153. යානාදිපටික්ඛෙපො

253. තෙන ඛො පන සමයෙන ඡබ්බග්ගියා භික්ඛූ යානෙන යායන්ති, ඉත්ථියුත්තෙනපි පුරිසන්තරෙන, පුරිසයුත්තෙනපි ඉත්ථන්තරෙන. මනුස්සා උජ්ඣායන්ති ඛිය්‍යන්ති විපාචෙන්ති – ‘‘සෙය්‍යථාපි ගඞ්ගාමහියායා’’ති. භගවතො එතමත්ථං ආරොචෙසුං. න, භික්ඛවෙ, යානෙන යායිතබ්බං. යො යායෙය්‍ය, ආපත්ති දුක්කටස්සාති. තෙන ඛො පන සමයෙන අඤ්ඤතරො භික්ඛු කොසලෙසු ජනපදෙ සාවත්ථිං ගච්ඡන්තො භගවන්තං දස්සනාය අන්තරාමග්ගෙ ගිලානො හොති. අථ ඛො සො භික්ඛු මග්ගා ඔක්කම්ම අඤ්ඤතරස්මිං රුක්ඛමූලෙ නිසීදි. මනුස්සා තං භික්ඛුං දිස්වා එතදවොචුං – ‘‘කහං, භන්තෙ, අය්‍යො ගමිස්සතී’’ති? ‘‘සාවත්ථිං ඛො අහං, ආවුසො, ගමිස්සාමි භගවන්තං දස්සනායා’’ති. ‘‘එහි, භන්තෙ, ගමිස්සාමා’’ති. ‘‘නාහං, ආවුසො, සක්කොමි, ගිලානොම්හී’’ති. ‘‘එහි, භන්තෙ, යානං අභිරුහා’’ති. ‘‘අලං, ආවුසො, පටික්ඛිත්තං භගවතා යාන’’න්ති කුක්කුච්චායන්තො යානං නාභිරුහි. අථ ඛො සො භික්ඛු සාවත්ථිං ගන්ත්වා භික්ඛූනං එතමත්ථං ආරොචෙසි. භික්ඛූ භගවතො එතමත්ථං ආරොචෙසුං. අනුජානාමි, භික්ඛවෙ, ගිලානස්ස යානන්ති. අථ ඛො භික්ඛූනං එතදහොසි – ‘‘ඉත්ථියුත්තං නු ඛො පුරිසයුත්තං නු ඛො’’ති? භගවතො එතමත්ථං ආරොචෙසුං. අනුජානාමි, භික්ඛවෙ, පුරිසයුත්තං හත්ථවට්ටකන්ති.

තෙන ඛො පන සමයෙන අඤ්ඤතරස්ස භික්ඛුනො යානුග්ඝාතෙන බාළ්හතරං අඵාසු අහොසි. භගවතො එතමත්ථං ආරොචෙසුං. අනුජානාමි, භික්ඛවෙ, සිවිකං පාටඞ්කින්ති.

යානාදිපටික්ඛෙපො නිට්ඨිතො.