44. අනාපුච්ඡාවරණවත්ථු

108. තෙන ඛො පන සමයෙන ඡබ්බග්ගියා භික්ඛූ උපජ්ඣායෙ අනාපුච්ඡා සාමණෙරානං ආවරණං කරොන්ති. උපජ්ඣායා ගවෙසන්ති – කථං [කහං (ක.)] නු ඛො අම්හාකං සාමණෙරා න දිස්සන්තීති. භික්ඛූ එවමාහංසු – ‘‘ඡබ්බග්ගියෙහි, ආවුසො, භික්ඛූහි ආවරණං කත’’න්ති. උපජ්ඣායා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ අම්හෙ අනාපුච්ඡා අම්හාකං සාමණෙරානං ආවරණං කරිස්සන්තී’’ති. භගවතො එතමත්ථං ආරොචෙසුං. න, භික්ඛවෙ, උපජ්ඣායෙ අනාපුච්ඡා ආවරණං කාතබ්බං. යො කරෙය්‍ය, ආපත්ති දුක්කටස්සාති.

අනාපුච්ඡාවරණවත්ථු නිට්ඨිතං.