228. සබ්බනීලකාදිපටික්ඛෙපකථා

372. තෙන ඛො පන සමයෙන ඡබ්බග්ගියා භික්ඛූ සබ්බනීලකානි චීවරානි ධාරෙන්ති…පෙ… සබ්බපීතකානි චීවරානි ධාරෙන්ති…පෙ… සබ්බලොහිතකානි චීවරානි ධාරෙන්ති…පෙ… සබ්බමඤ්ජිට්ඨකානි [සබ්බමඤ්ජෙට්ඨකානි (සී. ස්‍යා.)] චීවරානි ධාරෙන්ති…පෙ… සබ්බකණ්හානි චීවරානි ධාරෙන්ති …පෙ… සබ්බමහාරඞ්ගරත්තානි චීවරානි ධාරෙන්ති…පෙ… සබ්බමහානාමරත්තානි චීවරානි ධාරෙන්ති…පෙ… අච්ඡින්නදසානි චීවරානි ධාරෙන්ති…පෙ… දීඝදසානි චීවරානි ධාරෙන්ති…පෙ… පුප්ඵදසානි චීවරානි ධාරෙන්ති…පෙ… ඵණදසානි [ඵලදසානි (ක.)] චීවරානි ධාරෙන්ති…පෙ… කඤ්චුකං ධාරෙන්ති…පෙ… තිරීටකං ධාරෙන්ති…පෙ… වෙඨනං ධාරෙන්ති. මනුස්සා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම සමණා සක්‍යපුත්තියා වෙඨනං ධාරෙස්සන්ති, සෙය්‍යථාපි ගිහී කාමභොගිනො’’ති. භගවතො එතමත්ථං ආරොචෙසුං. න, භික්ඛවෙ, සබ්බනීලකානි චීවරානි ධාරෙතබ්බානි, න සබ්බපීතකානි චීවරානි ධාරෙතබ්බානි, න සබ්බලොහිතකානි චීවරානි ධාරෙතබ්බානි, න සබ්බමඤ්ජිට්ඨකානි චීවරානි ධාරෙතබ්බානි, න සබ්බකණ්හානි චීවරානි ධාරෙතබ්බානි, න සබ්බමහාරඞ්ගරත්තානි චීවරානි ධාරෙතබ්බානි, න සබ්බමහානාමරත්තානි චීවරානි ධාරෙතබ්බානි, න අච්ඡින්නදසානි චීවරානි ධාරෙතබ්බානි, න දීඝදසානි චීවරානි ධාරෙතබ්බානි, න පුප්ඵදසානි චීවරානි ධාරෙතබ්බානි, න ඵණදසානි චීවරානි ධාරෙතබ්බානි, න කඤ්චුකං ධාරෙතබ්බං, න තිරීටකං ධාරෙතබ්බං, න වෙඨනං ධාරෙතබ්බං. යො ධාරෙය්‍ය, ආපත්ති දුක්කටස්සාති.

සබ්බනීලකාදිපටික්ඛෙපකථා නිට්ඨිතා.