7. ආරඤ්ඤිකවත්තකථා

367. තෙන ඛො පන සමයෙන සම්බහුලා භික්ඛූ අරඤ්ඤෙ විහරන්ති. තෙ නෙව පානීයං උපට්ඨාපෙන්ති, න පරිභොජනීයං උපට්ඨාපෙන්ති, න අග්ගිං උපට්ඨාපෙන්ති, න අරණිසහිතං උපට්ඨාපෙන්ති, න නක්ඛත්තපදානි ජානන්ති, න දිසාභාගං ජානන්ති. චොරා තත්ථ ගන්ත්වා තෙ භික්ඛූ එතදවොචුං – ‘‘අත්ථි, භන්තෙ, පානීය’’න්ති? ‘‘නත්ථාවුසො’’ති. ‘‘අත්ථි, භන්තෙ, පරිභොජනීය’’න්ති? ‘‘නත්ථාවුසො’’ති. ‘‘අත්ථි, භන්තෙ, අග්ගී’’ති? ‘‘නත්ථාවුසො’’ති. ‘‘අත්ථි, භන්තෙ, අරණිසහිත’’න්ති? ‘‘නත්ථාවුසො’’ති. ( ) [(අත්ථි භන්තෙ නක්ඛත්තපදානීති, න ජානාම ආවුසොති, අත්ථි භන්තෙ දිසාභාගන්ති, න ජානාම ආවුසොති.) සී. විමතිටීකාය පන සමෙති] ‘‘කෙනජ්ජ, භන්තෙ, යුත්ත’’න්ති? ‘‘න ඛො මයං, ආවුසො, ජානාමා’’ති. ‘‘කතමායං, භන්තෙ, දිසා’’ති? ‘‘න ඛො මයං, ආවුසො, ජානාමා’’ති. අථ ඛො තෙ චොරා – ‘නෙවිමෙසං පානීයං අත්ථි, න පරිභොජනීයං අත්ථි, න අග්ගි අත්ථි, න අරණිසහිතං අත්ථි, න නක්ඛත්තපදානි ජානන්ති, න දිසාභාගං ජානන්ති; චොරා ඉමෙ, නයිමෙ භික්ඛූ’ති – ආකොටෙත්වා පක්කමිංසු. අථ ඛො තෙ භික්ඛූ භික්ඛූනං එතමත්ථං ආරොචෙසුං. භික්ඛූ භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි –

368. ‘‘තෙන හි, භික්ඛවෙ, ආරඤ්ඤිකානං භික්ඛූනං වත්තං පඤ්ඤපෙස්සාමි යථා ආරඤ්ඤිකෙහි භික්ඛූහි සම්මා වත්තිතබ්බං. ආරඤ්ඤිකෙන, භික්ඛවෙ, භික්ඛුනා කාලස්සෙව උට්ඨාය පත්තං ථවිකාය පක්ඛිපිත්වා අංසෙ ආලග්ගෙත්වා චීවරං ඛන්ධෙ කරිත්වා උපාහනා ආරොහිත්වා දාරුභණ්ඩං මත්තිකාභණ්ඩං පටිසාමෙත්වා ද්වාරවාතපානං ථකෙත්වා සෙනාසනා ඔතරිතබ්බං – ඉදානි ගාමං පවිසිස්සාමීති. උපාහනා ඔමුඤ්චිත්වා නීචං කත්වා පප්ඵොටෙත්වා ථවිකාය පක්ඛිපිත්වා අංසෙ ආලග්ගෙත්වා තිමණ්ඩලං පටිච්ඡාදෙන්තෙන පරිමණ්ඩලං නිවාසෙත්වා කායබන්ධනං බන්ධිත්වා සගුණං කත්වා සඞ්ඝාටියො පාරුපිත්වා ගණ්ඨිකං පටිමුඤ්චිත්වා ධොවිත්වා පත්තං ගහෙත්වා සාධුකං අතරමානෙන ගාමො පවිසිතබ්බො. සුප්පටිච්ඡන්නෙන අන්තරඝරෙ ගන්තබ්බං…පෙ… න ඛම්භකතෙන අන්තරඝරෙ ගන්තබ්බං. න ඔගුණ්ඨිතෙන අන්තරඝරෙ ගන්තබ්බං. න උක්කුටිකාය අන්තරඝරෙ ගන්තබ්බං.

‘‘නිවෙසනං පවිසන්තෙන සල්ලක්ඛෙතබ්බං – ‘ඉමිනා පවිසිස්සාමි, ඉමිනා නික්ඛමිස්සාමී’ති. නාතිසහසා පවිසිතබ්බං. නාතිසහසා නික්ඛමිතබ්බං. නාතිදූරෙ ඨාතබ්බං. නාච්චාසන්නෙ ඨාතබ්බං. නාතිචිරං ඨාතබ්බං. නාතිලහුං නිවත්තිතබ්බං. ඨිතකෙන සල්ලක්ඛෙතබ්බං – ‘භික්ඛං දාතුකාමා වා අදාතුකාමා වා’ති. සචෙ කම්මං වා නික්ඛිපති, ආසනා වා වුට්ඨාති, කටච්ඡුං වා පරාමසති, භාජනං වා පරාමසති, ඨපෙති වා – දාතුකාමස්සාති ඨාතබ්බං. භික්ඛාය දිය්‍යමානාය වාමෙන හත්ථෙන සඞ්ඝාටිං උච්චාරෙත්වා දක්ඛිණෙන හත්ථෙන පත්තං පණාමෙත්වා උභොහි හත්ථෙහි පත්තං පටිග්ගහෙත්වා භික්ඛා පටිග්ගහෙතබ්බා. න ච භික්ඛාදායිකාය මුඛං උල්ලොකෙතබ්බං. සල්ලක්ඛෙතබ්බං – ‘සූපං දාතුකාමා වා අදාතුකාමා වා’ති. සචෙ කටච්ඡු වා පරාමසති, භාජනං වා පරාමසති, ඨපෙති වා – දාතුකාමස්සාති ඨාතබ්බං. භික්ඛාය දින්නාය සඞ්ඝාටියා පත්තං පටිච්ඡාදෙත්වා සාධුකං අතරමානෙන නිවත්තිතබ්බං.

‘‘සුප්පටිච්ඡන්නෙන අන්තරඝරෙ ගන්තබ්බං…පෙ… න උක්කුටිකාය අන්තරඝරෙ ගන්තබ්බං. ගාමතො නික්ඛමිත්වා පත්තං ථවිකාය පක්ඛිපිත්වා අංසෙ ආලග්ගෙත්වා චීවරං සඞ්ඝරිත්වා සීසෙ කරිත්වා උපාහනා ආරොහිත්වා ගන්තබ්බං.

‘‘ආරඤ්ඤිකෙන, භික්ඛවෙ, භික්ඛුනා පානීයං උපට්ඨාපෙතබ්බං, පරිභොජනීයං උපට්ඨාපෙතබ්බං, අග්ගි උපට්ඨාපෙතබ්බො, අරණිසහිතං උපට්ඨාපෙතබ්බං, කත්තරදණ්ඩො උපට්ඨාපෙතබ්බො, නක්ඛත්තපදානි උග්ගහෙතබ්බානි – සකලානි වා එකදෙසානි වා, දිසාකුසලෙන භවිතබ්බං. ඉදං ඛො, භික්ඛවෙ, ආරඤ්ඤිකානං භික්ඛූනං වත්තං යථා ආරඤ්ඤිකෙහි භික්ඛූහි සම්මා වත්තිතබ්බ’’න්ති.