10. දුතියමාරකථා

35. අථ ඛො භගවා වස්සංවුට්ඨො [වස්සංවුත්ථො (සී.)] භික්ඛූ ආමන්තෙසි [සං. නි. 1.155] – ‘‘මය්හං ඛො, භික්ඛවෙ, යොනිසො මනසිකාරා යොනිසො සම්මප්පධානා අනුත්තරා විමුත්ති අනුප්පත්තා, අනුත්තරා විමුත්ති සච්ඡිකතා. තුම්හෙපි, භික්ඛවෙ, යොනිසො මනසිකාරා යොනිසො සම්මප්පධානා අනුත්තරං විමුත්තිං අනුපාපුණාථ, අනුත්තරං විමුත්තිං සච්ඡිකරොථා’’ති. අථ ඛො මාරො පාපිමා යෙන භගවා තෙනුපසඞ්කමි, උපසඞ්කමිත්වා භගවන්තං ගාථාය අජ්ඣභාසි –

‘‘බද්ධොසි මාරපාසෙහි, යෙ දිබ්බා යෙ ච මානුසා;

මහාබන්ධනබද්ධොසි [මාරබන්ධනබද්ධොසි (සී. ස්‍යා.)], න මෙ සමණ මොක්ඛසී’’ති.

‘‘මුත්තාහං මාරපාසෙහි, යෙ දිබ්බා යෙ ච මානුසා;

මහාබන්ධනමුත්තොම්හි [මාරබන්ධනමුත්තොම්හි (සී. ස්‍යා.)], නිහතො ත්වමසි අන්තකා’’ති.

අථ ඛො මාරො පාපිමා – ජානාති මං භගවා, ජානාති මං සුගතොති දුක්ඛී දුම්මනො

තත්ථෙවන්තරධායි.

දුතියමාරකථා නිට්ඨිතා.