159. තස්සුද්දානං

රාජා ච මාගධො සොණො, අසීතිසහස්සිස්සරො;

සාගතො ගිජ්ඣකූටස්මිං, බහුං දස්සෙති උත්තරිං.

පබ්බජ්ජාරද්ධභිජ්ජිංසු, වීණං එකපලාසිකං;

නීලා පීතා ලොහිතිකා, මඤ්ජිට්ඨා කණ්හමෙව ච.

මහාරඞ්ගමහානාමා, වද්ධිකා ච පටික්ඛිපි;

ඛල්ලකා පුටපාලි ච, තූලතිත්තිරමෙණ්ඩජා.

විච්ඡිකා මොරචිත්‍රා ච, සීහබ්‍යග්ඝා ච දීපිකා;

අජිනුද්දා මජ්ජාරී ච, කාළලුවකපරික්ඛටා.

ඵලිතුපාහනා ඛිලා, ධොතඛාණුඛටඛටා;

තාලවෙළුතිණං චෙව, මුඤ්ජපබ්බජහින්තාලා.

කමලකම්බලසොවණ්ණා, රූපිකා මණිවෙළුරියා;

ඵලිකා කංසකාචා ච, තිපුසීසඤ්ච තම්බකා.

ගාවී යානං ගිලානො ච, පුරිසායුත්තසිවිකා;

සයනානි මහාචම්මා, ගොචම්මෙහි ච පාපකො.

ගිහීනං චම්මවද්ධෙහි, පවිසන්ති ගිලායනො;

මහාකච්චායනො සොණො, සරෙන අට්ඨකවග්ගිකං.

උපසම්පදං පඤ්චහි, ගුණඞ්ගුණා ධුවසිනා;

චම්මත්ථරණානුඤ්ඤාසි, න තාව ගණනූපගං;

අදාසි මෙ වරෙ පඤ්ච, සොණත්ථෙරස්ස නායකොති.

ඉමම්හි ඛන්ධකෙ වත්ථූනි තෙසට්ඨි.

චම්මක්ඛන්ධකො නිට්ඨිතො.