121. පවාරණාභෙදා

212. අථ ඛො භික්ඛූනං එතදහොසි – ‘‘කති නු ඛො පවාරණා’’ති? භගවතො එතමත්ථං ආරොචෙසුං. ද්වෙමා, භික්ඛවෙ, පවාරණා – චාතුද්දසිකා ච පන්නරසිකා ච. ඉමා ඛො, භික්ඛවෙ, ද්වෙ පවාරණාති.

අථ ඛො භික්ඛූනං එතදහොසි – ‘‘කති නු ඛො පවාරණකම්මානී’’ති? [පවාරණාකම්මානීති (ස්‍යා.)] භගවතො එතමත්ථං ආරොචෙසුං. චත්තාරිමානි, භික්ඛවෙ, පවාරණකම්මානි – අධම්මෙන වග්ගං පවාරණකම්මං, අධම්මෙන සමග්ගං පවාරණකම්මං, ධම්මෙන වග්ගං පවාරණකම්මං, ධම්මෙන සමග්ගං පවාරණකම්මං. තත්‍ර, භික්ඛවෙ, යදිදං අධම්මෙන වග්ගං පවාරණකම්මං, න, භික්ඛවෙ, එවරූපං පවාරණකම්මං කාතබ්බං; න ච මයා එවරූපං පවාරණකම්මං අනුඤ්ඤාතං. තත්‍ර, භික්ඛවෙ, යදිදං අධම්මෙන සමග්ගං පවාරණකම්මං, න, භික්ඛවෙ, එවරූපං පවාරණකම්මං කාතබ්බං; න ච මයා එවරූපං පවාරණකම්මං අනුඤ්ඤාතං. තත්‍ර, භික්ඛවෙ, යදිදං ධම්මෙන වග්ගං පවාරණකම්මං, න, භික්ඛවෙ, එවරූපං පවාරණකම්මං කාතබ්බං; න ච මයා එවරූපං පවාරණකම්මං අනුඤ්ඤාතං. තත්‍ර, භික්ඛවෙ, යදිදං ධම්මෙන සමග්ගං පවාරණකම්මං, එවරූපං, භික්ඛවෙ, පවාරණකම්මං කාතබ්බං; එවරූපඤ්ච මයා පවාරණකම්මං අනුඤ්ඤාතං. තස්මාතිහ, භික්ඛවෙ, එවරූපං පවාරණකම්මං කරිස්සාම යදිදං ධම්මෙන සමග්ගන්ති, එවඤ්හි වො, භික්ඛවෙ, සික්ඛිතබ්බන්ති.

පවාරණාභෙදා නිට්ඨිතා.