146. තස්සුද්දානං

වස්සංවුට්ඨා කොසලෙසු, අගමුං සත්ථු දස්සනං;

අඵාසුං පසුසංවාසං, අඤ්ඤමඤ්ඤානුලොමතා.

පවාරෙන්තා පණාමඤ්ච [පවාරෙන්තාසනෙ ද්වෙ ච (සී. ස්‍යා.)], කම්මං ගිලානඤාතකා;

රාජා චොරා ච ධුත්තා ච, භික්ඛුපච්චත්ථිකා තථා.

පඤ්ච චතුතයො ද්වෙකො, ආපන්නො වෙමතී සරි;

සබ්බො සඞ්ඝො වෙමතිකො, බහූ සමා ච ථොකිකා.

ආවාසිකා චාතුද්දස, ලිඞ්ගසංවාසකා උභො;

ගන්තබ්බං න නිසින්නාය, ඡන්දදානෙ පවාරණා [ඡන්දදානපවාරණා (ක.)].

සවරෙහි ඛෙපිතා මෙඝො, අන්තරා ච පවාරණා;

න ඉච්ඡන්ති පුරම්හාකං, අට්ඨපිතා ච භික්ඛුනො.

කිම්හි වාති කතමඤ්ච, දිට්ඨෙන සුතසඞ්කාය;

චොදකො චුදිතකො ච, ථුල්ලච්චයං වත්ථු භණ්ඩනං;

පවාරණාසඞ්ගහො ච, අනිස්සරො පවාරයෙති.

ඉමම්හි ඛන්ධකෙ වත්ථූනි ඡචත්තාරීසාති.

පවාරණාක්ඛන්ධකො නිට්ඨිතො.