150. ඔමුක්කගුණඞ්ගුණූපාහනානුජානනා

247. අථ ඛො භගවා පුබ්බණ්හසමයං නිවාසෙත්වා පත්තචීවරමාදාය රාජගහං පිණ්ඩාය පාවිසි, අඤ්ඤතරෙන භික්ඛුනා පච්ඡාසමණෙන. අථ ඛො සො භික්ඛු ඛඤ්ජමානො භගවන්තං පිට්ඨිතො පිට්ඨිතො අනුබන්ධි. අද්දසා ඛො අඤ්ඤතරො උපාසකො ගුණඞ්ගුණූපාහනා ආරොහිත්වා භගවන්තං දූරතොව ආගච්ඡන්තං; දිස්වා උපාහනා ආරොහිත්වා යෙන භගවා තෙනුපසඞ්කමි; උපසඞ්කමිත්වා භගවන්තං අභිවාදෙත්වා යෙන සො භික්ඛු තෙනුපසඞ්කමි; උපසඞ්කමිත්වා තං භික්ඛුං අභිවාදෙත්වා එතදවොච – ‘‘කිස්ස, භන්තෙ, අය්‍යො ඛඤ්ජතී’’ති? ‘‘පාදා මෙ, ආවුසො, ඵලිතා’’ති [ඵාලිතාති (ක.)]. ‘‘හන්ද, භන්තෙ, උපාහනායො’’ති. ‘‘අලං, ආවුසො, පටික්ඛිත්තා භගවතා ගුණඞ්ගුණූපාහනා’’ති. ‘‘ගණ්හාහෙතා, භික්ඛු, උපාහනායො’’ති. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘අනුජානාමි, භික්ඛවෙ, ඔමුක්කං ගුණඞ්ගුණූපාහනං. න, භික්ඛවෙ, නවා ගුණඞ්ගුණූපාහනා ධාරෙතබ්බා. යො ධාරෙය්‍ය, ආපත්ති දුක්කටස්සා’’ති.

ඔමුක්කගුණඞ්ගුණූපාහනානුජානනා නිට්ඨිතා.