144. භණ්ඩනකාරකවත්ථු
240. තෙන ඛො පන සමයෙන සම්බහුලා සන්දිට්ඨා සම්භත්තා භික්ඛූ කොසලෙසු ජනපදෙ අඤ්ඤතරස්මිං ආවාසෙ වස්සං උපගච්ඡිංසු. තෙසං සාමන්තා අඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා වස්සං උපගච්ඡිංසු – මයං තෙසං භික්ඛූනං වස්සංවුට්ඨානං පවාරණාය පවාරණං ඨපෙස්සාමාති. අස්සොසුං ඛො තෙ භික්ඛූ – ‘‘අම්හාකං කිර සාමන්තා අඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා වස්සං උපගතා – මයං තෙසං භික්ඛූනං වස්සංවුට්ඨානං පවාරණාය පවාරණං ඨපෙස්සාමා’’ති. කථං නු ඛො අම්හෙහි පටිපජ්ජිතබ්බන්ති? භගවතො එතමත්ථං ආරොචෙසුං.
ඉධ පන, භික්ඛවෙ, සම්බහුලා සන්දිට්ඨා සම්භත්තා භික්ඛූ අඤ්ඤතරස්මිං ආවාසෙ වස්සං උපගච්ඡන්ති. තෙසං සාමන්තා අඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා වස්සං උපගච්ඡන්ති – මයං තෙසං භික්ඛූනං වස්සංවුට්ඨානං පවාරණාය පවාරණං ඨපෙස්සාමාති. අනුජානාමි, භික්ඛවෙ, තෙහි භික්ඛූහි ද්වෙ තයො උපොසථෙ චාතුද්දසිකෙ කාතුං – කථං මයං තෙහි භික්ඛූහි පඨමතරං පවාරෙය්‍යාමාති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තං ආවාසං ආගච්ඡන්ති, තෙහි, භික්ඛවෙ, ආවාසිකෙහි භික්ඛූහි ලහුං ලහුං සන්නිපතිත්වා පවාරෙතබ්බං, පවාරෙත්වා වත්තබ්බා – ‘‘පවාරිතා ඛො මයං, ආවුසො; යථායස්මන්තා මඤ්ඤන්ති තථා කරොන්තූ’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා අසංවිහිතා තං ආවාසං ආගච්ඡන්ති, තෙහි, භික්ඛවෙ, ආවාසිකෙහි භික්ඛූහි ආසනං පඤ්ඤපෙතබ්බං, පාදොදකං පාදපීඨං පාදකථලිකං උපනික්ඛිපිතබ්බං, පච්චුග්ගන්ත්වා පත්තචීවරං පටිග්ගහෙතබ්බං, පානීයෙන පරිපුච්ඡිතබ්බා; තෙසං වික්ඛිත්වා [වික්ඛිපාපෙත්වා (පටිවිසොධකානං මති), ආචික්ඛිත්වා (ක.)] නිස්සීමං ගන්ත්වා පවාරෙතබ්බං, පවාරෙත්වා වත්තබ්බා – ‘‘පවාරිතා ඛො මයං, ආවුසො; යථායස්මන්තා මඤ්ඤන්ති තථා කරොන්තූ’’ති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, ආවාසිකෙන භික්ඛුනා බ්‍යත්තෙන පටිබලෙන ආවාසිකා භික්ඛූ ඤාපෙතබ්බා –
