270. තස්සුද්දානං

චම්පායං භගවා ආසි, වත්ථු වාසභගාමකෙ;

ආගන්තුකානමුස්සුක්කං, අකාසි ඉච්ඡිතබ්බකෙ [ඉච්ඡිතබ්බකො (ක.)].

පකතඤ්ඤුනොති ඤත්වා, උස්සුක්කං න කරී තදා;

උක්ඛිත්තො න කරොතීති, සාගමා ජිනසන්තිකෙ.

අධම්මෙන වග්ගකම්මං, සමග්ගං අධම්මෙන ච;

ධම්මෙන වග්ගකම්මඤ්ච, පතිරූපකෙන වග්ගිකං.

පතිරූපකෙන සමග්ගං, එකො උක්ඛිපතෙකකං;

එකො ච ද්වෙ සම්බහුලෙ, සඞ්ඝං උක්ඛිපතෙකකො.

දුවෙපි සම්බහුලාපි, සඞ්ඝො සඞ්ඝඤ්ච උක්ඛිපි;

සබ්බඤ්ඤුපවරො සුත්වා, අධම්මන්ති පටික්ඛිපි.

ඤත්තිවිපන්නං යං කම්මං, සම්පන්නං අනුසාවනං;

අනුස්සාවනවිපන්නං, සම්පන්නං ඤත්තියා ච යං.

උභයෙන විපන්නඤ්ච, අඤ්ඤත්‍ර ධම්මමෙව ච;

විනයා සත්ථු පටිකුට්ඨං, කුප්පං අට්ඨානාරහිකං.

අධම්මවග්ගං සමග්ගං, ධම්ම පතිරූපානි යෙ දුවෙ;

ධම්මෙනෙව ච සාමග්ගිං, අනුඤ්ඤාසි තථාගතො.

චතුවග්ගො පඤ්චවග්ගො, දසවග්ගො ච වීසති;

පරොවීසතිවග්ගො ච [අතිරෙකවීසතිවග්ගො (ස්‍යා.)], සඞ්ඝො පඤ්චවිධො තථා.

ඨපෙත්වා උපසම්පදං, යඤ්ච කම්මං පවාරණං;

අබ්භානකම්මෙන සහ, චතුවග්ගෙහි කම්මිකො.

දුවෙ කම්මෙ ඨපෙත්වාන, මජ්ඣදෙසූපසම්පදං;

අබ්භානං පඤ්චවග්ගිකො, සබ්බකම්මෙසු කම්මිකො.

අබ්භානෙකං ඨපෙත්වාන, යෙ භික්ඛූ දසවග්ගිකා;

සබ්බකම්මකරො සඞ්ඝො, වීසො සබ්බත්ථ කම්මිකො.

භික්ඛුනී සික්ඛමානා, ච සාමණෙරො සාමණෙරී;

පච්චක්ඛාතන්තිමවත්ථූ, උක්ඛිත්තාපත්තිදස්සනෙ.

අප්පටිකම්මෙ දිට්ඨියා, පණ්ඩකො ථෙය්‍යසංවාසකං;

තිත්ථියා තිරච්ඡානගතං, මාතු පිතු ච ඝාතකං.

අරහං භික්ඛුනීදූසි, භෙදකං ලොහිතුප්පාදං;

බ්‍යඤ්ජනං නානාසංවාසං, නානාසීමාය ඉද්ධියා.

යස්ස සඞ්ඝො කරෙ කම්මං, හොන්තෙතෙ චතුවීසති;

සම්බුද්ධෙන පටික්ඛිත්තා, න හෙතෙ ගණපූරකා.

පාරිවාසිකචතුත්ථො, පරිවාසං දදෙය්‍ය වා;

මූලා මානත්තමබ්භෙය්‍ය, අකම්මං න ච කරණං.

මූලා අරහමානත්තා, අබ්භානාරහමෙව ච;

න කම්මකාරකා පඤ්ච, සම්බුද්ධෙන පකාසිතා.

භික්ඛුනී සික්ඛමානා ච, සාමණෙරො සාමණෙරිකා;

පච්චක්ඛන්තිමඋම්මත්තා, ඛිත්තාවෙදනදස්සනෙ.

අප්පටිකම්මෙ දිට්ඨියා, පණ්ඩකාපි ච බ්‍යඤ්ජනා [ඉතො පරං ස්‍යාමමූලෙ දියඩ්ඪගාථාහි අභබ්බපුග්ගලා සමත්තං දස්සිතා];

නානාසංවාසකා සීමා, වෙහාසං යස්ස කම්ම ච.

අට්ඨාරසන්නමෙතෙසං, පටික්කොසං න රුහති;

භික්ඛුස්ස පකතත්තස්ස, රුහති පටික්කොසනා.

සුද්ධස්ස දුන්නිසාරිතො, බාලො හි සුනිස්සාරිතො;

පණ්ඩකො ථෙය්‍යසංවාසො, පක්කන්තො තිරච්ඡානගතො.

