223. උපනන්දසක්‍යපුත්තවත්ථු
364. තෙන ඛො පන සමයෙන ආයස්මා උපනන්දො සක්‍යපුත්තො සාවත්ථියං වස්සංවුට්ඨො අඤ්ඤතරං ගාමකාවාසං අගමාසි. තත්ථ ච භික්ඛූ චීවරං භාජෙතුකාමා සන්නිපතිංසු. තෙ එවමාහංසු – ‘‘ඉමානි ඛො, ආවුසො, සඞ්ඝිකානි චීවරානි භාජියිස්සන්ති, සාදියිස්සසි භාග’’න්ති? ‘‘ආමාවුසො, සාදියිස්සාමී’’ති. තතො චීවරභාගං ගහෙත්වා අඤ්ඤං ආවාසං අගමාසි. තත්ථපි භික්ඛූ චීවරං භාජෙතුකාමා සන්නිපතිංසු. තෙපි එවමාහංසු – ‘‘ඉමානි ඛො, ආවුසො, සඞ්ඝිකානි චීවරානි භාජියිස්සන්ති, සාදියිස්සසි භාග’’න්ති? ‘‘ආමාවුසො, සාදියිස්සාමී’’ති. තතොපි චීවරභාගං ගහෙත්වා අඤ්ඤං ආවාසං අගමාසි. තත්ථපි භික්ඛූ චීවරං භාජෙතුකාමා සන්නිපතිංසු. තෙපි එවමාහංසු – ‘‘ඉමානි ඛො, ආවුසො, සඞ්ඝිකානි චීවරානි භාජියිස්සන්ති, සාදියිස්සසි භාග’’න්ති? ‘‘ආමාවුසො, සාදියිස්සාමී’’ති. තතොපි චීවරභාගං ගහෙත්වා මහන්තං චීවරභණ්ඩිකං ආදාය පුනදෙව සාවත්ථිං පච්චාගඤ්ඡි. භික්ඛූ එවමාහංසු – ‘‘මහාපුඤ්ඤොසි ත්වං, ආවුසො උපනන්ද, බහුං තෙ චීවරං උප්පන්න’’න්ති. ‘‘කුතො මෙ, ආවුසො, පුඤ්ඤං? ඉධාහං, ආවුසො, සාවත්ථියං වස්සංවුට්ඨො අඤ්ඤතරං ගාමකාවාසං අගමාසිං. තත්ථ භික්ඛූ චීවරං භාජෙතුකාමා සන්නිපතිංසු. තෙ මං එවමාහංසු – ‘ඉමානි ඛො, ආවුසො, සඞ්ඝිකානි චීවරානි භාජියිස්සන්ති, සාදියිස්සසි භාග’න්ති? ‘ආමාවුසො, සාදියිස්සාමී’ති. තතො චීවරභාගං ගහෙත්වා අඤ්ඤං ආවාසං අගමාසිං. තත්ථපි භික්ඛූ චීවරං භාජෙතුකාමා සන්නිපතිංසු. තෙපි මං එවමාහංසු – ‘ඉමානි ඛො, ආවුසො, සඞ්ඝිකානි චීවරානි භාජියිස්සන්ති, සාදියිස්සසි භාග’’’න්ති? ‘ආමාවුසො, සාදියිස්සාමී’ති. තතොපි චීවරභාගං ගහෙත්වා අඤ්ඤං ආවාසං අගමාසිං. තත්ථපි භික්ඛූ චීවරං භාජෙතුකාමා සන්නිපතිංසු. තෙපි මං එවමාහංසු – ‘ඉමානි ඛො, ආවුසො, සඞ්ඝිකානි චීවරානි භාජියිස්සන්ති, සාදියිස්සසි භාග’න්ති? ‘ආමාවුසො, සාදියිස්සාමී’ති. තතොපි චීවරභාගං අග්ගහෙසිං. එවං මෙ බහුං චීවරං උප්පන්නන්ති. ‘‘කිං පන ත්වං, ආවුසො උපනන්ද, අඤ්ඤත්‍ර වස්සංවුට්ඨො අඤ්ඤත්‍ර චීවරභාගං සාදියී’’ති? ‘‘එවමාවුසො’’ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ආයස්මා උපනන්දො සක්‍යපුත්තො අඤ්ඤත්‍ර වස්සංවුට්ඨො අඤ්ඤත්‍ර චීවරභාගං සාදියිස්සතී’’ති. භගවතො එතමත්ථං ආරොචෙසුං…පෙ… ‘‘සච්චං කිර ත්වං, උපනන්ද, අඤ්ඤත්‍ර වස්සංවුට්ඨො අඤ්ඤත්‍ර චීවරභාගං සාදියී’’ති? ‘‘සච්චං භගවා’’ති. විගරහි බුද්ධො භගවා…පෙ… කථඤ්හි නාම ත්වං, මොඝපුරිස, අඤ්ඤත්‍ර වස්සංවුට්ඨො අඤ්ඤත්‍ර චීවරභාගං සාදියිස්සසි. නෙතං, මොඝපුරිස, අප්පසන්නානං වා පසාදාය…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි – ‘‘න, භික්ඛවෙ, අඤ්ඤත්‍ර වස්සංවුට්ඨෙන අඤ්ඤත්‍ර චීවරභාගො සාදිතබ්බො. යො සාදියෙය්‍ය, ආපත්ති දුක්කටස්සා’’ති.
තෙන ඛො පන සමයෙන ආයස්මා උපනන්දො සක්‍යපුත්තො එකො ද්වීසු ආවාසෙසු වස්සං වසි – ‘‘එවං මෙ බහුං චීවරං උප්පජ්ජිස්සතී’’ති. අථ ඛො තෙසං භික්ඛූනං එතදහොසි – ‘‘කථං නු ඛො ආයස්මතො උපනන්දස්ස සක්‍යපුත්තස්ස චීවරපටිවීසො දාතබ්බො’’ති? භගවතො එතමත්ථං ආරොචෙසුං. දෙථ, භික්ඛවෙ, මොඝපුරිසස්ස එකාධිප්පායං. ඉධ පන, භික්ඛවෙ, භික්ඛු එකො ද්වීසු ආවාසෙසු වස්සං වසති – ‘‘එවං මෙ බහුං චීවරං උප්පජ්ජිස්සතී’’ති. සචෙ අමුත්‍ර උපඩ්ඪං අමුත්‍ර උපඩ්ඪං වසති, අමුත්‍ර උපඩ්ඪො අමුත්‍ර උපඩ්ඪො චීවරපටිවීසො දාතබ්බො. යත්ථ වා පන බහුතරං වසති, තතො චීවරපටිවීසො දාතබ්බොති.
උපනන්දසක්‍යපුත්තවත්ථු නිට්ඨිතං.