2. ආවාසිකවත්තකථා

358. තෙන ඛො පන සමයෙන ආවාසිකා භික්ඛූ ආගන්තුකෙ භික්ඛූ දිස්වා නෙව ආසනං පඤ්ඤපෙන්ති, න පාදොදකං පාදපීඨං පාදකථලිකං උපනික්ඛිපන්ති, න පච්චුග්ගන්ත්වා පත්තචීවරං පටිග්ගණ්හන්ති, න පානීයෙන පුච්ඡන්ති [න පානීයෙන පුච්ඡන්ති, න පරිභොජනීයෙන පුච්ඡන්ති (ස්‍යා. කං.)], න වුඩ්ඪතරෙපි ආගන්තුකෙ භික්ඛූ අභිවාදෙන්ති, න සෙනාසනං පඤ්ඤපෙන්ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ආවාසිකා භික්ඛූ ආගන්තුකෙ භික්ඛූ දිස්වා නෙව ආසනං පඤ්ඤපෙස්සන්ති, න පාදොදකං පාදපීඨං පාදකථලිකං උපනික්ඛිපිස්සන්ති, න පච්චුග්ගන්ත්වා පත්තචීවරං පටිග්ගහිස්සන්ති, න පානීයෙන පුච්ඡිස්සන්ති, වුඩ්ඪතරෙපි ආගන්තුකෙ භික්ඛූ න අභිවාදෙස්සන්ති, න සෙනාසනං පඤ්ඤපෙස්සන්තී’’ති! අථ ඛො තෙ භික්ඛූ භගවතො එතමත්ථං ආරොචෙසුං…පෙ… සච්චං කිරං, භික්ඛවෙ…පෙ… සච්චං භගවාති…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි –

359. ‘‘තෙන හි, භික්ඛවෙ, ආවාසිකානං භික්ඛූනං වත්තං පඤ්ඤපෙස්සාමි යථා ආවාසිකෙහි භික්ඛූහි සම්මා වත්තිතබ්බං. ආවාසිකෙන, භික්ඛවෙ, භික්ඛුනා ආගන්තුකං භික්ඛුං වුඩ්ඪතරං දිස්වා ආසනං පඤ්ඤපෙතබ්බං, පාදොදකං පාදපීඨං පාදකථලිකං උපනික්ඛිපිතබ්බං, පච්චුග්ගන්ත්වා පත්තචීවරං පටිග්ගහෙතබ්බං, පානීයෙන පුච්ඡිතබ්බො [පානීයෙන පුච්ඡිතබ්බො, පරිභොජනීයෙන පුච්ඡිතබ්බො (ස්‍යා.)]. සචෙ උස්සහති, උපාහනා පුඤ්ඡිතබ්බා. උපාහනා පුඤ්ඡන්තෙන පඨමං සුක්ඛෙන චොළකෙන පුඤ්ඡිතබ්බා, පච්ඡා අල්ලෙන. උපාහනාපුඤ්ඡනචොළකං ධොවිත්වා [ධොවිත්වා පීළෙත්වා (ස්‍යා.)] එකමන්තං විස්සජ්ජෙතබ්බං.

‘‘ආගන්තුකො භික්ඛු වුඩ්ඪතරො අභිවාදෙතබ්බො. සෙනාසනං පඤ්ඤපෙතබ්බං – ‘එතං තෙ සෙනාසනං පාපුණාතී’ති. අජ්ඣාවුට්ඨං වා අනජ්ඣාවුට්ඨං වා ආචික්ඛිතබ්බං. ගොචරො ආචික්ඛිතබ්බො. අගොචරො ආචික්ඛිතබ්බො. සෙක්ඛසම්මතානි කුලානි ආචික්ඛිතබ්බානි. වච්චට්ඨානං ආචික්ඛිතබ්බං. පස්සාවට්ඨානං ආචික්ඛිතබ්බං. පානීයං ආචික්ඛිතබ්බං. පරිභොජනීයං ආචික්ඛිතබ්බං. කත්තරදණ්ඩො ආචික්ඛිතබ්බො. සඞ්ඝස්ස කතිකසණ්ඨානං ආචික්ඛිතබ්බං – ‘ඉමං කාලං පවිසිතබ්බං, ඉමං කාලං නික්ඛමිතබ්බ’න්ති.

‘‘සචෙ නවකො හොති, නිසින්නකෙනෙව ආචික්ඛිතබ්බං – ‘අත්‍ර පත්තං නික්ඛිපාහි, අත්‍ර චීවරං නික්ඛිපාහි, ඉදං ආසනං නිසීදාහී’ති. පානීයං ආචික්ඛිතබ්බං. පරිභොජනීයං ආචික්ඛිතබ්බං. උපාහනාපුඤ්ඡනචොළකං ආචික්ඛිතබ්බං. ආගන්තුකො භික්ඛු නවකො අභිවාදාපෙතබ්බො. සෙනාසනං ආචික්ඛිතබ්බං – ‘එතං තෙ සෙනාසනං පාපුණාතී’ති. අජ්ඣාවුට්ඨං වා අනජ්ඣාවුට්ඨං වා ආචික්ඛිතබ්බං. ගොචරො ආචික්ඛිතබ්බො. අගොචරො ආචික්ඛිතබ්බො. සෙක්ඛසම්මතානි කුලානි ආචික්ඛිතබ්බානි. වච්චට්ඨානං ආචික්ඛිතබ්බං. පස්සාවට්ඨානං ආචික්ඛිතබ්බං. පානීයං ආචික්ඛිතබ්බං. පරිභොජනීයං ආචික්ඛිතබ්බං. කත්තරදණ්ඩො ආචික්ඛිතබ්බො. සඞ්ඝස්ස කතිකසණ්ඨානං ආචික්ඛිතබ්බං – ‘ඉමං කාලං පවිසිතබ්බං, ඉමං කාලං නික්ඛමිතබ්බ’න්ති. ඉදං ඛො, භික්ඛවෙ, ආවාසිකානං භික්ඛූනං වත්තං යථා ආවාසිකෙහි භික්ඛූහි සම්මා වත්තිතබ්බ’’න්ති.