සපරික්කමනං, ආපත්ති දුක්කටස්ස…පෙ… අනාරම්භං අපරික්කමනං, ආපත්ති දුක්කටස්ස…පෙ… අනාරම්භං සපරික්කමනං, අනාපත්ති.
378. අත්තනා විප්පකතං අත්තනා පරියොසාපෙති, ආපත්ති සඞ්ඝාදිසෙසස්ස.
අත්තනා විප්පකතං පරෙහි පරියොසාපෙති, ආපත්ති සඞ්ඝාදිසෙසස්ස.
පරෙහි විප්පකතං අත්තනා පරියොසාපෙති, ආපත්ති සඞ්ඝාදිසෙසස්ස.
පරෙහි විප්පකතං පරෙහි පරියොසාපෙති, ආපත්ති සඞ්ඝාදිසෙසස්ස.
379. අනාපත්ති ලෙණෙ ගුහාය තිණකුටිකාය අඤ්ඤස්සත්ථාය වාසාගාරං ඨපෙත්වා සබ්බත්ථ. අනාපත්ති උම්මත්තකස්ස, ආදිකම්මිකස්සාති.
විහාරකාරසික්ඛාපදං නිට්ඨිතං සත්තමං.