3. ඛම්භකතවග්ගො
596. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ ඛම්භකතා අන්තරඝරෙ ගච්ඡන්ති…පෙ….
‘‘න ඛම්භකතො අන්තරඝරෙ ගමිස්සාමීති සික්ඛා කරණීයා’’ති.
න ඛම්භකතෙන අන්තරඝරෙ ගන්තබ්බං. යො අනාදරියං පටිච්ච එකතො වා උභතො වා ඛම්භං කත්වා අන්තරඝරෙ ගච්ඡති, ආපත්ති දුක්කටස්ස.
අනාපත්ති අසඤ්චිච්ච…පෙ… ආදිකම්මිකස්සාති.
පඨමසික්ඛාපදං නිට්ඨිතං.
597. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ ඛම්භකතා අන්තරඝරෙ නිසීදන්ති…පෙ….
‘‘න ඛම්භකතො අන්තරඝරෙ නිසීදිස්සාමීති සික්ඛා කරණීයා’’ති.
න ඛම්භකතෙන අන්තරඝරෙ නිසීදිතබ්බං. යො අනාදරියං පටිච්ච එකතො වා උභතො වා ඛම්භං කත්වා අන්තරඝරෙ නිසීදති, ආපත්ති දුක්කටස්ස.
අනාපත්ති අසඤ්චිච්ච, අස්සතියා, අජානන්තස්ස, ගිලානස්ස, වාසූපගතස්ස, ආපදාසු, උම්මත්තකස්ස, ආදිකම්මිකස්සාති.
දුතියසික්ඛාපදං නිට්ඨිතං.
598. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ සසීසං පාරුපිත්වා අන්තරඝරෙ ගච්ඡන්ති…පෙ….
‘‘න ඔගුණ්ඨිතො අන්තරඝරෙ ගමිස්සාමීති සික්ඛා කරණීයා’’ති.
න ඔගුණ්ඨිතෙන අන්තරඝරෙ ගන්තබ්බං. යො අනාදරියං පටිච්ච සසීසං පාරුපිත්වා අන්තරඝරෙ ගච්ඡති, ආපත්ති දුක්කටස්ස.
අනාපත්ති අසඤ්චිච්ච…පෙ… ආදිකම්මිකස්සාති.
තතියසික්ඛාපදං නිට්ඨිතං.
599. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ සසීසං පාරුපිත්වා අන්තරඝරෙ නිසීදන්ති…පෙ….
‘‘න ඔගුණ්ඨිතො අන්තරඝරෙ නිසීදිස්සාමීති සික්ඛා කරණීයා’’ති.
න ඔගුණ්ඨිතෙන අන්තරඝරෙ නිසීදිතබ්බං. යො අනාදරියං පටිච්ච සසීසං පාරුපිත්වා අන්තරඝරෙ නිසීදති, ආපත්ති දුක්කටස්ස.
අනාපත්ති අසඤ්චිච්ච, අස්සතියා, අජානන්තස්ස, ගිලානස්ස, වාසූපගතස්ස, ආපදාසු, උම්මත්තකස්ස, ආදිකම්මිකස්සාති.
චතුත්ථසික්ඛාපදං නිට්ඨිතං.
600. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ උක්කුටිකාය අන්තරඝරෙ ගච්ඡන්ති…පෙ….
‘‘න උක්කුටිකාය අන්තරඝරෙ ගමිස්සාමීති සික්ඛා කරණීයා’’ති.
න උක්කුටිකාය අන්තරඝරෙ ගන්තබ්බං. යො අනාදරියං පටිච්ච උක්කුටිකාය අන්තරඝරෙ ගච්ඡති, ආපත්ති දුක්කටස්ස.
අනාපත්ති අසඤ්චිච්ච…පෙ… ආදිකම්මිකස්සාති.
පඤ්චමසික්ඛාපදං නිට්ඨිතං.
601. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ පල්ලත්ථිකාය [පල්ලත්තිකාය (ක.)] අන්තරඝරෙ නිසීදන්ති…පෙ….
‘‘න පල්ලත්ථිකාය අන්තරඝරෙ නිසීදිස්සාමීති සික්ඛා කරණීයා’’ති.
න පල්ලත්ථිකාය අන්තරඝරෙ නිසීදිතබ්බං. යො අනාදරියං පටිච්ච හත්ථපල්ලත්ථිකාය වා දුස්සපල්ලත්ථිකාය වා අන්තරඝරෙ නිසීදති, ආපත්ති දුක්කටස්ස.