මාතු පිතු අරහන්ත, දූසකො සඞ්ඝභෙදකො;

ලොහිතුප්පාදකො චෙව, උභතොබ්‍යඤ්ජනො ච යො.

එකාදසන්නං එතෙසං, ඔසාරණං න යුජ්ජති;

හත්ථපාදං තදුභයං, කණ්ණනාසං තදූභයං.

අඞ්ගුලි අළකණ්ඩරං, ඵණං ඛුජ්ජො ච වාමනො;

ගණ්ඩී ලක්ඛණකසා, ච ලිඛිතකො ච සීපදී.

පාපා පරිසකාණො ච, කුණී ඛඤ්ජො හතොපි ච;

ඉරියාපථදුබ්බලො, අන්ධො මූගො ච බධිරො.

අන්ධමූගන්ධබධිරො මූගබධිරමෙව ච;

අන්ධමූගබධිරො ච, ද්වත්තිංසෙතෙ අනූනකා.

තෙසං ඔසාරණං හොති, සම්බුද්ධෙන පකාසිතං;

දට්ඨබ්බා පටිකාතබ්බා, නිස්සජ්ජෙතා න විජ්ජති.

තස්ස උක්ඛෙපනා කම්මා, සත්ත හොන්ති අධම්මිකා;

ආපන්නං අනුවත්තන්තං, සත්ත තෙපි අධම්මිකා.

ආපන්නං නානුවත්තන්තං, සත්ත කම්මා සුධම්මිකා;

සම්මුඛා පටිපුච්ඡා ච, පටිඤ්ඤාය ච කාරණා.

සති අමූළ්හපාපිකා, තජ්ජනීනියස්සෙන ච;

පබ්බාජනීය පටිසාරො, උක්ඛෙපපරිවාස ච.

මූලා මානත්තඅබ්භානා, තථෙව උපසම්පදා;

අඤ්ඤං කරෙය්‍ය අඤ්ඤස්ස, සොළසෙතෙ අධම්මිකා.

තං තං කරෙය්‍ය තං තස්ස, සොළසෙතෙ සුධම්මිකා;

පච්චාරොපෙය්‍ය අඤ්ඤඤ්ඤං, සොළසෙතෙ අධම්මිකා.

ද්වෙ ද්වෙ තම්මූලකං තස්ස [ද්වෙ ද්වෙ මූලා කතා කස්ස (ස්‍යා.), දොදොතමූලකන්තස්ස (ක.)], තෙපි සොළස ධම්මිකා;

එකෙකමූලකං චක්කං, ‘‘අධම්ම’’න්ති ජිනොබ්‍රවි.

අකාසි තජ්ජනීයං කම්මං, සඞ්ඝො භණ්ඩනකාරකො;

අධම්මෙන වග්ගකම්මං, අඤ්ඤං ආවාසං ගච්ඡි සො.

තත්ථාධම්මෙන සමග්ගා, තස්ස තජ්ජනීයං කරුං;

අඤ්ඤත්ථ වග්ගාධම්මෙන, තස්ස තජ්ජනීයං කරුං.

පතිරූපෙන වග්ගාපි, සමග්ගාපි තථා කරුං;

අධම්මෙන සමග්ගා ච, ධම්මෙන වග්ගමෙව ච.

පතිරූපකෙන වග්ගා ච, සමග්ගා ච ඉමෙ පදා;

එකෙකමූලකං කත්වා, චක්කං බන්ධෙ විචක්ඛණො.

බාලා බ්‍යත්තස්ස නියස්සං, පබ්බාජෙ කුලදූසකං;

පටිසාරණීයං කම්මං, කරෙ අක්කොසකස්ස ච.

අදස්සනාප්පටිකම්මෙ, යො ච දිට්ඨිං න නිස්සජ්ජෙ;

තෙසං උක්ඛෙපනීයකම්මං, සත්ථවාහෙන භාසිතං.

උපරි නයකම්මානං [උපවිනයකම්මානං (ස්‍යා.), උක්ඛෙපනීයකම්මානං (ක.)] පඤ්ඤො තජ්ජනීයං නයෙ;

තෙසංයෙව අනුලොමං, සම්මා වත්තති යාචිතෙ [යාචති (ස්‍යා.), යාචිතො (සී.)].

පස්සද්ධි තෙසං කම්මානං, හෙට්ඨා කම්මනයෙන ච;

තස්මිං තස්මිං තු කම්මෙසු, තත්‍රට්ඨො ච විවදති.

අකතං දුක්කටඤ්චෙව, පුනකාතබ්බකන්ති ච;

කම්මෙ පස්සද්ධියා චාපි, තෙ භික්ඛූ ධම්මවාදිනො.

විපත්තිබ්‍යාධිතෙ දිස්වා, කම්මප්පත්තෙ මහාමුනි;

පටිප්පස්සද්ධිමක්ඛාසි, සල්ලකත්තොව ඔසධන්ති.

ඉමම්හි ඛන්ධකෙ වත්ථූනි ඡත්තිංසාති.

චම්පෙය්‍යක්ඛන්ධකො නිට්ඨිතො.