2. දුතියපාටිදෙසනීයසික්ඛාපදං

557. තෙන සමයෙන බුද්ධො භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන භික්ඛූ කුලෙසු නිමන්තිතා භුඤ්ජන්ති. ඡබ්බග්ගියා භික්ඛුනියො ඡබ්බග්ගියානං භික්ඛූනං වොසාසන්තියො ඨිතා හොන්ති – ‘‘ඉධ සූපං දෙථ, ඉධ ඔදනං දෙථා’’ති. ඡබ්බග්ගියා භික්ඛූ යාවදත්ථං භුඤ්ජන්ති. අඤ්ඤෙ භික්ඛූ න චිත්තරූපං භුඤ්ජන්ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ භික්ඛුනියො වොසාසන්තියො න නිවාරෙස්සන්තී’’ති…පෙ… සච්චං කිර තුම්හෙ, භික්ඛවෙ, භික්ඛුනියො වොසාසන්තියො න නිවාරෙථාති? ‘‘සච්චං, භගවා’’ති. විගරහි බුද්ධො භගවා …පෙ… කථඤ්හි නාම තුම්හෙ, මොඝපුරිසා, භික්ඛුනියො වොසාසන්තියො න නිවාරෙස්සථ! නෙතං, මොඝපුරිසා, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –

558. ‘‘භික්ඛූ පනෙව කුලෙසු නිමන්තිතා භුඤ්ජන්ති, තත්‍ර චෙ සා [තත්‍ර චෙ (ස්‍යා.)] භික්ඛුනී වොසාසමානරූපා ඨිතා හොති – ‘ඉධ සූපං දෙථ, ඉධ ඔදනං දෙථා’ති, තෙහි භික්ඛූහි සා භික්ඛුනී අපසාදෙතබ්බා – ‘අපසක්ක තාව, භගිනි, යාව භික්ඛූ භුඤ්ජන්තී’ති. එකස්ස චෙපි [එකස්සපි චෙ (සී. ස්‍යා.)] භික්ඛුනො න පටිභාසෙය්‍ය තං භික්ඛුනිං අපසාදෙතුං – ‘අපසක්ක තාව, භගිනි, යාව භික්ඛූ භුඤ්ජන්තී’ති පටිදෙසෙතබ්බං තෙහි භික්ඛූහි – ‘ගාරය්හං, ආවුසො, ධම්මං ආපජ්ජිම්හා අසප්පායං පාටිදෙසනීයං, තං පටිදෙසෙමා’’’ති.

559. භික්ඛූ පනෙව කුලෙසු නිමන්තිතා භුඤ්ජන්තීති කුලං නාම චත්තාරි කුලානි – ඛත්තියකුලං, බ්‍රාහ්මණකුලං, වෙස්සකුලං, සුද්දකුලං.

නිමන්තිතා භුඤ්ජන්තීති පඤ්චන්නං භොජනානං අඤ්ඤතරෙන භොජනෙන නිමන්තිතා භුඤ්ජන්ති.

භික්ඛුනී නාම උභතොසඞ්ඝෙ උපසම්පන්නා.

වොසාසන්තී නාම යථාමිත්තතා යථාසන්දිට්ඨතා යථාසම්භත්තතා යථාසමානුපජ්ඣායකතා යථාසමානාචරියකතා – ‘‘ඉධ සූපං දෙථ, ඉධ ඔදනං දෙථා’’ති. එසා වොසාසන්තී නාම.

තෙහි භික්ඛූහීති භුඤ්ජමානෙහි භික්ඛූහි.

සා භික්ඛුනීති යා සා වොසාසන්තී භික්ඛුනී.

තෙහි භික්ඛූහි සා භික්ඛුනී අපසාදෙතබ්බා – ‘‘අපසක්ක තාව, භගිනි, යාව භික්ඛූ භුඤ්ජන්තී’’ති. එකස්ස චෙපි [එකස්සපි චෙ (සී. ස්‍යා.)] භික්ඛුනො අනපසාදිතො [අනපසාදිතෙ (සී. ස්‍යා.)] – ‘‘ඛාදිස්සාමි භුඤ්ජිස්සාමී’’ති පටිග්ගණ්හාති, ආපත්ති දුක්කටස්ස. අජ්ඣොහාරෙ අජ්ඣොහාරෙ ආපත්ති පාටිදෙසනීයස්ස.

560. උපසම්පන්නාය උපසම්පන්නසඤ්ඤී වොසාසන්තියා න නිවාරෙති, ආපත්ති පාටිදෙසනීයස්ස. උපසම්පන්නාය වෙමතිකො වොසාසන්තියා න නිවාරෙති, ආපත්ති පාටිදෙසනීයස්ස. උපසම්පන්නාය අනුපසම්පන්නසඤ්ඤී වොසාසන්තියා න නිවාරෙති, ආපත්ති පාටිදෙසනීයස්ස.

එකතොඋපසම්පන්නාය වොසාසන්තියා න නිවාරෙති, ආපත්ති දුක්කටස්ස. අනුපසම්පන්නාය උපසම්පන්නසඤ්ඤී, ආපත්ති දුක්කටස්ස. අනුපසම්පන්නාය වෙමතිකො, ආපත්ති දුක්කටස්ස. අනුපසම්පන්නාය අනුපසම්පන්නසඤ්ඤී, අනාපත්ති.

561. අනාපත්ති අත්තනො භත්තං දාපෙති න දෙති, අඤ්ඤෙසං භත්තං දෙති න දාපෙති, යං න දින්නං තං දාපෙති, යත්ථ න දින්නං තත්ථ දාපෙති, සබ්බෙසං සමකං දාපෙති, සික්ඛමානා වොසාසති, සාමණෙරී වොසාසති, පඤ්ච භොජනානි ඨපෙත්වා සබ්බත්ථ, අනාපත්ති, උම්මත්තකස්ස, ආදිකම්මිකස්සාති.

දුතියපාටිදෙසනීයසික්ඛාපදං නිට්ඨිතං.