අනාපත්ති අසඤ්චිච්ච, අස්සතියා, අජානන්තස්ස, ගිලානස්ස, වාසූපගතස්ස, ආපදාසු,
උම්මත්තකස්ස, ආදිකම්මිකස්සාති.
ඡට්ඨසික්ඛාපදං නිට්ඨිතං.
602. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ අසක්කච්චං පිණ්ඩපාතං පටිග්ගණ්හන්ති ඡඩ්ඩෙතුකාමා විය…පෙ….
‘‘සක්කච්චං පිණ්ඩපාතං පටිග්ගහෙස්සාමීති සික්ඛා කරණීයා’’ති.
සක්කච්චං පිණ්ඩපාතො පටිග්ගහෙතබ්බො. යො අනාදරියං පටිච්ච අසක්කච්චං පිණ්ඩපාතං පටිග්ගණ්හාති ඡඩ්ඩෙතුකාමො විය, ආපත්ති දුක්කටස්ස.
අනාපත්ති අසඤ්චිච්ච…පෙ… ආදිකම්මිකස්සාති.
සත්තමසික්ඛාපදං නිට්ඨිතං.
603. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ තහං තහං ඔලොකෙන්තා පිණ්ඩපාතං පටිග්ගණ්හන්ති, ආකිරන්තෙපි අතික්කන්තෙපි [අතික්කමන්තෙපි (සී.)] න ජානන්ති…පෙ….
‘‘පත්තසඤ්ඤී පිණ්ඩපාතං පටිග්ගහෙස්සාමීති සික්ඛා කරණීයා’’ති.
පත්තසඤ්ඤිනා පිණ්ඩපාතො පටිග්ගහෙතබ්බො. යො අනාදරියං පටිච්ච තහං තහං ඔලොකෙන්තො පිණ්ඩපාතං පටිග්ගණ්හාති, ආපත්ති දුක්කටස්ස.
අනාපත්ති අසඤ්චිච්ච…පෙ… ආදිකම්මිකස්සාති.
අට්ඨමසික්ඛාපදං නිට්ඨිතං.
604. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ පිණ්ඩපාතං පටිග්ගණ්හන්තා සූපඤ්ඤෙව බහුං පටිග්ගණ්හන්ති…පෙ….
‘‘සමසූපකං පිණ්ඩපාතං පටිග්ගහෙස්සාමීති සික්ඛා කරණීයා’’ති.
සූපො නාම ද්වෙ සූපා – මුග්ගසූපො, මාසසූපො. හත්ථහාරියො සමසූපකො පිණ්ඩපාතො පටිග්ගහෙතබ්බො. යො අනාදරියං පටිච්ච සූපඤ්ඤෙව බහුං පටිග්ගණ්හාති, ආපත්ති දුක්කටස්ස.
අනාපත්ති අසඤ්චිච්ච, අස්සතියා, අජානන්තස්ස, ගිලානස්ස, රසරසෙ, ඤාතකානං පවාරිතානං, අඤ්ඤස්සත්ථාය, අත්තනො ධනෙන, ආපදාසු, උම්මත්තකස්ස, ආදිකම්මිකස්සාති.
නවමසික්ඛාපදං නිට්ඨිතං.
605. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ඡබ්බග්ගියා භික්ඛූ ථූපීකතං පිණ්ඩපාතං පටිග්ගණ්හන්ති…පෙ….
‘‘සමතිත්තිකං [සමතිත්ථිකං (ක.)] පිණ්ඩපාතං පටිග්ගහෙස්සාමීති සික්ඛා කරණීයා’’ති.
සමතිත්තිකො [සමතිත්ථිකං (ක.)] පිණ්ඩපාතො පටිග්ගහෙතබ්බො. යො අනාදරියං පටිච්ච ථූපීකතං පිණ්ඩපාතං පටිග්ගණ්හාති, ආපත්ති දුක්කටස්ස.
අනාපත්ති අසඤ්චිච්ච, අස්සතියා, අජානන්තස්ස, ආපදාසු, උම්මත්තකස්ස, ආදිකම්මිකස්සාති.
දසමසික්ඛාපදං නිට්ඨිතං.
ඛම්භකතවග්ගො තතියො.