97. වෙමතිකපන්නරසකං

174. ඉධ පන, භික්ඛවෙ, අඤ්ඤතරස්මිං ආවාසෙ තදහුපොසථෙ සම්බහුලා ආවාසිකා භික්ඛූ සන්නිපතන්ති චත්තාරො වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ, කප්පති නු ඛො අම්හාකං උපොසථො කාතුං න නු ඛො කප්පතීති, වෙමතිකා උපොසථං කරොන්ති, පාතිමොක්ඛං උද්දිසන්ති. තෙහි උද්දිස්සමානෙ පාතිමොක්ඛෙ, අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පාතිමොක්ඛං උද්දිසිතබ්බං. උද්දෙසකානං ආපත්ති දුක්කටස්ස.

ඉධ පන, භික්ඛවෙ, අඤ්ඤතරස්මිං ආවාසෙ තදහුපොසථෙ සම්බහුලා ආවාසිකා භික්ඛූ සන්නිපතන්ති චත්තාරො වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති, තෙ ‘‘කප්පති නු ඛො අම්හාකං උපොසථො කාතුං, න නු ඛො කප්පතී’’ති, වෙමතිකා උපොසථං කරොන්ති, පාතිමොක්ඛං උද්දිසන්ති. තෙහි උද්දිස්සමානෙ පාතිමොක්ඛෙ, අථඤ්ඤෙ ආවාසිකා භික්ඛූ ආගච්ඡන්ති සමසමා. උද්දිට්ඨං සුඋද්දිට්ඨං, අවසෙසං සොතබ්බං. උද්දෙසකානං ආපත්ති දුක්කටස්ස.

ඉධ පන, භික්ඛවෙ, අඤ්ඤතරස්මිං ආවාසෙ තදහුපොසථෙ සම්බහුලා ආවාසිකා භික්ඛූ සන්නිපතන්ති චත්තාරො වා අතිරෙකා වා. තෙ ජානන්ති අත්ථඤ්ඤෙ ආවාසිකා භික්ඛූ අනාගතාති, තෙ කප්පති නු ඛො අම්හාකං උපොසථො කාතුං, න නු ඛො කප්පතීති, වෙමතිකා උපොසථං කරොන්ති, පාතිමොක්ඛං උද්දිසන්ති. තෙහි උද්දිස්සමානෙ පාතිමොක්ඛෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. උද්දිට්ඨං සුඋද්දිට්ඨං, අවසෙසං සොතබ්බං. උද්දෙසකානං ආපත්ති දුක්කටස්ස.

ඉධ පන, භික්ඛවෙ, අඤ්ඤතරස්මිං ආවාසෙ තදහුපොසථෙ සම්බහුලා ආවාසිකා භික්ඛූ සන්නිපතන්ති චත්තාරො වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ, ‘‘කප්පති නු ඛො අම්හාකං උපොසථො කාතුං න නු ඛො කප්පතී’’ති, වෙමතිකා උපොසථං කරොන්ති, පාතිමොක්ඛං උද්දිසන්ති. තෙහි උද්දිට්ඨමත්තෙ පාතිමොක්ඛෙ,…පෙ… අවුට්ඨිතාය පරිසාය…පෙ… එකච්චාය වුට්ඨිතාය පරිසාය…පෙ… සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා…පෙ… සමසමා…පෙ… ථොකතරා. උද්දිට්ඨං සුඋද්දිට්ඨං, තෙසං සන්තිකෙ පාරිසුද්ධි ආරොචෙතබ්බා. උද්දෙසකානං ආපත්ති දුක්කටස්ස.

වෙමතිකපන්නරසකං නිට්ඨිතං.