264. නියස්සකම්මපටිප්පස්සද්ධිකථා

445. ඉධ පන, භික්ඛවෙ, භික්ඛු සඞ්ඝෙන නියස්සකම්මකතො සම්මා වත්තති, ලොමං පාතෙති, නෙත්ථාරං වත්තති, නියස්සස්ස කම්මස්ස පටිප්පස්සද්ධිං යාචති. තත්‍ර චෙ භික්ඛූනං එවං හොති – ‘‘අයං ඛො, ආවුසො, භික්ඛු සඞ්ඝෙන නියස්සකම්මකතො සම්මා වත්තති, ලොමං පාතෙති, නෙත්ථාරං වත්තති, නියස්සස්ස කම්මස්ස පටිප්පස්සද්ධිං යාචති. හන්දස්ස මයං නියස්සකම්මං පටිප්පස්සම්භෙමා’’ති. තෙ තස්ස නියස්සකම්මං පටිප්පස්සම්භෙන්ති – අධම්මෙන වග්ගා…පෙ… අධම්මෙන සමග්ගා… ධම්මෙන වග්ගා… ධම්මපතිරූපකෙන වග්ගා… ධම්මපතිරූපකෙන සමග්ගා. තත්‍රට්ඨො සඞ්ඝො විවදති – ‘‘අධම්මෙන වග්ගකම්මං, අධම්මෙන සමග්ගකම්මං, ධම්මෙන වග්ගකම්මං, ධම්මපතිරූපකෙන වග්ගකම්මං, ධම්මපතිරූපකෙන සමග්ගකම්මං, අකතං කම්මං දුක්කටං කම්මං පුන කාතබ්බං කම්ම’’න්ති. තත්‍ර, භික්ඛවෙ, යෙ තෙ භික්ඛූ එවමාහංසු – ‘‘ධම්මපතිරූපකෙන සමග්ගකම්ම’’න්ති, යෙ ච තෙ භික්ඛූ එවමාහංසු – ‘‘අකතං කම්මං දුක්කටං කම්මං පුන කාතබ්බං කම්ම’’න්ති, ඉමෙ තත්ථ භික්ඛූ ධම්මවාදිනො. ඉමෙපි [ඉමෙ (සී. ස්‍යා. එවමුපරිපි)] පඤ්ච වාරා සංඛිත්තා.

නියස්සකම්මපටිප්පස්සද්ධිකථා නිට්ඨිතා.