136. නානාසංවාසකාදීහි පවාරණා

230. ඉධ පන, භික්ඛවෙ, ආගන්තුකා භික්ඛූ පස්සන්ති ආවාසිකෙ භික්ඛූ නානාසංවාසකෙ. තෙ සමානසංවාසකදිට්ඨිං පටිලභන්ති, සමානසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. අනාපත්ති. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා පාටෙක්කං පවාරෙන්ති. අනාපත්ති.

ඉධ පන, භික්ඛවෙ, ආගන්තුකා භික්ඛූ පස්සන්ති ආවාසිකෙ භික්ඛූ සමානසංවාසකෙ. තෙ නානාසංවාසකදිට්ඨිං පටිලභන්ති, නානාසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා පාටෙක්කං පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා එකතො පවාරෙන්ති. අනාපත්ති.

ඉධ පන, භික්ඛවෙ, ආවාසිකා භික්ඛූ පස්සන්ති ආගන්තුකෙ භික්ඛූ නානාසංවාසකෙ. තෙ සමානසංවාසකදිට්ඨිං පටිලභන්ති, සමානසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. අනාපත්ති. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා පාටෙක්කං පවාරෙන්ති. අනාපත්ති.

ඉධ පන, භික්ඛවෙ, ආවාසිකා භික්ඛූ පස්සන්ති ආගන්තුකෙ භික්ඛූ සමානසංවාසකෙ. තෙ නානාසංවාසකදිට්ඨිං පටිලභන්ති, නානාසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා පාටෙක්කං පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා එකතො පවාරෙන්ති. අනාපත්ති.

නානාසංවාසකාදීහි පවාරණා නිට්ඨිතා.