245. පටිසාරණීයකම්මකථා

414. ඉධ පන, භික්ඛවෙ, භික්ඛු ගිහී අක්කොසති පරිභාසති. තත්‍ර චෙ භික්ඛූනං එවං හොති – ‘‘අයං ඛො, ආවුසො, භික්ඛු ගිහී අක්කොසති පරිභාසති. හන්දස්ස මයං පටිසාරණීයකම්මං කරොමා’’ති. තෙ තස්ස පටිසාරණීයකම්මං කරොන්ති – අධම්මෙන වග්ගා. සො තම්හා ආවාසා අඤ්ඤං ආවාසං ගච්ඡති. තත්ථපි භික්ඛූනං එවං හොති – ‘‘අයං ඛො, ආවුසො, භික්ඛු සඞ්ඝෙන පටිසාරණීයකම්මකතො අධම්මෙන වග්ගෙහි. හන්දස්ස මයං පටිසාරණීයකම්මං කරොමා’’ති. තෙ තස්ස පටිසාරණීයකම්මං කරොන්ති – අධම්මෙන සමග්ගා…පෙ… ධම්මෙන වග්ගා… ධම්මපතිරූපකෙන වග්ගා… ධම්මපතිරූපකෙන සමග්ගා…පෙ….

චක්කං කාතබ්බං.

පටිසාරණීයකම්මකථා නිට්ඨිතා.