185. චතුමහාපදෙසකථා

305. තෙන ඛො පන සමයෙන භික්ඛූනං කිස්මිඤ්චි කිස්මිඤ්චි ඨානෙ කුක්කුච්චං උප්පජ්ජති – ‘‘කිං නු ඛො භගවතා අනුඤ්ඤාතං, කිං අනනුඤ්ඤාත’’න්ති? භගවතො එතමත්ථං ආරොචෙසුං. ‘‘යං, භික්ඛවෙ, මයා ‘ඉදං න කප්පතී’ති අප්පටික්ඛිත්තං තඤ්චෙ අකප්පියං අනුලොමෙති, කප්පියං පටිබාහති, තං වො න කප්පති. යං, භික්ඛවෙ, මයා ‘ඉදං න කප්පතී’ති අප්පටික්ඛිත්තං තඤ්චෙ කප්පියං අනුලොමෙති, අකප්පියං පටිබාහති, තං වො කප්පති. යං, භික්ඛවෙ, මයා ‘ඉදං කප්පතී’ති අනනුඤ්ඤාතං තඤ්චෙ අකප්පියං අනුලොමෙති, කප්පියං පටිබාහති, තං වො න කප්පති. යං, භික්ඛවෙ, මයා ‘ඉදං කප්පතී’ති අනනුඤ්ඤාතං, තඤ්චෙ කප්පියං අනුලොමෙති, අකප්පියං පටිබාහති, තං වො කප්පතී’’ති.

අථ ඛො භික්ඛූනං එතදහොසි – ‘‘කප්පති නු ඛො යාවකාලිකෙන යාමකාලිකං, න නු ඛො කප්පති? කප්පති නු ඛො යාවකාලිකෙන සත්තාහකාලිකං, න නු ඛො කප්පති? කප්පති නු ඛො යාවකාලිකෙන යාවජීවිකං, න නු ඛො කප්පති? කප්පති නු ඛො යාමකාලිකෙන සත්තාහකාලිකං, න නු ඛො කප්පති? කප්පති නු ඛො යාමකාලිකෙන යාවජීවිකං, න නු ඛො කප්පති? කප්පති නු ඛො සත්තාහකාලිකෙන යාවජීවිකං, න නු ඛො කප්පතී’’ති? භගවතො එතමත්ථං ආරොචෙසුං. ‘‘යාවකාලිකෙන, භික්ඛවෙ, යාමකාලිකං, තදහු පටිග්ගහිතං කාලෙ කප්පති, විකාලෙ න කප්පති. යාවකාලිකෙන, භික්ඛවෙ, සත්තාහකාලිකං, තදහු පටිග්ගහිතං කාලෙ කප්පති, විකාලෙ න කප්පති. යාවකාලිකෙන, භික්ඛවෙ, යාවජීවිකං, තදහු පටිග්ගහිතං කාලෙ කප්පති, විකාලෙ න කප්පති. යාමකාලිකෙන, භික්ඛවෙ, සත්තාහකාලිකං, තදහු පටිග්ගහිතං යාමෙ කප්පති, යාමාතික්කන්තෙ න කප්පති. යාමකාලිකෙන, භික්ඛවෙ, යාවජීවිකං, තදහු පටිග්ගහිතං යාමෙ කප්පති, යාමාතික්කන්තෙ න කප්පති. සත්තාහකාලිකෙන, භික්ඛවෙ, යාවජීවිකං පටිග්ගහිතං, සත්තාහං කප්පති, සත්තාහාතික්කන්තෙ න කප්පතී’’ති.

චතුමහාපදෙසකථා නිට්ඨිතා.

භෙසජ්ජක්ඛන්ධකො ඡට්ඨො.