105. වජ්ජනීයපුග්ගලසන්දස්සනා
183. න, භික්ඛවෙ, භික්ඛුනියා නිසින්නපරිසාය පාතිමොක්ඛං උද්දිසිතබ්බං. යො උද්දිසෙය්‍ය, ආපත්ති දුක්කටස්ස. න සික්ඛමානාය…පෙ… න සාමණෙරස්ස …පෙ… න සාමණෙරියා…පෙ… න සික්ඛාපච්චක්ඛාතකස්ස…පෙ… න අන්තිමවත්ථුං අජ්ඣාපන්නකස්ස නිසින්නපරිසාය පාතිමොක්ඛං උද්දිසිතබ්බං. යො උද්දිසෙය්‍ය, ආපත්ති දුක්කටස්ස.
න ආපත්තියා අදස්සනෙ උක්ඛිත්තකස්ස නිසින්නපරිසාය පාතිමොක්ඛං උද්දිසිතබ්බං. යො උද්දිසෙය්‍ය, යථාධම්මො කාරෙතබ්බො. න ආපත්තියා අප්පටිකම්මෙ උක්ඛිත්තකස්ස නිසින්නපරිසාය…පෙ… න පාපිකාය දිට්ඨියා අප්පටිනිස්සග්ගෙ උක්ඛිත්තකස්ස නිසින්නපරිසාය පාතිමොක්ඛං උද්දිසිතබ්බං. යො උද්දිසෙය්‍ය, යථාධම්මො කාරෙතබ්බො.
න පණ්ඩකස්ස නිසින්නපරිසාය පාතිමොක්ඛං උද්දිසිතබ්බං. යො උද්දිසෙය්‍ය, ආපත්ති දුක්කටස්ස. න ථෙය්‍යසංවාසකස්ස…පෙ… න තිත්ථියපක්කන්තකස්ස…පෙ… න තිරච්ඡානගතස්ස…පෙ… න මාතුඝාතකස්ස…පෙ… න පිතුඝාතකස්ස…පෙ… න අරහන්තඝාතකස්ස…පෙ… න භික්ඛුනිදූසකස්ස…පෙ… න සඞ්ඝභෙදකස්ස…පෙ… න ලොහිතුප්පාදකස්ස…පෙ… න උභතොබ්‍යඤ්ජනකස්ස නිසින්නපරිසාය පාතිමොක්ඛං උද්දිසිතබ්බං. යො උද්දිසෙය්‍ය, ආපත්ති දුක්කටස්ස.
න, භික්ඛවෙ, පාරිවාසිකපාරිසුද්ධිදානෙන උපොසථො කාතබ්බො, අඤ්ඤත්‍ර අවුට්ඨිතාය පරිසාය. න ච, භික්ඛවෙ, අනුපොසථෙ උපොසථො කාතබ්බො, අඤ්ඤත්‍ර සඞ්ඝසාමග්ගියාති.
වජ්ජනීයපුග්ගලසන්දස්සනා නිට්ඨිතා.
තතියභාණවාරො නිට්ඨිතො.
උපොසථක්ඛන්ධකො දුතියො.