‘‘සුණන්තු මෙ, ආයස්මන්තො [ආයස්මන්තා (ක.)], ආවාසිකා. යදායස්මන්තානං පත්තකල්ලං, ඉදානි උපොසථං කරෙය්‍යාම, පාතිමොක්ඛං උද්දිසෙය්‍යාම, ආගමෙ කාළෙ පවාරෙය්‍යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තෙ භික්ඛූ එවං වදෙය්‍යුං – ‘‘සාධාවුසො, ඉදානෙව නො පවාරෙථා’’ති, තෙ එවමස්සු වචනීයා – ‘‘අනිස්සරා ඛො තුම්හෙ, ආවුසො, අම්හාකං පවාරණාය; න තාව මයං පවාරෙය්‍යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තං කාළං අනුවසෙය්‍යුං, ආවාසිකෙන, භික්ඛවෙ, භික්ඛුනා බ්‍යත්තෙන පටිබලෙන ආවාසිකා භික්ඛූ ඤාපෙතබ්බා –
‘‘සුණන්තු මෙ, ආයස්මන්තො, ආවාසිකා. යදායස්මන්තානං පත්තකල්ලං, ඉදානි උපොසථං කරෙය්‍යාම, පාතිමොක්ඛං උද්දිසෙය්‍යාම, ආගමෙ ජුණ්හෙ පවාරෙය්‍යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තෙ භික්ඛූ එවං වදෙය්‍යුං – ‘‘සාධාවුසො, ඉදානෙව නො පවාරෙය්‍යාථා’’ති, තෙ එවමස්සු වචනීයා – ‘‘අනිස්සරා ඛො තුම්හෙ, ආවුසො, අම්හාකං පවාරණාය, න තාව මයං පවාරෙය්‍යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තම්පි ජුණ්හං අනුවසෙය්‍යුං, තෙහි, භික්ඛවෙ, භික්ඛූහි සබ්බෙහෙව ආගමෙ ජුණ්හෙ කොමුදියා චාතුමාසිනියා අකාමා පවාරෙතබ්බං.
තෙහි චෙ, භික්ඛවෙ, භික්ඛූහි පවාරියමානෙ ගිලානො අගිලානස්ස පවාරණං ඨපෙති, සො එවමස්ස වචනීයො – ‘‘ආයස්මා ඛො ගිලානො. ගිලානො ච අනනුයොගක්ඛමො වුත්තො භගවතා. ආගමෙහි, ආවුසො, යාව අරොගො හොසි. අරොගො ආකඞ්ඛමානො චොදෙස්සසී’’ති. එවඤ්චෙ වුච්චමානො චොදෙති, අනාදරියෙ පාචිත්තියං. තෙහි චෙ, භික්ඛවෙ, භික්ඛූහි පවාරියමානෙ අගිලානො ගිලානස්ස පවාරණං ඨපෙති, සො එවමස්ස වචනීයො – ‘‘අයං ඛො, ආවුසො, භික්ඛු ගිලානො. ගිලානො ච අනනුයොගක්ඛමො වුත්තො භගවතා. ආගමෙහි, ආවුසො, යාවායං භික්ඛු අරොගො හොති. අරොගං ආකඞ්ඛමානො චොදෙස්සසී’’ති. එවඤ්චෙ වුච්චමානො චොදෙති, අනාදරියෙ පාචිත්තියං. තෙහි චෙ, භික්ඛවෙ, භික්ඛූහි පවාරියමානෙ ගිලානො ගිලානස්ස පවාරණං ඨපෙති, සො එවමස්ස වචනීයො – ‘‘ආයස්මන්තා ඛො ගිලානා. ගිලානො ච අනනුයොගක්ඛමො වුත්තො භගවතා. ආගමෙහි, ආවුසො, යාව අරොගා හොථ. අරොගො අරොගං ආකඞ්ඛමානො චොදෙස්සසී’’ති [යාව අරොගො හොති, අරොගං ආකඞ්ඛමානො චොදෙස්සසීති (ක.)]. එවඤ්චෙ වුච්චමානො චොදෙති, අනාදරියෙ පාචිත්තියං. තෙහි චෙ, භික්ඛවෙ, භික්ඛූහි පවාරියමානෙ අගිලානො අගිලානස්ස පවාරණං ඨපෙති, උභො සඞ්ඝෙන සමනුයුඤ්ජිත්වා සමනුගාහිත්වා [සමනුභාසිත්වා (සී.)] යථාධම්මං කාරාපෙත්වා සඞ්ඝෙන පවාරෙතබ්බන්ති.
භණ්ඩනකාරකවත්ථු නිට්ඨිතං.